Upoko 14
Rīpenetātanga
Ka pōuri tātou i ngā mahinga hē. Me pēhea tātou e harikoa anō ai i muri i tā tātou mahi i tētahi mea hē?
I whakamahere tō tātou Matua te Rangi i tētahi huarahi kia whakatikahia ai ō tātou hara
I mōhio tō tātou Matua i te Rangi, ka mahi hē tātou katoa i te ao nei. Ko ngā mea hē e mahi ai tātou, e kīa nei ko te hara. Ka hara tātou ki te mahi tātou i ngā mea i tohungia ai e te Atua kia kaua e mahi. Ka hara hoki tātou ki te kore tātou e mahi i ngā mea i tohungia ai e te Atua kia mahia.
E kore tō tātou Matua i te Rangi e hara, ā, e kore Ia e whakaae kia ora ngā tāngata e hara ai ki Tōna taha. Kia ora ai i Tōna taha, me rīpenetā tātou i ō tātou hara. Ko te tikanga o te rīpenetā, ka rongo tātou i te pōuri mō ō tātou hara, ā, ka whakamutua atu te mahi i aua hara.
E aroha ana tō tātou Matua i te Rangi ki a tātou. Kāore Ia i te hiahia kia taupātia ai tō tātou hokinga atu ki a Ia e ō tātou hara. Nō reira, i whakamaheretia e Ia tētahi huarahi hei āwhina i a tātou.
I tono tō tātou Matua i te Rangi i a Ihu hei āwhina i a tātou ki te rīpenetā i ō tātou hara. Ka whakaako a Ihu i a tātou i ngā mea me mahi, kia karo i te hara. Ka homai hoki Ia i te kaha ki a tātou kia mahia ai ēnei mea. Ki te whakapono tātou ki a Ia, ā, ki te aru hoki tātou i a Ia, ka panoni Ia i ō tātou ngākau kia kore tātou e hiahia ki te hara, heoi ki te mahi anake i te pai. Ki te kore tātou e hiahia ana kia whakamamaetia mō ō tātou hara, me whakapono i a Ihu. Ka rīpenetā te hunga e tino whakapono nei i a Ihu i ō rātou hara.
Inā whakapono tātou ki a Ihu me te rīpenetā, ka utua te whakamamaetanga o Ihu i ō tātou hara, ā, ka horoia tātou. Ka āhei tātou ki te hoki atu ki tō tātou Matua i te Rangi nō te mea he mā tātou.
Hei Matapaki
-
He aha te tikanga o te rīpenetā?
-
He aha e hiahia ai tō tātou Matua i te Rangi kia rīpenetā ai tātou i ō tātou hara?
-
He aha te hunga e tino whakapono ana ki a Ihu e rīpenetā ai i ō rātou hara?
Kua kī mai tō tātou Matua i te Rangi me aha tātou kia rīpenetā ai
Kia rīpenetā ai, me whakapono tātou ki a Ihu me ngā mea i whakaakongia e Ia. Me whakapono tātou i whakamamaetia Ia mō ō tātou hara. Me whakapono tātou, ko Ia anake te Mea i āhei ai te utu i ō tātou hara. Me whakapono tātou, e hiahia ana Ia kia whakatikahia ai ō tātou hara, ā, Māna hoki tātou e āwhina. Me kaha tātou ki te mahi i ngā mea ka whakahaua mai e Ia ki a tātou.
Inā rīpenetā ai tātou, ka whakaae tātou kia panonitia tātou e Ihu kia meinga ai tātou ki tērā e hiahiatia ana e Ia. Ka whakamutua tātou te mahi i te hē, ā, ka mahi kē i ngā mea tika. Mehemea kua kōrero tātou i ngā mea kāore i te tika, ka whakamutua atu tātou i tērā, ā, ka kī anake i ngā mea pono. Mehemea kua tāhae tātou i tētahi mea, ka whakahoki atu tātou i taua mea ki te tangata nāna tonu taua mea, ā, ka whakamutua hoki te mahi tāhae. Mehemea kua mahi hē tātou ki ētahi atu, ka whakamutua tērā, ā, ka aroha atu ki a rātou.
Inā rīpenetā ai tātou, ka mahi tātou i ēnei mea e whai ake nei:
Ka whāki tātou ki a tātou anō kua hara nei tātou. Ka mōhio tātou kei te hara mehemea kāore tātou i te whakarongo ki tō tātou Matua i te Rangi. Kia rīpenetā ai tātou, kāore he takunga mō te mahi i ngā mea hē. Ka whakaae tātou ki ā tātou mahi hē, ā, ka hiahia hoki tātou ki te panoni.
Ka pōuri tātou mō ngā mea hē kua mahia e tātou. Inā rīpenetā ai tātou, ka tino pōuri tātou mō te mahi i ngā mea hē. Kāore tātou mo te whakahua noa iho i te kupu pōuri hei whakaatu i te pōuri mō ō tātou hara. Ka pono tō tātou pōuri, ā, ka hiahia kia whakakorengia aua mahi hē i mahia ai. Ka hiahia hoki tātou ki te mahi i ngā mea ka whakahaungia mai ki a tātou e tō tātou Matua i te Rangi.
Ka whakamutua e tātou te mahi i ngā mea hē. Ki te whakaae anake tātou ki ō tātou hara, ā, ki te kī noa iho e pōuri ana tātou, ehara tērā i te rīpenetā tūturu. Kia rīpenetā pono ai, me mutu hoki tātou ki te mahi i ngā mea hē. I ētahi wā, ehara i te mea ngāwari kia whakamutua ai, heoi i haramai a Ihu ki te ao kia whiwhi ai tātou i te āwhina e hiahiatia ana e tātou. E hiahia ana tō tātou Matua i te Rangi kia whakaae tātou ki te āwhina o Ihu, nō te mea, ko tērā anake te huarahi e meinga tātou kia kohakore ai, ā, kia hoki anō ki te Atua noho ai.
Ka whāki tātou i ō tātou hara. I roto i Te Hāhi o Ihu Karaiti o te Hunga Tapu o ngā rā o Muri Nei, ko te tikanga o te whāki, he mea kōrero ki tō tātou Matua i te Rangi me tētahi kaiārahi o te hāhi mō ā tātou mahi hē. Ko ētahi o ō tātou hara ka whai pānga noa iho ki a tātou anō. I a tātou e inoi ana ki tō tātou Matua i te Rangi, me kōrero tātou ki a Ia e pā ana ki ēnei hara. Me pātai tātou ki a Ia kia murua ai aua hara, ā, kia āwhina hoki i a tātou kia whakatikahia aua hara. Mehemea e whai pānga ai ō tātou hara ki tētahi atu, me whāki atu tātou i aua hara ki taua tangata tonu, ā, ki te Atua anō hoki. Me whāki tātou i ngā hara tino kino, pērā i te pūremutanga, ki tō tātou kaiārahi o te hāhi, pērā i tō tātou Pīhopa,* te Tumuaki rānei o tō tātou peka.*
Ka ngana tātou ki te mahi i ngā mea e taea ana hei whakatika i ō tātou hē. Inā rīpenetā ai tātou, ka whakatika tātou i ngā mea hē kua mahia ai e tātou. Hei tauira, mehemea kua tāhae tātou i tō tātou hoa tata, ka whakahokia atu taua mea i tāhaengia e tātou. Mehemea kāore i a tātou te mea i tāhaengia, ka hokona he mea hou, ka utua rānei mō taua mea.
Ka whakamuru tātou i ngā hara o ētahi atu. Kua whakahaua tātou e tō tātou Matua i te Rangi kia whakamuru ai tātou i ngā hara o ētahi atu. Ki te hiahia tātou kia whakamurua ai ō tātou hara e Ia, me whakamuru tātou i ngā hara o ētahi atu. Ki te mauāhara tātou ki ētahi atu mō ā rātou mahi hē, ā, ki te kore hoki tātou e whakamuru i a rātou, e kore tō tātou Matua i te Rangi e whakamuru i ō tātou hara.
Ka manawanui tātou ki te mau ki ngā whakahaunga katoa a Ihu mō te katoa o ō tātou nei oranga. Ka kaha tonu tātou ki te panoni i ā tātou mahi hē, kia mahi rānō tātou i ngā mea tika. Ka manawanui tātou ia rā ki te whakatika i ngā mea kino e mahia ai e tātou.
Me rīpenetā tātou i ia wā e hē ai tātou. Tērā pea ka whakaaro tātou he mea uaua kia rīpenetā i tēnei wā tonu. Tērā pea ka whakaaro tātou he ngāwari ake kia rīpenetā ā muri ake nei, heoi e kore e pērā. He uaua kia rīpenetā ai mehemea ka tāria te wā kia mahia ai. E kore hoki tātou e tipu ā-wairua, nō te mea tē taea e Ihu te āwhina i a tātou ki te ako e pā ana ki tō tātou Matua i te Rangi, ā, me pēhea rānei e whakarite i a tātou anō kia hoki atu ai tātou ki Tana taha noho ai, mehemea e kore tātou e rīpenetā. Ia wā e mārama ai tātou ki ā tātou mahinga hē, me tere tonu tā tātou rīpenetā.
Hei Matapaki
-
Me aha tātou kia rīpenetā ai?
Ka taea e tēnā me tēnā o tātou ki te rīpenetā
Ka taea e tēnā me tēnā o tātou ki te rīpenetā. I ētahi wā, he uaua pea kia rīpenetā ai tātou. Tērā pea ka whakaaro tātou, tē taea te whakatika i ō tātou ngoikoretanga. E hiahia ana a Hātana kia whakapono ai tātou ki ēnei whakaaro, mā reira e mahi tonu ai tātou i ngā mea hē. Me mahara tātou, ka taea e tātou te rīpenetā. Tē taea e tātou te mahi ko tātou anake. Me whai āwhina tātou. He tamariki tātou katoa nā tō tātou Matua i te Rangi, ā, kua tono mai Ia i a Ihu hei āwhina i a tātou. Mā e āwhina o Ihu, ka taea e tātou te mahi i ngā mea katoa kua whakahaungia ai tātou kia mahia ai e tō tātou Matua i te Rangi.
Ka āwhina a Ihu i a tātou ki te rīpenetā, mehemea ka inoi tātou ki tō tātou Matua i te Rangi mō te āwhina o Ihu. E hiahia ana Rāua ko tō tātou Matua i te Rangi kia mahi ai tātou i ngā mea tika. Kāore rāua i te rata ki ngā mea hē e mahia ai e tātou. Heoi, e aroha tonu ana Rāua ki a tātou, ahakoa mahi ai tātou i ngā mea hē. E hiahia ana Rāua kia rīpenetā ai tātou, mā reira e whakamurua ō tātou hara e tō tātou Matua i te Rangi, ā, e harikoa ai hoki tātou.
Hei Matapaki
-
He aha te take me rīpenetā tātou, ahakoa i ētahi wā he uaua pea?
-
Mā wai tātou e āwhina kia rīpenetā ai tātou?
Ka whakamānawatia tātou e tō tātou Matua i te Rangi ina rīpenetā tātou
Inā whakapono tātou ki a Ihu me te rīpenetā, ka whakamurua rawatia tātou e tō tātou Matua i te Rangi. Ehara i te mea me māharahara tātou mō te whakamamaetanga mō ō tātou hara. Ehara i te mea ka whakamuru anake Ia i ō tātou hara; ka āwhina hoki Ia i a tātou kia kore tātou e hiahia ki te hara, engari ki te mahi i ngā mea pai anake i ngā wā katoa. Ka homai a Ihu i tēnei āwhina.
Me maumahara tātou, e kore tātou e meinga kia pērā tonu ki tō tātou Matua i te Rangi i te wā kotahi. Heoi, kia ū tonu tō tātou whakapono ki a Ihu, ā, kia rīpenetā ai i ō tātou hara me te whakarongo ki a Ihu, ka whakamuru tonu tō tātou Matua i te Rangi i ō tātou hara. Ka āwhina tonu a Ihu i a tātou. Ka meinga tonu tātou kia pērā rawa ki tō tātou Matua i te Rangi. Ā tōna wā, ka āhei tātou ki te hoki ki tō tātou Matua i te Rangi noho ai.
Inā rīpenetā ai tātou, ka harikoa tātou. E kore tātou e pōuri mō ngā mea hē kua mahia ai e tātou, heoi ka harikoa tātou i te mea kua whakatikahia ō tātou ngoikoretanga me te āwhina o Ihu. Ka mōhio tātou kei a tātou tonu te kaha ki te kaupare atu i ngā whakawainga me te mahi i ngā mea tika.
Hei Matapaki
-
He aha ngā whakamānawa e whiwhi ai tātou ina rīpenetā ai tātou?