kau ako ʻoku nau tangutu fuopotopoto ʻo talanoa

Ngaahi Lēsoni 7–14

Ko Hono Tali ʻEtau Ngaahi Fehuʻí

ʻI he tefito foʻou takitaha ʻoku fili ʻe hoʻo kalasí ke aleaʻí, poupouʻi e kau akó ke nau fakaʻaongaʻi e ngaahi maʻuʻanga tokoni ʻoku maʻu ʻi he ngaahi peesi ʻo e Newsroom, Fakahinohino ki he Ngaahi Folofolá, Konifelenisi Lahí, Tokoni ʻo e Moʻuí, pe Ngaahi Tefito ʻo e Ongoongoleleí . ʻE lava ke fakapapauʻi ʻe he ngaahi tefito naʻe filí pe ko e hā ʻa e maʻuʻanga tokoni pe ngaahi maʻuʻanga tokoni ʻoku totonu ke fakaʻaongaʻí. Kapau ʻokú ke ongoʻi ʻe ʻaonga kiate koe pe ko hoʻo kau akó ha ngaahi maʻuʻanga tokoni lahi ange, fakakaukau ke ke ʻalu ki he peesi ʻo e Answering Doctrinal, Historical, and Social Questions (Ko Hono Tali ʻo e Ngaahi Fehuʻi Fakatokāteliné, Fakahisitōliá mo e Fakasōsialé), ʻa ia ʻoku kau ai ʻa e Helps by Topics mo e Gospel Study Links (ʻoku maʻu ʻi he ChurchofJesusChrist.org).

Poupouʻi e kau akó ke nau ako maʻu pē mei he ngaahi folofolá mo e ngaahi lea ʻa e kau palōfitá pea ke fekumi ki he ivi tākiekina ʻo e Laumālie Māʻoniʻoní ʻi heʻenau fekumi ki he ngaahi tefito kehekehé. Ko e fokotuʻutuʻu ko ʻení ʻokú ne muimuiʻi ʻa e sīpinga naʻe fokotuʻu ʻi he lēsoni 4–6, pea ʻoku fakataumuʻa ia ke fakaʻaongaʻi ki ha faʻahinga tefito pē ʻoku fie ako ki ai hoʻo kau akó.

Ngaahi Fokotuʻu ki Hono Akoʻí

Makatuʻunga ʻi he ngaahi fiemaʻu ʻa e kau akó, te ke lava ʻo kamata ʻa e kalasí ʻaki ha taha ʻo e ngaahi meʻá ni:

• Ko ha ako konga iiki mei he fakamatala fakalahi A

• Ko ha fealēleaʻaki “Ko e Hā ʻOku Foʻoú?” fekauʻaki mo e ngaahi lipooti ongoongo mei he Newsroom (vakai, laʻipepa tufa 1 ʻi he fakamatala fakalahi E)

• Ko ha fealēleaʻaki fekauʻaki mo e tefito ʻo e ʻaho ní

Aleaʻi ʻa e Mahuʻinga ʻo e Tefitó

Tuku ha ngaahi miniti siʻi ki he kau akó ke nau aleaʻi ʻa e ʻuhinga ʻoku felāveʻi ai ʻa e tefito kuo nau filí mo ʻenau moʻuí.

Fakaloloto ʻa e Mahinó

Fakaafeʻi e kau akó ke nau ako lahi ange ʻaki ʻenau fekumi ʻi he ngaahi peesi ʻo e Newsroom, Fakahinohino ki he Ngaahi Folofolá, Konifelenisi Lahí, Tokoni ʻo e Moʻuí, pe Ngaahi Tefito ʻo e Ongoongoleleí . Ke tataki ʻa e fealēleaʻaki fakakulupú, te ke lava ʻo ʻoange ki he kau akó ʻa e laʻipepa tufa 2, “Ko Hono Fakaloloto ʻEtau Mahinó,” ʻoku maʻu ʻi he fakamatala fakalahi E. Manatuʻi ke tokoniʻi e kau akó ke nau vakai ki he tefito takitaha ʻaki ha fakakaukau ʻoku taʻengatá pea ke fehuʻi ange pe ʻoku kaunga fēfē ʻa ʻenau akó ki heʻenau tui ki he Fakamoʻuí mo ʻEne ongoongoleleí.

Fakamatala ke Mahino

Fakahoko ha taha ʻo e ngaahi ʻekitivitī ʻoku maʻu ʻi he laʻipepa tufa 3–5 ʻi he fakamatala fakalahi E, pe faʻu haʻo ʻekitivitī pē ʻaʻau.

Fakakaukauloto mo Lekooti

ʻOange ha taimi ki he kau akó ke nau fakalaulauloto ki he meʻa kuo nau ako mo ongoʻi ʻi he ʻaho ní. Te ke lava ʻo fakaʻaongaʻi e ngaahi fehuʻi ʻi he laʻipepa tufa 6, “Fakakaukauloto mo Lekooti” (ʻoku maʻu ʻi he fakamatala fakalahi E), ke tataki ʻaki ʻa e ʻekitivitī ko ʻení.

Ki he Kalasi Hokó

Feinga ke ʻiloʻi ʻa e tefito naʻe felotoi ki ai ki he kalasi hokó. Fakaafeʻi ʻa e kau akó ke nau vakaiʻi ʻa e ngaahi peesi ʻo e Newsroom, Fakahinohino ki he Ngaahi Folofolá, Konifelenisi Lahí, Tokoni ʻo e Moʻuí, pe Ngaahi Tefito ʻo e Ongoongoleleí ʻi heʻenau teuteu ki he kalasí.