Chʼol 4
Eb’ li perel ch’iich’ bronce
Laj Lehi kixye re laj Nefi naq li Qaawa’ kiraj naq a’an ut eb’ li ras te’sutq’iiq aran Jerusalen. Tento te’xsik’eb’ li perel ch’iich’ bronce li wankeb’ rik’in jun li winq aj Laban xk’ab’a’.
Eb’ li perel ch’iich’ bronce a’aneb’ jun esil nim xwankil. Neke’aatinak chirixeb’ lix xe’toonileb’ laj Lehi, ut chi sa’ wan li raatin li Dios k’utb’esinb’il rik’in xtz’uumaleb’ re li profeet.
Laj Laman ut laj Lemuel ink’a’ ke’raj sutq’iik chaq re xtawb’aleb’ li perel ch’iich’ bronce. Ke’xye naq k’a’jo’ xch’a’ajkilal. Maak’a’eb’ xpaab’aal chirix li Qaawa’.
Laj Nefi kiraj ab’ink chiru li Qaawa’. A’an kixnaw naq li Qaawa’ taatenq’anq re a’an ut eb’ li ras chixtawb’aleb’ li perel ch’iich’ bronce li wankeb’ rik’in laj Laban.
Laj Laman, laj Lemuel, laj Sam, ut laj Nefi ke’sutq’i chaq Jerusalen re xtawb’aleb’ li perel ch’iich’ bronce.
Laj Laman xko’o chirilb’al laj Laban re xpatz’b’aleb’ li perel ch’iich’.
Laj Laban kijosq’o’ ut ink’a’ kiraj xk’eeb’aleb’ li perel ch’iich’ bronce re laj Laman. Laj Laban kiraj xkamsinkil laj Laman, a’b’anan ki’eelelik laj Laman.
Laj Laman kixye reheb’ li riitz’in li k’a’ru xk’ul chaq. Kixuwak ut kiraj xkanab’ankil li ke’taqlaak wi’ ut sutq’iik chaq rik’in lix yuwa’ sa’ li yamyookil ch’och’.
Laj Nefi kixye naq ink’a’ te’ruuq chi sutq’iik chaq chi maak’a’eb’ li perel ch’iich’ bronce rik’ineb’. Kixye reheb’ li ras naq chiwanq xnimal lix paab’aaleb’ chirix li Qaawa’ ut chi jo’kan te’ruuq chixtawb’aleb’ li perel ch’iich’ bronce.
Laj Nefi ut eb’ li ras xkoheb’ wi’chik sa’ li ochoch li ke’xkanab’ chaq Jerusalen re xxokb’al chaq li oor ut li plaat re xk’eeb’al choq’ reeqajeb’ li perel ch’iich’.
Ke’xk’ut chiru laj Laban lix b’ihomal ut ke’xyeechi’i re choq’ reeqajeb’ li perel ch’iich’. Naq kiril li oor ut li plaat laj Laban, kixrahi ru choq’ re xjunes rib’ ut kiralinasiheb’ chaq.
Laj Laban kixtaqlaheb’ lix moos chixkamsinkileb’ li ralal laj Lehi. Laj Nefi ut eb li ras ke’eelelik ut ke’xmuq rib’ sa’ xtehelal jun pek. Kikana li oor ut li plaat sa’ ruq’ laj Laban.
Laj Laman ut laj Lemuel ke’josq’o’ rik’in laj Nefi. Ke’xsak’ laj Nefi ut laj Sam rik’in jun li che’.
Jun li anjel kixk’ut rib’ chiruheb’ laj Laman ut laj Lemuel ut kixye reheb’ naq te’xkanab’ xb’aanunkil a’an. Kixye naq li Qaawa’ tixtenq’aheb’ chixtawb’aleb’ li perel ch’iich’. Kixye ajw’i naq laj Nefi taawanq choq’ aj taqlanel sa’ xb’eeneb’ li ras.
Laj Nefi kixye reheb’ li ras naq che’xpaab’ li Qaawa’ ut naq ink’a’ te’xxuwa ru laj Laban ut eb’ lix moos. Laj Nefi kixkawresiheb’ xch’ool re naq te’sutq’iiq wi’chik Jerusalen.
Sa’ li q’ojyin a’an, eb’ li ras laj Nefi ke’xmuq rib’ chirix li xaqxookil tz’ak re li tenamit naq laj Nefi ki’ok xmuqb’esinkil rib’ sa’ li tenamit. Xko’o sa’ xjayal li rochoch laj Laban.
Naq laj Nefi kinach’ok wan wi’ rochoch laj Laban, kiril jun li winq t’anenaq chi ch’och’ xb’aan naq kalajenaq. A’an laj Laban.
Laj Nefi kiril lix yok’leb’ ch’iich’ laj Laban ut kixxok. Li Santil Musiq’ej kixye re laj Nefi naq tixkamsi laj Laban, a’b’anan laj Nefi ink’a’ kiraj xkamsinkil.
Li Santil Musiq’ej kixye wi’chik re laj Nefi naq tixkamsi laj Laban re naq chi jo’kan taaruuq chixtawb’aleb’ li perel ch’iich’ bronce. Aajeleb’ ru li perel ch’iich’ choq’ re lix junkab’al laj Lehi re naq te’ruuq chixtzolb’al li evangelio.
Laj Nefi ki’ab’in chiru li Santil Musiq’ej ut kixkamsi laj Laban. Chirix a’an, laj Nefi kixk’e chirix li raq’ ut lix kolb’a-ib’ aq’ laj Laban.
Laj Nefi xko’o sa’ li rochoch laj Laban ut kik’ule’ xb’aan laj Tzoram, lix moos laj Laban. Li rilb’al ut li xyaab’ xkux laj Nefi chanchan ajwi’ laj Laban.
Kixye re laj Tzoram naq tixk’ameb’ chaq li perel ch’iich’ bronce. Laj Tzoram kixk’oxla naq laj Nefi a’an laj Laban, jo’kan naq kixq’axtesiheb’ re li perel ch’iich’. Laj Nefi kixye re laj Tzoram naq tixtaaqe.
Laj Laman, laj Lemuel, ut laj Sam ke’ril chi chalk laj Nefi ut ke’chal xxiw; ke’xk’oxla naq a’an laj Laban. Ke’ok chi eelelik, a’b’anan ke’xaqli naq naq ke’b’oqe’ xb’aan laj Nefi.
Laj Tzoram kixk’e reetal naq laj Nefi moko a’an ta laj Laban, ut kixyal eelelik. Laj Nefi kixchap laj Tzoram ut kixyeechi’i re naq ink’a’ tixrahob’tesi wi taaxik chirix laj Nefi sa’ li yamyookil ch’och’.
Laj Tzoram kixye naq tixb’aanu. Laj Nefi ut eb’ li ras ke’xk’am laj Tzoram ut eb’ li perel ch’iich’ bronce ut ke’sutq’i chaq rik’in laj Lehi ut li xSariah.
Ke’xk’eheb’ re laj Lehi li perel ch’iich’ bronce. Ke’saho’ sa’ xch’ool laj Lehi ut li xSariah xb’aan naq ke’kole’ rix li ralaleb’. Chixjunileb’ ke’saho’ sa’ xch’ool ut ke’b’antioxink chiru li Dios.
Laj Lehi kiril ru li tz’iib’anb’il chiruheb’ li perel ch’iich’ bronce. Tz’iib’anb’il resil laj Adan ut li xEva, jo’ ajwi’ lix yo’ob’tesinkil li ruchich’och’. Tz’iib’anb’il chiruheb’ raatineb’ naab’aleb’ li profeet.
Saheb’ xch’ool laj Lehi ut laj Nefi xb’aan naq ke’ab’in chiru li Qaawa’ ut ke’ru chixtawb’aleb’ li perel ch’iich’ bronce.
Lix junkab’al laj Lehi ke’xk’am rik’ineb’ li perel ch’iich’ bronce naq xkoheb’ chiru li yamyookil ch’och’ re naq te’ruuq chixk’utb’al chiru li ralal k’ajol lix taqlahom li Qaawa’ tz’iib’anb’il chiruheb’ li perel ch’iich’.