Chʼol 24
Laj Ammon naxnaw ru lix yuwa’ li rey aj Lamoni
Li rey aj Lamoni kiraj xk’amb’al laj Ammon chixnawb’al ru lix yuwa’. Li Qaawa’ kixye re laj Ammon naq ink’a’ taaxik, xb’aan naq lix yuwa’ laj Lamoni tixsik’ xkamsinkil.
Li Qaawa’ kixye re laj Ammon naq taaxik sa’ li ch’och’ Middoni b’ar wi’ wan sa’ tz’alam laj Aaron, li ras. Li rey aj Lamoni kirochb’eeni laj Ammon.
Naq yookeb’ chi b’eek, ke’xk’ul lix yuwa’ li rey aj Lamoni, li wan choq’ rey sa’ xb’een chixjunil li ch’och’. A’an kixpatz’ re laj Lamoni b’ar xik re rik’in jun aj Nefita aj tik’ti’.
Li rey aj Lamoni kixnumsi re lix yuwa’ resil laj Ammon ut li ras li wan chaq sa’ tz’alam. Chi wan xjosq’il, lix yuwa’ laj Lamoni kixtaqla laj Lamoni naq tixkamsi laj Ammon ut naq ink’a’ taaxik sa’ li ch’och’ Middoni.
Laj Lamoni ink’a’ kiraj xkamsinkil laj Ammon, ut kixye naq a’an ut laj Ammon te’xik chirach’ab’ankil laj Aaron. Lix yuwa’ laj Lamoni kinumta xjosq’il ut kixb’otz’ lix yok’leb’ ch’iich’ re xkamsinkil laj Lamoni.
Laj Ammon kixxaqab’ rib’ chi uub’ej re xkolb’al rix laj Lamoni. Toja’ naq lix yuwa’ laj Lamoni kixsik’ xkamsinkil laj Ammon, a’b’an a’an kixkol rib’ ut kixsak’ lix tel lix yuwa’ laj Lamoni.
Naq kiril lix yuwa’ laj Lamoni naq laj Ammon taaruuq chixkamsinkil, kixyeechi’i re laj Ammon xyijach li rawa’b’ejihom wi ink’a’ tixkamsi.
Laj Ammon kixye naq a’an naraj naq laj Aaron ut lix komon te’isiiq chaq sa’ tz’alam, ut naq laj Lamoni taakanaaq li rawa’b’ejihom rik’in.
Lix yuwa’ laj Lamoni kixk’e reetal naq laj Ammon ink’a’ naraj xrahob’tesinkil. Kisach xch’ool naq kiril xnimal xrahom laj Ammon choq’ re li ralal. A’an kixpatz’ re laj Ammon naq tixk’ut li evangelio chiru.
Laj Ammon ut li rey aj Lamoni xkoheb’ sa’ li ch’och’ Middoni. Laj Lamoni ki’aatinak rik’in li rey aran, ut laj Aaron ut eb’ lix komon ke’ach’ab’aak chaq sa’ tz’alam.
Laj Ammon kiraho’ xch’ool naq kiril li rahilal ke’xk’ul chaq. Naab’al li ke’xnumsi, a’b’an ke’wan xkuyum.