Vahe 12
Ko e Tuʻi ko Penisimaní
Ko e Tuʻi anga-tonu ʻa Penisimani mei he kau Nīfaí. Naʻá ne fokotuʻu ʻa e melinó ʻi he fonuá, ʻi hano tokoniʻi ia ʻe ha kau tangata anga-tonu kehe ʻi he fonuá.
Naʻe fakaʻau ke toulekeleka ʻa e Tuʻi ko Penisimaní pea naʻá ne loto ke lea ki hono kakaí. Naʻá ne fie maʻu ke fakahā kiate kinautolu ʻa hono foha ko Mōsaiá ko e tuʻi ia hono hokó.
Naʻe fakatahataha mai leva ʻa e kakaí mei he ngaahi feituʻu kehekehe ʻo e fonuá ki he veʻe temipalé. Naʻe fokotuʻu honau ngaahi fale fehikitakí ʻo hanga ʻa e ngaahi matapaá ki he temipalé.
Naʻe folofola leva ʻa e Tuʻi ko Penisimaní mei he funga tauá koeʻuhí ke lava ʻa e kau Nīfaí ʻo fanongo kiate ia.
Naʻá ne fakahā ki hono kakaí ʻa ʻene ngāue mālohi ʻi hono tauhi kinautolú. Naʻá ne pehē ko e founga ʻo e tauhi ki he ʻOtuá ko haʻanau fetokoniʻaki ʻiate kinautolu.
Naʻe fakahā ʻe he Tuʻi ko Penisimaní ki hono kakaí ke nau talangofua ki he ngaahi fekau ʻa e ʻOtuá. He ʻe fiefia ʻa kinautolu te nau nau tauhi ʻa e ngaahi fekaú pea nofo mo e ʻOtuá ʻi ha ʻaho.
Naʻe fakahā ange ʻe he tuʻi ko Penisimaní ʻe vave pē hano ʻaloʻi mai ʻo Sīsū Kalaisi ki he māmaní. Ko e hingoa ʻo ʻene faʻeé ko Mele.
ʻE fai ʻe Sīsū ha ngaahi mana. Te ne fakamouʻi ha ngaahi mahaki pea mo fokotuʻu ʻa e maté. Te ne lava ʻo fakaʻā ʻa e kuí pea fakaongo ʻa e tulí.
ʻE fuesia ʻe Sīsū ʻetau ngaahi angahalá pea mo pekia koeʻuhí ko e kakai kotoa pē. ʻE fakamolemoleʻi ʻa e angahala ʻa e kakai kotoa pē te nau maʻu ʻa e tui kia Sīsuú.
Naʻe talaange ʻe he Tuʻi ko Penisimaní ki he kakai Nīfaí ʻe taaʻi ʻe he kau tangata fai angahalá ʻa Sīsū. Hili iá te nau kalusefai ia.
ʻE toetuʻu ʻa Sīsū hili ha ʻaho ʻe tolu.
Hili e folofola ʻa e Tuʻi ko Penisimaní, naʻe tōmapeʻe ʻa e kau Nīfaí ki he kelekelé. Naʻa nau loto mamahi koeʻuhí ko ʻenau ngaahi angahalá pea naʻa nau fie fakatomala.
Naʻe maʻu ʻe he kakaí ha tui kia Sīsū Kalaisi, pea naʻa nau lotu ke fakamolemoleʻi ʻa kinautolu.
Naʻe fakafonu ʻe he Laumālie Māʻoniʻoní honau lotó. Naʻa nau ʻiloʻi kuo fakamolemoleʻi kinautolu ʻe he ʻOtuá pea ʻokú ne ʻofa foki ʻiate kinautolu. Naʻa nau maʻu ai ha melino mo ha fiefia.
Naʻe fakahā ʻe he Tuʻi ko Penisimaní ki hono kakaí ke nau tui ki he ʻOtuá. Naʻá ne loto ke nau ʻiloʻi naʻe ngaohi ʻe he ʻOtuá ʻa e ngaahi meʻa kotoa pē; ʻokú ne māfimafi mo ʻafioʻi ʻa e meʻa kotoa pē.
Naʻe fakahā ʻe he Tuʻi ko Penisimaní ki he kakaí ke nau loto māʻulalo mo nau lotu ʻi he ʻaho kotoa pē. Naʻe loto ke manatuʻi maʻu pē ʻe hono kakaí ʻa e ʻOtuá mo faivelenga maʻu ai pē.
Naʻá ne talaange ke ʻoua naʻa nau tuku ʻenau fānaú ke nau fekeʻikeʻi pe fefakakikihiʻaki.
Naʻá ne fakahā ange kiate kinautolu ke akoʻi ʻenau fānaú ke nau ʻofa pea mo fetokoniʻaki ʻiate kinautolu.
Naʻá ne fakatokanga ki he kakaí ke nau tokanga ki he ngaahi meʻa ʻoku nau fakakaukauʻi, leaʻaki mo faí. Naʻá ne pehē ʻoku totonu ke nau faivelenga mo tauhi ʻa e ngaahi fekaú ki he ngataʻanga ʻenau moʻuí.
Naʻe fehuʻi ʻe he Tuʻi ko Penisimaní ki he kakaí pe ʻoku nau tui ki heʻene ngaahi akonakí. Naʻa nau tali kotoa ʻoku nau tui ki ai. Naʻe liliu kinautolu ʻe he Laumālie Māʻoniʻoní, pea ʻikai ke nau toe fie fai angahala.
Naʻa nau fuakava kotoa, pe palōmesi, ke tauhi ʻa e ngaahi fekau ʻa e ʻOtuá. Naʻe hōifua lahi ki ai ʻa e Tuʻi ko Penisimaní.
Naʻe hanga ʻe he Tuʻi ko Penisimaní ʻo pani hono foha ko Mōsaiá ke ne hoko ko e tuʻi foʻou. Naʻe ʻosi mei ai ha taʻu ʻe tolu pea pekia leva ʻa e Tuʻi ko Penisimaní.
Ko ha tuʻi anga-tonu ʻa Mōsaia. Naʻá ne ngāue mālohi mo tokoni ki hono kakaí, ʻo hangē pē ko ʻene tamaí.