Vahe 41
Ko e Ngaahi Fakaʻilonga ʻo Hono ʻAloʻi Mai ʻo Kalaisí
Naʻe foaki ʻe Nīfai, ko e foha ʻo Hilamaní, ʻa e ngaahi lekooti mo e ngaahi tohi folofola toputapú ki hono foha ko Nīfaí.
Naʻe mamata ʻa e kakai Nīfaí ki ha ngaahi fakaʻilonga lahi pea mo ha ngaahi mana ʻa ia naʻe ʻosi kikiteʻi pē mei muʻa ʻe hoko pea toki ʻaloʻi mai ʻa Sīsū Kalaisí.
Naʻe pehē ʻe ha kakai Nīfai ia ʻe niʻihi kuo mahili e taimi totonu naʻe lau ʻe ʻaloʻi mai aí. Naʻa nau manukiʻi ʻa kinautolu naʻe tui ki he ngaahi kikite ʻa e tangata Leimana ko Samuelá.
Naʻe loto-mamahi ʻa e kakai naʻe tui kia Sīsū Kalaisi mo e kau palōfitá telia naʻa ʻikai hoko ʻa e ngaahi kikité.
Naʻe hanganaki pē ʻa e kakaí ki he pō he ʻikai hoko ai ha poʻulí, he ko e taha ia ʻo e ngaahi fakaʻilonga kuo ʻaloʻi ʻa Sīsū Kalaisí.
Naʻe hanga ʻe he kau taʻe tuí ʻo fili ha foʻi ʻaho ke fakapoongi ai ʻa e kakai kotoa pē naʻe tuí ʻo kapau ʻe ʻikai ke hoko ʻa e fakaʻilongá ni.
Naʻe mamahi ʻaupito ʻa Nīfai ʻi he fai angahala ʻa e kakai naʻe ʻikai tui ki he Fakamoʻuí.
Naʻe lotu ʻa Nīfai ʻi ha ʻaho kakato koeʻuhí ko e kakai ne teu fakapōngí.
Naʻe folofola ʻa e ʻEikí kia Nīfai he ʻikai ke fakapoʻuli ʻa e pō ko iá. ʻE toki ʻaloʻi ʻa Sīsū ʻi he ʻaho hono hokó ʻi Pētelihema.
ʻI he tō ʻa e laʻaá he efiafi ko iá, naʻe ʻikai ha poʻuli ia. Kuo hoko leva ʻa e fakaʻilonga ʻo hono ʻAloʻi ʻo Sīsū Kalaisí. Naʻe ofo ʻa e kakaí.
Naʻe tō ki he kelekelé ʻa kinautolu ne palani ke fakapoongi ʻa e kakai tuí ʻo hangē kuo nau maté.
Ne nau manavahē koeʻuhí ko ʻenau fai angahalá. Naʻa nau ʻiloʻi ʻe ʻaloʻi ʻa e Fakamoʻuí pea naʻe moʻoni e ngaahi lea ʻa e kau palōfitá.
Naʻe maama ʻa e poó hono kotoa. ʻI he hopo hake ʻa e laʻaá he pongipongi hono hokó, naʻe ʻiloʻi ʻe he kakaí ʻe ʻaloʻi mai ʻa Sīsū Kalaisi ʻi he ʻaho ko iá. Kuo fakahoko ʻa e ngaahi kikité.
Naʻe hā ʻi he langí ha fetuʻu foʻou, ʻo hangē pē ko ia ne fakahā ʻe he kau palōfitá.
Naʻe feinga ʻa Sētane ke ueʻi ʻa e kakaí ke ʻoua te nau tui ki he ngaahi fakaʻilonga kuo nau mamata ki aí, ka naʻe kei tui pē ha kakai tokolahi ia.
Naʻe papitaiso ʻe Nīfai mo ha kau taki kehe ʻo e Siasí ʻa kinautolu kotoa pē naʻe tui mo fakatomalá.
Naʻe ʻomi ha ngaahi ongoongo fakafiefia ki he fonuá he kuo fakahoko e ngaahi lea ʻa e kau palōfitá. Kuo ʻaloʻi mai ʻa Sīsū Kalaisi.