Upoko 34
Te Manonga Tau
He aha te Manonga Tau? Ka pēhea te āhua o te oranga i runga i te whenua i te wā o te Manonga Tau?
Ka Noho ngā Tāngata Tika i runga i te Whenua i te wā o te Manonga Tau
Ina haere mai anō a Ihu, Māna te ao e whakahaere mō ngā tau 1,000. Ka mōhiotia tēnei wā ko te Manonga Tau.
Ko te Manonga Tau tētahi wā rongomau, he wā e tōtika anō ai ngā tāngata. Ka horoia e Ihu te ao i ngā hara i mua i te tīmatanga o te Manonga Tau. Ka whakangaromia ngā tāngata kino katoa. Ka whakaorangia ngā tāngata tika anake kia noho ai i runga i te whenua i tēnei wā. Kāore e whai kaha ana anō a Hātana i runga i ngā tāngata kia tata atu ki te pito whakamutunga o te Manonga Tau.
I kī mai te Poropiti a Hōhepa Mete ka tokomaha ngā tāngata mai i te rangi e torotoro mai nei ki te whenua i waenganui i te Manonga Tau. Ka āwhina rātou i ngā mahi e mahia nei i ngā temepara me ngā mahi mihingare.
Hei Matapaki
-
He aha te Manonga Tau?
-
Ko wai mā e noho mai nei i runga i te whenua i te wā o te Manonga Tau?
-
Me ngana ki te whakaaro ake ka pēhea te noho i tētahi wāhi kāore ōna whakarihariha.
Ka Meatia ngā Mahi Nui e Rua i te wā o te Manonga Tau
Ko te mahi nui tuatahi ko te mahi i ngā tikanga tapu i roto i te temepara mō te hunga ora me te hunga mate. Mā ngā tāngata kua ara ake i te mate e āwhina i te hunga e ora ana i runga i te whenua ki te kimi i ngā ingoa o ō rātou whanaunga kua mate me te whakatika i ngā hapa i roto i ngā tuhinga.
Ka mahia katoatia ngā tikanga tapu e tika ana kia hīria tahitia ai ngā whānau i roto i ngā temepara. Ka whakahonoa ngā whānau mai i tētahi whakatipuranga ki tētahi whakatipuranga tae noa atu ki a Ārama.
Ko te mahi nui tuarua ko te kauhautanga atu i te rongopai. Ka āhei ngā tāngata katoa ki te whakarongo atu me te whakaae atu ki te rongopai. Ka noho tonu ētahi tāngata pai ehara i te mema o tō Ihu Hāhi i runga i te whenua a te wā e tīmata ai te Manonga Tau. Heoi anō, meāke, ka mōhio ngā tāngata katoa, ā, ka kī ake ngā tāngata katoa ko Ihu te Kaiwhakaora o te ao.
Hei Matapaki
-
He aha ngā mahi nui e rua ka mahia i te wā o te Manonga Tau?
Ko te Āhua o te Oranga i te wā o te Manonga Tau
I te wā o te Manonga Tau, ka rite te ao ki tōna āhua i te wā i a Ārama rāua ko Iwi e noho ana i te Kāri o Erene. Kāore he pakanga i reira. Mā Ihu te Hāhi me te Kāwana e whakahaere. Ka whakatūria ngā ture katoa i runga i ngā mātāpono pono, i ngā mātāpono tika. Ka rua ngā pā matua. Kotahi i Hiruharama. Kotahi anō i Amerika ki te Raki, ko Hiruharama Hou.
Ka noho tahi ngā tāngata i runga i te rongomau me te aroha. Ka noho tahi katoa ngā kararehe, ko ngā mea anō e hoariri ana tētahi ki tētahi ināianei, i runga i te rongomau. E kore e whawhai tonu tētahi ki tētahi.
Kāore he mate urutā, ā, kāore he mate. Ina kaumātua haere te tangata, kāore rātou e mate pērā i a tātou i ēnei rā. Ka tīni rātou mai i tō tātou āhuatanga ināianei ki tētahi āhuatanga mate kore, koia ko tēnei, e kore rātou e mate anō.
He hōnore nui kia ora te tangata i te wā o te Manonga Tau. Ka mārama ngā mea kāore i te mārama ki a tātou i tēnei wā. Ka tino rite te āhua o te oranga ki te āhua ināianei, atu i te mea ka mahia ngā mea katoa i runga i te aroha me te rongomau. Ka whānau tonu mai, ka whakatupu tonu mai ngā tāngata i ngā tamariki, whakatō me te hauhake kai, me te hanga i ngā whare.
Hei Matapaki
-
Ka pēhea te āhua o te ao i te wā o te Manonga Tau?
Ka Tū Tētahi Whawhai Whakamutunga e Tata ana ki te Mutunga o te Manonga Tau
Hei te wā e tata mutu ana te Manonga Tau, ka tīmata a Hātana kia whai kaha anō i runga i te whenua. Ka whakapono ētahi tāngata ki a Ia. Ka whawhai a Hātana rātou ko te hunga e aruaru ana i a ki te hunga e aruaru ana i a Ihu. I tēnei pakanga, ka turakina a Hātana me te hunga e aruaru ana i a Ia mō āke tonu atu. Whai muri i tēnei pakanga, ka whakawākia ngā tāngata, ka whakatau atu he kīngitanga hei nohonga mō rātou, ā, koia nei tā rātou i whakaritea ai mō rātou anō.
Hei Matapaki
-
Ka aha hei te mutunga o te Manonga Tau?