Mataupu 24
Ua Faatu mai le Oti le Afafine o Iairo
Na fai atu Iairo o lona afafine e 12 tausaga ua ma’i tigaina. Sa ia aioi atu ia Iesu e sau e faamanuia lona afafine. Sa talitonu o ia e mafai e Iesu ona faamalolo ia te ia.
Sa amata ona mulimuli atu Iesu ia Iairo, peitai sa tu o Ia e faamalolo se fafine. Ao talanoa atu o Ia i le fafine, na sau se tagata ma ta’u atu ia Iairo ua tuai—ua oti lona afafine.
Sa lagona e Iesu upu na fai mai. Na Ia fai atu ia Iairo e aua le fefe ae ia talitonu ia te Ia.
Ona o lea o Iesu ma Iairo i le fale o Iairo. Sa tumu le fale i tagata o loo fetagisi ona o le oti o le teineitiiti.
Na ta’u atu e Iesu ia i latou e le o oti le teineitiiti ae o loo moe. Sa taliē tagata ia te Ia. Sa latou mautinoa ua oti le teineitiiti.
Sa fai atu le Faaola i tagata uma e o ese mai le fale ae tuu lava na o i latou ma Ona soo, Iairo, ma le toalua o Iairo. Sa latou o atu i le potu o loo taoto ai le teineitiiti.
Sa tago atu Iesu i le lima o le teineitiiti. Sa Ia fai atu ia te ia e nofo i luga. Sa tu i luga le teineitiiti ma savali. Sa ofo ona matua. Na fai atu Iesu e aua nei ta’uina i nisi le mea na tupu. Ona Ia fai atu lea i matua o le teineitiiti e aveane i ai sana mea e ‘ai.