Lesona 26 Anomea a le Faiaoga

O Le Ekalesia i Sisifo

O le faavaeina o le Ekalesia i sisifo o le Iunaite Setete o se tala ofoofogia o le faatuatua. O lenei lesona o le a maua ai e tagata aoga se avanoa e aoao ai lesona mai le Au Paia faamaoni o e na fausia o latou faavae i luga o Iesu Keriso ma tuuto atu o latou olaga i le fausiaina o Lona malo. O le a fesoasoani foi i tagata aoga ia malamalama lelei i se tasi mea matautia o le talafaasolopito o le Ekalesia mai lenei vaitau lea na faaalia ai le ogaoga o le aluese mai aoaoga o le talalelei a le Faaola: o le Fasiotiga Tele i Mountain Meadows.

Fautuaga mo le Aoaoina Atu

Na faaauau pea ona fausia e le Au Paia le malo o le Alii e ala i le faatuatua ma le ositaulaga.

Faʻaali atu le ata o se ie tele [tapestry], pe aumai sau oe ie tele i le vasega. Ia mautinoa ia malamalama le vasega o se ie tele e faia e ala i le lalagaina o le tele o filo i ni auala faigata ma faʻapitoa e maua ai se ata matagofie po o se mamanu.

ie tele o perofeta ma malumalu

Valaaulia se tagata aoga e faitau le saunoaga lenei mai ia Elder Steven E. Snow o le Fitugafulu, o le sa avea muamua ma Tusitalafaasolopito ma Tusitalafaamaumau a le Ekalesia.

Steven E. Snow

Afai e te mafaufau i le talafaasolopito o le Ekalesia o se ie soosoo po o se ie tele, o se mea e sili ona mauoa ma matagofie i mea uma ua ou vaai i ai. Afai e te suʻesuʻeina ma le faaeteete, o le a e mauaina ni filo tulagaese i totonu o lena ie soosoo po o le ie tele, ma afai e te toso i ai ma matamata totoa i na filo, o le a e misia le savali ofoofogia o la tatou talafaasolopito. Afai o le a e toe foʻi i tua ma tilotilo i le ie soʻoso’o po o le ie tele atoa, e matagofie. (Steven E. Snow, “Start with Faith: A Conversation with Elder Steven E. Snow,” Religious Educator, no. 3 [2013], 11)

Faamalamalama atu mai le amataga o le talafaasolopito o le Ekalesia i Sisifo, e faitau afe tala o le Au Paia faamaoni ma o ā latou taumafaiga e mulimuli ia Iesu Keriso ma le fausiaina o le Ekalesia a le Alii na fausia ai se ie tele matagofie o le faatuatua.

Saili po o ai le tagata aoga na faitauina le fea tala mai le vaega 1 o anomea mo sauniuniga. Mo tala taʻitasi, valaaulia se tagata aoga e fai mea nei:

1. Aotele le tala na ia faitauina.

2. Faamatala pe na faapefea e le Au Paia o Aso e Gata Ai po o le Au Paia i le tala ona faaalia lo latou faatuatua ia Iesu Keriso ma Lana talalelei toefuataiina.

3. Faasoa atu lesona po o mataupu faavae na ia aoaoina mai le tala.

Tuʻu atu i isi tagata aoga e faitau le tala lava e tasi e faʻaopopo ai o latou malamalamaaga aʻo leʻi agai atu i le isi tala.

O nisi o le Au Paia o Aso e Gata Ai na fuafua ma faataunuuina le Fasiotiga Tagata i Mountain Meadows.

Faaali atu le ata o loo tuuina atu, ma faamatala atu i tagata aoga se ata o le maa faamanatu o le Fasiotiga Tagata i Mountain Meadows na fausia e le Ekalesia i Iuta i saute. Faamalamalama atu, o le mea faanoanoa, o le mala o Mountain Meadows o se filo faanoanoa lea na lalagaina i le talafaasolopito o le Au Paia.

Maa faamanatu i Mountain Meadows

Fesili atu i tagata aoga po o le a se mea na latou aoaoina mai a latou faitauga e uiga i le Fasiotiga Tagata i Mountain Meadows. Ia mautinoa ia malamalama tagata aoga i le aso 11 Setema, 1857, e tusa ma le 50 i le 60 o fitafita i le itu i saute o Iuta, na lagolagoina e nisi o tagata Initia Amerika, na fasiotia e tusa ma le 120 tagata malaga na faimalaga i taavale toso i Kalefonia. E na o le 17 tamaiti na sao.

• O a nisi o mea na tutupu ma filifiliga na mafua ai le faʻalavelave i Mountain Meadows? (Afai e manaomia, tuu atu i tagata aoga ni nai minute e iloilo le vaega 2 o anomea mo sauniuniga.)

Mafaufau e fai atu i tagata aoga e faasoa mai mataupu faavae ma upumoni mai tusitusiga paia e mafai ona fesoasoani i nei tagata e faia ni filifiliga ese. (O nisi faataitaga e aofia ai Faataoto 28:13; 3 Nifae 12:24–25, 43–44; Mataupu Faavae ma Feagaiga 64:9–11.)

• O a nisi o lesona e mafai ona tatou aʻoaʻoina mai le faalavelave o le Fasiotiga Tagata i Mountain Meadows? (Mafaufau e tusi tali a tamaiti aoga i luga o le laupapa.)

E mafai ona e tuʻuina atu i tamaiti o le vasega se minute pe lua e tusi pe faʻamatala pe faʻapefea ona mafai e nei mataupu faavae ona puipuia le loto tiga le fuafuaina[manaomia] i o latou lava olaga.

Faamalamalama atu e faapea, talu ai ona o nisi o le Au Paia i le lotoifale sa nafa ma le fuafuaina ma le faataunuuina o le Fasiotiga Tagata i Mountain Meadows, ua faatagaina ai e nisi o tagata lenei mea na tupu e faaaafia ai i se auala le lelei o latou manatu e uiga i le Ekalesia.

• O le a se mea e te ono fai atu i se tasi e manatu leaga e uiga i le Ekalesia ona o le Fasiotiga Tagata i Mountain Meadows? (Faamalosiau i tagata aoga e tusi se ata o le mea na latou aoaoina mai i le vaega 2 o anomea mo sauniuniga.)

Valaaulia tagata aoga e faitau ma faailoa se mataupu faavae mai le Helamana 5:12. Faaali atu saunoaga nei. Valaaulia se tagata aoga e faitau leotele ma fai atu i le vasega e vaavaai pe faapefea ona faaalia le mataupu faavae o loo aoaoina i le Helamana 5:12.

O James Sanders o se tasi o Le Ekalesia a Iesu Keriso o le Au Paia o Aso e Gata Ai ma o se atalii o le atalii o Nancy Saphrona Huff, o se tasi o tamaiti na faasaoina mai le fasiotiga tagata. Na faasoa mai e Brother Sanders lagona nei e uiga i le fasiotiga tagata: ”Ou te lagona pea le tiga; ou te lagona pea le ita ma le faanoanoa ona o le tupu o le fasiotiga tagata. … Ae ou te iloa o tagata o e na faia lenei mea o le a tali atu i le Alii, ma o lena mea e aumai ai ia te a’u le toafilemu.” O Brother Sanders na saunoa mai faapea “o le iloaina o [lona] tuaa na fasiotia i le fasiga tele ‘e lei aafia ai lona faatuatua ona e faavae ia Iesu Keriso, e leo se isi tagata i le Ekalesia’” (i le Richard E. Turley Jr., “The Mountain Meadows Massacre,” Ensign, Sept. 2007, 21).

• O faapefea ona aoaoina le mataupu faavae o loo faaalia i le faamatalaga a James Sanders i le Helamana 5:12 ? (A uma ona tali mai tagata aoga, tusi le mataupu faavae lenei i luga o le laupapa: O le fausiaina o lo tatou faatuatua i luga o le faavae o Iesu Keriso ma Lana talalelei e mafai ona fesoasoani ia i tatou e tumau ai le malosi e ui lava i le le atoatoa o tagata o le Ekalesia.)

• E mafai faapefea e le faavae o lo tatou faatuatua ia Iesu Keriso ona fesoasoani ia i tatou pe a tatou vaai pe aoao i taimi e le ola ai tagata o le Ekalesia e tusa ai ma aoaoga o le talalelei?

• O a mea e te faia e fesoasoani ai ia te oe e fausia ma faatumauina lou faatuatua i le faavae o Iesu Keriso?

Tuu atu i tagata aoga se taimi e mafaufau ai ma tusi i lalo mea o le a latou faia e faatumauina ma faamalosia ai lo latou faatuatua ia Iesu Keriso ma Lana talalelei.

Molimau atu i le taua o le ola ai i aoaoga a le Faaola ma le faavaeina o lo tatou faatuatua i luga ia te Ia ma Lana talalelei, e tusa lava po o le a le faaletonu faaletagata o tagata o le Ekalesia. A o tatou faia lena mea, e mafai ona tatou fesoasoani e siitia le malo o Keriso i luma e pei ona faia e le Au Paia paionia faamaoni.

Mo Le Isi Taimi

Fai atu i tagata aoga pe na fesiligia i latou pe aisea na taofia ai e le Ekalesia le pule o le perisitua ma nisi o sauniga o le malumalu mai tagata uli o le aiga tupuaga o Aferika mo se taimi. Faamalamalama atu i le sauniuniga mo le isi vasega e sosoo ai, o le a maua e tamaiti aoga le avanoa e aoao ai e uiga i lenei autu ma le faaaliga e faatatau i le Tautinoga Aloaia 2 lea na faatalitali i ai perofeta mo le tele o tausaga. Valaaulia tagata aoga e o mai saunia i le vasega e talanoaina mea na latou aoaoina ma soo se latou fesili o i ai e uiga i lenei autu.