Lesona 10 Anomea a le Faiaoga

Mulimuli i Perofeta Soifua a le Alii

O se upumoni faavae o le talalelei toefuataiina o lea, o loo faaauau pea ona valaau e le Alii ia perofeta soifua e faaali mai i ai Lona finagalo ma aoaoga faavae i Ona tagata. O lenei lesona ua fuafuaina ia fesoasoani e faamalosia ai le tautinoga a tamaiti aoga e mulimuli i perofeta a le Alii i le onosai ma le faatuatua.

Fautuaga mo le Aoaoina Atu

Ua poloai e le Alii le Au Paia e faalogo ma usitai i upu a Ana perofeta.

Faaali atu se ata o le Peresitene o le Ekalesia, ma fesili atu i tamaiti aoga po o a ni o latou manatu ma lagona pe a latou vaai i lenei ata.

Faaali atu le saunoaga lenei a Elder Ulisses Soares o le Korama a Aposetolo e Toasefululua, o loo i ai foi i anomea mo sauniuniga:

Elder Ulisses Soares

O le i ai o perofeta o se faailoga o le alofa o le Atua i Ana fanau. (Ulisses Soares,“E Saunoa Mai Perofeta i le Mana o le Agaga Paia,” Ensign po o le Liahona, Me 2018, 99)

• O a auala ua avea ai perofeta soifua o se faailoga o le alofa o le Atua i Ana fanau? (Faamalosiau i tamaiti aoga ia manatua mea na latou suesueina i le vaega 1 o anomea mo sauniuniga.)

Faamalamalama atu, i le aso na faatulagaina ai le Ekalesia, sa maua ai e le Perofeta o Iosefa Samita se faaaliga mai le Alii faatasi ai ma se poloaiga ma le folafolaga i tagata o Lana Ekalesia. Faitau faatasi ma tamaiti aoga le Mataupu Faavae ma Feagaiga 21:4-5, ma vaavaai mo mea na poloaiina e le Alii le Au Paia e fai.

• O le a le upumoni e mafai ona tatou faailoa mai i poloaiga a le Alii i le Au Paia? (Faaaoga upu a tamaiti aoga, e faailoa mai ai se upumoni e pei o lea: Ua poloaiina i tatou e le Alii ia talia upu a le perofeta e faapei na aumai i Lona lava fofoga i le onosai ma le faatuatua.)

• Aisea e manaomia ai le onosai ma le faatuatua e talia ma ua’i atu ai i upu a le perofeta?

I le vasega po o ni vaega toalaiti, ia valaaulia tamaiti aoga e faitau vaaiga faataitai nei ma talanoa i fesili o loo i lalo:

A o talanoa ai ma se uo e uiga i le konafesi aoao lata mai nei, na ta’u atu ai e lau uo ia te oe ia lona tauivi e talia se mea na aoao mai e se tasi o taitai o le Ekalesia. “O le a se mea e tatau ona ou faia pe afai ou le ioe i se mea na aoao mai e se perofeta?” sa ia fesili mai ai

• Aisea e mafai ona avea ai lenei mea o se faafitauli luitauina mo se tatgata o le Ekalesia?

• O le a se mea e te ono faasoa atu i lau uo e faamalosiau ai o ia ia faatino i le onosai ma le faatuatua a o ia saili e foia lona popolega? (Faamalosiau i tamaiti aoga e mafaufau e uiga, pe toe faamanatu pe a manaomia ia mea na latou aoaoina mai i le vaega 2 o anomea mo sauniuniga.)

• O le a se mea na fesoasoani e te mulimuli ai i perofeta a le Alii i le onosai ma le faatuatua? Po o le a se mea na e aoao mai i se tagata o le aiga po o se uo na e talanoa i ai e uiga i lenei fesili (e pei ona fautuaina i le vaega 2 o anomea mo sauniuniga)?

Tusi i le laupapa (pe faaali atu) le mataupu faavae le uma lenei: A o tatou uai atu i upu a perofeta a le Alii i le onosai ma le faatuatua …

Faitau faatasi ma tamaiti aoga le Mataupu Faavae ma Feagaiga 21:6, ma vaavaai mo faamanuiaga folafolaina a le Alii mo le mulimuli i Ana perofeta i le onosai ma le faatuatua.

• O le a lou manatu i le uiga o le “o le a lē manumalo ai faitotoa o seoli ia te outou”? O le a “faamataa ese ai e le Alii le Atua mana o le pouliuli mai i o outou luma’?, ma o le a “luluina le lagi mo lo outou lelei”? (Tusi tali a tamaiti aoga i le laupapa i lalo o le faamatalaga le uma o le mataupu faavae.)

• O a nisi o aoaoga lata mai nei mai perofeta a le Alii e mafai ona fesoasoani e puipui ai tatou e faasaga i mana o le pouliuli ma luluina ai le lagi mo lo tatou lelei? (Mafaufau e saunia ni nai faataitaiga e faasoa atu.)

• O le a se taimi na [e] maua ai nisi o nei faamanuiaga ona o lou naunau e mulimuli i le fautuaga a se perofeta?

Tuu atu i tamaiti aoga se taimi e mafaufau loloto ai ma le agaga tatalo ia mea e mafai ona latou faia e mulimuli ai i perofeta a le Alii i le onosai ma le faatuatua faateleina. O lenei mea e ono aofia ai le mafaufau i auala e mafai ona latou faatino atoatoa atili ai ia valaaulia ma fautuaga faaperofeta lata mai nei. Valaaulia tamaiti aoga e tusifaamaumau ni manatu ma ni lagona e oo mai ia i latou. Faamalosiau ia i latou e galulue i uunaiga latou te maua mai le Agaga.

E maua e perofeta a le Alii ia faaaliga ma tautino mai aoaoga faavae mo le Ekalesia aoao.

Fai atu i tamaiti aoga ia manatua le aafiaga ma Hiram Page ma lana maa mai a latou suesuega o anomea mo sauniuniga.

• O a ni faafitauli na faatupuina mo tagata o le Ekalesia e faaaliga le faamaonia a Hiram Page?

Faamanatu atu i tamaiti aoga e le gata ina sa faapea mai Hiram Page sa maua ni faaaliga mo le Ekalesia, ae o ana faaaliga le faamaonia sa feteenai ma aoaoga faavae na aoaoina i tusitusiga paia ma faaaliga na maua muamua e Iosefa Samita. O i latou na taliaina faaaliga a Hiram Page na aofia ai tagata o le aiga o Uitimera ma Oliva Kaotui.

Faitau le Mataupu Faavae ma Feagaiga 28:1-7, ma vaavaai mo aoaoga a le Alii ia Oliva Kaotui ma tagata o le Ekalesia. Faailoa atu e faapea “o mealilo” na ta’ua i le fuaiupu 7 e faatatau i “upumoni faaleagaga e na’o faaaliga e iloa ai” (Taiala i Tusitusiga Paia, “Mealilo a le Atua,” scriptures.ChurchofJesusChrist.org).

• O a ni upumoni e mafai ona tatou aoao mai nei fuaiupu e uiga i le po o ai e mafai ona mauaina faaaliga mo le Ekalesia atoa? (E ono faailoa mai e tamaiti aoga ni upumoni eseese, e aofia ai mea nei: E na’o i latou o e umia ki e taitai ai le Ekalesia ua faatagaina e maua faaaliga ma faatulaga aoaoga faavae mo le Ekalesia atoa.)

• E mafai faapefea ona fesoasoani le malamalama i lenei upumoni tatou te aloese ai mai le faaseseina?

Faamalamalama atu o loo i ai le ogatasi tele i le aoaoga faavae e aoaoina mai e perofeta filifilia a le Alii i le talafaasolopito atoa o le Ekalesia. Ae peitai, e ono mafaufau nisi o tagata po o le a le mea e fai pe a latou tau i se faamatalaga na faia i aso ua mavae e se taitai o le Ekalesia e foliga mai ua le ogatasi ma aoaoga faavae ua aoaoina i onaponei.

• O a ni mataupu faavae e mafai ona taitaia i tatou i le iloaina o le aoaoga faavae a le Alii e pei ona aoao mai e Ana perofeta soifua? ((Atonu e te manao e valaaulia tamaiti aoga e toe faamanatu saunoaga a Elders D. Todd Christofferson ma Neil L. Andersen i le vaega 3 o anomea mo sauniuniga.)

I le avea ai ma se vaega o le talanoaga, e mafai ona e faasoa atu le saunoaga lenei a Peresitene Russell M. Nelson:

Peresitene Russell M. Nelson

Atonu e te le malamalama i taimi uma i folafolaga taitasi a se perofeta soifua. Ae afai e te iloaina o se perofeta o se perofeta, e mafai ona e tatalo atu i le Alii i le lotomaualalo ma le faatuatua ma ole atu mo sa oe lava molimau e uiga i soo se mea ua folafola mai e Lana perofeta. (Russell M. Nelson, “Tutu Atu o ni Tagata Moni o le Meleniuma,” Liahona, Oke. 2016, 31)

Mafaufau e faauma le lesona i le faasoa atu o lau molimau i perofeta soifua ma faamanuiaga o le mulimuli ia i latou i le onosai ma le faatuatua.

Mo Le Isi Taimi

Faamalamalama atu o le isi vasega e sosoo ai o le a taulai atu ai i se autu na faatatau atu i ai Peresitene Russell M. Nelson o se “luitau silisili, o le faapogai silisili ma le galuega silisili lava i le lalolagi i aso nei” (“Faamoemoe o Isaraelu” [faigalotu a le autalavou i le lalolagi aoao, 3 Iuni, 2018], faaopoopoga i le New Era ma le Ensign, 4–5, HopeofIsrael.ChurchofJesusChrist.org; faatusilima i le uluai tusiga). Valaaulia tamaiti aoga e suesue i anomea mo sauniuniga mo le lesona e sosoo ai, ma ia o mai saunia e soalaupule i faamoemoega ma faamanuiaga o le auai i le faamoemoega ma le galuega maoae o le faapotopotoina o Isaraelu.