Mga Propeta, Pagpangulo, ug Balaanon nga Balaod
Usa ka Gabii uban ni Presidente Russell M. Nelson
Tibuok Kalibutan nga Debosyonal alang sa mga Young Adult • Enero 8, 2017 • Brigham Young University
Akong minahal nga mga kaigsoonan, akong gidala kaninyo ang pagtimbaya ug gugma gikan sa Unang Kapangulohan ug sa Korum sa Napulog Duha ka mga Apostoles. Nagpasalamat mi kaninyo sa pakig-uban kanamo karong gabhiona ug sa pag-andam sa inyong kasingkasing ug hunahuna nga matudloan sa espirituhanong paagi. 1
Sukad sa Enero 2016, sa dihang namulong ako kaninyo niining panagpundok sa tibuok kalibutan nga debosyonal, nakauban nako ang daghan kaninyo samtang nagbiyahe ko sa Japan, sa Pilipinas, China, Canada, England, Wales, Germany, Italy, Spain, ug mga lokasyon sa tibuok Estados Unidos.
Sa miaging Septyembre, duna koy dili malimtan nga kasinatian uban ni Elder M. Russell Ballard ug sa ubang mga lider sa Simbahan sa dihang miadto mi sa Baton Rouge, Louisiana, aron mahimamat ang mga tawo didto human sa makapaguba nga lunop. Pagka-Dominggo, ang matag usa kanamo mipahigayon og upat ka dagkong mga sakrament miting—usa alang sa mga biktima ug tulo alang sa mga volunteer nga miabut gikan sa daghang estado aron motabang sa pagpanglimpyo. Kining mga litrato naghatag og mga ideya niadtong mga kongregasyon sa adlawng Dominggo nga gilangkuban sa gatusan nga nagsul-ob sa atong trademark nga Mormon Helping Hands nga mga T-shirt.
Hinumdumi ang daghang malipayon nga panagway sa mga batan-ong lalaki ug babaye nga mibiya sa ilang mga panimalay aron motabang sa mga silingan nga wala nila mailhi, taliwala sa init kaayo nga summer sa Louisiana, ug kinsa mihunong atol sa Igpapahulay aron mosimba sa Ginoo. Samtang nagtan-aw ko niadtong talagsaong mga kongregasyon sa andam nga mga trabahante, nga ang kadaghanan susama ninyo og edad, duna koy dako kaayo nga impresyon nga nagtan-aw ko sa mga lalaki ug babaye nga sa dili madugay mahimong mga lider niining Simbahan.
Busa karong gabhiona, samtang naghunahuna ko ninyo nga nagpundok sa tibuok kalibutan, hatagan nako og gibug-aton ug mamulong bahin niana nga impresyon. Kamo mao ang umaabut nga mga lider sa Simbahan sa Ginoo! Andam na ba mo nga modawat sa responsibilidad sa pagpangulo?
Sa dihang namulong ko ninyo usa ka tuig na ang milabay, gihagit ko kamo nga mobarug isip tinuod nga mga milenyal diin kamo gipakatawo nga mahimo. Kinahanglan kamong motabang sa pag-andam sa kalibutan alang sa milenyal nga paghari sa Manluluwas pinaagi sa pagpundok sa mga pinili gikan sa tibuok kalibutan, aron ang tanang mopili sa pagbuhat sa ingon makadawat sa ebanghelyo ni Jesukristo ug sa tanang panalangin niini. Karong gabhiona gusto kong maghisgot kaninyo kon unsaon nga makapangandam mo.
Una, pag-focus sa inyong kaminyoon ug pamilya. Buhata ang mga impresyon nga inyong nadawat samtang nadungog ninyo ang upat ka kamatuoran ni “Tiya Wendy” bahin sa gugma ug kaminyoon.
Inyong responsibilidad sa Ginoo ang pagtabang sa pagpundok sa mga pinili gikan sa moral nga kalibug ug ang pagdagsa sa sala nga naglibut kanato sa atong panahon dili gamay nga buluhaton. Si Lucifer ug ang iyang mga sumusunod naggamit sa matag porma sa teknolohiya ug komunikasyon aron ipakatap ang mga bakak bahin sa kinabuhi ug sa tinuod nga tinubdan sa kalipay. Sa ingon, ang pagbuhat sa unsay inyong gianhi sa yuta magkinahanglan sa labing maayo nga mga kahanas sa pagpangulo nga mahimo sa inyong henerasyon.
Salamat, kay duna kitay talagsaong mga ehemplo nga angayang sundon. Samtang ang kalibutan mahimong motan-aw sa talagsaong mga abilidad sa pagpangulo sa mga lalaki ug babaye sama nila ni Napoleon, Joan of Arc, George Washington, Mahatma Gandhi, Mother Teresa, ug uban pa, nagtuo ko nga ang labing maayo nga mga lider nga mipuyo sa yuta mao ang mga propeta sa Dios.
Karon, 16 ka lalaki ang gipili sa Ginoo nga mahimong mga Presidente sa Iyang Simbahan, nga gipahiuli niini nga dispensasyon—niining panapos nga dispensasyon sa kasaysayan sa yuta. Personal nakong nakaila ang 10 niadtong 16 ka lalaki. (Naghatag kana og ideya bahin sa akong edad kay sa bisan unsa pang butang. Ato lang kining isulti niining paagiha: Wala na ko mopalit og green nga saging.)
Karon, kon seryuso mo bahin sa pagbarug isip tinuod nga milenyal, awhagon ko kamo nga tun-an ang kinabuhi ug mga pagtulun-an niining 16 ka propeta sa Dios. 2 Kana nga pagtuon mousab sa inyong kinabuhi. Pwede ba kong mopakigbahin og pipila ka baruganan sa pagpangulo nga akong nakat-unan gikan nila?
Si Presidente Joseph Fielding Smith, ang ika-10 nga Presidente sa Simbahan, nagpuyo pipila lang ka balay gikan sa akong panimalay sa bata pa ko. Ang iyang duha ka kinamanghuran nga mga anak nga lalaki akong mga amigo sa pagkabata. Kanunay ko nilang dapiton sa ilang panimalay.
Si Presidente Smith mao ang Presidente sa Simbahan niadtong 1971, sa dihang gitawag ko nga mahimong Kinatibuk-ang Presidente sa Sunday School. Sa dihang ang kanhi nako asawa, nga si Dantzel, ug ako mikuyog niya sa ulahing bahin nianang tuiga sa unang area conference, nga gipahigayon didto sa Manchester, England, nakaobserbar ko og importante kaayong leksyon sa epektibo nga pagpangulo samtang nangayo si Presidente Smith og mga report gikan sa mga General Authority nga nagpundok sa usa ka gamayng kwarto sa wala pa ang conference.
Human makasulti ang tanan, imbis nga mohatag og pang-diktador nga direksyon, mibarug si Presidente Smith uban sa kaligdong sa usa ka pangulo, midapit nila nga makat-on gikan sa kaalam sa iyang 94 nga pangidaron, samtang mipahayag sa iyang gugma ug sinserong tinguha sa pagtabang kanila. Natingala ko sa impluwensya niining lider sa pagpahayag og gugma ug pagsalig sa iyang katawhan. Human sa area conference, sa dihang mikomplimento mi ni Presidente Smith sa iyang nindot kaayo nga mensahe, yano ra siyang mitubag, “Ako wala moanhi aron mapakyas.” 3
Siya dunay hugot nga pagtuo nga ang Ginoo mogiya niadtong mga tulumanon samtang gibuhat ni Presidente Smith ang tanan sa iyang gahum sa pagpadayon sa buhat. Ang hugot nga pagtuo, pag-ampo, pagtuon, ug kakugi manag-uban aron magmalampuson. Sama ni Presidente Smith nga wala moadto sa England aron mapakyas, sa ingon ang atong Amahan mipadala ninyo sa yuta niining katapusang dispensasyon dili aron mapakyas apan aron molampus—ug makakaplag og kalipay samtang magbuhat sa ingon.
Si Presidente Ezra Taft Benson nahimong sakop sa Korum sa Napulog Duha ka mga Apostoles sulod lamang sa duha ka tuig sa dihang, pagka-Disyembre 1945, human sa Ikaduhang Gubat sa Kalibutan , si Presidente George Albert Smith mitawag kang-Elder Benson sa pagpangulo sa European Mission. Ang mga kahimtang didto grabe kaayo. Sa 10 ka bulan nga misyon sa gugma ngadto sa mga miyembro kansang kinabuhi nabalda sa gubat, si Elder Benson mibiyahe sa tibuok Germany, Poland, Czechoslovakia, ug Scandinavia, nag-apud-apod og mga pagkaon, sinina, ug bedding ngadto sa nag-antus nga mga Santos. 4 Balik-balik niyang giatubang ang daw dili masagubang nga mga problema. Apan balik-balik niyang gipakita ang “determinado nga pagtuo sa gahum sa Ginoo nga mabuntog ang mga babag.” 5
Kwarenta ka tuig ang milabay, pagka-Nobyembre 1985, si Presidente Benson, nga nianang higayuna bag-ong naordinahan isip Presidente sa Simbahan, mi-assign nako isip junior nga sakop sa Napulog Duha sa pagsangyaw sa ebanghelyo sa mga nasud sa Eastern Europe nga nianang higayuna ubos sa impluwensya sa komunismo.
Gibati nako nga dili andam sa maong mahagitong buluhaton, apan si Presidente Benson misugod sa paghimo niini nga buhat nga nag-una nako. Sa unsang paagi nga dili nako mabuhat kon unsay iyang nabuhat? Ang iyang ehemplo nakapadasig nako nga mag-ampo ug mobuhat og maayo kutob sa akong mahimo ug dayon makita ang milagrusong impluwensya sa Ginoo. 6
Kon bisan kinsa nato ang mobati nga nabug-atan, makakat-on kita og daghan gikan ni Presidente Benson. Sulod sa walo ka tuig nagserbisyo siya sa samang higayon isip usa ka Apostol ug isip secretary of agriculture sa gabinete sa presidente sa U. S. nga si Dwight D. Eisenhower.
Giunsa man niya sa pagdumala? Kini ang iyang mga pulong: “Nagtrabaho ko og maayo kutob sa akong mahimo ug gibuhat ang tanan nga akong makaya. Ug naningkamot ko sa pagsunod sa mga sugo. Dayon gitugutan nako ang Ginoo nga maoy mopuno sa unsay kulang.” 7 Kadto ang mga pulong nga angayang sundon.
Si Presidente Gordon B. Hinckley usa ka madasigong lider kansang pagtudlo sa pagdumala sa Simbahan talagsaon. Sa wala pa magserbisyo isip ika-15 nga Presidente sa Simbahan, nahimo na siyang magtatambag sa tulo ka miaging mga Presidente. Sa pag-uli gikan sa iyang misyon isip usa ka batan-on didto sa England, nagtrabaho siya alang sa Simbahan sa daghang paagi, sa kanunay ubos sa direksyon sa Unang Kapangulohan ug sa Korum sa Napulog Duha. Balik-balik siyang gihangyo sa pagsulbad sa dagkong mga hagit. Sama pananglit, si Presidente David O. McKay mi-assign ni Brother Hinckley sa pagtino kon unsaon paghatag sa ordinansa sa endowment nga isalida aron ang mga panginahanglan sa paghubad matubag alang sa nagkadako nga Simbahan.
Si Presidente Hinckley kon mosulti maayo gayud. Masaligon siyang mosulti bahin sa ebanghelyo ngadto sa tanan gikan sa dugay nang mga tigbalita ngadto na sa mga lider sa kalibutan. Nakasaksi ko kon giunsa niya pagpahumok ang kasingkasing ni Mikhail Gorbachev, kanhi presidente sa Soviet Union, kinsa sa sinugdanan mibalibad sa imbitasyon nga makighimamat kang Presidente Hinckley sa iyang opisina. Hinoon, si Mr. Gorbachev gusto nga si Presidente Hinckley moadto sa kwarto sa hotel ni Gorbachev. Apan sa dihang naghimamat sila sa punoang buhatan sa Simbahan, gitudlo ni Presidente Hinckley ang nindot nga Circassian walnut paneling sa council room sa Unang Kapangulohan. Sa dihang gisultihan ni Presidente Hinckley si Mr. Gorbachev kon diin gikan kana nga kahoy, si Mr. Gorbachev nahingangha! Kana nga kahoy nagagikan sa mismong rehiyon sa iyang yutang natawhan sa Russia! 8 Ang iyang buot dali nga nagmahigalaon.
Si Presidente Hinckley kanunayng positibo, resulta sa iyang hingpit nga pagtuo sa Ginoo. Dul-an sa 13 ka tuig isip Presidente, gipangulohan niya ang Simbahan agi sa talagsaong panahon sa kausaban, lakip na ang desinyo sa mas gagmayng mga templo, ang pagtukod sa Conference Center, ang pagpahibalo bahin sa 79 ka bag-ong mga templo, ug ang pagpahinungod o pagpahinungod og usab sa 95 sa 124 ka mga templo nga gigamit na nianang higayuna. Ang panglantaw ni Presidente Hinckley, ug unsay gikinahanglan gikan niya tungod niana nga panglantaw, walay kinutuban.
Si Presidente Hinckley usa ka eksperto sa kasaysayan sa Simbahan. Usa usab siya ka manalagna. Sa ingon, siya walay kahadlok sa pagsangyaw sa umaabut. Paminaw sa iyang mga pulong: “Kini nga kawsa [ni Kristo] magpadayon sa kahalangdon ug gahum nga mopuno sa yuta. Ang mga pultahan nga sirado karon sa pagsangyaw sa ebanghelyo maabli. Ang Labawng Makagagahum, kon gikinahanglan, mahimong mopakurog sa kanasuran aron mopaubos kini ug makapahimo niini nga maminaw sa mga sulugoon sa buhi nga Dios. Ang bisan unsay gikinahanglan mahitabo.” 9
Karon si Presidente Thomas S. Monson mao ang buhi nga propeta sa Ginoo dinhi sa yuta. Gihigugma, gipaluyohan, ug gi-ampo gayud nato siya! Ug nakakat-on gayud kita gikan niya! Hunahunaa kini. Gitawag siya nga mahimong bishop sa edad nga 22. Ang iyang ward naglakip og 80 ka biyuda. Gitawag siya nga mahimong Apostol sa batan-ong edad nga 36. Si Presidente Monson nagpakabuhi sumala sa motto nga “Kon gusto sa Ginoo nga dunay mahitabo, gusto nako nga mahibalo Siya nga makasalig Siya kang Tom Monson nga mobuhat niini.” 10
Gipakita niya kanato kon unsaon sa pagtabang ug pagluwas sa usa. Gitudloan Niya kita pinaagi sa ehemplo nga ang pag-atiman sa mga tawo kanunayng mas importante kay sa pagdumala sa oras, o mga miting, o mga iskedyul.
Sa tibuok niyang kinabuhi, si Presidente Monson kanunayng dunay agian una mopauli gikan sa tibuok adlaw nga pagtrabaho. Usahay mohunong siya sa ospital aron hupayon kadtong nagkalisud. Sa ubang mga adlaw giyahan siya nga moadto sa piho nga mga panimalay aron bisitahan. Kasagaran ang iyang wala damha nga pagpanuktok sa pultahan sugaton og tawo nga naglugok-lugok ang luha nga moingon og sama sa, “Giunsa nimo pagkasayud nga anibersaryo sa kamatayon sa among anak nga babaye?” o “Giunsa nimo pagkasayud nga birthday nako?”
Sa tibuok niyang kinabuhi, kanunayng gipakita ni Presidente Monson ang duha ka sukaranang mga kinaiya nga nakapahimo sa mga propeta sa Dios nga dili kasarangan nga mga lider: Una, gipakita niya ang una ug ikaduhang dako nga mga sugo—sa paghigugma sa Dios sa tibuok natong kalag ug paghigugma sa atong mga silingan, ang mga anak sa Dios, sama sa paghigugma sa atong kaugalingon. Ug ikaduha, ang matag propeta nasayud kon unsaon sa pagdawat og pinadayag ug sa pagtubag dayon niini kon moabut kini. Si Presidente Thomas S. Monson mao ang representasyon sa matarung nga pagpangulo.
Ang mga propeta sa Dios dunay komon nga mga kinaiya. Ang usa mao nga ang matag propeta nakasabut sa kaimportante sa balaanon nga balaod. Ang kahibalo bahin sa balaanon nga balaod ug epektibo, matarung nga pagpangulo magkauban. Kon mas daghan kamo og mahibaloan nga mga balaod sa Dios—ug mas importante, ang paagi sa pagsunod ninyo niini—mas mahimong epektibo ang inyong matarung nga pagpangulo.
Sa dihang usa pa ko ka batan-ong estudyante sa medisina, ang subsob nga pagtuon sa lawas sa tawo nakapakumbinser nako nga buhi ang Dios. Ug sa pagkahibalo nako nga ang lawas gilalang sa Dios, mas naintriga ko sa mga balaod sa Dios nga nagdumala sa function sa lawas. Pinaagi sa ekstensibo nga pag-research sa laboratoryo, akong nakat-unan sa wala madugay ang balaod nga nagdumala sa pagpitik sa kasingkasing. Dugang pa, akong nakat-unan nga ang nagpitik nga kasingkasing luwas nga mapahunong sa temporaryong paagi aron mapahigayon ang delikado nga operasyon. Mahimo kini pinaagi sa pag-usab sa sodium/potassium ratio sa dugo nga gisuplay sa kasingkasing. Human niana, kon ang kasingkasing masuplayan og dugo nga dunay normal nga sodium/potassium ratio, ang kasingkasing normal na usab nga mopitik. Kining mga butanga napamatud-an nga matag-an, masaligan, ug masubli.
Bag-o pa lang duna koy oportunidad sa pagpasabut niini sa usa ka klase sa eskwelahan sa medisina. Usa ka batid nga propesor nga naa didto nangutana nako, “Apan unsa kaha kon dili kini mosalir?” Mitubag ko, “Kini kanunayng mosalir! Mosalir kini sumala sa balaanon nga balaod.”
Ang balaanon nga balaod dili malimud ug dili malalis. Ang balaanon nga balaod dili mahimong ilimud o lalison. Ug kon ang mga balaod sa Dios sundon, ang may kalabutan nga mga panalangin kanunayng moresulta! Ang mga panalangin kanunayng gipasikad sa pagkamasulundon sa magamit nga balaod. 11
Ang mga existentialist makapasabut og dugang; ang mga relativist makapangatarungan gamit ang ilang limitado nga panglantaw sa kamatuoran—nga ang kamatuoran usa lamang ka piho nga kasinatian—ang mga balaod mga balaod gayud! Ang kamatuoran sa Dios tinuod gayud! Unsay giingon sa Dios nga husto kay husto! Ug unsay Iyang giingon nga sayop kay sayop!
Mao kini nganong importante nga mahibalo mo sa mga balaod sa Dios. Gikontrolar niini kining universe ug ang daghan pa. Kon supakon ang balaanon nga mga balaod, mosunod ang mga sangputanan. Bisan kon magsakit ang atong kasingkasing alang niadtong mosupak sa mga balaod sa Dios, ang mga silot kinahanglan gayung bayaran. Ang balaanon nga balaod kinahanglan gayung sundon.
Nakat-unan nako kini isip doktor ni Presidente Spencer W. Kimball. Sa dihang ang gitaud nga pacemaker sa iyang kasingkasing kalit lang nga wala mosalir, mibalik nako si Presidente Kimball alang sa tabang. Apan gihangyo una ko niya nga hatagan siya og panalangin sa priesthood. Human sa panalangin, nga misaad og pagkorihir sa napakyas niyang pacemaker, miingon dayon siya ngari nako, “Karon mahimo nimong buhaton kon unsay kinahanglan nimong buhaton aron matinuod kana nga panalangin.”
Mipadayon ko sa operasyon. Sa wire nga nagdala og kuryente gikan sa pacemaker ngadto sa iyang kasingkasing, nakita nako nga dunay naputol sa insulation. Sa dihang giilisan nako kanang depektuso nga wire, misalir na usab dayon ang pacemaker, nga nagtugot sa kasingkasing ni Presidente Kimball nga mopitik og normal. Bisan sa propeta sa Dios ang balaod kalabut sa transmisyon sa kuryente dili mahimong ibaliwala.
Sa pagkatinuod, si Presidente Kimball usa ka propeta sa Dios. Samtang nagtan-aw ko niya og maayo sa nagkadaiyang mga sakit ug nag-obserbar sa iyang labihan ug lantip nga pagtuon samtang nagtinguha siya og pagpadayag, siya ang akong tigtudlo. Ang akong gugma alang kaniya walay kinutuban!
Samtang ang kalibutan napuno sa pagkadili sigurado, kinahanglan walay pagkadili sigurado diha sa inyong kasingkasing ug hunahuna bahin sa unsay tinuod ug unsay dili. Ang pagkadili sigurado nagagikan sa dili hingpit o wala mahibaloi nga impormasyon. Isip usa ka Apostol, nangamuyo ko ninyo nga magkat-on sa dili mausab nga mga balaod sa Dios. Kat-uni kini pinaagi sa pagtuon ug pinaagi sa hugot nga pagtuo. Nagpasabut kana, apil sa uban pang mga butang, nga “[magpakabuhi] pinaagi sa matag pulong nga mogula gikan sa ba-ba sa Dios.” 12
Pag-ampo aron makaila tali sa mga balaod sa Dios ug sa mga pilosopiya sa mga tawo, lakip na kadtong malinglahong gipangsundog sa kaaway. Sa tibuok panahon, naperpekto ni Lucifer ang iyang pamaagi. Hanas siya sa pagbalda, pagtuis, paglingla, ug pagpahisalaag. Nangamuyo ko ninyo nga likayan ang iyang malinglahong mga laang sama sa inyong buhaton aron malikayan ang usa ka sakit nga midagsang!
Ang pagpanglit-ag nga gidesinyo ni Satanas makadala lamang ninyo og kaalautan, espirituhanong pagkabihag, ug kamatayon. 13 Tinuod kini sa matag higayon. Ang subo nga mga sangputanan sa pagnunot sa mga pag-agni ni Lucifer matag-an, masaligan, masubli, ug kamahayan.
Sa laing bahin, mosaad ko nga sa pagtuman ninyo sa mga sugo sa Dios, sa pagsunod ninyo sa Iyang mga balaod, mahimo kamong mas gawasnon. Kini nga kagawasan mopakita kaninyo sa inyong balaanong kinaiya ug motugot ninyo nga mouswag sa personal nga paagi. Mahimo kamong gawasnon gikan sa pagkaulipon sa sala. Mahimo kamong gawasnon nga mahimong kamo—epektibo, matarung nga lider. Mahimo kamong andam nga mangulo pinaagi sa lagda ug ehemplo bisan asa kamo kinahanglanon. Sa malipayong paagi, ang mga panalangin sa pagtuman sa mga sugo sa Dios matag-an, masaligan, ug masubli usab.
Isip mga miyembro sa Iyang gipahiuli nga Simbahan, nasayud kita nga si Jesukristo, ang atong Agalon, mao ang atong katapusang Tigtudlo. Isip tinuod nga milenyal, gipakatawo kamo aron mahimong tinuod nga disipulo ni Jesukristo. Gani, ang bugtong paagi aron mahimong tinuod nga milenyal mao ang mahimong usa sa Iyang tinuod nga mga disipulo!
Unsaon ninyo pagpalambo sa inyong pagkadisipulo? Duna koy imbitasyon alang ninyo nga makatabang—usa kini ka buluhaton, sa tinuod lang—kon pilion ninyo nga modawat niini. Sugdi karong gabhiona sa pagpahinungod og porsyon sa inyong panahon matag semana sa pagtuon sa tanan nga gisulti ug gibuhat ni Jesus sigun sa narekord diha sa Daang Tugon, kay Siya ang Jehova sa Daang Tugon. Tun-i ang Iyang mga balaod sigun sa narekord diha sa Bag-ong Tugon, kay Siya ang Kristo niini. Tun-i ang Iyang doktrina sigun sa narekord diha sa Basahon ni Mormon, kay walay basahon sa kasulatan diin ang Iyang wali ug ang Iyang pangalagad mas klarong gipadayag. Ug tun-i ang Iyang mga pulong sigun sa narekord diha sa Doktrina ug mga Pakigsaad, kay Siya nagpadayon sa pagtudlo sa Iyang katawhan niini nga dispensasyon.
Mahimong usa kini ka dakong buluhaton, apan awhagon ko kamo sa pagdawat niini. Kon mopadayon kamo sa pagkat-on sa tanan nga inyong mahimo bahin ni Jesukristo, mosaad ko ninyo nga ang inyong gugma alang Kaniya, ug alang sa mga balaod sa Dios, molambo lapas pa sa inyong kasamtangang gihunahuna. Ako mosaad usab ninyo nga ang inyong abilidad sa pagbuntog sa sala molambo. Ang inyong tinguha sa pagtuman sa mga sugo molambo og maayo. Inyong mabantayan ang inyong kaugalingon nga mas makapalayo sa pagtubay ug pagpanglit-ag niadtong nagbiay-biay sa mga sumusunod ni Jesukristo. Aron matabangan mo, i-refer sa Giya ngadto sa mga Kasulatan alang sa mga reference ubos sa hilisgutan nga “Jesukristo.” 14
Tun-i ang tanan kon unsa si Jesukristo pinaagi sa mainampuon ug madasigong pagtinguha nga makasabut sa kahulugan sa matag usa sa Iyang nagkadaiyang mga tawag ug mga ngalan sa personal nga paagi alang ninyo. Pananglitan, Siya gayud ang inyong Manlalaban ngadto sa Amahan. Molaban Siya sa inyong habig. Mobarug Siya alang ninyo. Mosulti Siya alang ninyo, matag higayon, samtang kamo mopili nga mas mahisama Kaniya. 15
Ila-ilaha Siya pinaagi sa pagtuon sa tanan nga padayon Niyang gitudlo pinaagi sa Iyang buhi nga mga propeta ug mga apostoles. Tun-i ang “Ang Pamilya: Usa ka Pamahayag ngadto sa Kalibutan.” Tun-i ang dokumento nga “Ang Buhi nga Kristo.” Kining duha nadawat pinaagi sa pagpadayag. I-post kini sa internet ug kon asa ninyo kini makita matag adlaw.
Kadtong gipadayag nga mga pulong maoy gituohan sa matag tinuod nga Santos sa Ulahing mga Adlaw. Pag-ampo alang sa pagsaksi nga kadtong mga kamatuoran nagrepresentar sa balaanon nga balaod. Pagkat-on sa pagpahayag niadtong mga kamatuoran diha sa inyong kaugalingong mga pulong. Pagpraktis! Dayon pag-ampo ug pangita og mga oportunidad sa pagsulti bahin sa unsay inyong gituohan. Ang inyong abilidad sa pagpangulo ug pagbaton og matarung nga impluwensya molambo samtang buhaton ninyo kini.
Sa umaabut nga adlaw, inyong ipresentar ang inyong kaugalingon atubangan sa Manluluwas. Mapuno kamo sa pagbati ngadto na sa punto nga makahilak nga maanaa sa Iyang balaang presensya. Manlimbasug kamo sa pagpangita og mga pulong sa pagpasalamat Kaniya tungod sa pagbayad sa inyong mga sala, sa pagpasaylo ninyo sa bisan unsa nga pagkadili mabination ngadto sa uban, sa pag-ayo ninyo gikan sa mga kasakit ug pagkadili makiangayon niining kinabuhia.
Pasalamatan ninyo Siya tungod sa paglig-on ninyo sa pagbuhat sa imposible, sa paghimo sa inyong mga kahuyang ngadto sa mga kalig-on, ug sa paghimong posible nga makapuyo kamo uban Niya ug sa inyong pamilya sa kahangturan. Ang Iyang pagkatawo, Iyang Pag-ula, ug Iyang mga hiyas mahimong personal ug tinuod nganha ninyo.
Apan dili kinahanglang maghulat mo hangtud nianang panahona. Pilia nga mahimong usa sa Iyang tinuod nga mga disipulo karon. Mahimong usa kinsa tinuod nga nahigugma Kaniya, kinsa tinuod nga gustog moserbisyo ug mangulo sama sa Iyang gibuhat. 16
Kita ang Iyang katawhan! Ubos kita sa pakigsaad nga dad-on ang mensahe sa ebanghelyo ngadto sa matag kanasuran, kaliwatan, pinulongan, ug katawhan. Samtang magtrabaho kita sa tinuyo nga paagi nga mahimong matarung nga mga lider, mahimo kitang maghiusa sa pagkanta og, “Magpadayon kita sa buluhaton sa Ginoo.” 17
Karon, isip usa sa Iyang mga Apostoles, nangamuyo ko niadtong mga yawe aron magbilin og panalangin sa matag usa kaninyo. Panalanginan ko kamo nga makakat-on sa mga balaod sa Dios ug mosunod niini. Panalanginan ko kamo nga mahimong maayo nga ehemplo, sa pulong ug sa buhat, sa usa ka tinuod nga disipulo ni Jesukristo. Panalanginan ko kamo nga mahimong gawasnon sa sala, nga mapadan-ag ang kaayo ug kahayag sa paagi nga modani sa uban aron gustong masayud ug mobati sa tinubdan sa inyong kahayag. Panalanginan ko kamo og kalampusan sa inyong mga paningkamot kalabut sa edukasyon ug panarbaho. Panalanginan ko kamo nga magtinguha ug moatiman sa inyong mahiyason nga kauban. Ug panalanginan nako ang matag usa ninyo nga mahimong matarung nga lider sa inyong pamilya, komunidad, nasud, ug sa Simbahan.
Sa ingon ako mopanalangin kaninyo, ug mamahayag nga ang Dios buhi! Si Jesus mao ang Kristo! Iya kini nga Simbahan! Sa ingon ako mopamatuod sa sagradong pangalan ni Jesukristo, amen.
© 2017 sa Intellectual Reserve, Inc. Ang tanang mga katungod gigahin. Pagtugot sa Iningles: 10/16. Pagtugot sa paghubad: 10/16. Hubad sa “Prophets, Leadership, and Divine Law.” Cebuano. PD60002798 853