Vahe 3
Ko e Mavahe ʻa Līhai mei SelūSalemá
Naʻe hōifua ʻa e ʻEikí kia Līhai pea naʻe folofola kiate ia ʻi ha pō ʻe taha ʻi ha misi. Naʻá ne fakahā ange kia Līhai ke ʻave hono fāmilí pea mavahe mei Selūsalema. Naʻe talangofua ʻa Līhai ki he ʻEikí.
Naʻe faʻo ʻe he fāmili ʻo Līhaí ha meʻatokoni pea mo ha ngaahi fale fehikitaki. Naʻá nau tuku honau falé pea mo ʻenau koulá mo e silivá ka nau fononga ki he toafá.
Naʻe maʻu ʻe Līhai mo hono uaifi ko Selaiá, ha ngaahi foha ʻe toko fā. Ko honau hingoá ko Leimana, Lēmiuela, Samu, mo Nīfai.
Hili ha ʻaho ʻe tolu ʻenau fonongá, naʻe fokotuʻu ʻe Līhai honau fale fehikitakí ʻi ha teleʻa ʻofi ki ha vaitafe.
Naʻe langa ʻe Līhai ha ʻesi feilaulau mei ha ngaahi maka pea naʻá ne fai ha feilaulau ki he ʻOtuá. Naʻá ne fakamālō ki he ʻOtuá koeʻuhí ko ʻene fakahaofi hono fāmilí mei he fakaʻauhá.
Naʻe ui ʻe Līhai ʻa e vaitafé ko Leimana pea ko e moʻungá ko Lēmiuela. Naʻe fie maʻu ʻe Līhai hono ongo fohá ke na hangē ko e vaitafé pea mo e moʻungá, ʻo hokohoko atu ai pē ʻene tafe ki he ʻOtuá pea mo tuʻu maʻu ʻi hono tauhi ʻa e ngaahi fekaú.
Naʻe fakakaukau ʻa Leimana mo Lēmiuela ʻoku vale ʻena tamaí ʻi heʻene liʻaki ʻa Selūsalema pea mo ʻenau koloá. Naʻe ʻikai ke na tui ʻe fakaʻauha ʻa Selūsalema.
Naʻe loto ʻa Nīfai ke mahino kiate ia ʻa e ngaahi meʻa naʻe mamata ki ai ʻa Līhaí. Naʻá ne lotu ai ke ne ʻilo pe naʻe fai ʻe heʻene tamaí ʻa e meʻa totonú, ʻI heʻene mavahe mei Selūsalemá.
Naʻe ʻaʻahi ʻa Sīsū Kalaisi kia Nīfai mo fakahā ange ʻoku moʻoni ʻa e ngaahi meʻa kuo lea ki ai ʻa Līhaí. Naʻe tui ʻa Nīfai pea naʻe ʻikai ke angatuʻu ʻo hangē ko Leimana mo Lēmiuelá.
Naʻe fakahā ʻe Nīfai ki hono ngaahi tokouá ʻa e meʻa naʻe fakahā ange ʻe Sīsū kiate iá. Naʻe tui ʻa Samu kia Nīfai, ka naʻe ʻikai ke tui ʻa Leimana mo Lēmiuela ia.
Naʻe talaʻofa ʻa e ʻEikí kia Nīfai ʻe tāpuekina ia koeʻuhí ko ʻene tuí. Te ne hoko ko e taki ki hono ngaahi tokouá.