Lesona 22 Anomea a le Faiaoga

Faaipoipoga Autaunonofo

O le faaipoipoga i le va o le alii e toatasi ma le tamaitai e toatasi o le tulafono lea a le Alii sei vagana ua Ia poloaiina mai se isi [tulafono] (tagai i le Iakopo 2:27-30). E ala mai i le faaaliga na poloaiina e le Alii le perofeta o Iosefa Samita e faatuina le faiga o autaunonofo i uluai tagata o le Ekalesia. Sa faaauau lava faaipoipoga autaunonofo i le Ekalesia seia oo ina tautino mai e le Alii e ala i faaaliga e faapea, ua tatau i le Au Paia ona faamutaina lea faiga (tagai i le Folafolaga Aloaia 1). Ua mamanuina le lesona lenei ia faamalosia ai le mautinoa o tagata aoga o Iosefa Samita ma tagata anamua o le Ekalesia, ina ua latou faia faaipoipoga autaunonofo, sa latou faia i lalo o le faatonuga a le Alii. O le a fesoasoani foi i tagata aoga ia faalagolago atoatoa i le Alii a o latou saili e usitai i Lona finagalo ma su’e tali i a latou fesili.

Fautuaga mo le Aoaoina Atu

O le Alii na faaalia mai le faia o faaipoipoga autaunonofo.

Faaali atu le saunoaga lenei a Peresitene Russell M. Nelson:

Peresitene Russell M. Nelson

E masani lava ona talosaga mai le Atua i Ana fanau o le feagaiga e fai mea faigata. (Russell M. Nelson, “Tutu Atu o ni Tagata Moni o le Meleniuma,” Ensign, Oct. 2016, 27)

• O a nisi o “mea faigata” ua talosaga mai le Atua i tagata o le Ekalesia e fai i o tatou aso? (E mafai ona e lisiina tali i luga o le laupapa. Valaaulia tagata aoga e mafaufau i lo latou usiusitai patino i nei poloaiga i le aluga atoa o le lesona.)

• Aisea e te manatu ai ua talosagaina e le Atua ia Ana fanau o le feagaiga e fai nei mea?

Ia faailoa atu, mo le toatele o le Au Paia o Aso e Gata Ai, o se tasi o mea aupito faigata sa manaomia mai e le Atua o le, ia latou ola i le mataupu faavae o le faaipoipoga autaunonofo. Faamanatu atu i tagata aoga, o le amataga lava o le 1831, na tatalo ai Iosefa Samita ina ia malamalama i le pogai na faia ai e perofeta anamua ma tupu o Isaraelu faaipoipoga autaunonofo (tagai i le ulutala o le vaega ma le fuaiupu 1 o le Mataupu Faavae ma Feagaiga 132).

Valaaulia se tagata aoga e faitau leotele le Mataupu Faavae ma Feagaiga 132:34–37 . Fai atu i le vasega e mulimuli i le faitauga, ma vaavaai pe na faapefea ona tali mai le Faaola i le fesili a le Perofeta.

• Faaali atu le fesili lenei: Aisea na faaipoipo ai Aperaamo ia Akara, e fai ma le isi ana ava?

• E tusa ai ma le fuaiupu 36–37, o le a le mataupu faavae na aoao mai e le Alii ia Iosefa Samita e uiga i le usiusitai i Ana poloaiga? (A uma ona tali mai tagata aoga, tusi le upumoni lenei i le laupapa: A tatou naunau e usitai i soo se mea e poloai mai ai le Alii, e “faitauina lea mea ia [i tatou] mo le amiotonu.”)

• E mafai faapefea ona faatusatusa le poloaiga a le Alii ia Aperaamo e osi le taulaga ia Isaako i Lana poloaiga ia Iosefa Samita ma le Au Paia anamua e faia faaipoipoga autaunonofo?

Faamalamalama atu e faapea, o se taimi ina ua uma ona faaali mai e le Alii le mataupu faavae o faaipoipoga autaunonofo ia Iosefa Samita, sa Ia poloaiina ai le Perofeta ia ola i lenei mataupu faavae ma ia aoao atu i isi.

Faaali atu le faamatalaga lenei, ma valaaulia se tagata aoga e faitau leotele:

E tusa ai ma le saunoaga a Helen Mar Kimball, sa saunoa mai Iosefa Samita e faapea, “o le faatinoina o lenei mataupu faavae o le tofotofoga aupito sili lea ona faigata o le a sueina ai e le Au Paia o latou faatuatua.” E ui lava o se tasi lea o tofotofoga “sili ona matuia” o lona olaga, na ia molimau mai faapea, na avea foi o se”‘tasi o faamanuiaga silisili.” (“Faaipoipoga Autaunonofo i Katelani ma Navu,” Gospel Topics, topics.ChurchofJesusChrist.org)

• O a ni lagona o Iosefa Samita sa i ai e faasaga i le faiga o faaipoipoga autaunonofo i le taimi muamua lava na faalauiloa mai ai? (Pe a manaomia, tuu atu i tagata aoga e toe faamanatu le saunoaga a Sister Eliza R. Snow o loo i le vaega 2 o anomea mo sauniuniga.)

Fai atu i tagata o le vasega e mafaufau i faataitaiga a Aperaamo ma Iosefa Samita.

• O le a se mea ua faaalia mai e le naunau o le Au Paia anamua ia usitai i poloaiga faigata faapea, e uiga i o latou tagata ma faatuatua?

Faamalamalama atu, sa tuua e nisi o le Au Paia anamua ni faamatalaga o le tauiviga i totonu lea sa latou oo i ai ina ua faalauiloa atu faaipoipoga autaunonofo ia i latou. Valaaulia tagata aoga e faasoa mai ni mea latou te manatua mai tala na latou suesueina i le vaega 3 o anomea mo sauniuniga.

Faaali atu le tala lenei mai ia Phebe Uitilafi, o le faletua o Peresitene Uilifoti Uitilafi. Valaaulia se tagata aoga e faitau leotele:

O le taimi muamua lava na aoao mai ai le mataupu o le tele o avā, sa ou faapea ifo, o le mea aupito sili lea ona leaga ua ou faalogo i ai. … Ae peitai, ina ua faatalitonuina a’u e faapea na afua mai o se faaaliga mai le Atua e ala mai ia Iosefa, ma le iloa o ia o se perofeta, sa ou tauivi ma lo’u Tama Faalelagi i le tatalo faatauanau, ina ia taitaia tonu a’u i lena taimi aupito taua o lo’u olaga. Sa oo mai le tali. Sa tuuina mai le toafilemu i lo’u mafaufau. Sa ou iloaina o le finagalo lea o le Atua. (Phebe Woodruff, i le Edward Tullidge, The Women of Mormondom [1877], 413)

• E mafai faapefea ona fesoasoani le faataitaiga a Phebe i se tasi i aso nei o lē atonu o loo tauivi ma le usitaia o se poloaiga a le Atua? E mafai faapefea ona fesoasoani lana faataitaiga i se tasi o lē atonu o i ai ni fesili e uiga i le faia o faaipoipoga autaunonofo i le Au Paia anamua?

Valaaulia se tagata e faitau leotele le Faataoto 3:5–6 ma fai i le vasega e mulimuli ai ma vaavaai mo se mataupu faavae e mafai ona faatatau i aafiaga o nei Au Paia anamua.

• O a ni mataupu faavae e mafai ona tatou aoaoina mai lenei fuaitau ma aafiaga o le Au Paia anamua? (I le faaaogaina o upu a tagata aoga, tusi i le laupapa (pe faaali atu) se mataupu faavae e talitutusa ma lenei: Afai tatou te faalagolago i le Alii ma o tatou loto atoa, ae aua le faalagolago i lo tatou lava atamai, o le a Ia taiala o tatou olaga.)

Fai atu i tagata aoga le fesili lenei:

• O le a sou manatu o le uiga mo se tasi o popole e uiga i le faiga anamua o faaipoipoga autaunonofo ia faalagolago i le Alii ma lona loto atoa ae le na’o le faalagolago i lona lava atamai?

Faamalamalama atu, e le o se mea e le masani ai mo taitai o le Ekalesia ona i ai ni fesili po o ni atugaluga e uiga i faaipoipoga autaunonofo. E le’i faaalia mai ma e le o manao le Atua ia tatau lava ona malamalama Ana fanau i aso nei i faamatalaga auiliili o faaipoipoga autaunonofo. E ui i lea, ua folafolaina mai i le Au Paia uma, e mafai ona latou maua se molimau o Iosefa Samita o se perofeta a le Atua o lē na maua mai poloaiga ma faaaliga mai ia te Ia ma sa ola faamaoni Iosefa e tusa ai ma poloaiga a le Atua.

FAALELEIA O LO TATOU AOAO ATU MA LE AOAOINA

E mafai ona e fesoasoani i tagata aoga e tali fesili faigata. O le tuuina atu o faamatalaga sa’o i tagata aoga ma fesoasoani ia i latou ia iloa punavai faatuatuaina e mafai ona fesoasoani latou te mafaufau e uiga, ma faamalamalama sa’o atu autu faigata. Afai e fia aoao atili tagata aoga e uiga i le faiga o faaipoipoga autaunonofo, valaaulia i latou e suesue ma le agaga tatalo i punaoa faaopoopo ua lisiina atu i le vaega “Manao Pea i Nisi Mea?” o anomea mo sauniuniga.

Valaaulia tagata aoga e mafaufau i ni taimi i o latou lava olaga na latou faalagolago ai i le Alii ma usitaia se poloaiga faigata—po o se taimi na tatau ai ona latou “le faalagolago i o [latou] lava atamai” a o latou suesue mo tali i fesili faigata. Atonu e te valaaulia ni nai tagata aoga e faasoa mai o latou aafiaga. Fesili atu ia i latou po o a ni auala na taitaia ai le Alii o latou ala.

Mafaufau e tuu atu i tagata aoga se taimi e mafaufau ai e uiga i ni a latou fesili faalelotu pe faaletagata lava ia o loo i ai. Fai atu ia i latou e mafaufau loloto po o a ni mea e mafai ona latou faia ia maua ai tali i po o faamautinoaga e uiga i nei fesili, ia faatuatua i le Alii ma ia faalagolago ia te Ia. Atonu foi latou te faamaumauina o latou manatu i se apitalaaga pe tatalo mo le fesoasoani a le Alii ia iloa le ala e faatino ai i le faatuatua.

Na faaali mai e le Alii nisi o pogai mo le faiga o faaipoipoga autaunonofo.

Faamalamalama atu, tatou te le malamalama i faamoemoega uma o le Atua mo le faalauiloa mai o faaipoipoga autaunonofo i lenei tisipenisione, ae ua Ia tuuina mai ia i tatou nisi o Ana mafuaaga. Mo se faataitaiga, na aoao e le Alii le Perofeta o Iosefa Samita e faapea, o lea faiga sa o se vaega o le toefuataiga o “mea uma” mai tisipenisione ua mavae (tagai Mataupu Faavae ma Feagaiga 132:40, 45).

Valaaulia se tagata aoga e faitau leotele le Iakopo 2:30 , ma fai i le vasega e vaavaai mo se isi mafuaaga ua tuuina mai e le Alii mo le poloaiina o Lona nuu e fai faaipoipoga autaunonofo. Valaaulia tagata aoga e lipoti mea sa latou mauaina. (E tatau ona aofia i tali a tagata aoga e faapea, o le poloaiga na tuuina mai o se auala e faateleina ai le numera o tamaiti e fananau i totonu o le feagaiga o le talalelei. I lenei auala, e “faatutu mai ni fanau” e le nuu o le Atua mo Ia.)

Faailoa atu o taumafaiga a uluai Au Paia e usitai i lenei poloaiga “na taunuu i le fananauina o se aofaiga tele o fanau i totonu o aiga faamaoni o le Au Paia o Aso e Gata Ai” (“Plural Marriage and[] Early Utah,” Gospel Topics, topics.lds.org).

Na faaalia mulimuli mai e le Alii ua tatau i le Au Paia o Aso e Gata Ai ona faamuta le faatinoina o faaipoipoga autaunonofo.

Valaaulia se tagata aoga sa suesue i anomea mo sauniuniga (vaega 2) e toe faamatala le mea na taitai atu ai i le faamutaina o faaipoipoga autaunonofo i le Ekalesia toefuataiina.

• O le a faapefea ona e faamatalaina le tautinoga a le Alii e faapea, o Ana poloaiga uma e faaleagaga?

Valaaulia nai tagata aoga e feauauai e faitau leotele mai parakalafa muamua ma le lona fitu o le “O ni Upusii mai ni Saunoaga se tolu a Peresitene Uilifoti Uitilafi e Uiga i le Manifeso,” lea e sosoo ma le Folafolaga Aloaia 1.

• O le a le mea na aoao mai e Peresitene Woodruff i le Au Paia? (E ao i tagata aoga ona faailoa mai se upumoni e talitutusa ma lenei: O le a le faatagaina lava e le Alii le Peresitene o le Ekalesia e taitai sese le Ekalesia.)

• E mafai faapefea e lenei upumoni ona aafia ai le auala tatou te tali patino atu ai i le fautuaga ma aoaoga a le perofeta soifua a le Alii?

Faaiu i le faasoa atu o lau molimau o le Perofeta o Iosefa Samita ma isi taitai o le Ekalesia anamua o ni perofeta moni a le Atua o e sa mulimuli ma aoaoina atu ma le usiusitai poloaiga a le Alii i le Au Paia o Aso e Gata Ai.

Mo Le Isi Taimi

Faamatala atu i tagata aoga a’o latou suesue mo le isi vasega e sosoo ai, o le a latou maua se avanoa e aoao ai i faamatalaga auiliili e faatatau i le maliliu o Iosefa ma Ailama Samita. Uunaia tagata aoga ia o mai i le vasega ua saunia e soalaupule o latou manatu i mea na ausia e Iosefa Samita a o avea ma se perofeta a le Atua.