“Abram ug Sarai,” Mga Istorya sa Daang Tugon (2021)
“Abram ug Sarai,” Mga Istorya sa Daang Tugon
Genesis 11–15; 17; Abraham 1–2
Abram ug Sarai
Usa ka saad sa pagpanalangin sa tawhanong pamilya
Mipuyo si Abram sa siyudad sa Ur. Ang daotang mga pari didto gusto nga mosakripisyo kaniya ngadto sa ilang mga dios-dios. Nag-ampo si Abram, ug ang Ginoo miluwas kaniya.
Dayon ang Ginoo misugo ni Abram ug sa iyang asawa nga si Sarai sa pagbiya sa Ur ug mobiyahe ngadto sa usa ka layo nga yuta. Misaad Siya nga panalanginan sila sa ilang biyahe.
Misalig sa Ginoo si Abram ug Sarai ug mibiya sa Ur. Apan mibati sila og kasubo tungod kay sila dili makabaton og mga anak. Ang Ginoo mihupay kanila. Misaad Siya nga sila makabaton og usa ka anak.
Genesis 11:30–31; 15:1–6; 17:2–16; Abraham 2:6–9
Nag-ampo si Abram ngadto sa Ginoo aron makakat-on pa og daghan mahitungod Kaniya. Ang Ginoo mibisita ni Abram ug mitawag sa Iyang Kaugalingon og Jehova [Ginoo]. Ang Ginoo mihimo og pakigsaad uban kang Abram. Misaad Siya nga si Abram makabaton sa pagkapari. Misaad usab Siya nga pinaagi sa pamilya ni Abram, ang tanang mga pamilya ibabaw sa yuta mapanalanginan.
Samtang si Abram ug Sarai mibiyahe, sila kinahanglan nga mangita og pagkaon. Misulay sila sa pagpuyo didto sa usa ka yuta nga gitawag og Canaan. Walay pagkaon didto, busa kinahanglan silang moadto sa Ehipto. Apan ang pagpuyo sa Ehipto makuyaw alang kanila.
Genesis 12:10–20; Abraham 2:21–25
Mibiya si Abram ug Sarai sa Ehipto ug mibalik sa pagpuyo sa Canaan. Nagdala sila og pagkaon ug mga hayop gikan sa Ehipto uban kanila. Ang Canaan kabahin sa yuta nga gisaad sa Ginoo kanila.
Genesis 13:1–4, 12; Abraham 2:19
Gituman usab sa Ginoo ang Iyang saad nga si Abram makadawat sa pagkapari. Usa ka adlaw niana si Abram ug Sarai nakahimamat og matarong nga hari nga ginganlan og Melchizedek. Mibayad og ikapulo si Abram ngadto kaniya.
Nadawat ni Abram ang pagkapari gikan ni Melchizedek. Kini mao ang samang pagkapari nga nadawat nila ni propetang Adan ug Noe.
Hubad ni Joseph Smith, Genesis 14:36–40; Abraham 1:2–4; Doktrina ug mga Pakigsaad 84:14
Malipayon si Abram ug Sarai sa Canaan, apan sa gihapon sila naguol tungod kay sila walay anak. Kinahanglan silang mosalig sa saad sa Ginoo nga usa ka adlaw niana ang ilang pamilya modaghan ug mopanalangin sa tibuok yuta.