“Sakripisyo,” Mga Hilisgotan ug mga Pangutana (2023)
Giya sa Pagtuon sa Ebanghelyo
Sakripisyo
Unsaon nato sa pagpakita unsa ang labing importante nato
Paghunahuna og panahon nga dili na kamo mopadayon sa usa ka butang alang ug tungod sa laing tawo. Dili tingali kini sayon nga butang nga buhaton, apan pinaagi sa paghimo niana nga sakripisyo, inyong gipakita nga kamo andam sa pagbutang og una sa indibidwal nga mga panginahanglan labaw sa inyong panginahanglan.
Sa samang paagi, kon kita mosakripisyo og usa ka butang alang sa Dios, gipakita nato nga gihigugma nato Siya ug andam sa pag-una Kaniya sa atong mga kinabuhi. Ang labing taas nga ekspresyon sa atong sakripisyo moabot kon kita mobuhat sa kabubut-on sa Dios kay sa atong kabubut-on. Ang atong mga sakripisyo makapakita sa atong gugma ug pasalamat alang ni Jesukristo kinsa—sa labing mahinungdanon sa tanang mga buhat sa gugma—misakripisyo sa Iyang kinabuhi aron kita makabalik sa pagpuyo uban sa Langitnong Amahan.
Unsa ang Sakripisyo?
Ang sakripisyo mao ang buhat sa paghatag sa usa ka butang alang ug tungod sa laing butang. Ang katawhan sa Dios mihimo og mga sakripisyo ngadto Kaniya sukad sa karaang panahon. Karon mosakripisyo kita pinaagi sa paghatag sa atong kabubut-on ngadto sa Dios ug paghinulsol sa atong mga sala uban sa masulub-ong kasingkasing ug mahinulsolon nga espiritu. Mosakripisyo usab kita sa atong panahon ug mga talento sa pagsuporta sa buhat sa Dios sa kaluwasan ug kahimayaan (tan-awa sa Mateo 6:33). Pinaagi sa sakripisyo, gipakita nato ang atong pagkaandam sa pag-una sa Dios sa atong mga kinabuhi (tan-awa sa Mateo 19:29).
Kinatibuk-ang pagpasabot sa hilisgotan: Sakripisyo
May kalabotan nga mga giya sa pagtuon sa ebanghelyo: Pagkamasulundon, Ikapulo [Tithing], Pagpahinungod [Consecration], Pagserbisyo diha sa mga Calling sa Simbahan [Serving in Church Callings]
Seksiyon 1
Ang Dios Mihatag sa Balaod sa Sakripisyo isip usa ka Pahinumdom sa Sakripisyo ni Kristo
Ang mga anak sa Dios misunod sa balaod sa sakripisyo sa karaan pinaagi sa paghalad og hayop nga mga sakripisyo isip usa ka pahinumdom nga ang Kordero sa Dios motubos kanila gikan sa Pagkapukan (tan-awa sa Mga Taga-Colosas 1:13–18; Moises 5:6–7). Human si Jesukristo andam nga misakripisyo sa Iyang kinabuhi diha sa krus, ang hayop nga mga sakripisyo wala na kinahanglana (tan-awa sa Lucas 23:46; 3 Nephi 9:19; 4 Nephi 1:12). Ang sakripisyo sa Manluluwas mao ang labing mahinungdanon nga nag-inusarang buhat sa gugma ug mipahitabo sa katubsanan ug kaluwasan sa katawhan (tan-awa sa Isaias 53:7; 2 Nephi 2:7).
Aron makat-on pa og dugang mahitungod sa sakripisyo sa Manluluwas, tan-awa ang “Pag-ula ni Jesukristo” nga giya sa pagtuon.
Mga butang nga angayang hunahunaon
-
Ang hugot nga pagtuo ni Abraham gisulayan sa dihang ang Dios mimando kaniya sa pagsakripisyo sa iyang anak nga si Isaac. Ikonsiderar ang pagbasa sa Genesis 22; Mga Hebreo 11:17–19; ug Jacob 4:5, mahitungod sa sakripisyo nga gisugo sa Dios nga himoon ni Abraham. Samtang inyong buhaton, pamalandongi ang sakripisyo nga gihimo sa Dios sa paghalad sa Iyang Bugtong Anak, nga si Jesukristo, ug ang sakripisyo nga gihimo sa Manluluwas sa paghatag sa Iyang kinabuhi. Unsa ang gitudlo sa Espiritu kaninyo mahitungod sa mga sakripisyo sa Amahan ug sa Manluluwas samtang magbasa kamo niini nga mga tudling?
Kalihokan alang sa pagkat-on uban sa laing mga tawo
-
Sa dihang gihimo ni Jesukristo ang Iyang Pag-ula, “ang ordinansa sa sakramento gipulihan sa ordinansa sa sakripisyo.” Ikonsiderar ang pagkanta sa mga himno sa sakramento sama sa “Didto sa Krus sa Kalbaryo” o “Unsa kadako sa Kaalam ug sa Gugma.” Mahimo usab nga basahon ninyo ang mga kasulatan nga may kalabotan sa matag himno ug maghisgot kon sa unsa nga paagi kamo makaandam alang sa sakramento matag semana. Sa unsa nga paagi nga ang paghunahuna sa sakramento isip usa ka oportunidad sa pagsakripisyo og butang ngadto sa Ginoo makapahimo sa inyong pagsimba nga mas makahuloganon?
Pagkat-on pa og dugang
-
Levitico 1:2–3, 10; Alma 34:8–14; Mga Artikulo sa Hugot nga Pagtuo 1:3
-
Jeffrey R. Holland, “Tan-awa ang Kordero sa Dios,” Liahona, Mayo 2019, 44–46
-
Tracy Y. Browning, “Mas Makakita Pa ni Jesukristo diha sa Atong mga Kinabuhi,” Liahona, Nob. 2022, 13–15
Seksiyon 2
Ang Dios Misugo Nato sa Sakripisyo sa usa ka Masulob-on nga Kasingkasing ug Mahinulsolon nga Espiritu
Karon nagsunod gihapon kita sa balaod sa sakripisyo pinaagi sa paghalad ngadto sa Dios og usa ka masulub-on nga kasingkasing ug usa ka mahinulsolon nga espiritu (tan-awa sa 3 Nephi 9:19–20; Doktrina ug mga Pakigsaad 59:8). Unsaon nato nga makahalad niining matanga sa sakripisyo? Pinaagi sa pagtuo diha ni Kristo, pagpaubos sa atong mga kaugalingon, tinuod nga paghinulsol sa atong mga sala, ug pagduol ngadto Kaniya (tan-awa sa 3 Nephi 12:19; Moroni 6:1–3; Doktrina ug mga Pakigsaad 20:37). Ang paghimo niining mga matanga sa mga sakripisyo nagpakita sa atong gugma sa Dios ug nga kita andam sa paghimo unsay Iyang gisugo. Kon atong ihatag ang atong tibuok nga mga kalag ngadto sa Dios ug molahutay hangtod sa kataposan, maluwas ug makadawat kita og kinabuhing dayon (tan-awa sa Omni 1:26).
Mga butang nga angayang hunahunaon
-
Natural lang nga maghunahuna kon ang Ginoo nakamatikod ba ug modawat sa mga sakripisyo nga inyong gihimo sa pagsunod Kaniya. Pamalandongi ang mga pulong sa Ginoo ngadto ni Joseph Smith sa Doktrina ug mga Pakigsaad 132:49–50. Unsa nga mga panalangin ang gisaad ngadto ni Joseph tungod sa iyang mga sakripisyo? Napanalanginan na ba kamo tungod sa mga sakripisyo nga inyong gihimo alang sa Dios? Mahimo kamong magsulat og lista sa mga panalangin nga inyong nadawat ug dayon mamalandong niini sa tibuok semana.
-
Usa ka paagi nga atong mapakita ang atong gugma alang sa Dios mao ang paghimo og mga sakripisyo sa pagduol ngadto Kaniya. Sa iyang pakigpulong “Kinasingkasing ang Tanan,” si Elder Dieter F. Uchtdorf mipasabot nga ang atong mga sakripisyo mahimong sama ka yano sa pagbiya sa atong personal nga mga tinguha ug mga kahupayan aron mas makasunod sa hingpit sa Manluluwas. Ikonsiderar ang pagbasa ug sa pagpamalandong sa pakigpulong ni Elder Uchtdorf kon sa unsa nga paagi kamo makahatag sa inyong tibuok kasingkasing ngadto ni Jesukristo. Unsa ang inyong mahimong isakripisyo aron mas mosunod sa Manluluwas kaysa kaniadto?
Kalihokan alang sa pagkat-on uban sa laing mga tawo
-
Sa bidyo “Usa ka Masulub-on nga Kasingkasing, Mahinulsolon nga Espiritu, ug Diosnon nga Kasubo” (3:58), si Elder Neil L. Andersen mipasabot nga ang paghatag ngadto sa Ginoo og usa ka masulub-ong kasingkasing ug mahinulsolon nga espiritu nagpasabot mao ang “mahimong sama sa bata.” Mahimo ninyong tan-awon kini nga bidyo ug dayon maghisgot sa mga hiyas sa mga bata nga kinahanglan natong tinguhaon sa pagsakripisyo sa atong kabubut-on ngadto sa Dios. Mahimo usab kamong mopakigbahin og mga kasinatian nga inyong nasinati sa mga bata nga nagpakita unsay atong makat-onan gikan sa ilang mga hiyas.
Pagkat-on pa og dugang
-
Salmo 51:16–17; Juan 6:38; 2 Nephi 2:6–7; 4:32
-
Neill F. Marriott, “Pagtugyan sa Atong Kasingkasing ngadto sa Dios,” Liahona, Nob. 2015, 30–32
Seksiyon 3
Pinaagi sa Inadlaw nga mga Pagsakripisyo, Kita Mahimong Balaan sama ni Jesukristo
Ang pagsakripisyo alang sa Dios makatabang nato nga modawat sa Iyang gahom, diin kita mahimong balaan. Pinaagi sa pagsakripisyo alang sa Ginoo, mapakita nato ang atong gugma alang Kaniya ug sa uban. Tingali naghunahuna kita nga ang sakripisyo lisod nga buhaton, apan sa kasagaran nagpasabot kini sa “pagpakabuhi kada adlaw isip tinuod nga disipulo ni Kristo.” Samtang magsakripisyo kita matag adlaw aron sa pagtuman sa atong mga pakigsaad ug pagsunod ni Jesukristo, nagtabang kita nga magpadayon ang buhat sa Dios.
Mga butang nga angayang hunahunaon
-
Usa ka paagi nga kita makasakripisyo matag adlaw mao ang paghatag sa atong panahon ngadto sa Ginoo. Kini mahimong naglakip sa mga butang sama sa pagtuman sa atong mga calling o sa pagpangalagad sa uban. Si Presidente Dallin H. Oaks mitudlo, “Ang atong mga kinabuhi sa atong serbisyo ug sakripisyo ang tukmang pahayag sa atong pasalig nga moserbisyo sa Agalon ug sa atong isigkatawo.” Sa unsa nga paagi kamo kanunay nga mosakripisyo sa inyong panahon ngadto sa Ginoo? Pamalandongi kon sa unsa nga paagi nga ang paghimo sa ingon nakatabang kaninyo nga mas maduol ngadto ni Kristo ug mahimong mas balaan.
-
Usahay ang matag adlaw nga mga sakripisyo nga atong gihimo isip mga disipulo ni Kristo mahimong bation nga gamay ug walay bili ngari nato. Apan kini nga mga sakripisyo importante ngadto sa Ginoo. Basaha ang Doktrina ug mga Pakigsaad 64:33 aron makahibalo kon sa unang paagi siya motan-aw sa atong mga paningkamot, bisan unsa pa kini ka gamay. Sa unsa nga paagi nga kini nga bersikulo naghatag ninyo og kaisog sa pagpadayon sa paghimo og gagmay, matag adlaw nga mga sakripisyo alang sa Ginoo?
Kalihokan alang sa pagkat-on kauban ang laing mga tawo
-
Sa bidyo “A Sacrifice of Time” (2:53), si Presidente Russell M. Nelson mitudlo, “Ang atong mga katigulangan dili mahimong hingpit kon wala kita, ug kita dili mahimong hingpit kon wala sila.” Pinaagi sa kanunay nga paghimo og buhat sa templo ug family history, mahimo kitang mas balaan, sama ni Jesukristo. Tan-awa ang bidyo “A Sacrifice of Time” pagdungan, ug dayon ipakigbahin kon sa unsa nga paagi nga ang pagsakripisyo sa inyong panahon sa paghimo kanunay og buhat sa templo ug family history nakapanalangin kaninyo. Unsay inyong nakat-onan gikan sa mga kasinatian sa uban nga nagdasig ninyo sa pagpadayon o sa pagsugod sa pagsakripisyo sa inyong panahon niining paagiha?
-
Adunay daghang paagi nga makasakripisyo og butang alang sa Ginoo ug alang sa uban nga dili gani makaamgo niini. Kon motuman kamo sa inyong mga pakigsaad, moserbisyo sa usa ka higala o sakop sa pamilya, mobayad sa ikapulo, o mopakigbahin sa inyong mga talento, nagsakripisyo kamo alang sa Dios ug alang sa Iyang mga anak. Paghimo og lista sa piho nga mga paagi nga kamo makasakripisyo matag adlaw nga mahimong usa ka disipulo ni Kristo. Dayon mahimo kamong maghisgot kon sa unsa nga paagi nga ang paghunahuna niini nga mga butang isip mga sakripisyo nga makaapekto sa inyong pagkadisipulo ug makatabang ninyo nga mas maduol ngadto Kaniya.
Pagkat-on pa og dugang
-
1 Mga Cronicas 16:29; Lucas 18:22; Mga Taga-Roma 12:1; Doktrina ug mga Pakigsaad 138:12–13
-
Jeffrey R. Holland, “Called to Serve,” Liahona, Nob. 2002, 36–38