Chʼol 28
Eb’ laj Tzoramita ut li Rameumptom
Junxil, eb’ laj Tzoramita ke’wan sa’ lix Iglees li Dios, a’b’an okenaqeb’ chik jo’ aj maak ut neke’xloq’oni li pak’b’il dios.
Eb’ laj Nefita ink’a’ ke’raj naq eb’ laj Tzoramita te’xjunaji rib’ rik’ineb’ laj Lamanita, jo’kan naq laj Alma xko’o rik’in xkomoneb’ chik li misioneer re xjultikankil li raatin li Dios chiruheb’ laj Tzoramita.
Eb’ li misioneer a’in ke’sach xch’ool ut ke’raho’ xch’ooleb’ naq ke’ril chan ru neke’loq’onin laj Tzoramita sa’eb’ lix iglees, ch’utleb’aal neke’xk’ab’a’i.
Sa’ xyi li iglees, eb’ laj Tzoramita ke’xkab’la jun li xaqarib’aal na’ajej najt xteram, li Rameumptom yeeb’il re. Jun ajwi’ li winq naru naxaqli chaq toj sa’ xb’een.
Eb’ laj Tzoramita neke’xjali rib’ re naq te’taqe’q aran, neke’xtaqsi li ruq’ sa’ xjayal li choxa ut chi kaw xyaab’eb’ xkux neke’xye chixjunqaleb’ li junaj chi tij.
Sa’ li tij a’an, eb’ laj Tzoramita neke’xye naq li Dios moko wan ta xtib’el; yal junes jun musiq’ej. Jo’kan ajwi neke’xye naq maajun Kristo taawanq.
Eb’ laj Tzoramita ke’xpaab’ naq li Dios kixsik’eb’ ru juneseb’ a’an re te’kole’q sa’ li choxahil awa’b’ejihom. Ke’b’antioxin chirix naq a’aneb’ jun tenamit sik’b’il ru .
Chirix naq chixjunileb’ laj Tzoramita ke’tijok, ke’sutq’i sa’ rochocheb’ ut chiru chixjunil li xamaan ink’a’ chik neke’tijok chi moko neke’aatinak chirix li Dios.
Eb’ laj Tzoramita aj b’ihom ke’xra ru li oor ut li plaat ut taqsinb’ileb’ xch’ool chirix lix ruchich’och’il b’ihomaleb’. Naq laj Alma kiril xnimal xmaa’usilaleb’, kiraho’ xch’ool.
Laj Alma kitijok re naq a’an ut eb’ li rech aj misioneer taawanq xkawilaleb’, taak’ojob’aaq xch’ooleb’, ut te’elq chi uub’ej sa’ lix k’anjeleb’.
Chirix naq ke’xpatz’ naq te’ruuq chixk’amb’aleb’ wi’chik sa’ li yaal laj Tzoramita, laj Alma ut eb’ li rech aj misioneer ke’nujak rik’in li Santil Musiq’ej.
Chirix a’an, eb’ li misioneer ke’xchap jalan jalanq xb’e re te’xik chi jultikank aatin. Li Dios kirosob’tesiheb’ rik’in li wa ut li aq’ej, ut kixk’eheb’ xmetz’ew sa’ lix k’anjel.
Eb’ laj Tzoramita li neb’a’eb’ moko kanab’anb’ileb’ ta chi ok sa’eb’ li ch’utleb’aal. Eb’ a’an ke’ok chirab’inkil li raatineb’ li misioneer.
Naab’aleb’ ke’xpatz’ re laj Alma k’a’ru tento te’xb’aanu. Laj Alma kixye reheb’ naq moko na’ajman ta ru naq te’wanq chi sa’ junaq ch’utleb’aal re te’tijoq malaj re te’xloq’oni li Dios.
A’an kixye reheb’ naq chiwanq xpaab’aaleb’ chirix li Dios. Toja’ naq laj Amulek kixk’ut chiruheb’ resil li Jesukristo ut lix k’uub’anb’il na’leb’ li Dios choq’ reheb’ li ralal xk’ajol.
Eb’ li misioneer xkoheb’, ut eb’ laj Tzoramita li ke’paab’an ke’isiik chaq sa’ li tenamit. Eb’ laj paab’anel xkoheb’ sa’ li ch’och’ Jerxon rik’ineb’ lix tenamit laj Ammon.
Us ta eb’ laj Tzoramita aj maak ke’xyeechi’i rahilal sa’ xb’een lix tenamit laj Ammon, eb’ lix tenamit laj Ammon ke’xtenq’aheb’ laj Tzoramita li tiikeb’ xch’ool ut ke’xk’e reheb’ li tzakemq, li aq’ej, ut li ch’och’.