Lesona 15 Anomea a le Faiaoga

O Le Fuafuaga a le Tama Faalelagi ma Lo Tatou Gafatia Faalelagi

Na faaalia e le Alii ia Iosefa Samita le mana o le fuafuaga a le Tama Faalelagi o le faaolataga ma le tatou gafatiaga faalelagi e avea faapei o Ia. O lenei lesona o le a fesoasoani i tagata aoga e faamalosia lo latou loto faafetai mo le fuafuaga a le Tama ma atili ona malamalama loloto po o ai i latou ma mea e mafai ona latou faia e ausia ai lo latou gafatiaga faalelagi.

Fautuaga mo le Aoaoina Atu

Na mauaina e Iosefa Samita ni upumoni taua e uiga i le ata o le faaolataga.

Valaaulia tagata aoga e faamatala vaega na iloa e le tele o tagata Kerisiano ma i latou na uluai liliu mai i le Ekalesia e faatatau i le Atua ma le olaga pe a mavae lenei olaga ae lei oo mai faaaliga na tuuina mai e le Alii auala mai ia Iosefa Samita e uiga i nei autu. (Atonu e mananao tagata aoga e iloilo vaega 1 ma le 3 o anomea mo sauniuniga.)

• Mai mea na e aoaoina i le anomea mo sauniuniga, o anafea ma na faapefea ona faaalia e le Alii upumoni e uiga i le ata o le faaolataga ia Iosefa Samita?

• O a nisi o upumoni toefuataiina e faatatau i le fuafuaga e te manatu na matuai suia ai lava olaga o le Au Paia anamua? O fea o faamaumau ai nei upumoni? (Tagai vaega 1 ma le 3 o anomea mo sauniuniga.)

Ao tali tagata aoga i fesili muamua, atonu e te fai atu ia i latou e toe faitau nisi o mau faitau na taua i le anomea mo sauniuniga, e pei o Mose 1:39 ma le Aperaamo 3:22-26. Fesoasoani i tagata aoga e faailoa ma faamatala upumoni e pei o lea: O le galuega ma le mamalu o le Atua o le aumaia le tino ola pea ma le ola e faavavau o le tagata (tagai Mose 1:39). Sa tatou nonofo faatasi ma le Tama Faalelagi o ni agaga ae tatou te le’i fananau mai (tagai Aperaamo 3:22–23). Na foafoa e le Alii le lalolagi o se nofoaga e mafai ona tatou filifili pe tatou te usitai pe leai i le Atua (tagai Aperaamo 3:24--25).

• Vaai faalemafaufau pe mata e ese faapefea lou olaga pe afai e te le iloa e uiga i le fuafuaga a le Tama Faalelagi. O le a sou manatu i le aafiaga o le auala e te mafaufau ai, faia ai au faaiuga ma faatinoga ona o lou iloa e uiga i lenei fuafuaga?

Na aoao mai Iosefa Samita e faatatau i o tatou gafatiaga faalelagi.

Faamatala atu i le “aso 7 o Aperila, 1844 na tulai ai Iosefa Samita e lauga i le konafesi na mulimuli ane avea ma ana konafesi mulimuli. Ina ua maea ona ia fesili atu i le Au Paia mo le latou ‘taulaiga atoa,’ … na aoao atu Iosefa e uiga i le amio atua ma le agai i luma e faavavau” (King Follett Discourse,” Autu o le Talafaasolopito o le Ekalesia, ChurchofJesusChrist.org/study/church-history).

Valaaulia se tagata aoga e faitau leotele le faamatalaga a Iosefa Samita mai lana tala ia King Follett o loo maua i le amataga o le vaega 2 o anomea mo sauniuniga.

• O le a se mea ua e aoaoina mai aoaoga a Iosefa e uiga i lou sootaga ma le Atua?

Faamalamalama atu e faapea i le 1995, na tuuina mai ai e le Au Peresitene Sili ma le Korama a Aposetolo e Toasefululua se pepa ua faaigoaina “O Le Aiga: O Se Folafolaga i le Lalolagi.” I totonu o lenei folafolaga, na latou folafola mai ai:

O tagata uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga. …

I le muai olaga, sa iloa ma tapua’i atalii ma afafine agaga i le Atua o lo latou Tama e Faavavau ma sa latou talia Lana fuafuaga e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga ma iloa tino ai lo latou taunuuga paia o ni suli o le ola e faavavau. (“O Le Aiga: O Se Folafolaga i le Lalolagi,” ChurchofJesusChrist.org)

• I le avea ai ma atalii ma afafine o le Atua, o le a lo tatou gafatiaga e faavavau? (Feasoasoai i tagata aoga e faailoa se aoaoga faavae e tutusa ma lenei: I le avea ai ma atalii ma afafine faaleagaga o le Tama Faalelagi, ua ia i tatou le gafatia e avea faapei o Ia.)

Faaali atu pe fai atu fesili nei, ma tuu atu i tagata aoga se minute pe lua e mafaufau loloto ai i na fesili ma tusi ni uunaiga atonu e oo atu ia i latou.

• E mafai faapefea e lenei upumoni ona faatosinaina le auala e te tagai atu ai i lou fesootaiga ma le Tama Faalelagi? E mafai faapefea e lenei upumoni ona faatosinaina le auala e te vaai ai ia te oe ma i latou o siomia oe? O faapefea ona aafia ai le ala o loo e ola ai?

Na faaali mai e Iesu Keriso le auala e mafai ai ona tatou maua se atoaga o le mana o le Atua i le malo selesitila.

Tusi i luga o le laupapa pe faaali upu Lagi ma Seoli, ma fesili atu i tagata aoga i talitonuga a le tele o tagata Kerisiano o le seneturi lona-19 e faatatau po o ai e alu i fea.

Valaaulia tagata aoga e toe faamatala mea na latou aoaoina mai le Mataupu Faavae ma Feagaiga 76 e uiga i le olaga pe a mavae lenei olaga ma le mauaina o le malo selesitila. (Atonu e manaomia e tagata aoga ona iloilo le Mataupu Faavae ma Feagaiga 76:50-54.) Atonu e te fesili atu foi i tagata aoga po o a mea na latou aoaoina e faatatau i le Tama Faalelagi ma Iesu Keriso mai upumoni na faaalia i le vaega 76.

Faaali atu le saunoaga lenei a Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

I le Ekalesia atoa ou te faalogo pea i le toatele o loo tauivi ma lenei faafitauli: “E le lava lo’u lelei.” “Ou te le taitai oo i ai.” “O le a ou le gafataulimaina lava.” Ou te faalogo i nei tala mai le autalavou. Ou te faalogo i ai mai faifeautalai. Ou te faalogo i ai mai tagata fou liliu mai. Ou te faalogo i ai i tagata ua leva ona lolotu. (Jeffrey R. Holland, “Ia Atoatoa Ona Lelei o La Outou Amio—I Le Iuga,” Ensign po o le Liahona, Nov. 2017, 40)

Atonu e mafai ona e valaaulia tagata aoga e mafaufau i taimi i o latou olaga na faapea ai o latou lagona.

Valaaulia tagata aoga e faitau le Mataupu Faavae ma Feagaiga 76:40–42, 69, ma vaai mo le vaega taua e faia e Iesu Keriso i le tatou faaolataga.

• O le a le matafaioi a Iesu Keriso i la tatou tulimataiga mo le ola e faavavau? (Fesoasoani i tagata aoga e faailoa mai le upumoni lenei: E mafai ona faaatoatoaina i tatou e ala ia Iesu Keriso.)

• Aisea e te manatu ai e taua le manatua ua na o Iesu Keriso e oo mai ai le atoatoa ma le ola e faavavau?

Faitau le Mataupu Faavae ma Feagaiga 93:12-13 ma le vasega, ma vaavaai mo le mea o loo aoao mai e lenei fuaitau e uiga i le auala na uia e le Faaola ina ia avea e faapei o le Tama Faalelagi.

• O le a sou manatu i le uiga e faapea, “na faaauau le Faaola mai le alofa tunoa i lea alofa tunoa seia oo ina ia maua se atoatoaga”?

• E faapefea e le faataitaiga a le Faaola ona fesoasoani ia te oe e faatoilaloina lagona o le faalotovaivai ao e taulai atu mo le ola e faavavau?

Faaali atu ma faitau le faamatalaga lenei mai ia Elder Holland:

Elder Jeffrey R. Holland

Ou te molimau atu i lena taunuuga sili, lea ua faaavanoa mai ia i tatou e le Togiola a le Alii o Iesu Keriso, o Ia lava e faaauau pea “mai le alofa tunoa i le alofa tunoa” [Mataupu Faavae ma Feagaiga 93:13] seia oo i Lona tino ola pea [tagai Luka 13:32] sa Ia maua ai le atoatoaga o le mamalu selesitila. Ou te molimau atu i lenei itula ma itula uma, faatasi ai ma ona aao ua ma’ila i fao, o loo Ia faaloaloa mai pea ia i tatou i lea lava alofa tunoa e tasi, ma uumauina ma faamalosiau mai ia i tatou, musu e tuu i tatou e o seia tatou taunuu saogalemu ai i le aiga i le opomau a o tatou Matua e Faavavau. Mo sea taimi atoatoa, e faaauau pea ona ou tauivi, po o le a lava le le mautonu. Mo sea meaalofa atoatoa, e faaauau pea ona ou faafetai, po o le a lava le le lelei. Ou te faia ai i le igoa lava o le Atoatoaga lava ia, o Ia o le sa lei le mautonu lava pe sa le’i le lelei lava ae e alofa ia i tatou uma, le Alii o Iesu Keriso. (Jeffrey R. Holland, “Ia Atoatoa Ona Lelei o La Outou Amio—I Le Iuga,” Ensign po o le Liahona, Nov. 2017, 42)

Valaaulia tagata aoga e mafaufau loloto mo se minute po o le a le mea o le a matua fesoasoani ia i latou e agai ai i luma faaleagaga i le ola e faavavau i lenei taimi. Faaiu i le faasoaina o lau molimau e ala mai i le alofa tunoa o le Faaola ma i le mulimuli i Ana faataitaiga e mafai ona tatou maua le ola e faavavau ma ulu atu i le malo selesitila.

FAALELEIA O LO TATOU AOAO ATU MA LE AOAOINA

Faaauau pea ona faamalosia le tapenaga a le tagata aoga. Ona o lea ua sili atu ma le afa le taimi o tagata aoga i lenei kosi, atonu e te valaauliaina i latou e faasoa pe na faapefea ona aafia le latou i ai i lenei kosi ona o la latou tapenapenaga mo le vasega. Mafaufau e faasoa atu le faamalosiau lenei mai ia Elder Kim B. Clark o le Fitugafulu: “Pe a e faia lau vaega—tatalo ma le faatuatua, saunia, suesue, auai ma le naunautai, ma faia le mea sili—o le Agaga Paia o le a aoaoina oe, faalauteleina lou malosi e faatino ai mea ua e aoaoina, ma fesoasoani ia te oe e avea ma tagata e finagalo le Alii ia avea ai oe” (“O le Aoaoina mo le Agaga Atoa,” Ensign, Aug. 2017, 27).

Mo Le Isi Taimi

Fai i le vasega e mafaufau pe faapefea ona ese o latou olaga ona o malumalu ma sauniga o le malumalu. Faamatala atu i le vasega e sosoo ai, o le a latou aoao pe aisea na faaali atu ai perofeta anamua ia Iosefa Samita ma Oliva Kaotui i totonu o le Malumalu o Katelani. Faamalosiau ia i latou e suesue i anomea mo sauniuniga mo le lesona 16 ina ia mafai ona latou o mai saunia e soalaupule mataupu faavae o le a fesoasoani e avea le malumalu ma se vaega taua o o latou olaga.