Chʼol 42
Eb’ li reetalil lix kamik li Kristo chiru krus
Anajwan ke’royb’eniheb’ li reetalil lix kamik: oxib’ kutan chi aak’ab’.
Wankeb’ li ink’a’ ke’xpaab’ naq taak’utmanq li eetalil. Eb’ a’an ke’xwech’eb’ li ani neke’paab’an.
Jun kutan kiwakli jun li kaq-sut-iq’ q’axal nim. K’a’jo’ xxuwajel li iq’.
Kilemlot xrepom li kaaq, ut li kaaq kixchiq’chiq’i chixjunil li ch’och’.
Kixchap xxamlel li tenamit Tzarahemla. Li tenamit Moroni kisub’e’ sa’ xchamal li palaw. Kik’ame’ li ch’och’ sa’ xb’een li tenamit Moronihah.
Jun li hiik kixchiq’chiq’i chixjunil li ch’och’. Eb’ li tach’tookil b’e ke’po’e’, ut eb’ li ninqi kab’l ke’t’ane’ chi ch’och’. Naab’al li tenamit ke’kana chi sachenaq ut naab’aleb’ ke’kamsiik.
Li kaq-sut-iq’ ut li hiik ke’kana chiru tana’ xnumik oxib’ hoor.
Naq ke’raqe’ li kaq-sut-iq’ ut li hiik, jun chamal aak’ab’ kixtz’ap xb’een li ch’och’. Maab’ar wan li saqen. Eb’ li tenamit ke’ru chireek’ankil xb’ook li aak’ab’.
Kikana li q’ojyin chiru oxib’ kutan. Ink’a’ kiru xlochb’al li xam, ut li tenamit ink’a’ ke’ru chirilb’al li saq’e, li po, chi moko eb’ li chahim.
Eb’ li tenamit ke’yaab’ak xb’aan li aak’ab’, li sache’k, ut li kamk. Ke’raho’ xch’ool xb’aan naq ink’a’ ke’xjal xk’a’uxl chirixeb’ lix maak.
Toja’ naq eb’ li tenamit ke’rab’i lix yaab’ xkux li Jesukristo.
Li Jesus kixye reheb’ resil li xuwajel sache’k sa’ li ch’och’. A’an kixye naq eb’ li q’axaleb’ aj maak ke’kamsiik.
A’an kixye naq aajel ru naq eb’ li ink’a’ ke’kamsiik te’xjal xk’a’uxl. Wi te’xb’aanu ut te’chalq rik’in, a’an taarosob’tesiheb’.
K’a’jo’ xsachikeb’ xch’ool li tenamit chirix naq ke’rab’i li xyaab’ kuxej jo’kan naq ke’xkanab’ li yaab’ak. Kiwan chi ch’anch’o chixjunil chiru xnumik k’iila hoonal.
Li Jesus ki’aatinak wi’chik ut kixye naq naab’al sut kixsik’ xtenq’ankileb’ li tenamit. Wi te’xjal xk’a’uxl anajwan, toj te’ruuq chi sutq’iik rik’in.
Chirix xnumik oxib’ kutan ki’oso’ li aak’ab’. Li tenamit kisaho’ sa’ xch’ool ut rik’in sahil ch’oolejil ke’b’antioxin chiru li Qaawa’.