Upoko 2
Tō tātou oranga i te Rangi
I ora tātou ki hea i mua i tō tātou whānautanga mai ki te ao nei? I aha tātou ki reira?
He Tamariki Tātou Katoa nā Tō Tātou Matua i te Rangi
I mua i tō tātou whānautanga mai ki tēnei ao, i ora ai tātou ki te Rangi. I runga noa atu te mīharo me te ātaahua o tō tātou kāinga i te Rangi, i ngā mea katoa e mōhiotia ana ki te ao nei. He whānau tō tātou i reira. I aroha tātou tētahi ki tētahi, ā, i harikoa ai. Ko te Atua, te Matua o ō tātou wairua, mō tēnei take, i ētahi wā, karangatia ai tātou ki a Ia, ko tō tātou Matua i te Rangi. Nō te mea ko Ia tō tātou Matua, e aroha ana Ia ki a tātou.
Ko ngā tāngata katoa e ora ana ki te ao nei, i mua atu, ko rātou tonu o tātou tuākana, teina i te Rangi. Ko Ihu Karaiti* te mātāmua o tō tātou whānau i te Rangi. Ko Ia tō tātou kauaemua.
Kāore he tinana kikōiwi ō tātou i te wā i noho ai tātou ki te Rangi, pērā i ō tātou tinana inaianei. He wairua kē tātou. He ōrite te āhua o te wairua ki te āhua o te tangata. Ā-wairua nei, i kōrero tētahi ki tētahi, i nekeneke haere, i kōwhiri tonu, i mōhio i te rerekētanga o te pai me te kino.
Kāore i ōrite tahi tātou i te Rangi. I rerekē tātou katoa, pērā tonu ki a tātou inaianei. He rerekē ō tātou awhero me ō tātou pūmanawa. I ako tātou me pēhea te whakamahi i ō tātou ake pūmanawa.
Hei Matapaki
-
He aha te āhua o tō tātou kāinga i te Rangi?
-
Ko wai tō tātou Matua?
-
Ko wai tō tātou kauaemua?
I mōhio tō tātou Matua i te Rangi ka taea e tātou te tipu, kia meinga ai tātou kia rite ki a Ia
Nō te mea, ko tō tātou Matua i te Rangi, te Matua o ō tātou wairua, i mātua mōhio Ia ki a tātou. I aroha Ia ki a tātou. I mōhio Ia, he mea tuku iho nāna ki a tātou, ngā āhuatanga ako katoa, me pēhea hoki e meinga ai kia pērā tonu ki a Ia. Ko Tōna hiahia, kia pai tātou, pērā ki a Ia.
Hei Matapaki
-
E pēhea ana ngā kare ā-roto o tō tātou Matua i te Rangi mō tātou, ā, he aha hoki ōna hiahia mō tātou?
-
E pēhea ana ōu ake kare ā-roto, nā te mōhio he Matua i te Rangi tōu?
I mua i tō tātou haerenga mai ki te ao, i noho ki te Rangi.
I hanga tō tātou Matua i te Rangi i tētahi mahere hei āwhina i a tātou
He maha ngā mea i ako ai tātou i te Rangi, he kaha anō tō tātou whakawhanake i a tātou anō. Heoi, he maha tonu ngā mea, tē taea e tātou te ako me te mahi ki reira. I hanga tō tātou Matua i te Rangi i tētahi mahere mō tātou kia taea te ako tonu.
I karangatia tātou e Ia ki tētahi hui i te Rangi. I reira tātou katoa. I whakamārama Ia i Tōna mahere ki a tātou, ā, i kī mai hoki, ki te whai tātou i Tōna mahere, ka meinga tātou pērā tonu ki a Ia.
I kōrero tō tātou Matua i te Rangi, ka hanga Ia i tētahi ao hei nohoanga mō tātou, mō tētahi wā. I te ao nei, kua kore tātou e maumahara i tō tātou oranga ki tōna taha i te Rangi. Ka taea e tātou te kōwhiri i te pai, te kino rānei. He momo whakamātautau tēnei, kia kite mehemea ka whakarongo tātou ki tō tātou Matua i te Rangi, i te wehenga atu i Tōna aroaro.
E ai ki te mahere o tō tātou Matua i te Rangi, ka riro tātou katoa i tētahi tinana kikōiwi. Mā tēnei momo tinana, e āhei ai tātou ki te ako me te mahi i ngā mea e mōhiotia ana, e mahia ana hoki e Ia. A muri ake, ka mate tātou, ā, ka wehe atu ō tātou wairua i ō tātou tinana kikōiwi. Heoi, ā tōna wā, ka hono anō ō tātou wairua me ō tātou tinana, ā, e kore tātou e mate anō. Ko rātou i mahi i ngā mea i tohutohungia e tō tātou Matua i te Rangi, ko rātou ngā mea ka hoki atu ki Tōna taha noho ai mō āke tonu atu.
I ako tātou, ka pāngia tātou katoa e ngā momo raruraru i te ao nei, pērā i ngā māuiuitanga, ngā mamaetanga, te pōuritanga, me te mate. Heoi, i mārama tātou, he akoranga kei roto i ēnei āhuatanga katoa. Ka whakaako ēnei raruraru i a tātou ki te aroha me te āwhina tētahi i tētahi.
Ka kōwhiri tō tātou Matua i te Rangi i te wā me te wāhi e whānau ai tātou katoa ki te ao. I mōhio Ia i te wāhi tōtika mō tēnā, me tēnā o tātou, kia akona ai ngā mea e tika ana mō tātou. He āheinga tā tātou katoa ki te mahi i ngā mea maha rerekē. I hiahia tō tātou Matua i te Rangi kia mahi tātou i ngā mea pai, ā, kia hoki anō ki a Ia. Heoi, e kore Ia e meinga i a tātou kia mahi i tētahi mea.
Ka kōwhiri ētahi o tātou ki te whakarongo ki a Ia. Ki te whakarongo tātou ki a Ia, ka meinga tātou pērā tonu ki a Ia, ā, ka hoki anō ki Tōna taha noho ai. Ka kōwhiri ētahi o tātou, kia kaua e whakarongo ki a Ia. Ki te kore tātou e whakarongo ki a Ia, e kore tātou e meinga pērā tonu ki a Ia, ā, kāore mō te hoki ki Tōna taha noho ai.
I tino harikoa tātou i te whakarongo ki te mahere o tō tātou Matua i te Rangi. I hiahia tātou ki te ako me te whakawhanake. I tautoko ngā tāngata katoa kua ora mai nei i te ao ki Tōna mahere.
Hei Matapaki
-
He aha te mahere o tō tātou Matua i te Rangi mō tātou?
-
He aha te take i wehe atu tātou i tō tātou kāinga i te Rangi?
-
He aha tō tātou Matua i te Rangi hiahia hei mahi mā tātou i te ao nei?