Upoko 26
Ngākaupono
He pono tō tātou Matua i te Rangi i roto i Āna mahi katoa. E hiahia ana Ia kia pono hoki tātou i roto i ā tātou mahi?
Ka Tohutohu Tō Tātou Matua i te Rangi i a Tātou, kia Pono Tātou i roto i ā Tātou Mahi Katoa
Ko te tikanga o te ngākaupono, ko te kōrero pono i ngā wā katoa. Ko te tikanga o te ngākaupono, ko te rūkahu kore, te tāhae kore rānei. Ina kōrero tātou i ngā mea kāore i te pono, kei te rūkahu tātou. Ina tōia e tātou ētahi atu kia whakapono ai ki tētahi mea kāore i te pono, kāore tātou i te ngākaupono.
Ko te tāhae ia te tango atu i tētahi mea nō tētahi atu kīhai taua tangata i whakaae mai. Ki te tango atu i tētahi mea mai i te toa kīhai i utua, he tāhae. Kua tohua mai e tō tātou Matua i te Rangi kia kaua e tāhae.
Ka kaha rawa te mahi a te hunga ngākaupono i ngā hāora katoa e utua ana rātou. Ka utua e ngā rangatira ngākaupono ā rātou kaimahi e ai ki ngā utu e tika ana. E tika ana tā te hunga ngākaupono utu mō ā rātou mahi, mō ā rātou mea e hokona atu ai. Me ngākaupono tātou mehemea kei te hiahia tātou ki te noho tahi me tō tātou Matua i te Rangi.
E ngana ana a Hātana ki te whakawai i a tātou kia tinihanga tātou. Ina tinihanga tātou, e whai ana tātou i a Hātana. E rata ana a Hātana ki te rūkahu. E hiahia ana a Hātana kia whakaaro tātou he mea atamai ngā mahi tinihanga. E ngana ana ia ki te whakaawe i a tātou, kia whakaaro ake tātou ka harikoa ina mahi tinihanga tātou. E hiahia ana ia kia whakaaro tātou, kāore te mahi tinihanga i te hara. E hiahia ana a Hātana kia tinihanga tātou kia kore ai tātou e harikoa.
Kua whakaako tō tātou Matua i te Rangi i a tātou kia pono i ngā wā katoa. Ka pōuri Ia ina rūkahu tātou. E hiahia ana Ia kia mōhio tātou, e hē ana te rūkahu i ngā wā katoa. E hē ana te tinihanga i ngā wā katoa, ā, kua kore tātou e koa i te mahi tinihanga.
Ka tāhae mea ētahi nā tō rātou pōhēhē nō rātou te tikanga ki aua mea. Ka tinihanga ētahi taiohi i te kura mō te māka pai, nā te mea rānei kei te pērā anō ētahi atu ākonga. Ka rūkahu ētahi e pai ai ngā whakaaro a ētahi atu mō rātou. Kāore tētahi o ēnei take i te take pai e tika ai te mahi tāhae me te mahi rūkahu. Ina tuku takunga tātou mō te rūkahu, kāore tātou i te ngākaupono.
Hei Matapaki
-
He aha te ngākaupono?
-
E whai ana tātou i a wai ina ngākaupono ana tātou?
Ka Taea e Tātou te Mahi Pono i ā Tātou Mahi Katoa
Ka ngākaupono tātou mā te māia ki te kōrero pono atu, ahakoa e uaua ana i ētahi wā. Mā tō tātou Matua i te Rangi tātou e āwhina ki te ngākaupono atu mēnā ka inoia Ia. Ka tukuna e Ia te Wairua Tapu ki te āwhina i a tātou ki te kōwhiri i te huarahi ngākaupono. Mā te Wairua Tapu tātou e āwhina kia mōhio ai he mea tika te mahi ngākaupono.
Ina mārama tātou i ngā akoranga a Ihu, ka hiahia tātou ki te mahi ngākaupono i ā tātou mahi katoa. Kua whakaakona mai tātou e Ihu he tamariki katoa tātou nā tō tātou Matua i te Rangi, ā, he teina, he tuakana, he tungāne, he tuahine tātou katoa. Kua whakaakona mai nei e Ia mā te ngākaupono anake tātou e tino harikoa pū ai. Kua kore tātou e tau mehemea kei ō tātou kāinga tētahi mea ehara nō tātou. Kua whakaakona mai nei e Ia, nā, mēnā he whakapono tōu i a Ia, ka rīpenetātia me te tino ngākaupono ka taea e tātou te hoki atu ki te noho tahi me tō tātou Matua i te Rangi i runga i te harikoa mō āke tonu atu.
Ina mārama tātou ki ēnei mea katoa, ka hiahia tātou ki te hīkoi i te ara ngākaupono. Kāore tātou e hiahia ki te rūkahu ki ētahi atu tāngata. Ka hiahia tātou ki te whaakakoa i tō tātou Matua i te Rangi e hoki atu ai tātou ki a Ia. Ka hiahia tātou ki te whāki atu i ō tātou hē me te whakatikatikahia ērā kia murua ai tātou e tō tātou Matua i te Rangi.
Hei Matapaki
-
Mehemea kua rūkahu tātou, ahakoa he rūkahu iti noa nei, me aha tātou e rīpenetā?
-
Me pēhea tātou e ngākaupono ai i ā tātou mahi katoa?
-
Ka pēhea tō tātou Matua i te Rangi e āwhina ai i a tātou kia ngākaupono ai tātou?
Ka Koa Tātou i te Ngākaupono
Ka koa tātou i ngā wā e ngākaupono ana tātou. Ka koa tō tātou Matua i te Rangi i a tātou. Kāore tātou i te kaniawhea. E pai ana te ngākau nā te mea e mōhio ana tātou kāore kau he mea e muna ana i ētahi atu. Kāore he take kia āwangawanga ai tātou ka kitea he rūkahu.
I a tātou e ngākaupono ana ka meinga tātou kia tata ake ki tō tātou Matua i te Rangi. E mōhio ana tātou e whakarite ana tātou ki te hoki ki Tana taha noho ai. I a tātou e ngākaupono ana, ka whakawhirinaki ētahi atu tāngata ki a tātou. I a tātou e ngākaupono ana, ka āwhina tō tātou Matua i te Rangi i a tātou kia whakatutuki i ngā mea tika e hiahiatia ana e tātou.
Hei Matapaki
-
E pēhea ana ō tātou ngākau i ngā wā e ngākaupono ana tātou?
-
Ka pēhea te āhua o te ao mehemea i ngākaupono ngā tāngata katoa?