Lesona 28 Anomea mo le Sauniuniga o le Vasega: Ua Faanatinati e le Alii Lana Galuega
“Lesona 28 Anomea mo le Sauniuniga o le Vasega: Ua Faanatinati e le Alii Lana Galuega,” Anomea a le Faiaoga O Faavae o le Toefuataiga (2019)
“Lesona 28 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Ata
konafesi aoao i le Nofoaga Tutotonu o Konafesi
Lesona 28 Anomea mo le Sauniuniga o le Vasega
Ua Faanatinati e le Alii Lana Galuega
Na aoao mai Peresitene Russell M. Nelson: “O aso fiafia nei. Ua faanatinatiina e le Alii Lana galuega i luma o o tatou mata. E manaia. E faigata tele. E tele mea e manaʻomia mai ia i tatou taʻitoʻatasi-sili atu nai lo se isi lava taimi. Ma e tele atu mea o loo tuuina atu” (“A Personal Invitation to Participate in Seminary and Institute,” Feb. 4, 2019, ChurchofJesusChrist.org). Ao e suesue i lenei mea, vaavaai mo ni auala e mafai ona faaauai ai oe ao faanatinatiina e le Alii Lana galuega i le sauniuniga mo Lona Afio Mai Faalua.
Vaega 1
O le a le taunuuga o Le Ekalesia a Iesu Keriso o le Au Paia o Aso e Gata Ai?
I le Aso Lua, 6 o Aperila, 1830, e tusa ma le 50 tagata na tumutumu atu i totonu ma faataamilo i le fale ogalaau o Pita Uitimera i Faiete, Niu Ioka. O iina, na faatulagaina ai e Iosefa Samita, i lalo o le taitaiga a Iesu Keriso, le Ekalesia a le Alii i luga o le fogaeleele. E ui ina amata laitiiti le Ekalesia, ae o lona taunuuga o le faatumulia lea o le lalolagi atoa.
I vaitaimi o le Feagaiga Tuai, na fai ai se miti a le tupu Papelonia o Nepukanesa lea na ia vaaia ai se “maa na tofi mai le mauga e aunoa ma lima” (Tanielu 2:45). O lenei maa na faatupuina le tele seia oo ina “avea lea ma mauga tele ua tumu ai le lalolagi uma” (Tanielu 2:35). I lana faamatalaina o le miti a le tupu, na valoia ai e le perofeta o Tanielu i aso e gata ai, o le a faatuina e le Atua se malo e le faaumatiaina ae o le a tumau e faavavau (see Tanielu 2:28, 44).
Na toe taʻua e le Alii le valoaga a Tanielu i le Perofeta o Iosefa Samita i le 18 masina talu ona faavaeina le Ekalesia, i le taimi lea e pe na o le 600 le Au Paia o Aso e Gata Ai i le lalolagi. I le Mataupu Faavae ma Feagaiga 65:2 ua tatou faitauina: “O ki o le malo o le Atua ua tuu atu i tagata i luga o le lalolagi, ma mai iina o le a taavale atu ai i luma le talalelei i tuluiga o le lalolagi, e pei ona o le a taavale atu le maa na tofi mai le mauga e aunoa ma lima, seia tumu ai le lalolagi atoa.”
I le lua ma le afa tausaga mulimuli ane, ia Aperila 1834, na faia ai e le Perofeta o Iosefa Samita se valoaga ofoofogia e uiga i le taunuuga o le Ekalesia i se vaega o e umia le perisitua i Katelani, Ohaio.
Na manatua e Peresitene Uilifoti Uitilafi, o le sa i le fonotaga:
Ata
Peresitene Wilford Woodruff
Sa valaauina e le Perofeta i latou uma sa umiaina le Perisitua ina ia faapotopoto atu i se tamai faleaoga ogalaau sa i ai iina. O se fale e laitiiti naua, pe tusa ma le 14 futu faatafafa. Ae sa ofi uma ai le Au Perisitua O Le Ekalesia a Iesu Keriso o le Au Paia o Aso e Gata Ai o e sa i ai i le nuu o Katelani. … Na saunoa atu le Perofeta, “Uso e, … Ou te fia fai atu ia te outou i luma o le Alii, e tou te lei iloaina nisi mea faaopoopo e uiga i taunuuga o lenei Ekalesia ma le malo nai lo se pepe i luga o vae o lona tina. Tou te le malamalama i ai.” Sa fai si o’u ofo. Na ia fai mai, “Ua na o sina luutaga itiiti o le Perisitua o loo outou vaai atu i ai iinei i lenei po, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.” (Wilford Woodruff, in Teachings of Presidents of the Church: Joseph Smith [2007], 137)
Matamata i le vitio “The Gospel Shall Roll Forth” (2:47), ma mafaufau pe faapefea ona avea le tuputupu ae o le Ekalesia toefuataiina ma faamaoniga o le finagalo o le Tama Faalelagi e faamanuia le lalolagi atoa.
I le silia ma le 160 tausaga mulimuli ane, ina ua mavae le tuputupu ae o le Ekalesia i le sili atu ma le 11 miliona tagata o le au paia ma faasalalauina i le tele o le lalolagi, na aoao mai Peresitene Gordon B. Hinckley e faapea:
Ata
Peresitene Gordon B. Hinckley
Ou uso e ma tuafafine, pe ua outou silafia ea mea ua ia te i tatou? Pe ua outou silafia ea lo tatou tulaga i le talafaasolopito sili o le tagata? O le taimi lenei ua tulimatai mai i ai mea uma ua mavae atu. O le vaitau lenei o le faatulaiina. O aso nei o le toefuataiga. … O le faatumutumuga lenei o seneturi uma o taimi talu mai le soifua mai o Keriso e oo mai i lenei aso matagofie. (Gordon B. Hinckley, “At the Summit of the Ages,” Ensign, Nov. 1999, 74)
Ma i le itiiti ifo ma le sefulu tausaga mulimuli ane, na folafola mai ai e Peresitene Hinckley:
Ata
Peresitene Gordon B. Hinckley
O loo i ai se vavega tele o loo tupu tonu i luma o o tatou mata. …
Ma e na o le amataga lenei. O le a faaauau pea ona tupu ma olaola lenei galuega ma agai atu i le lalolagi atoa. (Gordon B. Hinckley, “O Le Maa Na Tofia i le Mauga,” Ensign po o le Liahona, Nov. 2007, 83–84)
Ata
aikona, mafaufau loloto
Mafaufau Loloto a o Sauniuni mo le Vasega
Aisea e te manatu ai e taua le malamalama ma maua se molimau o le taunuuga o le Ekalesia a le Alii?
Vaega 2
E faapefea ona faanatinatiina e le Alii Lana galuega i aso nei?
I le saunoa ai i le faatelevaveina o le tuputupu aʻe ma le uunaiga a le Ekalesia a le Alii, na aoao mai ai Peresitene Thomas S. Monson e faapea:
Ata
Peresitene Thomas S. Monson
O le mafuaaga ua faatupulaia ai le Ekalesia i lenei vaitaimi ona sa faailoa mai e le Alii o le a tupu. I le Mataupu Faavae ma Feagaiga, na Ia fetalai mai, “Faauta, o le a Ou faanatinatiina la’u galuega i lona taimi” [Mataupu Faavae ma Feagaiga 88:73].
I le avea ai o i tatou ma fanau agaga a lo tatou Tama Faalelagi, ua auina mai i tatou i le lalolagi ina ia mafai ona tatou auai i le faanatinatiina o lenei galuega maoae. (Thomas S. Monson, “Faanatinatiina o le Galuega,” Liahona, Iuni 2014, 4)
O faataitaiga nei o ni nai auala ua valaaulia oe e le Alii ma Ana auauna ina ia e auai i le faanatinatiina o le galuega o le faaolataga. Mafaufau i le makaina o soʻo se mataupu poʻo ni manatu e tulagaese ia te oe, ma ia e sauni e faʻamatala atu ou mafaufauga e uiga ia i latou i le vasega.
A o saunoa e uiga i lenei faapotopotoina, na aoao mai Peresitene Russell M. Nelson:
Ata
Peresitene Russell M. Nelson
O’u uso e ma tuafafine talavou pele, o aso moni lava nei e gata ai, ma ua faanatinati e le Alii Lana galuega e faapotopoto Isaraelu. O lena faapotopotoina o le mea aupito sili lea ona taua o loo tupu i le lalolagi i le taimi nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. …
Pe a tatou talanoa i le faapotopotoina ua na ona tatou fai atu lava o lenei upumoni faalefaavae: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. Latou te filifili mo i latou lava pe latou te mananao e iloa atili. (Russell M. Nelson, “Faamoemoe o Isaraelu” [worldwide youth devotional, June 3, 2018], supplement to the Ensign and New Era, 8, ChurchofJesusChrist.org; italics in original)
Faasoaina Atu o le Talalelei
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 123:12, vaavaai mo mea na aoao atu e le Alii i le Perofeta o Iosefa Samita e uiga i le toatele o e ua faatauasoina i “togafiti a tagata.”
Mafaufau i le aoaoga o loo i lenei fuaiupu ao e mafaufau i lenei valaaulia mai ia Elder David A. Bednar o le Korama a Aposetolo e Toasefululua o loo uunaia i tatou e fesoasoani i le galuega o le faaolataga i auala fou:
Ata
Elder David A. Bednar
Ua faanatinatiina e le Alii Lana galuega, ma e le o se mea na faafuaveta … fesootaiga mamana taulagalaga ma mea fou o loo tutupu i le tisipenisione o le atoaga o taimi. O ala o faasalalauga o ni meafaigaluega faavaomalo e mafai ona aoga patino ma le lelei i tagata e toatele taitoatasi ma aiga. Ma ou te talitonu ua oo mai le taimi mo i tatou o soo o Keriso e faaaogaina lelei ia sili atu le aoga o nei meafaigaluega musuia e molimau atu ai i le Atua le Tama Faavavau, o Lana fuafuaga o le fiafia mo Lana fanau, ma Lona Alo, o Iesu Keriso, o le Faaola o le lalolagi; e folafola atu le moni o le Toefuataiga o le talalelei i aso e gata ai; ma faataunuu le galuega a le Alii. (David A. Bednar, “To Sweep the Earth as with a Flood” [Brigham Young University Education Week devotional, Aug. 19, 2014], ChurchofJesusChrist.org)
Auaunaga
I le taimi o Lana galuega faaletino na aoao ai e le Faaola Ona soo o Ia e “le’i sau ina ia auauna mai tagata ia te ia, a ia auauna atu ia” (Mataio 20:28). Sa auauna atu o Ia, ao Ia “femaliuai ma agalelei” (Galuega 10:38). I se faaaliga ia Iosefa Samita, na valaaulia ai e le Alii Frederick G. Williams e auauna atu i isi.
Ua faapena foi ona valaauina i tatou e auauna atu. Na aoao mai Elder Jeffrey R. Holland o le Korama a Aposetolo e Toasefululua:
Ata
Elder Jeffrey R. Holland
Ou te tuuina atu lau lava molimau o nei fetuutuunaiga [mai faiaoga o aiga ma asiasiga i auaunaga] o … ae sili atu faamaoniga o loo faanatinatiina e le Alii Lana galuega i lona taimi. …
… Tau ina ia … tatou galulue faatasi ma le Alii o le tovine [tagai Iakopo 5:70–72] ma tuu atu i le Atua ma le Tama o i tatou uma se lima fesoasoani i Lana galuega taua o le taliina o tatalo, tuuina atu o le faamafanafanaga, soloia o loimata, ma le faamalosia o tulivae vaivai [tagai Mataupu Faavae ma Feagaiga 81:5]. Afai o le a tatou faia lena mea, o le a avea atili i tatou ma soo moni o Keriso e pei ona tatau ona avea ai i tatou. (Jeffrey R. Holland, “Ia Faatasi ma Faamalosi i Latou,” Ensign po o Liahona, Me 2018, 101, 103)
O Sister Linda K. Burton, o le sa avea muamua ma Peresitene Aoao o le Aualofa, na ia faasoa mai foi:
Ata
Sister Linda K. Burton
Vaai faalemafaufau ma a’u i nisi o faailoga faigofie faaleagaga o le “manaomia le fesoasoani” e faatatau i le galuega o le faaolataga:
Manaomia le fesoasoani: mo matua ia tausi a’e a latou fanau i le malamalama ma le upumoni
Manaomia le fesoasoani: mo afafine ma atalii, uso ma tuagane, tamaitai ma tamaloloa o aiga, tausoga, tina ma tama matutua, ma uo moni e galulue o ni faufautua ma ofo atu lima fesoasoani i luga o le ala o feagaiga
Manaomia le fesoasoani: mo i latou o e faalogo i musumusuga o le Agaga Paia ma faatinoina uunaiga e maua
Manaomia le fesoasoani: mo i latou o e ola i le talalelei i aso uma i auala faigofie ma faatauvaa
Manaomia le fesoasoani: mo talafaasolopito o aiga ma tagata faigaluega o le malumalu ia sosoo faatasia aiga e faavavau
Manaomia le fesoasoani: mo faifeautalai ma tagata o le au paia e faasalalau atu le “tala fiafia”—o le talalelei a Iesu Keriso
Manaomia le fesoasoani: mo ni tagata laveai ia saili i latou ua leiloloa lo latou ala
Manaomia le fesoasoani: mo e tausi feagaiga ia tutu mausali mo le upumoni ma le mea sa’o
Manaomia le fesoasoani: mo soo moni o le Alii o Iesu Keriso …
… E le afaina pe afai tatou te le’i atoatoa ma silisili ona lelei. … E mafai ai ona tatou savavali faatasi, o ni soo, o ni auauna o i ai - loto naunautai ma lima e faanatinati ai le galuega o le faaolataga. A tatou faia lena mea, o le a avea i tatou e pei o le Faaola. (Linda K. Burton, “Manaomia: Lima ma Loto e Faanatinati le Galuega,” Ensign po o le Liahona, Me 2014, 124)
Faamamaluina o le Sapati
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 59:9-10 e aoao ai po o le a le mea na aoao ai e le Alii Lana Au Paia e uiga i le tausia o le aso Sapati ia paia.
Na aoao mai e Peresitene M. Russell Ballard o le Korama a Aposetolo e Toasefululua mea nei e uiga i le mana o le faamamaluina o le aso Sapati:
Ata
Peresitene M. Russell Ballard
O suiga uma a le faalapotopotoga po o aiaiga faavae po o aoaoga faavae faaleaoaoga lea e mafai ona faanatinatiina le galuega o le faaolataga i lenei taimi, ua tatou filifili ai o le siitiaina o le agaga ma le mana o le aso Sapati o le a sili ona aoga i le aumaia o tagata auai ma aiga e latalata atu i le Alii o Iesu Keriso . (M. Russell Ballard, in Chad H. Webb, “O le Aso Sapati” [Seminaries and Institutes training satellite broadcast, Aug. 4, 2015], ChurchofJesusChrist.org)
Ata
aikona, tusifaamaumau
Tusifaamaumau Ou Lagona Uunai
O a faamaoniga faaopoopo na e vaaia o loo faanatinatiina e le Alii Lana galuega i o tatou aso? O a nisi auala patino e te manao e fesoasoani atili ai i le galuega a le Alii? Tusi ou manatu i lau apitalaaga po o le avanoa ua saunia.
