Ako Konga Iiki 5

Founga ke Hoko ko ha Tokotaha Fakafanongo Tokangá

Fakamatalaʻi

Fakaʻaliʻali pea lau ʻa e fakamatala ko ʻeni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Mahalo ʻoku mahu‘inga ange ʻa e fakafangongó ʻi he leá. … Naʻe tuʻo taha hono talamai ʻe [Palesiteni] Lāsolo Nalesoni ko e taha ʻo e ngaahi ʻuluaki lao ʻo e fakaʻekeʻeke fakafaitoʻó ko e “ʻEke ki he tokotaha mahakí pe ko e feituʻu fē ʻoku mamahí.” Naʻá ne pehē, “ʻE hoko e tokotaha mahakí, ko ho fakahinohino lelei taha ki ha sivi ʻoku totonú pea iku ki ha faitoʻó.” Kapau te tau fakafanongo ʻi he ʻofa, ʻe ʻikai fie maʻu ke tau fifili pe ko e hā te tau lea ʻakí. ‘E foaki mai ia kiate kitautolu—ʻe he Laumālié pea mo hotau ngaahi kaungāme‘á. (Jeffrey R. Holland, “Witnesses unto Me,” Liahona, May 2001, 15)

ʻOange ha tatau ʻo e laʻipepa tufa ko ʻení ki he kau akó:

Ngaahi Founga ‘e Nima ke Hoko ko ha Tokotaha Fakafanongo Leleí.

Ko Hono Tali ʻEku Ngaahi Fehuʻi ʻi he Ongoongoleleí—Ako Konga Iiki 5: Founga ke Hoko ko ha Tokotaha Fakafanongo Tokangá

ʻOange ha taimi ki he kakaí. Faʻa kātaki pea tuku ha taimi ki he kakaí ke nau fakakaukau mo lea kimuʻa mo e hili ʻenau lea ʻaki ha meʻá. ʻOua te ke manavasiʻi ʻi he fakalongolongó.

Tokanga. Fakafanongo moʻoni ke mahino, pea ʻoua naʻá ke fai ha ngaahi aofangatuku fakavavevave pe tomuʻa fakakaukauʻi ʻa e meʻa te ke lea ʻakí.

Fakamaʻalaʻala. Fai ha ngaahi fehuʻi fakamaʻalaʻala ke fakahaaʻi hoʻo mahuʻingaʻia ʻi he meʻa ʻoku lea ʻaki ʻe he tokotahá pea ke fakapapauʻi naʻe ʻikai ke ke maʻuhala.

Fakakaukauloto. Toe lea ʻaki pe toe fakamatala ʻa e meʻa ʻokú ke ongoʻi ʻoku lea ʻaki ʻe he tokotahá. ʻOku ʻoange ʻe he meʻá ni ki he tokotaha leá ha faingamālie ke ne ongoʻi fakapapauʻi mo ne fakamahino mai ʻo ka fie maʻu.

Feinga ke maʻu ha mahino tatau. Feinga ʻi he lahi tahá ke ke fakakaukau tatau mo e tokotahá, ʻo ʻikai ke ke maʻuhala ʻa e ngaahi ongo ʻokú ke maʻú, ke tokoni ke langaki ʻa e uouangatahá mo holoki ha faʻahinga loto-hohaʻa pe kumi ʻuhinga. (Ne toʻo mei he “Meʻa ʻe Nima ʻOku Fai ʻe he Kau Fakafanongo Leleí,” Liahona, Sune 2018, 6–9)

© 2022 ʻe he Intellectual Reserve, Inc. All rights reserved.

Ngaahi Founga ‘e Nima ke Hoko ko ha Tokotaha Fakafanongo Leleí

Toe vakaiʻi fakakalasi e ngaahi taukei ʻe nima ko ʻení, pea fakaafeʻi e kau akó ke nau fakakaukau pe ko e fē ʻoku fie maʻu lahi taha ke nau ngāue ki aí.

Fakatātaaʻi

Fakaafeʻi ha tokotaha ako ke ne fakahaaʻi atu ʻi ha miniti nai ʻe ua kiate koe, pe ki ha tokotaha ako te ne fiemālie pē ke ʻoange ha fakamatala tokoni, ʻa ʻene fakakaukau fekauʻaki mo ha tefito ʻoku kaunga ki he ongoongoleleí ʻa ia ʻokú ne ongoʻi ʻoku mahuʻingá. Poupouʻi ʻa e tokotaha akó ke fakaʻehiʻehi mei he ngaahi palopalema fakakikihí.

• Kole ki he kalasí ke nau mamata mo fakatokangaʻi pe naʻe fakaʻaongaʻi ʻe he tokotaha fakafanongó ha taha ʻo e ngaahi taukei ʻe nima ne toki ʻosi hono aleaʻí, pea kapau ne pehē, naʻe tokoni fēfē?

• Te ke lava foki ʻo fakaafeʻi ʻa e kalasí ke nau feinga ke ʻiloʻi ha taukei fakafanongo kehe ne mei lava ai ke fakaleleiʻi ʻa e aʻusiá.

Fakaʻaongaʻi

Fakaafeʻi e kau akó ke nau faʻu ha ngaahi kulupu tautau toko tolu pea fili ha tefito te nau fie aleaʻi. ʻAi ha taha ke ne fakaʻaongaʻi ha miniti nai ʻe taha ke vahevahe ʻene ngaahi ongo fekauʻaki mo e tefito kuo filí. ʻAi ʻa e tokotaha fika uá ke ne akoako fakafanongo ʻo fakaʻaongaʻi ha taukei ʻe taha pe lahi ange ʻo e ngaahi taukei ʻo e fakafanongo leleí naʻe aleaʻi kimuʻá. ʻAi ʻa e tokotaha fika tolú ke ne vakaiʻi mo ʻoange ha fakamatala tokoni fekauʻaki mo e ngaahi taukei fakafanongo ne nau fakatokangaʻí. Hili iá pea ʻai ʻa e kau mēmipa ʻo e kulupú ke nau liliu honau ngaahi fatongiá pea toe fakahoko ʻa e ʻekitivitií. Hili ʻa e akoako ʻa e kau akó, fakaafeʻi ha toko taha pe toko ua ʻo e kau akó ke vahevahe ʻa e meʻa ne nau akó.