“Lesona 1 Anomea mo le Sauniuniga o le Vasega: Ta’imuaga i le Toefuataiga,” Anomea a le Faiaoga O Faavae o le Toefuataiga (2019)
“Lesona 1 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 1 Anomea mo le Sauniuniga o le Vasega
Ta’imuaga i le Toefuataiga
Susū mai i O Faavae o le Toefuataiga. I le kosi lenei o le a e suesue ai i faaaliga, aoaoga faavae, tagata, ma mea lauiloa na tutupu faafaavae e faatatau i le Toefuataiga i aso e gata ai o le Ekalesia a Iesu Keriso. O le suesue ma le agaga tatalo i nei mea o le a fesoasoani i lou faatatauina atu o nei mataupu ma tagata i lou olaga ma tulaga. O le a faapea foi ona lelei atu le mafai ona e maua o le malamalama faaleagaga ma iloatino ai mea moni mai i mea sese.
O lenei anomea mo sauniuniga o le a tuuina atu ai ia te oe se faavae mo lou aafiaga i le vasega. O le suesue o mea taitasi e faaaoga mo sauniuniga o le lesona a o le’i oo i le vasega, o le a fesoasoani e te maua ai se aafiaga loloto atu ma sili atu le anoa e aoao ai.
A o e faia lenei kosi ma le agaga tatalo, o le a e vaaia ai le aao o le Alii i le talafaasolopito o le Toefuataiga ma faalogo ai i Lona siufofoga i faaaliga o le Toefuataiga (tagai Mataupu Faavae ma Feagaiga 18:34–36). E oo ane i le faaiuga o lenei lesona, ua tatau ona mafai ona e faamatala atu le pogai e manaomia ai ona toefuatai mai le Ekalesia. E tatau foi ona e iloa le ala na saunia ai e le Alii le ala mo se tisipenisione fou o upumoni i o tatou aso.
Vaega 1
O le a le mea na oo atu ai i le Liliuese Tele?
Ina ua mavae le maliu ma le Toetu o Iesu Keriso, sa faaauau ona taitai e Ana Aposetolo le Ekalesia a o faatoateleina. Na faamalamalama mai e Peresitene M. Russell Ballard o le Korama a Aposetolo e Toasefululua, le ala na iu ai ina pau atu le Ekalesia a Iesu Keriso i le liliuese:
Ua faailoa mai e le Feagaiga Fou e faapea, sa galulue malosi uluai Aposetolo e faasaosao le ekalesia sa tuua e Iesu Keriso i lo latou tausiga ma le vaaiga, ae sa latou iloa o a latou taumafaiga o le a iu ina le manuia. Sa tusi atu Paulo i le Au Paia i Tesalonia, o e sa faatalitali ma le naunautai i le afio mai faalua o Keriso, e faapea, “e le oo mai lena aso, seia muai ona taunuu o le tete’a ese” (2 Tesalonia 2:3). …
Mulimuli ane, faatasi ai ma le tuusaunoaga ua lauiloa o Ioane le Soo Pele, o Peteru ma ona uso a Aposetolo sa faapea ona faamaturoina. Sa tauivi le Aposetolo o Ioane ma tagata o le Ekalesia ina ia ola pea a o feagai ai ma sauaga sili ona mataga. I le faafetaia ai o i latou e faavavau, sa ola le FaaKerisiano ma sa o se malosiaga taua moni i le faaiuga o le seneturi lona lua T.A. E toatele le Au Paia lotototoa sa aafia i le fesoasoani i le FaaKerisiano ia tumau,
E ui lava i le taua o auaunaga a nei Au Paia, ae latou te le’i umia lea lava pule faa-aposetolo sa maua e Peteru ma isi Aposetolo e ala i le faauuina i lalo o aao o le Alii o Iesu Keriso lava Ia. Ina ua leiloa lena pule, sa amata e tagata ona vaai atu i isi punavai mo le malamalama faaleaoaoga faavae. O se taunuuga la, e tele upumoni manino ma pele na leiloloa. (M. Russell Ballard, “Upumoni Toefuataiina,” Liahona, Nov. 1994, 65–66)
Na vaai le perofeta o Nifae i le Liliuese Tele i se faaaliga vaaia. Sa ia vaaia, i le taimi o lenei liliuese, “[o le a] aveese [e tagata amioleaga] mai le talalelei a le Tamai Mamoe le tele o vaega ia ua manino ma sili ona pele; ma e tele foi feagaiga a le Alii ua latou aveese” (1 Nifae 13:26). Sa ia vaaia foi “e tele mea manino ma pele [o le a] aveesea mai” le Tusi Paia i le taimi o le Liliuese Tele (1 Nifae 13:28). Sa ta’u mai e se agelu ia Nifae, “Ona o ia mea ua aveesea i fafo mai le talalelei a le Tamai Mamoe, ua matua toatele lava ua tautevateva, ioe, ua oo ina maua ai e Satani le mana tele i luga o i latou” (1 Nifae 13:29).
Mafaufau Loloto a o Sauniuni mo le Vasega
Aisea na manaomia ai se toefuataiga o le atoatoa o le talalelei a Iesu Keriso?
Vaega 2
Na faapefea ona saunia e le Alii le ala mo le Toefuataiga?
I le mavae ai [o le tele] o seneturi o le liliuese, i le taimi lea sa toaitiiti lava ni tagata na i ai le avanoa e faaaoga ai tusitusiga paia, e toatele alii ma tamaitai musuia sa faia mea na latou mafaia, na masani lava ona latou pagatia ai, e fesoasoani ai i isi e sailia le upumoni. I le faaiuga o le vaitaimi o le 1300, na amata ai e Ioane Uitilifi se faaliliuga o le Tusi Paia i le FaaPeretania, ma o se taunuuga na ta’usalaina ai o ia e taitai o ekalesia i lona vaitaimi, o se tagata e talitonu i talafeaveai faalelotu. O le fatuga fou o le masini lomitusi i le ogatotonu o le vaitaimi o le 1400, na faia ma maua ai ni kopi taugofie o le Tusi Paia e ni isi tagata e toatele. I le vaitaimi o le 1500, na musuia ai e le Agaga o le Alii ia Matini Luteru, Huldrych Zwingli, Ioane Kalavini, Ioane Knox, Ane Askew, ma le toatele o isi o e na amata ona tautatala atu e faasaga i mea sese a lotu autu o o latou vaitaimi. Sa faia foi e Viliamu Tinitale ma isi ni faaliliuga fou o le Tusi Paia. O le toatele o nei tagata fai suiga na totogiina le tau o a latou faatinoga i o latou ola. O a latou taumafaiga na tau atu ai i le faatuina o lotu Porotesano fou. Ona sa leai se saolotoga i mea tau tapuaiga i Europa, o le fatuina o nei lotu fou na taitai atu ai i ni feteenaiga tetele.
O sauaga ona o mea tau tapuaiga na faaosofia ai le toatele o i latou nei ma isi tagata taitoatasi e sue se nofoaga fou lea e mafai ona latou tapuai saoloto ai, e aofia ai le au Tapuai, o e sa malaga mai Egelani i le atu Amerika i le amataga o le vaitaimi o le 1600. Sa vaai le perofeta o Nifae i se faaaliga vaaia i le toatele o na tagata fai suiga o mea tau lotu o e o le a iu ina nonofo i Amerika.
Suesue e Sauniuni ai mo le Vasega
Faitau le 1 Nifae 13:13–16, 19.
O e na tupuga mai i au Tapuai ma isi tagata malaga mai o e sa sailia le saolotoga faateleina na vavae ese mai Peretania Tele, na taitai atu ai i le Taua a le Au Tetee ia Amerika. O se tasi o fitafita o le sa tau i le itu a Amerika sa igoa ia Asaeli Samita. O Asaeli, o le tamamatua o le tamā o le Perofeta o Iosefa Samita, ua lauiloa i lona faapea mai i se tasi o taimi, “Ua faapea ona tuuina mai i lo’u agaga e faapea, o se tasi e tupuga mai ia te a’u o le a faataunuuina se galuega e faafouina ai le lalolagi o tapuaiga faalelotu” (Joseph Fielding Smith, Church History and Modern Revelation, 2 vols. [1953], 1:4). Sa molimauina e Asaeli le faavaeina o se malo fou, o se malo na i ai i lona totonugalemu le saolotoga o mea tau tapuaiga.
Sa aoao mai Elder Robert D. Hales o le Korama a Aposetolo e Toasefululua e faapea, o le faavaeina o le Iunaite Setete o Amerika sa o se laasaga lea i le saunia o le lalolagi mo le Toefuataiga o le talalelei:
O lagona faalelotu na taitaiina ai i latou na muai taunuu i se atunuu fou i le konetineta o Amerika. I lalo o le aao o le Atua, sa latou puipuia ai saolotoga faalelotu mo tagata uma, i se tautinoga musuia o le Pili o Aia Tatau. O le sefulufa o tausaga mulimuli ane, i le aso 23 o Tesema, 1805, na soifua mai ai le Perofeta o Iosefa Samita. Na toeitiiti lava mae’a tapenapenaga mo le Toefuataiga.
… Ou te molimau atu sa i ai le aao o [Iesu Keriso] i le galuega o le Toefuataiga mai le taimi a o lei faavaeina lenei lalolagi. (Robert D. Hales, “Sauniuniga mo le Toefuataiga ma le Afio Mai Faalua: ‘E i Ou Luga ai Pea Lou Lima,’” Ensign po o le Liahona, Nov. 2005, 90, 92)
Na aoao mai e Peresitene M. Russell Ballard le mea lenei:
O Iosefa Samita le Matua, o le tamā o le perofeta, sa mafatia i tulaga tautupe. … Sa auai [o ia] i se faiga pisinisi ma se paaga. Sa ave e le paaga faipisinisi le tupe ma leiloa ai. Sa laua faatauina mai se faatoaga sa faapea ona gau. Sa laua faatauina mai se isi [faatoaga], ma sa gau foi lena; faatau mai se isi, ma sa gau foi lena. Mulimuli ane, ona me’i atu ai lea o Iosefa Samita le Matua i Palamaira. Sa galue le aao o le Alii, e faame’i atu le aiga o Samita i le mea sa Ia manaomia ona i ai i latou. (M. Russell Ballard, “The Tapestry of God’s Hand” [Joseph Smith Memorial Fireside, Feb. 13, 2011, Logan Institute of Religion, Utah State University])
E ala i le mamanu a le lagi, sa soifua mai ai Iosefa Samita i le taimi sa’o, i le nofoaga sa’o, ma i lalo o tulaga sa’o e taulamua i le faavaeina o mea na tutupu o le Toefuataiga. Na molimau mai foi Peresitene Polika Iaga:
Na muai faauuina [Iosefa Samita] i le faavavau e pulefaamalumalu i lenei tisipenisione mulimuli. (Aoaoga a Peresitene o le Ekalesia: Polika Iaga [1997], 96.)
Mafaufau Loloto a o Sauniuni mo le Vasega
O le a se mea e mafai ona tatou aoao mai e uiga i le Alii i le ala sa Ia sauniaina ai le ala mo Iosefa Samita ma le Toefuataiga?