Librarya
Pagpahinungod

“Pagpahinungod,” Mga Hilisgotan ug mga Pangutana (2023)

batan-ong magtiayon nga nagtuon sa mga kasulatan

Giya sa Pagtuon sa Ebanghelyo

Pagpahinungod

Paghalad sa usa ka butang alang sa balaan nga katuyoan

Nakasulay na ba kamo nga hilabihan ang inyong pagpangga sa usa ka tawo nga buhaton ninyo bisan unsa alang nila? Ang paghalad sa inyong kaugalingon niana nga tawo nagkinahanglan og panahon ug kamapadayonon, apan mopalawom usab kini sa inyong relasyon sa usag usa.

Kini nga matang sa boluntaryo nga paghalad mopahinumdom nato kon unsay ipasabot sa pagpahinungod sa atong kaugalingon ngadto sa Ginoo. Pinaagi sa pagpahinungod, atong ihalad ang atong kaugalingon ngadto sa Dios tungod kay kita nahigugma Kaniya. Ug kon buhaton nato kini, atong gipalig-on ang atong relasyon ngadto sa Langitnong Amahan ug ni Jesukristo.

Unsa ang Pagpahinungod?

Ang pagpahinungod mao ang paggahin sa usa ka butang isip balaan alang sa buhat sa Ginoo. Ang mga Santos sa Ulahing mga Adlaw boluntaryo nga naghalad sa ilang panahon, mga talento, ug kapanguhaan sa pag-establisar sa gingharian sa Dios. Sama sa gitudlo ni Elder David A. Bednar, ang pagpahinungod “dinasig gikan sa gugmang putli ug magbunga og dugang tinguha sa pagserbisyo.” Diha sa templo, ang mga miyembro sa Simbahan nakigsaad nga mosunod sa balaod sa pagpahinungod. Ang labing taas nga matang sa pagpahinungod mao ang paghatag sa tanan nga anaa nato karon ug sa tanan nga kita mamahimo sa pagtukod sa gingharian sa Dios.

Kinatibuk-ang pagpasabot sa hilisgotan: Pagpahinungod

May kalabotan nga mga giya sa pagtuon sa ebanghelyo: Mga Pakigsaad ug mga Ordinansa, Sacrifice [Sakripisyo], Temple Endowment and Sealing [Pagtuga ug Pagselyo diha sa Templo], Caring for Those in Need [Pag-atiman Niadtong Nanginahanglan]

Seksiyon 1

Pinaagi sa Pagpahinungod ang Ginoo Motabang Nato nga Mahimong Balaan Sama Kaniya

babaye nga naggunit og hulagway ni Kristo

Kon kita mopahinungod og usa ka butang ngadto sa Dios, kita nagpahinungod niini alang sa pagpalig-on sa gingharian sa Ginoo. Kon kita mopahinungod og usa ka butang ngadto sa Dios tungod sa atong gugma Kaniya, mahimo kini nga balaan.

Samtang makapahinungod kita sa atong panahon, mga talento, ug mga kapanguhaan ngadto sa Ginoo, ang “kinadak-ang pagpahinungod mao ang pagtugyan sa usa ka tawo sa iyang kaugalingon ngadto sa Dios.” Niini nga sitwasyon, ang pagpahinungod dili gayod usa ka kalihokan o usa ka ritwal sa paghatag og usa ka butang—usa kini ka proseso nga makatabang nato nga makaila sa Langitnong Amahan ug ni Jesukristo. Kon kita mosunod sa ehemplo ni Jesukristo sa pagpuyo og usa ka gipahinungod nga kinabuhi, kita mahimong balaan sama Kaniya.

Mga butang nga angayang hunahunaon

  • Nagkinahanglan kini og panahon ug paningkamot sa pagpahinungod sa atong kaugalingon ngadto sa Dios. Ikonsiderar ang pagbasa sa Doktrina ug mga Pakigsaad 4:2 ug ang pagpamalandong sa unsay ipasabot sa pagserbisyo sa Dios “sa tibuok ninyong kasingkasing, gahom, hunahuna ug kusog.” Sa unsang paagi nga mas nagkaduol na kamo ngadto sa pagpahinungod sa “tanan” nga anaa ninyo ngadto sa Ginoo? Makapahinungod ba kamo sa usa ka butang ngadto Kaniya nga makatabang ninyo nga mas makaila Kaniya? Buhata ang bisan unsa nga mga pagbati nga inyong madawat.

  • Ang Ginoo makapanalangin usab nato pinaagi sa pagpahinungod, o sa paghimong balaan, sa atong mga pagsulay. Diha sa Basahon ni Mormon, si Lehi misulti sa iyang anak nga si Jacob nga ang Ginoo “[mo]pahinungod sa imong mga kasakit alang sa imong kaayohan.” Basaha ang iyang mga pulong sa 2 Nephi 2:1–2. Sa unsang paagi nga ang Ginoo mipahinungod sa inyong mga hagit alang sa inyong kaayohan? Sa unsang paagi nga Siya mitabang ninyo nga gamiton kana nga mga kasinatian sa pagpanalangin sa kinabuhi sa uban? Irekord ang bisan unsa nga mga hunahuna ninyo kon sa unsang paagi nga ang inyong mga pagsulay nakapahimo ninyong mas balaan ug mas nakapaduol ninyo ngadto kang Kristo.

Kalihokan alang sa pagkat-on kauban ang laing mga tawo

  • Sa usa ka pakigpulong sa 2017 nga tibuok kalibotan nga debosyonal nga giulohan og “Mga Propeta, Pagpangulo, ug Balaanon nga Balaod,” si Presidente Russell M. Nelson midapit sa mga young adult sa pagpahinungod sa ilang panahon sa pagtuon mahitungod ni Jesukristo. Miingon siya: “Kon mopadayon kamo sa pagkat-on sa tanan nga inyong mahimo bahin ni Jesukristo, mosaad ko ninyo nga ang inyong gugma alang Kaniya, ug alang sa mga balaod sa Dios, molambo lapas pa sa inyong kasamtangang gihunahuna. Ako mosaad usab ninyo nga ang inyong abilidad sa pagbuntog sa sala molambo. Ang inyong tinguha sa pagtuman sa mga sugo molambo og maayo. Inyong mabantayan ang inyong kaugalingon nga mas makapalayo sa pagtubay ug pagpanglit-ag niadtong nagbiay-biay sa mga sumusunod ni Jesukristo.” Rebyoha og dungan ang pakigpulong ni Presidente Nelson ug dayon maminaw o manganta sa himno nga “Take Time to Be Holy.” Sa unsang paagi nga ang pagpahinungod sa inyong panahon sa pagtuon mahitungod kang Jesukristo makatabang nga mahimo kamo nga balaan? Mahimo kamo nga mopakigbahin og mga ideya sa usag usa kon unsaon nga mas makahalad sa inyong panahon sa pagkat-on mahitungod Kaniya. Buhata ang bisan unsa nga mga pagbati nga inyong madawat.

  • Ang pagpahinungod sa usa ka butang ngadto sa Dios alang sa Iyang paggamit murag lisod paminawon, apan ang usa ka gipahinungod nga kinabuhi sa pagkatinuod naugmad pinaagi sa yano nga mga pagpili nga atong gihimo matag adlaw. Sa Abril 2015 nga kinatibuk-ang komperensiya, si Presidente Dieter F. Uchtdorf mitudlo: “Uban sa pailob ug kamapadayunon, bisan ang kinagamyang buhat sa pagkadisipulo o agipo sa pagtuo mamahimong magdilaab nga daob sa gipahinungod nga kinabuhi. Gani, ingon ana ang sinugdanan sa kadaghanang dagkong daob [bonfire]—isip gamay nga kidlap.” Tan-awa kini nga bidyo nga nagpakita kon sa unsang paagi nagsugod ang daob. O, kon anaa kamo sa dapit nga luwas ra ang paghimo niini, sugdi ang paghimo og campfire nga manag-uban. Hisgoti ang daw ginagmay, matag adlaw nga mga butang nga mapahinungod ninyo sa Ginoo aron matabangan kamo nga mahimong mas balaan sama Kaniya.

Pagkat-on pa og dugang

Seksiyon 2

Diha sa mga Templo, ang mga Santos sa Ulahing mga Adlaw Nakigsaad nga Mosunod sa Balaod sa Pagpahinungod

magtiayon nga naglakaw sa mga nataran sa templo

Diha sa balay sa Ginoo, ang mga Santos sa Ulahing mga Adlaw nakigsaad nga mosunod sa balaod sa pagpahinungod. Pinaagi sa pagsunod sa balaod sa pagpahinungod, ang mga miyembro nagtabang sa pag-atiman sa pisikal ug espirituwal nga mga panginahanglan sa uban ug sa pagpadayon sa buhat sa Ginoo dinhi sa yuta. Ang pagtuman sa pakigsaad nga mosunod sa balaod sa pagpahinungod magdala og daghang panalangin, lakip na ang “mas labaw nga kahigayonan sa gahom sa Dios ug sa malungtaron nga gugma, kalinaw, kahupayan, ug hingpit nga kalipay.”

Mga butang nga angayang hunahunaon

  • Ang balaod sa pagpahinungod mahangtoron. Gisunod kini sa karaan sa managlahing panahon sa mga sumusunod sa Dios ug gipahiuli sa ulahing mga adlaw. Mahimo ninyong basahon ang mahitungod sa pagpahiuli diha sa Mga Buhat 4:32; 4 Nephi 1:1–3; ug Moises 7:18. Sa inyong hunahuna unsa ang ipasabot sa “gipanag-usahan sa pag-ambit ang tanang butang” ug mahimong “usa sa kasingkasing ug usa sa hunahuna” ngadto sa uban? Sa unsang paagi nga inyong masunod kini nga mga sumbanan samtang naningkamot kamo sa pagsunod sa balaod sa pagpahinungod? Isulat ug buhata ang bisan unsa nga mga pagbati nga inyong madawat.

Kalihokan alang sa pagkat-on kauban ang laing mga tawo

  • Usa ka paagi nga kita makasunod sa balaod sa pagpahinungod mao ang pagtabang sa uban nga matubag ang ilang temporal ug espirituwal nga mga panginahanglan. Isip usa ka grupo, basaha ang Mosiah 4:26 ug dayon kantaha ang himno nga “Nakabuhat Ba Ako og Maayo Karon?” Hisgoti ang mga paagi nga makatabang kamo niadtong nanginahanglan pinaagi sa pagpangalagad, ikapulo, mga halad sa puasa, makitawhanon nga mga proyekto, ug uban pang mga matang sa pagserbisyo. Gani mahimo kamong magplano og buhat sa pagserbisyo isip usa ka grupo. Mahimo usab kamong mopakigbahin sa usag usa og personal nga mga kasinatian nga nagpakita kon sa unsang paagi nga ang pagtabang sa usa ka tawo nakapanalangin sa inyong kinabuhi ug nakapaduol ninyo ngadto kang Jesukristo.

  • Ang laing paagi nga atong masunod ang balaod sa pagpahinungod mao kon kita nagbuhat sa atong labing maayo sa pagtuman sa atong mga calling ug mga buluhaton sa Simbahan. Si Presidente Henry B. Eyring mitudlo: “Ang tawag sa pag-alagad kinahanglan nga himoon sa kinasingkasing. Pinaagi sa paghalad sa bug-os natong mga kasingkasing ngadto sa Magtutudlo ug maghupot sa Iyang mga sugo nga kita makaila Kaniya. Sa kaulahian, pinaagi sa gahom sa Pag-ula, ang atong mga kasingkasing mausab, ug kita mahisama Kaniya.” Dapita ang mga sakop sa grupo sa paghunahuna og usa ka tawo sa ilang kinabuhi nga nagserbisyo sa usa ka calling uban sa iyang tibuok kasingkasing. Mopakigbahin sa usag usa sa unsay inyong nakat-onan gikan sa ehemplo niana nga tawo bahin sa gipahinungod nga pagkinabuhi ug sa unsang paagi nga ikaw nagtuo nga nakahimo kini og kalainan sa kinabuhi sa uban.

Pagkat-on pa og dugang