Lesona 10 Anomea mo le Sauniuniga o le Vasega: Mulimuli i Perofeta Soifua a le Alii
“Lesona 10 Anomea mo le Sauniuniga o le Vasega: Mulimuli i Perofeta Soifua a le Alii,” Anomea a le Faiaoga O Faavae o le Toefuataiga (2019)
“Lesona 10 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 10 Anomea mo le Sauniuniga o le Vasega
Mulimuli i Perofeta Soifua a le Alii
Ata
Peresitene Russell M. Nelson o loo lulu lima ma tagata talavou
Mafaufau pe o le a faapefea ona ese lou olaga pe a aunoa ma le faatosinaga ma aoaoga a perofeta soifua. A o e suesue, mafaufau i auala e mafai ona aumai ai e perofeta nei a le Alii le taitaiga ma faamanuiaga sili atu i lou olaga.
Vaega 1
E mafai faapefea e le filifili e mulimuli i perofeta a le Alii ona manuia ai lo’u olaga?
I le aso na faatulagaina ai le Ekalesia a Iesu Keriso, sa faaali mai e le Alii, o le Perofeta o Iosefa Samita o le a “ta’ua o se tagatavāai, o se faaliliutusi, o se perofeta, o se aposetolo a Iesu Keriso, o se toeaina o le ekalesia” (Mataupu Faavae ma Feagaiga 21:1).
Ona tuuina mai lea e le Alii se poloaiga i le Au Paia e uiga i le mulimuli i Lana perofeta ma faamatala mai faamanuiaga o le a oo mai pe afai latou te faia o lea.
O le tausaga na sosoo ai, sa toe ta’ua ai e le Alii le sootaga i le va o Lona siufofoga ma leo o Ana perofeta. I se faaaliga lea na avea ma se faatomuaga mo le Tusi o Poloaiga, lea o le a avea mulimuli ane ma Mataupu Faavae ma Feagaiga, sa toe aoao mai ai le Alii e faapea, “e ui ina mavae atu le lagi ma le lalolagi, e lē mavae atu lava lau upu, ae o le a faataunuuina uma lava, pe i lo’u lava leo po o i le leo o a’u auauna, ua tutusa lava” (Mataupu Faavae ma Feagaiga 1:38).
Na molimau mai Elder Ulisses Soares o le Korama a Aposetolo e Toasefululua:
O le i ai o perofeta o se faailoga o le alofa o le Atua i Ana fanau. Latou te faailoa maia folafolaga ma le natura moni o le Atua ma Iesu Keriso i lo La’ua nuu. …
O le mulimuli [i perofeta a le Alii], o le a sili atu ai ona fiafia ma tuuitiitia le faigata o tatou olaga, e faigofie atu foi ona onosaia o tatou faigata ma faafitauli, ma tatou fatuina se ofutau faaleagaga o le a puipuia ai i tatou mai osofaiga a le fili i o tatou taimi. (Ulisses Soares, “E Saunoa Perofeta i le Mana o le Agaga Paia,” Ensign po o le Liahona, Me 2018, 99.)
E i ai taimi, e te lagona ai le faigata ona talia ma mulimuli i le fautuaga ma aoaoga a perofeta a le Alii. Atonu e tupu lenei mea pe a e le malamalama atoa i le pogai o i tua atu o a latou saunoaga. Pe atonu foi e feteenai ia aoaoga ma manatu ma faiga ua lauiloa a le lalolagi pe o a oe lava foi manatu ma tu masani faaleaiga.
Na tuuina mai e Elder Neil L. Andersen o le Korama a Aposetolo e Toasefululua, le fautuaga ma le folafolaga lenei:
Aua ne’i faate’ia oe pe a i ai se taimi e le muai ogatusa ai ou lava manatu patino ma aoaoga a le perofeta a le Alii. O taimi nei o le aoaoina, o le lotomaualalo, pe a tatou o i o tatou tulivae i le tatalo. Tatou te savavali i luma i le faatuatua, faalagolago i le Atua, iloaina o le a i ai le taimi o le a tatou maua ai le manino atili faaleagaga mai lo tatou Tama Faalelagi. …
… Ua ou iloa ai a ou suesueina ma le agaga tatalo ia upu a le perofeta a le Atua ma faaogatusaina faaleagaga, ma le faaeteete, ma le onosai lo’u loto i ana aoaoga musuia, e faateleina lava i taimi uma lo’u faatuatua i le Alii o Iesu Keriso. Afai tatou te filifili e faataatia ese ana fautuaga ma manatu e sili atu lo tatou iloa, o le a pagatia lo tatou faatuatua ma puaoa ai la tatou vaaiga e faavavau. Ou te folafola atu ia te outou a outou tumau mausali i le mulimuli i le perofeta, o le a faateleina lo outou faatuatua i le Faaola. (Neil L. Andersen, “O Le Perofeta a le Atua,” Ensign po o le Liahona, Me 2018, 26–27)
Na aoao mai e Sister Carol F. McConkie, o le sa auauna atu o se fesoasoani muamua i le Au Peresitene Aoao o Tamaitai Talavou:
A o tatou usiusitai, lagolagoina, ma faamautu upu faaperofeta, tatou te molimauina le i ai ia i tatou o le faatuatua e gauai atu ai ma le lotomaualalo i le finagalo, le poto, ma le taimi o le Alii.
Tatou te faalogo i upu faaperofeta e tusa lava pe foliga mai e leai sona uiga, le talafeagai, ma faigata. E tusa ai ma tulaga faatonuina o le lalolagi, o le mulimuli i le perofeta e ono inosiaina, lē sa’o i manatu faaupufai, po o le lē taliaina faaleagafesootai. Ae o le mulimuli i le perofeta e sa’o i taimi uma lava. …
Pe a tatou gauai atu i upu a perofeta, ua tatou fausia o tatou aiga ma o tatou olaga i luga o se faavae mautu e faavavau, “o le papa o lo tatou Togiola, o Keriso ia, o le Alo o le Atua” [Helamana 5:12]. (Carol F. McConkie, “Ola e Tusa ma Upu a Perofeta,” Ensign po o le Liahona, Nov. 2014, 77, 79)
O le faataitaiga lenei mai le talafaasolopito o le Ekalesia e mafai ona fesoasoani e faamalamalama ai le uiga o le maua o saunoaga o perofeta soifua a le Alii i le onosai ma le faatuatua. O le saunoa ai e uiga i le faaaliga vaaia i malo o le mamalu, lea ua tusifaamaumauina nei i le Mataupu Faavae ma Feagaiga 76 (tagai foi i le “The Vision (D&C 76),” ChurchofJesusChrist.org), sa faamatala mai ai e Peresitene Polika Iaga:
Ina ua faaali mai e le Alii ia Iosefa Samita ma Sini Rikitone e faapea, e i ai se nofoaga ua saunia mo tagata uma, e fuafua lea i le malamalama na latou mauaina ma lo latou teenaina o le leaga ae faia le lelei, sa avea lea ma se luitau tele i nisi, ma o nisi ua liliuese ona o le a le auina atu e le Atua i le faasalaga e faavavau i latou e le talitonu ia Keriso ma tamaiti pepe, ae i ai so latou nofoaga i le faaolataga, i le taimi e tatau ai [o le Alii], mo tagata uma, ma o le a faamanuiaina i latou e faamaoni ma mama ma tonu, e tusa lava pe sa auai i soo se ekalesia pe leai foi. Sa o se aoaoga faavae fou lea i lenei augatupulaga, ma e toatele sa umi se taimi o taumafai e talia lenei aoaoga. (Aoaoga a Peresitene o le Ekalesia: Polika Iaga [1997],349)
O Polika Iaga foi ia na faigata ona taliaina lenei aoaoga faavae i le taimi muamua. Sa fai mai o ia: “Na faapena foi a’u agaifanua, o lea ina ua oo mai le Faaaliga i le taimi muamua ia te au, sa matua faafeagai lava ma feteenai ma mea na aotauina ai au muamua. Sa faapea ifo, Faatalitali teisi. Ou te lei teenaina; ae sa le mafai ona ou malamalama i ai. … [Sa tatau] ona ou mafaufau ma tatalo, faitau ma mafaufau, seia oo ina ou iloaina ma malamalama atoa i ai mo a’u lava” (i le Journal of Discourses, 6:281).
Ata
aikona, talanoa
Talanoa ma Isi ma Sauni e Faasoa i le Vasega
Mafaufau e faasoa atu i se tagata o le aiga po o se uo se mea ua e aoaoina e uiga i le mulimuli i perofeta a le Alii i le onosai ma le faatuatua. Ona fesili lea, “O le a se mea ua fesoasoani ia te oe e mulimuli ai i perofeta a le Alii i le onosai ma le faatuatua?” Sau sauni i le vasega e faasoa mai mea sa e aoaoina.
Vaega 3
O le a le matafaioi a perofeta i le aoaoina mai ia te a’u o le aoaoga faavae moni?
I le popofou o le talafaasolopito o le Ekalesia, sa saili ai e Iosefa Samita le fesoasoani a le Alii e faatatau i tagata o le Ekalesia o e sa faaseseina e aoaoga faavae sese.
[I ni nai masina talu ona uma ona faatulagaina le Ekalesia, sa iloa ai e Iosefa Samita] o Hiram Page, o se tasi o Molimau e Toavalu [o le Tusi a Mamona], ma se faiaoga i le Perisitua Arona, ua amata ona ia sailia faaaliga mo le ekalesia e ala i le mea sa ia manatu o se maa a le talifaaaliga. E toatele le Au Paia … na talitonu o ia faaaliga sa mai le Atua.
Na iloa e Iosefa sa feagai o ia ma se faalavelave. O faaaliga a Hiram sa kopiina ai le gagana o tusitusiga paia. Sa latou talanoa mai e uiga i le faatuina o Siona ma le faatulagaina o le ekalesia, ae na i ai taimi sa feteenai ai ma le Feagaiga Fou ma upumoni na faaali mai e le Alii na ala mai ia Iosefa.
O le le mautinoa po o le a se mea a fai, sa le moe ai Iosefa i se tasi o po, ae na tatalo, ma aioi mo se taitaiga. (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018],97)
I le tali mai i tatalo a Iosefa Samita, na tuuina mai ai e le Alii le faaaliga ua tusifaamaumauina i le Mataupu Faavae ma Feagaiga 28, lea na faamanino mai ai le matafaioi tulaga ese o le Perofeta a le Ekalesia.
Na tautino mai foi e le Alii e faapea, o mea na tusia e Hiram Page sa le a le Atua ia (tagai i le Mataupu Faavae ma Feagaiga 28:11). Sa le’i umi lava ona tuuina mai lenei faaaliga, “ae teena e le Au Paia ia faaaliga a Hiram ma lagolagoina ai i le manatu autasi ia Iosefa ua na’o ia lea e mafai ona maua faaaliga mo le ekalesia” (Saints, 1:98).
Ona o loo umia e perofeta soifua a le Alii ia ki e maua ai faaaliga mo le Ekalesia, ua i ai foi ia i latou le tiutetauave e aoao ma faamanino ai aoaoga faavae mo tagata o le Ekalesia. Na aoao mai Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
I le Ekalesia i aso nei, e pei lava o le ekalesia anamua, o loo faamautuina le mataupu faavae a Keriso po o le faasa’oina o mea sese faalemataupu faavae, o se mataupu lea o faaaliga faalelagi ia i latou ua faaee i ai e le Alii le pule faa-Aposetolo. …
Ua ia i latou le aia tatau, le mana, ma le pule e tautino atu ai le mafaufau ma le finagalo o le Atua i lona nuu, e faalagolago lea i le mana ma le puleaoao o le Peresitene o le Ekalesia. …
E faapefea ona faaali atu e le Faaola Lona finagalo ma le mataupu faavae i perofeta, tagatavaai, ma talifaaaliga? E mafai ona Ia faaali mai e ala i avefeau po o Ia lava. Atonu na ia fetalai mai i Lona lava siufofoga po o le leo o le Agaga Paia. … (tagai 1 Nifae 17:45; Mataupu Faavae ma Feagaiga 9:8). E mafai ona Ia taitai o Ia lava i Ana auauna taitoatasi pe galue foi i aufono (tagai 3 Nifae 27:1–8). …
… E tatau ona manatuaina e le o faamatalaga uma e faia e se taitai o le Ekalesia i le taimi ua tuanai, po o le taimi nei, e ao ona avea ma se aoaoga faavae. Ua malamalama lava i le tulaga aoao o le Ekalesia o se faamatalaga e fai e se taitai i se sauniga se tasi e tele lava ina fai ma ona manatu patino, e ui sa lelei ona mafaufauina, ae e le avea ma se faamatalaga aloaia mo le Ekalesia atoa. (D. Todd Christofferson, “O Le Mataupu a Keriso,” Ensign po o le Liahona, Me 2012, 86–90)
Na faamalamalama mai e Elder Andersen, o aoaoga faavae moni e aoaoina i taimi uma e perofeta filifilia ma soifua a le Alii.
E toalaiti foi nisi sa fesiligia lo latou faatuatua ina ua latou maua se saunoaga sa faia e se taitai o le Ekalesia i ni tausaga ua mavae lea sa foliga mai e lei ogatusa ma la tatou aoaoga faavae. O loo i ai se mataupu faavae taua o loo puleaina ai le aoaoga faavae o le Ekalesia. O le aoaoga faavae e aoaoina e uso uma e toa 15 o le Au Peresitene Sili ma le Korama a le Toasefululua. E le o natiaina i se parakalafa faigata o se lauga se tasi. O mataupu faavae moni e aoaoina soo e le toatele. O la tatou aoaoga faavae e le faigata ona maua. (Neil L. Andersen, “Tofotofoina o lo Outou Faatuatua,” Ensign po o le Liahona, Nov. 2012, 41)
Ata
aikona, mafaufau loloto
Mafaufau Loloto a o Sauniuni mo le Vasega
O a ni faamanuiaga ua oo mai i lou olaga, a o e mulimuli i aoaoga ma fautuaga a perofeta a le Alii i o tatou vaitaimi?
