Lesona 5 Anomea a le Faiaoga

O Le Oo Mai o le Tusi a Mamona

O le oo mai o le Tusi a Mamona na tupu i se auala faavavega. O le lesona lenei o le a fesoasoani i tamaiti aoga ia malamalama lelei ai i le ala na faaliliuina ai le Tusi a Mamona “e ala i le meaalofa ma le mana o le Atua (Mataupu Faavae ma Feagaiga 135:3). O le a tomanatu foi tamaiti aoga i le, ma tuuina atu i ai se avanoa e faasoa mai ai a latou molimau i le moni o le Tusi a Mamona.

Fautuaga mo le Aoaoina Atu

FAALELEIA O LO TATOU AOAO ATU MA LE AOAOINA

Aoao atu mo le liua. Na aoao mai Peresitene Henry B. Eyring: “E ao ona siitia la tatou vaai. E tatau ona tatou faatumauina ia sini o loo i ai pea ia i tatou: lesitalaga, auai soo, faauuga, malamalama i tusitusiga paia, o le aafiaga o lagona o le faamautu mai e le Agaga Paia o upumoni. Ma le isi, e tatau ona tatou vaai taulai atu i le galuega faamisiona ma le malumalu. Ae e manaomia e tamaiti aoga le tele o nisi mea i le taimi e avea ai i latou ma a tatou tamaiti aoga. …

“E tatau ona oo ifo i totonu o loto o tamaiti aoga le talalelei mamā a Iesu Keriso e ala i le mana o le Agaga Paia. … O lo tatou faamoemoega ia tatau ona latou liua moni i le talalelei toefuataiina a Iesu Keriso a’o latou i ai pea ma i tatou” (“We Must Raise Our Sights” [Church Educational System conference on the Book of Mormon, Aug. 14, 2001], 2).

Ua oo mai le Tusi a Mamona “e ala i le meaalofa ma le mana o le Atua.”

Faaali atu se ata o Moronae o loo tanumia papatusi.

O Moronae o loo Tanumia Papatusi, saunia e Tom Lovell

Fai i tamaiti e faamatala atu mea ua latou iloa e uiga i le mea o loo tupu i le ata. Atonu e mafai ona e fesili atu, pe o le a so latou manatu, po o le a se mea na iloa e Moronae e uiga i le aafiaga o le a faia e faamaumauga i augatupulaga i le lumanai.

Fai atu i tamaiti aoga e faitau le Mamona 8:12–16, ma vaavaai mo mea na aoao mai e Moronae e uiga i le oo mai o le Tusi a Mamona.

• O le a le mea na manao Moronae e faamanino mai e uiga i le oo mai o le Tusi a Mamona?

Faaali atu le faamatalaga lenei a Iosefa Samita, lea e masani ona ia tautala ai pe a fesiligia [o ia] e uiga i le faaliliuga o le Tusi a Mamona:

o le Perofeta o Iosefa Samita

Sa ou faaliliua le Tusi a Mamona e ala i le meaalofa ma le mana o le Atua. (Joseph Smith, i le James Palmer, Journal, 75, Church History Library, The Church of Jesus Christ of Latter-day Saints, Salt Lake City, Utah; ua faaonaponei le faamataitusi lapopoaina)

Valaaulia tamaiti aoga e faasoa mai se mea na latou tau i ai i anomea mo sauniuniga, e uiga i le ala na oo mai ai le Tusi a Mamona “e ala i le meaalofa ma le mana o le Atua.” (Afai e manaomia, faamalosiau i tamaiti aoga e toe faamanatu faapuupuu le vaega 1 o anomea mo sauniuniga.) E mafai foi ona e valaaulia i latou e fai mai soo se latou fesili o i ai mai a latou suesuega e uiga i le faaliliuga o le Tusi a Mamona.

Valaaulia tamaiti aoga e toe faamanatu mea na latou aoaoina mai i saunoaga a Iosefa Samita ma Elder Neal A. Maxwell i le faaiuga o le vaega 1 o anomea e sauniuni ai. (Atonu e te manao e valaaulia se tamaitiiti e faitau leotele ia faamatalaga nei.)

• Aisea e te manatu e tatau ai ona sili atu lo tatou popole i le “aano o le tusi” nai lo “o le faagasologa lea ua ala ai ona tatou mauaina”?

Ua folafola mai le Atua e faapea, e mafai e tagata taitoatasi ona maua se molimau faamautinoa o le Tusi a Mamona.

Fesili atu i tamaiti aoga pe toafia i latou e fia vaai i papatusi auro mo i latou lava ma aisea.

• Aisea e te manatu e le faamaonia ai e le Alii le moni o le Tusi a Mamona e ala i le faatagaina o papatusi ma isi mea taua ina ia faaali atu i le lalolagi?

Fai atu i tamaiti aoga e faitau le Mataupu Faavae ma Feagaiga 5:3, 6–7, ma vaavaai pe aisea na le faaalia ai e Iosefa ia papatusi ia i latou o e na mananao i se faamaoniga. Fai atu i tamaiti aoga e faamatala mai le mea o loo aoao mai e fuaiupu.

Faamalamalama atu, o le faaaliga lenei na tuuina mai ia Iosefa o se taunuuga o le talosaga atu o Matini Harisi mo se molimau e faapea, sa i ai papatusi auro ia Iosefa. O Matini sa o se uo a Iosefa, ma sa i ai le gafatia i mea tautupe e fesoasoani ai e lolomi le Tusi a Mamona pe a uma ona faaliliuina. Sa faaulu e le toalua o Matini, o Lusi, se tagi i le faamasinoga i le lotoifale, na tuuaia ai Iosefa i le taufaavalea i lana tane ma isi mo le mauaina o ni tupe. Ia Mati 1829, sa alu atu ai Matini i Haramoni, Penisilevania, e fesili atu ia Iosefa Samita mo se faamaoniga o le i ai o papatusi.

Fai atu i tagata aoga e faitau le Mataupu Faavae ma Feagaiga 5:11–15, ma vaavaai mo se auala se tasi o le a faavae ai e le Alii le moni o le faamaumauga o le Tusi a Mamona. Fai atu i tamaiti aoga e faamalamalama mai se mea ua latou aoaoina mai i nei fuaiupu.

Faamalamalama atu, sa faaali mai e le Alii e faapea, e mafai ona avea Matini Harisi ma se tasi o Molimau e Toatolu pe afai o le a “ifo o ia i lalo” ma “faamaualalo o ia lava i le tatalo malosi ma le faatuatua” (Mataupu Faavae ma Feagaiga 5:24). O le tolu masina mulimuli ane, sa valaaulia ai e Iosefa ia Matini Harisi e auai faatasi ma Oliva Kaotui ma Tavita Uitimera i le sailia o le molimau faapitoa lea na folafola mai e le Alii.

Faaali atu le ata o Iosefa Samita ma Molimau e Toatolu mai anomea mo sauniuniga, ma fai atu i le vasega e toe faamatala le mea na tupu ina ua tatalo nei tamalii mo se molimau e uiga i papatusi.

• O a ni lagona o Iosefa e uiga i le vaai o Molimau e Toatolu i papatusi? (Afai e manaomia, tuu atu i tamaiti aoga e toe faamanatu le faamatalaga a Lusi Maki Samita o loo i anomea mo sauniuniga.)

• E faapefea ona faamalosia le mau a Molimau e Toatolu e ala i le mea moni e faapea, latou te le’i faafitia lava a latou molimau, e ui lava ina sa o ese i latou mai le Perofeta ma le Ekalesia?

Fai atu i tamaiti aoga e faitau le Mataupu Faavae ma Feagaiga 5:15–16 ma le Moronae 10:3–5, ma vaavaai mo auala e mafai ai e tagata uma ona maua se molimau i le moni o le Tusi a Mamona. A o faamalamalama mai e tamaiti aoga mea na latou aoaoina mai i nei fuaitau o mau, fesoasoani ia latou iloa se mataupu faavae e talitutusa i lenei: O le a faaali mai e le Alii le moni o le Tusi a Mamona e ala i le Agaga Paia, ia i latou uma o e sailia se molimau.

• E faapefea ona faatusatusa se molimau mai le Agaga Paia ma faamaoniga faaletino, e pei o le vaai i papatusi po o le i ai o se malamalama atoatoa e uiga i faamatalaga auiliili uma o le faaliliuga o le Tusi a Mamona.

Fai atu i se tagata aoga e faitau leotele le tala lenei mai ia Elder Tad R. Callister, o lē sa avea muamua ma Peresitene Aoao o le Aoga Sa.

Elder Tad R. Callister

Sa tuua e se tasi o a’u uo lelei atamai le Ekalesia mo se taimi. Sa tusi mai o ia talu ai nei e uiga i lona toe foi mai: “Muamua, sa ou manao ina ia faamaonia mai ia te au le Tusi a Mamona i lona faasolopito, faaletino, faalegagana, ma faaleaganuu. Peitai, ina ua ou suia la’u taulaiga i le mea o loo ia aoao mai e uiga i le talalelei a Iesu Keriso ma Lana misiona laveai, sa amata ona ou maua se molimau i lona moni. I se tasi aso a o ou faitauina le Tusi a Mamona i lo’u potu, sa ou taofi ae tootuli i lalo ma avatu se tatalo ma le loto ma lagonaina ma le manino sa musumusu mai le Tama Faalelagi i lo’u Agaga e faapea o le Ekalesia ma le Tusi a Mamona e matuai moni a’ia’i. O lau tolu ma le afa tausaga o le toe sailiilia o le Ekalesia na toe taitai mai ai a’u ma le loto atoa ma le faatalitonuina i lona moni.”

Afai e faaalu e le tagata se taimi e faitau ai ma manatunatu loloto ma le lotomaualalo le Tusi a Mamona, e faapei ona faia e la’u uo, ma uai atu i fua suamalie o le Agaga, ona mulimuli ane lea ona maua le molimau o loo moomia.

O le Tusi a Mamona o se tasi o meaalofa e le mafaatauina a le Atua ia i tatou. (Tad R. Callister, “O Le Molimau Mamana a le Atua: O Le Tusi a Mamona,” Ensign po o le Liahona, Nov. 2017, 109)

• O a ni aafiaga ua fesoasoani e te iloa ai e moni le Tusi a Mamona? (Tuu atu i tamaiti aoga le avanoa e faasoa mai ai mea na latou tusia i a latou anomea mo sauniuniga o loo i le faaiuga o le vaega 2.)

Faaiu i le faasoa atu o lau molimau e faapea, e ui ina tatou te le’i vaai i papatusi auro, pe sa tatou i ai foi i le taimi na faaliliuina ai le Tusi a Mamona, ae e mafai ona tatou faitau ma suesue i le tusi ma maua ai se molimau faaleagaga mo i tatou lava e faapea, e moni lava o le afioga lea a le Atua.

Mo Le Isi Taimi

Valaaulia tamaiti aoga e mafaufau pe aisea e tulituliapu ai ma le faalealofa e le au faitio o le Ekalesia a le Alii ia le Tusi a Mamona. Faamalosiau i le vasega e suesue i anomea mo sauniuniga mo le vasega e sosoo ai, ma vaavaai pe faapefea ona faateleina lo latou gafatia e puipui ai le Tusi a Mamona.