Chʼol 11
Laj Enos
Laj Enos a’an ralal laj Jakob. Kixk’uulaheb’ li perel ch’iich’ ut kitz’iib’ak chiruheb’ chirix naq kikam lix yuwa’.
Sa’ jun kutan, laj Enos xko’o chixyoob’aleb’ li xul sa’eb’ li k’iche’. Ki’ok chixk’oxlankil li kixk’ut chaq lix yuwa’, ut kiraj naq taakuye’q lix maak.
Laj Enos kiwiq’la ut ki’ok chi tijok chiru li Dios. Kitijok chiru chixjunil li kutan ut toj yoo chi tijok naq kiq’ojyino’.
Li Dios kixye re laj Enos naq sa’ xk’ab’a’ lix paab’aal chirix li Jesukristo, taakuye’q lix maak.
Laj Enos kiraj naq li Qaawa’ taarosob’tesiheb’ laj Nefita. Kitijok chirixeb’, ut li Qaawa’ kixye naq taarosob’tesiheb’ wi te’xpaab’ lix taqlahom.
Laj Enos kiraj ajwi’ naq li Qaawa’ taarosob’tesiheb’ laj Lamanita. Kitijok rik’in xnimal xpaab’aal ut li Qaawa’ kixyeechi’i naq tixb’aanu li kixpatz’ chaq laj Enos.
Us ta eb’ laj Lamanita ke’pleetik rik’ineb’ laj Nefita ut ke’xyal xq’e chixsachb’aleb’ lix tz’iib’anb’il esil, laj Enos kitijok re naq te’wulaq chi wank jo’ jun tenamit tiik xch’ool.
Laj Enos kitijok re naq kolb’ilaq rix li tz’iib’anb’il esil kixk’uula. Li Qaawa’ kixyeechi’i naq sa’ junaq kutan tixk’e chi k’ute’k chiruheb’ laj Lamanita li k’a’ru tz’iib’anb’il sa’eb’ li esil.
Laj Enos kijultikan aatin chiruheb’ laj Nefita. Kiraj naq te’xpaab’ li Dios ut te’ab’inq chiruheb’ li taqlahom.
Eb’ laj Nefita ke’xyal xk’utb’al li evangelio chiruheb’ laj Lamanita, a’b’anan ink’a’ ke’raj rab’inkil. Eb’ laj Lamanita xik’ ke’rileb’ laj Nefita.
Laj Enos kixnumsi lix yu’am sa’ xtzolb’aleb’ li tenamit chirix li Jesus ut li evangelio. Kik’anjelak chiru li Dios ut kixra chiru chixjunil lix kutan.