Chʼol 43
Li Jesukristo naxk’ut rib’ chiruheb’ laj Nefita
Eb’ li tenamit yookeb’ chi aatinak chirib’ileb’ rib’ chirix li Jesukristo ut li reetalil lix kamik.
Naq yookeb’ chi aatinak, ke’rab’i jun ch’ina xyaab’ kuxej nachal chaq sa’ choxa. Kixk’e chi xamnak lix ch’ooleb’.
Xb’een wa ink’a’ ke’xtaw ta ru li xyaab’ kuxej, a’b’an naq ke’rab’i rox sut, ke’xtaw ru.
Li xyaab’ kuxej a’an xyaab’ xkux li qaChoxahil Yuwa’. A’an kixye resil li Jesukristo ut kixye reheb’ li tenamit naq te’ab’inq chiru.
Li Jesukristo kikub’e chaq sa’ choxa ut kixxaqab’ rib’ sa’ xyiheb’ li tenamit. Ke’xuwak chi aatinak, xb’aan naq ink’a’ neke’xnaw k’a’ru yoo chi k’ulmank. Sa’ xch’ooleb’ a’an naq li Jesus a’an jun li anjel.
A’an kixye reheb’ naq a’an li Jesukristo, li ke’xye chaq eb’ li profeet naq taak’ulunq.
Li Jesus kixye reheb’ li tenamit naq te’chalq ut te’xch’e’ xtoch’olal sa’ xk’atq xsa’ ut sa’ ruq’ ut sa’ roq’, li kik’ehe’ wi’ rik’in klawx chiru krus.
Li Jesus kiraj naq te’xnaw naq a’an lix Dioseb’ ut naq kikam xb’aan lix maakeb’.
Chixjunjunqaleb’ ke’xch’e’ li eetalil sa’ xk’atq xsa’, sa’ ruq’, ut sa’ roq li Jesus. Ke’xnaw naq a’an li Kolonel.
Toja’ ut naq li tenamit ke’xnima ru li Jesus ut ke’t’ane’ chi roq ut ke’xloq’oni.
Li Jesus kixb’oq laj Nefi ut junlaju chik li winq. A’an kixk’e reheb’ li wankil re li tijonelil ut kixk’ut chiruheb’ chan ru tz’aqal taa’uxmanq li kub’sink ha’.
A’an kixye reheb’ laj Nefita naq te’xpaab’ a’an, te’xjal xk’a’uxl, ut te’ab’inq chiruheb’ lix taqlahom. Wi ink’a’ te’xb’aanu, ink’a’ te’ruuq chi ok sa li rawa’b’ejihom.
A’an kixk’ut chiruheb’ laj Nefita chan ru tijok chiru li qaChoxahil Yuwa’. Jo’kan ajwi’ kixk’ut chiruheb’ li kuyuk sa’, ut kixye naq tixkuy xmaakeb’ wi te’xkuy xmaak chirib’ileb’ rib’.
Chirix naq kixk’ut chiruheb’ naab’al li k’a’aq re ru, li Jesus kixye reheb’ naq te’sutq’iiq sa’ rochocheb’ ut te’k’oxlaq ut te’tijoq chirix li k’a’ru xye.
Eb’ laj Nefita ke’ok chi yaab’ak. Ink’a’ ke’raj naq taaxik li Jesus.
Li Jesus k’a’jo’ xrahom choq’ reheb’ laj Nefita. A’an kixye reheb’ naq te’xk’am chaq rik’in a’an li ani yaj malaj toch’b’il re naq a’an taaruuq tixk’irtesiheb’.
Li Jesus kixk’irtesiheb’ li kristiaan a’an. Chixjunileb’ ke’wiq’la ut ke’xloq’oni.