Ngā Rauemi
Upoko 17: Ko ngā Kaiaru o Ihu Karaiti
Image
Abraham on the Plains of Mamre [Āperahama i ngā oki o Mamere], nā Grant Romney Clawson

I mahi kawenata ai a Āperahama me te Ariki.

Upoko 17

Ko ngā Kaiaru o Ihu Karaiti

He rerekē ngā kaiaru o Ihu Karaiti i ētahi atu tāngata. Ko wai Āna kaiaru? Nā te aha rātou i rerekē ai?

E aroha ana ngā kaiaru o Ihu i tō tātou Matua i te Rangi

Ko ngā kaiaru o Ihu, he tangata e whakapono ana ki a Ia, ā, e whakarongo ana hoki ki a Ia. Ka ako rātou i te mahere o tō tātou Matua i te Rangi e ai ki tēnā e whakaakongia ana ki a rātou e Ihu, ā, e hiahia ana rātou ki te whai i taua mahere. E aroha ana rātou ki tō tātou Matua i te Rangi, ā, e whakapono ana rātou e hiahia ana Ia i te oranga papai rawa atu mō rātou. E whakapono ana rātou ko Ihu te Tama a tō tātou Matua i te Rangi. E whakapono ana rātou ko Ihu tō rātou Kaiwhakaora. E whakapono ana rātou, nā Ihu, e āhei ai rātou te hoki atu ki tō tātou Matua i te Rangi noho ai. E whakapono ana rātou, mā te aru anake i a Ihu me te mau ki Āna whakahaunga, ka whakamurua ai rātou i ō rātou hara, ā, ka hoki anō ki tō tātou Matua i te Rangi.

Ka tuku whakawhetai te hunga e aru ana i a Ihu ki te Atua rāua ko Ihu, mō ngā mea katoa kua mahia ai e te Atua rāua ko Ihu mā rātou. E hiahia ana rātou te whakarongo ki a Ihu. Ka rīpenetā rātou i ō rātou hara. Ka rumakina rātou, ā, ka whiwhi i te takohatanga o te Wairua Tapu. E mārama ana rātou, e whai tikanga nui ana ngā tāngata katoa ki te Atua. E ngana ana rātou ki te kimi huarahi hei āwhina i ētahi atu tāngata.

Ka mahi taurangi tapu ngā kaiaru o Ihu. Ka kī taurangi ai rātou ki tō tātou Matua i te Rangi, kia karangahia ai rātou mā te īngoa o Ihu Karaiti. Ko te tikanga o tēnei, ka mōhiotia hei mema o Tōna Hāhi, kia whakaaetia ai, ā, kia aru i Āna whakaakoranga katoa, me te maumahara hoki ki a Ia i ngā wā katoa. Ka kī taurangi hoki rātou kia aroha ai ki ētahi atu tāngata, ā, me te āwhina hoki i a rātou.

Ka mahi taurangi tapu tō tātou Matua i te Rangi me ngā kaiaru o Ihu. Ko ētahi o ngā mea ka kī taurangi Ia:

  1. Ka whakaaetia rātou hei mema o te Hāhi o Ihu Karaiti.

  2. Ka hoatu ki a rātou i te takohatanga o te Wairua Tapu.

  3. Ka āwhina i a rātou kia whiwhi ai ki ngā mea e whai tikanga nui nei ki a rātou.

  4. Ka hoatu i Tōna kaha ki a rātou kia mahia ai Āna mahi.

  5. Ka manaakitia rātou inaianei tonu, ā, āke ake tonu atu.

  6. Ka whakaaetia ai kia hoki atu rātou ki Tāna taha noho ai mehemea ka ū tonu rātou ki te whakarongo ki a Ihu.

Hei Matapaki

  • He aha te rerekētanga o ngā kaiaru o Ihu ki ērā atu tāngata?

  • He aha tā ngā kaiaru a Ihu e kī taurangi nei ka mahia e rātou?

  • He aha ngā mea e kī taurangi ai tō tātou Matua i te Rangi rāua ko Ihu ki ngā kaiaru o Ihu?

Image
Moses Calls Aaron to the Ministry [Ka karanga a Mohi i a Ārona ki te Minitatanga], nā Harry Anderson

I hoatu a Mohi i te tohungatanga ki a Ārona mā te whakapānga o ngā ringaringa.

Ka hoatu a Ihu i te tohungatanga ki ngā mema tāne whaipai o te hāhi

Ka hoatu a Ihu i te mana ki ngā tāne whaipai o te hāhi hei āwhina i a Ia i roto i Āna mahi. Kua karangahia tēnei mana ko te tohungatanga. I hoatu tō tātou Matua i te Rangi i tēnei mana ki a Ihu.

He manaakitanga nui te pupuri i te tohungatanga. He mana tapu te tohungatanga. Ko aua tāne anake he kaiaru tūturu o Ihu, ā, e mahi pono ana kia mau ai ki Āna whakahaunga, ko rātou anake e whakaaetia ana kia pupuri i te tohungatanga.

Ina puritia te tohungatanga e tētahi tāne, ka taea e ia te mahi i ētahi mea, ngā mea nei e hiahiatia ana e Ihu kia mahia ai e ia. Ka taea e ia te whakaako i ētahi atu mō tō tātou Matua i te Rangi rāua ko Ihu, ka taea e ia te rumaki i a rātou, ā, me te hoatu ki a rātou i te takohatanga o te Wairua Tapu. Ka taea e te tane e pupuri ana i te tohungatanga te manaaki i tōna whānau mehemea e māuiuia ana rātou, ā, mehemea kua pāngia rānei e ngā momo raruraru. E whakapono ai te tangata ki a Ihu me te whakarongo ki Āna whakahaunga, ka hoatungia e Ihu te tohungatanga ki a rātou me ētahi atu manaakitanga anō hoki.

Hei Matapaki

  • He aha te tohungatanga?

  • He aha e hoatungia ai e Ihu te tohungatanga ki ngā mema tāne whaipai o te Hāhi?

He tokomaha ngā tāngata i whakapono ki a Ihu, ā, i mau hoki ki Āna whakahaunga i mua tonu i Tana haerenga mai ki te ao

I whakapono a Ārama rāua ko Iwi me ētahi o ā rāua tamariki ki a Ihu, ā, i aru i Āna whakahaunga i mua i Tana haerenga mai ki te ao

I kī atu tō tātou Matua i te Rangi ki a Ārama rāua ko Iwi, kia whakapono ai ki a Ihu Karaiti me te mau ki Āna whakahaunga. I kōrerotia ai kia rāua, a tōna wā haere mai ai Ia ki te ao. I kī taurangi a Ārama rāua ko Iwi, ka whakarongo rāua. I whakatinanahia e rāua taua kī taurangi. I rumakina rāua, ā, i whiwhi i te takohatanga o te Wairua Tapu.

I mua i te haerenga mai o Ihu ki te ao, i hoatu Ia i te tohungatanga ki a Ārama. I whakaae Ia kia hoatungia ai e Ārama te tohungatanga ki āna tama ka whakarongo ki a Ihu. I whakapā a Ārama i ōna ringaringa ki te māhunga o tēnā me tēnā o āna tama ngohengohe, ā, i hoatu ki a rātou i te tohungatanga. A muri ake, i pērā tonu te hoatutanga a ngā tama a Ārama i te tohungatanga ki ā rātou ake tama.

Hei Matapaki

  • I aha a Ārama rāua ko Iwi kia meinga ai rāua hei kaiaru o Ihu?

  • I pēhea tā ngā kaiaru a Ihu whiwhinga i te tohungatanga?

I whakamana a Āperahama i a Ihu, ā, i aru i Āna whakahaunga

I whakapono a Āperahama me tōna whānau ki a Ihu. I whakapono rātou, ā tōnā wā haere mai ai Ia ki te ao. I kī taurangi a Āperahama ki tō tātou Matua i te Rangi, ka whakarongo ia ki a Ihu, ā, ka mahi i Āna mahi. I kī taurangi tō tātou Matua i te Rangi ki a Āperahama, mehemea ka ngohengohe ia, ka manaaki tō tātou Matua i te Rangi i a ia me ōna uri. Ko ēnei ētahi o ngā mea i kī taurangi ai tō tātou Matua i te Rangi:

  1. Ka hoatu Ia i te tohungatanga ki a Āperahama me ōna uri.

  2. Ka hoatu Ia ki a Āperahama me ōna uri, he whenua hei nohoanga mō rātou.

  3. Ka hoatu e Ia ngā uri tokomaha ki a Āperahama.

  4. He tokomaha ngā uri o Āperahama ka meinga hei kaiaru o Ihu.

  5. He tokomaha ngā uri o Āperahama ka kōwhiri ki te mahi i ngā mahi ā Ihu, ā, ki te whakaako hoki i ētahi atu mō tō tātou Matua i te Rangi rāua ko Ihu.

I whakaako a Āperahama i āna tamariki kia whakapono ai ki a Ihu me te mau ki Āna whakahaunga. I hoatu a Āperahama i te tohungatanga ki tana tama, ko Īhaka tōna ingoa. I hoatu a Īhaka i te tohungatanga ki tana tama a Hākopa. A muri ake, i panonitia te ingoa o Hākopa e tō tātou Matua i te Rangi ko Iharaira. Tekau mā rua ngā tama a Iharaira. I whakaako ia i a rātou kia whakapono ai ki a Ihu, me te mau ki Āna whakahaunga. I a rātou te tohungatanga. Ko ngā uri o ngā tama a Iharaira, i karangahia ai ko ngā iwi tekau mā rua o Iharaira.

Hei Matapaki

  • He aha ngā mea i kī taurangi ai tō tātou Matua i te Rangi ki a Āperahama?

  • Ko wai a Iharaira?

I whakapono ngā tāngata o Iharaira ki a Ihu, ā, i mau ki Āna whakahaunga

Nō te mea kāore he rawaka te kai i tō rātou ake whenua, i haere a Iharaira me āna tama ki tētahi whenua e kīa nei ko Īhipa noho ai. I tōna wā, i meinga ai ngā uri o Iharaira kia mahi kaha ai e ngā tāngata i noho ki Īhipa. I meinga rātou kia noho ai ki Īhipa hei pononga mā rātou. Kāore i whakaae kia hoki atu rātou ki te whenua i kī taurangi ai a Ihu ka hoatu ki a rātou.

He maha ngā tau ka pahure ake, i kōwhiri tō tātou Matua i te Rangi i tētahi tāne ko Mohi tōna ingoa, hei ārahi i ngā uri o Iharaira i waho atu i Īhipa. I whakamahi a Mohi i te kaha o te tohungatanga hei āwhina i a rātou ki te puta atu i ngā tāngata o Īhipa. I ārahi Ia i a rātou ki te whenua i kī taurangi ai a Ihu ka hoatu ai ki a rātou. I karangahia tēnei whenua ko Kānana. I kitea ai tēnei whenua i te taha hauāuru o te Awa Hōrano me Te Moana Mate.

Hei Matapaki

  • Nā tēhea kaha i mahi ai a Mohi hei āwhina atu i tō Ihu iwi kia puta ai i Īhipa?

I whakamutu ngā tāngata o Iharaira ki te whakapono ki a Ihu

I muri i te nohoanga o ngā tāngata o Iharaira i te whenua o Kānana mō ngā tau maha, i whakamutu tō rātou whakapono ki a Ihu me te mau ki Āna whakahaunga. I tono poropiti a Ihu ki te kōrero atu ki a rātou kia rīpenetā ai, ā, kia mau ki Āna whakahaunga. Ko Ihāia, ko Irāia, ā, ko Heremaia ētahi o aua poropiti i tonoa ai e Ihu. He tokomaha kē atu hoki ngā poropiti.

Heoi, kāore ngā tāngata o Iharaira i rīpenetā ai. Nā wai rā, i whakaae tō tātou Matua i te Rangi kia whakahaeretia ai rātou e hunga kē atu, kia raupatuhia ai ō rātou whenua, ā, kia whakamararatia ai hoki rātou ki whenua kē atu. He mea whakaiti tēnei i te iwi, ā, i meinga ai rātou kia whakamaharatia ai a Ihu, me te whakarongo ki a Ia. Heoi, i ētahi tau ruarua i mua i te whānautanga mai o Ihu i Peterehema, i huri kino anō ngā tāngata o Iharaira, ā, nā wai rā i whakaae tō tātou Matua i te Rangi kia hopukina ai ngā tāngata o Iharaira e ngā Rōma. I a rātou te mana whakahaere o ō rātou whenua me ō rātou whare tapu.

Hei Matapaki

  • I ahatia i te wā i wareware ai te iwi i ō rātou kawenata ki tō tātou Matua i te Rangi, ā, me tō rātou whakamutu ki te whakarongo ki a Ihu?

I haramai a Ihu ki te ao, ā, i whakarite Ia i ōna kaiaru

I te haerenga mai o Ihu ki te ao, i whakaako Ia i ngā tāngata, ko Ia te Tama a te Atua. I whakaako Ia, e kore rātou e whakamamaetia mō āke tonu atu mō ō rātou hara ki te whakarongo rātou ki Āna whakaakoranga. I kī Ia ki a rātou kia whakapono ki a Ia, ā, kia rīpenetā ai. I kī Ia me rumaki ai rātou. I kī taurangi Ia kia tonoa ai te Wairua Tapu hei āwhina i a rātou. I whakaako Ia i a rātou kia arohaina ai, ā, kia whakarongo ai hoki ki te Atua. I whakaako Ia i a rātou kia aroha ai ki ētahi atu tāngata, ā, kia āwhina hoki i a rātou.

Ko ngā tāngata i whakapono ai ki a Ihu, ā, i whakarongo hoki ki a Ia, i meinga ai rātou hei kaiaru o Ihu. I whakarōpuhia e Ia Tāna iwi hei rōpu e kīa nei ko Te Hāhi o Ihu Karaiti. I hoatu Ia i te tohungatanga ki ngā tāne i noho ai hei kaiārahi, ā, hei kaiako hoki mō Tōna Hāhi.

Hei Matapaki

  • I āwhina pēhea a Ihu i ngā tangata kia aru ai rātou i a Ia?

  • I ahatia ngā tāngata kia meinga ai rātou hei kaiaru o Ihu?

He hōnore nui kia meinga ai he kaiaru o Ihu

E harikoa ana te hunga e aru ana i a Ihu. E mōhio ana rātou ki te mahere o tō tātou Matua i te Rangi mā rātou. E mōhio ana rātou, e aroha ana tō tātou Matua i te Rangi ki a rātou. E mōhio ana rātou, e hiahia ana Ia kia aru rātou i a Ihu, kia āwhina a Ihu i a rātou kia hoki atu ai ki a Ia. E mōhio ana rātou i ngā mea me mahi kia harikoa ai. Kei a rātou te takohatanga o te Wairua Tapu hei āwhina i a rātou, ā, hei whakaāhuru i a rātou. Kia toko ake ētahi rauraru, e mōhio ana rātou ka āwhina a Ihu i a rātou. E mōhio ana rātou ka manaaki te Atua i a rātou mō tō rātou whakapono ki te aru i a Ihu.

He ngākau whakamoemiti ō te hunga e aru ana i a Ihu, mō ngā manaakitanga maha e hoaturia ai ki a rātou e tō tātou Matua i te Rangi. Ka tuku whakamoemiti rātou ki tō tātou Matua i te Rangi mō ērā manaakitanga i roto i ō rātou nei inoi.

Ka taea e rātou te hunga ehara i te kaiaru o Ihu te meinga hei kaiaru Ōna. Ka taea e rātou te ako Mōna mā te pānui i ngā karaipiture, ā, mā te whakarongo hoki ki ngā kaiārahi o Tōna Hāhi. Ka taea e rātou te whakapono ki a Ia, te rīpenetā, ā, me te rumaki. Ki te whakarongo rātou ki a Ihu, ka taea e rātou te whiwhi i ngā mea kua kī tāurangihia ai mai rānō e te Atua ki ngā kaiaru o Ihu.

Hei Matapaki

  • He aha te take he hōnore nui kia meinga ai hei kaiaru o Ihu?