Lesona 25 Anomea mo le Sauniuniga o le Vasega: Faasologa i le Au Peresitene ma le Solo Atu i Sisifo
“Lesona 25 Anomea mo le Sauniuniga o le Vasega: Faasologa i le Au Peresitene ma le Solo Atu i Sisifo” Anomea a le Faiaoga O Faavae o le Toefuataiga (2019)
“Lesona 25 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Ata
Agai i Luma, Pea i Luma, saunia e Glen S. Hopkinson
Na tilotilo atu Polika Iaga ao tuua e le Au Paia ia Navu.
Lesona 25 Anomea mo le Sauniuniga o le Vasega
Faasologa i le Au Peresitene ma le Solo Atu i Sisifo
Ina ua uma ona faasilasila atu le maliu o Iosefa ma Ailama Samita, na faaiuina ai e se tasi tusiga nusipepa, “Thus ends Mormonism” (Weekly Herald, July 13, 1844, 220). Faatasi ai ma le maliu o le Perofeta o Iosefa, e toatele le au maimoa mai fafo na talitonu o le a malepe le Ekalesia. Ma sa fesili tagata o le Ekalesia po o ai o le a taitaia i latou. Ao e suesue i le anomea o lenei lesona, vaavaai pe faapefea ona faaauau pea e le Alii ona taitaiina Lana Ekalesia ina ua mavae le maliu o le perofeta.
Vaega 1
O ai e taitaia le Ekalesia a le Alii pe a maliu le perofeta?
Fai ia uma se tasi o filifiliga nei mo lenei vaega:
Suesue mea nei, ona faamaea lea o le gaoioiga o le mafaufau loloto.
O se lagona o le pogisa na oo i luga o Navu ona o le maliliu ai o Iosefa ma Ailama Samita. I lenei taimi o le le mautonu, e toatele tagata na latou fai mai ua ia i latou le aia e taitaia ai le Ekalesia. O se tasi o nei tagata o Sini Rikitone.
I le taimi o le maliu o Iosefa, o Polika Iaga ma isi Aposetolo na auauna atu faamisiona i le itu i sasae o le Iunaite Setete. Ana le oo i le aso 16 o Iulai, 1844, na maua ai e Polika se tusi e faamatalaina ai le fasiotia o Iosefa ma Ailama Samita.
Ina ua ia faitau i le tusi, sa lagona e Polika lona ulu pei o le a ta’e. Na te lei lagonaina lava sea lagona atuatuvale.
Na liliu vave lona mafaufau i le perisitua. Na umia e Iosefa ki uma e tatau ai mo le faia o faaeega paia ma le faamauina o le Au Paia mo le faavavau. A aunoa ma na ki, o le galuega a le Alii e le mafai ona agai i luma. Mo sina taimi, na popole ai Polika ua ave e Iosefa nei ki i le tuugamau.
Ma, i se osofaʻiga o faaaliga, na manatua ai e Polika le auala na faaee ai e Iosefa ia ki i luga o Aposetolo e Toasefululua. I le aumaia o lona lima i luga o lona tulivae, na ia fai mai ai, “O ki o le malo o loo i ai iinei i le ekalesia.” (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018],559)
I le aso 7 o Aokuso, 1844, na potopoto ai le Toasefululua ma isi taitai o le Ekalesia i se fonotaga. I lenei fonotaga o Sini Rikitone, o le na alu ese mai le Ekalesia, na manao ona o ia lea na valaauina talu ai ma faauuina o se failauga mo Iosefa Samita (tagai i le Mataupu Faavae ma Feagaiga 100:9), o lana tiutetauave le “vaai ua taitaia le Ekalesia i le ala sao” (i le History, 1838–1856 [Manuscript History of the Church], volume F-1, 295, josephsmithpapers.org).
Ina ua uma le tautalaga a Sini Rikitone, sa folafola atu e Polika Iaga:
Ata
Peresitene Polika Iaga
Na faaee mai e Iosefa i luga [o] ulu [o Aposetolo e Toasefululua] ia ki uma ma mana e anaina e le au Aposetolo lea sa ia umiaina a’o le’i maliu o ia. (Brigham Young, in History, 1838–1856, volume F-1, 296, josephsmithpapers.org)
O le aso na sosoo ai, na faapotopoto ai le Au Paia i Navu e faalogologo atu ia Sini Rikitone a’o faia lana tautalaga i le avea ai ma tagata e vaaia le Ekalesia. Ina ua maea lana tautalaga, sa saunoa puupuu Polika Iaga, ma fautua atu faapea o le Korama a le Toasefululua, o e na umia faatasi ki o le perisitua lea na toefuatai mai i le Perofeta o Iosefa Samita, e tatau ona taitaiina le Ekalesia mo le taimi nei.
A o faalogo Emily [Hoyt] ia Polika, sa ia tilotilo atu ia te ia ina ia mautinoa e le o Iosefa o loo tautala mai. Sa i ai ia te ia le auala e saunoa ai Iosefa, o lana auala e mafaufau ai, ma e oo foi i le leo o lona siufofoga. …
I le fitu tausaga mulimuli ane, na faamaumauina ai e Emily lona aafiaga o le matauina o Polika Iaga ao saunoa atu i le Au Paia, ma molimau atu i le tutusa o ona foliga ma lona leo ma Iosefa ao i ai i luga o le tulaga. I tausaga a sau, o le a faaopoopo e le toatele o le Au Paia a latou molimau ia te ia, e faamatala ai vaaiga na latou vaaia ai le ofutalaloa faavaloaga a Iosefa i luga o Polika i lena aso. (Au Paia, 1:565–66)
Na tusia e Uilifoti Uitilafi, “Ana faapea ou te le’i vaai ia [Polika] i o’u lava mata, semanu e leai se tasi e mafai ona faatalitonuina a’u, sa le o Iosefa Samita” (i le Talafaasolopito o le Ekalesia, 7:236).
Faatasi ai ma le tautinoga a Polika Iaga e uiga i le faaeeina atu e Iosefa o ki ma mana o le faaaposetolo i luga o le Toasefululua ma le molimau faamaonia a le Agaga Paia, sa malamalama le Au Paia i le finagalo o le Alii ma lagolagoina le Korama a Aposetolo e Toasefululua o ni taitai o le Ekalesia toefuataiina a Iesu Keriso.
Ata
aikona, mafaufau loloto
Mafaufau Loloto a o Sauniuni mo le Vasega
Mafaufau pe na faapefea ona faailoa mai e le Tama Faalelagi Lona finagalo ma Lona alofa mo le Au Paia e ala i le faaali atu ia i latou o Polika Iaga ma le Toasefululua e taitaia le Ekalesia. Na faapefea ona e iloa o i latou o e taitaia le Ekalesia i aso nei ua filifilia ma valaauina e le Atua?
Vaega 2
E faapefea ona taitaia i tatou e le Alii pe afai e le o mautonu le lumanai?
Ia Ianuari o le 1846, i le lotolotoi o le faatupulaia o sauaga e faasaga i le Au Paia, na faamaeaina ai e le Au Aposetolo e Toasefululua ia fuafuaga e tuua Navu ma o atu i sisifo. I le 1842 na valoia ai e Iosefa Samita “o le a faaauau pea ona mafatia le Au Paia i le tele o puapuaga ma o le a aveina atu i Mauga o Papa … [ma faia] nofoaga ma fausia aai ma … avea ma tagata malolosi i totonugalemu o Mauga o Papa” (Aoaoga a Peresitene o le Ekalesia: Iosefa Samita [2007], 517).
A o sauni le Au Paia e tuua Navu, sa latou galulue foi e faamaea le Malumalu o Navu. A o lata ina maeʻa, o le afe ma afe o le Au Paia na o atu i le malumalu i le ao ma le po e maua sauniga o le faaeega paia ma le faamauga. Na maitauina e Sister Sara Rich:
Ata
Sara Rich
Ana leai le faatuatua ma le malamalama sa faapea ona faaeeina i o matou luga i lena malumalu e ala i le uunaiga ma le fesoasoani a le Agaga o le Alii, semanu le matou faigamalaga e faapei o le puna ifo i le pouliuli. … Ae sa matou faatuatua i lo matou Tama Faalelagi, ma matou tuu atu lo matou faatuatuaga ia te Ia ma lagona ai o i matou o Ona tagata filifilia. (Sara Rich, i le O Afafine i Lo’u Malo: O Le Talafaasolopito ma le Galuega a le Aualofa [2011], 30)
Na saunoa Elder Robert D. Hales o le Korama a Aposetolo e Toasefululua e uiga i le Au Paia sa i Navu i lena taimi:
Ata
Elder Robert D. Hales
O a latou feagaiga na osia ma le Alii i le Malumalu o Navu o se puipuiga mo i latou i le taimi o la latou malaga i sisifo, e pei ona i ai mo i tatou taitoatasi i le taimi nei ma i o tatou olaga atoa. (Robert D. Hales, “Faamanuiaga o le Malumalu,” Liahona, Fep. 2014, 4)
A o faateteleina sauaga, na faamaeaina e le Au Paia a latou fuafuaga ma o le uluai vaega tele o le Au Paia na amataina le malaga e sopoia ai Iowa ia Fepuari 1846. Sa feagai i latou ma le taumalulu faigata, le lava o meaai, ma le le lelei o le faatulagaina. O le tautotogo na oo mai ai le timu, pāpā vai, ma le palapala ua mafiafia, ua faatapulaaina ai le malaga a le Au Paia i le 300 maila (483 kilomita) i le 131 aso. O se taunuuga o nei faatuai ma le le lava o punaoa, na taofia ai e Polika Iaga le malaga ma faatuina ai se nofoaga e malolo ai e taua o Winter Quarters. I le tautoulu, o le faitau aofaʻi o Winter Quarters na oʻo atu i le silia ma le 7,000 tagata.
E toatele na mamaʻi mai le le lava o meaai ma le malulu, ma o le faatuatua o nisi sa luitauina. O nei tulaga faigata na faia ai le taumalulu o le 1846-47 o se tasi o vaitaimi sili ona faigata o le olaga o Polika Iaga. Sa ia lagonaina “e pei o se tamā ma se aiga e toatele o tamaiti o loo siomia ai [o ia]” ma mulimuli ane toe manatua ma faapea mai o ona tiutetauave sa mamafa i ona luga e pei o se “mea e luasefulu-lima tone le mamafa” (“This Shall Be Our Covenant,” Revelations in Context [2016], 307–8; tagai foi Au Paia: O le Tala o le Ekalesia a Iesua Keriso o Aso e Aso e Gata Ai, vol. 2, Leai Se Lima Eleelea, 1846–1893 [2020], 40–44, 46–51).
I lalo o lenei avega mamafa, na aioi atu ai Polika Iaga i le Alii mo le taitaiga ma maua ai se faaaliga e aofia ai le “Afioga ma le Finagalo o le Alii e faatatau i le Tolauapiga a Isaraelu i a latou malaga i Sisifo” (Mataupu Faavae ma Feagaiga 136:1). Ao e suesue i vaega nei o lenei faaaliga, mafaufau e faailoga ia faatonuga ma folafolaga a le Alii i le Au Paia.
Na tuuina mai e Peresitene Dallin H. Oaks o le Au Peresitene Sili se vaaiga taua i le taimi o le faaaliga o loo tusia i le Mataupu Faavae ma Feagaiga 136. Sa ia saunoa:
Ata
Peresitene Dallin H. Oaks
O le mea taua i soo se taumafaiga e maua se faaaliga, o se tautinoga lea e faia mea uma tatou te mafaia i a tatou lava taumafaiga ma faaiuga. O lona uiga e manaomia ona tatou auauna atu ma galulue.
O le agai i luma i a tatou auaunaga ma galuega o se auala taua e agavaa ai mo faaaliga. I a’u suesuega o tusitusiga paia ua ou matauina ai, o le tele o faaaliga i fanau a le Atua e oo mai i taimi latou te galulue ai, e le o taimi latou te nofonofo ai i o latou apitaga ma faatalitali i le Alii e ta’u atu ia i latou le laasaga muamua e faia.
Mo se faataitaiga, e taua le matauina o le faaaliga ua lauiloa o “le Afioga ma le Finagalo o le Alii e faatatau i le Tolauapiga a Isaraelu” (MF&F 136: 1) e lei tuuina atu i Navu ao fuafuaina e le Korama a le Toasefululua le malaga tele mai Navu; … e lei tuuina foi i le itu i sisifo o le Vaitafe o Misisipi. … O le faaaliga e taialaina ai le faigamalaga a le Au Paia i luga o laufanua laugatasi sa tuuina atu i le aso 14 o Ianuari, 1847, ina ua mavae atu le Au Paia i le tasi vaetolu o le ala i vanu o atumauga. (Dallin H. Oaks, “I Lana Lava Taimi, i Lana Lava Ala,” Liahona, Aok, 2013, 22, 24)
Mafaufau mo se minute pe mafai faapefea e lenei malamalamaaga mai ia Peresitene Oaks ona tali atu i au oe lava fesili ma filifiliga e aafia ai lou lumanai.
I le amataga o Aperila 1847, na tuua ai e Polika Iaga ia Winter Quarters ma le uluai vaega o le Au Paia. Latou te malaga i le 1,031 maila (1,660 kilomita) i le fa masina ma taunuu i le Vanu o Sate Leki i le aso 24 o Iulai, 1847. Na faamaumauina e Uilifoti Uitilafi, ina ua vaai Polika Iaga i le vanu, “na afifiina o ia i se faaaliga mo ni nai minute. … Ina ua mavae atu le faaaliga, sa ia faapea mai, ‘Ua lava lea. O le nofoaga tonu lenei. Faaauau pea’” (i le Aoaoga a Peresitene o le Ekalesia: Uilifoti Uitilafi [2004], 146). E oo atu ia Oketopa, e tusa ma le 1,700 le Au Paia na faamautu i Iuta. Peitai, e tusa ma le 10,000 isi sa nonofo i le Vaitafe o Misuri i Iowa ma Nebraska ma o le a malaga agai i sisifo i totonu o le lima tausaga na sosoo ai (tagai “Lagolagoina o se Au Peresitene Sili Fou i le 1847,” ChurchofJesusChrist.org).
Mo le silia ma le tolu tausaga, na taitaiina e le Au Aposetolo e Toasefululua le Ekalesia i le toesea ai o le Au Peresitene Sili. Ia Tesema 1847, na feiloai ai le Au Aposetolo i Council Bluffs, Iowa, lea na nonofo ai le toatele o le Au Paia. Sa latou potopoto i totonu o se tamai fale ogalaau e talanoaina le toe faatulagaina o le Au Peresitene Sili. “O se faaaliga sili o le Agaga Paia sa liligi mai i luga o i latou na i ai,” ma sa lagolagoina e le Toasefululua ia Polika Iaga, le Aposetolo sinia, e avea ma Peresitene o le Ekalesia (Autobiography of Bathsheba W. Smith, 12, Church History Library, Salt Lake City; spelling standardized; tagai foi Saints, 2:87–89, 92–95).
Ata
aikona, mafaufau loloto
Mafaufau Loloto a o Sauniuni mo le Vasega
Mafaufau pe na faapefea ona taitaiina e le Alii le Au Paia ao latou malaga atu i le Vanu o Sate Leki. O faapefea ona e lagona le taialaina e le Alii o lou olaga? O le a se mea e mafai ona e taulai atu i ai ina ia maua ai se taitaiga tele mai le Alii?
