“Fakatupulaki ʻa e Ngaahi Taukei ʻo e Akó mo e Fealēleaʻakí ʻaki ʻa e Ngaahi Ako Konga Īkí,” Ko Hono Tali ʻEku Ngaahi Fehuʻi ʻi he Ongoongoleleí - Naunau ʻa e Faiakó (2022)
“Fakatupulaki ʻa e Ngaahi Taukei ʻo e Akó mo e Fealēleaʻakí ʻaki ʻa e Ngaahi Ako Konga Īkí,” Ko Hono Tali ʻEku Ngaahi Fehuʻi ʻi he Ongoongoleleí - Naunau ʻa e Faiakó
Fakatupulaki ʻa e Ngaahi Taukei ʻo e Akó mo e Fealēleaʻakí ʻaki ʻa e Ngaahi Ako Konga Īkí
ʻOku kau ʻi he kalasi ko ʻení ha ngaahi ako konga iiki ʻe hiva naʻe fakataumuʻa ke fakatupulaki ʻa e malava ʻa e kau akó ke ako mo aleaʻi ʻa e tokāteliné, ngaahi akonakí, ngaahi tuʻutuʻuní, mo e hisitōlia ʻo e Siasí.
ʻOku totonu ke maheni e kau faiakó mo e ngaahi ako konga iiki kotoa pē pea fili leva ʻa e ngaahi ako ʻoku nau ongoʻi ʻoku ʻaonga mo taimi totonu taha ki heʻenau kau akó. ʻOku fokotuʻu atu ke fakaʻaongaʻi ʻa e ngaahi ako konga īkí ʻi he kamataʻanga ʻo e kalasí. ʻE lava ke fili ʻe he kau faiakó pe ko e ngaahi kalasi fē ʻe fakakau ai ʻa e kau akó ʻi ha ako konga iiki. ʻOku faʻu e ngaahi ako konga īkí ʻo fakafuofua ki ha miniti ʻe 15.
ʻOku ngāue ʻaki ʻe he ngaahi ako konga īkí ʻa e sīpinga ko ʻení:
-
Fakamatalaʻi. Tokoni ke mahino ki he kau akó ʻa e tefitoʻi moʻoni te nau fakaʻaongaʻí pe ko e taukei te nau akoako fakahokó. ʻOku totonu ke nounou ʻa e ʻekitivitī ko ʻení pea miniti nai ʻe 2–3.
-
Fakatātaaʻi. Fakaʻaliʻali ki he kau akó e founga ʻe lava ke fakaʻaongaʻi ai ʻa e tefitoʻi moʻoní pe taukeí. ʻOku totonu ke miniti ʻe 3-5 ʻa e ʻekitivitī ko ʻení.
-
Fakaʻaongaʻi. ʻOange ha faingamālie ki he kau akó ke nau akoako fakaʻaongaʻi ʻa e tefitoʻi moʻoní pe taukeí. Fakapapauʻi ʻe lava ke tuku ha vaeua ʻo e taimi ʻoku fakaʻaongaʻi ʻi he ako konga īkí (fakafuofua ki ha miniti ʻe 7-8) ki hono akoako fakahokó.