“Toetofi mai se Misiona Tala’i,” Fetuunaiga i le Olaga Faafaifeautalai mo Auaunaga: Tamaitusi o Punaoa (2020)

“Toetofi mai se Misiona Tala’i,” Fetuunaiga i le Olaga Faafaifeautalai mo Auaunaga

Ata

faifeautalai mo auaunaga o loo faitauina faatasi ia tusitusiga paia

Toetofi mai se Misiona Tala’i

A toetofi oe mai se misiona tala’i i se misiona mo auaunaga, e le aafia i le toetofi lou valaauga o se faifeautalai.

Tauliaina o le Suiga

O le toetofi mai se misiona tala’i i se misiona mo auaunaga o se mea faigata lava mo le tele o faifeautalai. E mafai ona e oo i ni ituaiga se tele o lagona le lelei. Ae ia e mautinoa e silafia e le Faaola lou tulaga. O Lona alofa mo oe e atoatoa. E finagalo ma manaomia pea o Ia lau auaunaga. Na te manaomia lau auaunaga i le fausiaina o Lona malo ao lei oo i Lona toe afio mai i le lalolagi.
E tele lava ina lagonaina e faifeautalai e toetofi le tausalaina. Latou te tu’itino ona o le le mafai ona latou nonofo ai pea i se misiona tala. O na lagona o le tausalaina e mafai ona taofia ai i latou mai le lagonaina o le Agaga. Afai o e i ai i lea tulaga, manatua o loo faatasi le Agaga ma oe. E leai se mafuaaga lelei e lagona ai se tausalaina ona o le le faamaeaina o se misiona talai. O lena lava e te naunau ma agavaa e galue (tagai i le Mataupu Faavae ma Feagaiga 64:34).
O lagona o le tausalaina e mafai ona sau mai fetalia’iga o elemene i le fai’ai. O nei lagona atonu e le o le taunuuga o le agasala. E taua tele le malamalama ma iloa le eseesega.

Ae o se Faamanuiaga Lava.

Manatu i le tala ia Helamana ma lana autau talavou e 2,060 (tagai i le Alema 57:19–27). Na mafatia le autau atoa e 2,060 i manu’aga. E toatele i latou na matapogia ona o le tele o le toto maligi. O le faasaoina o i latou uma o se vavega. E lei afaina po o le a le tele o manu’a o le taitasi o i latou, ae na faamanuiaina uma le 2,060. Sa naunau i latou uma e faatino le faamoemoe o le amiotonu. Sa latou faamaoni, usiusitai, ma lotototoa. E mafai ona e mulimuli i la latou faataitaiga ma avea o se faifeautalai faamaoni.

O manu’aga i le galuega faafaifeautalai i le taimi nei, e ono aofia ai gasegase o le tino, o le mafaufau, ma lagona. O nei gasegase e mai i faapogai eseese ma mafuaaga lautele. E mafai ona e galue pea ma faamanuiaina. O loo e naunau ma agaaa ma e mafai ona e faaaoga ou tomai i le galuega a le Atua. (Tagai i le Mataupu Faavae ma Feagaiga 4.)

Ata

faifeautalai o loo suesue

A e agai i luma i lou tofiga fou, manatua nei upu musuia mai ia Elder Gerrit W. Gong: E mafai ona tatou maua o tatou olaga e ala i le faagotouga o o tatou olaga mo le Faaola (“Becoming Perfect in Christ,” Ensign po o le Liahona, July 2014, 19). Ma e mafai ona e maua pea le malosi i le folafolaga a le Faaola: “Ia outou o mai ia te au, o outou uma o e tigaina ma mafatia i avega, o a’u foi e malolo ai outou. … “Aua e avegofie la’u amo, o la’u avega foi e mama ia” (Mataio 11:28–30).

Faaauau ona e Tuputupu Ae

O lea la ua toe tofi oe, ua e toe nofo nei i le fale. Taumafai e suia amio masani tuai o le faalagolago i isi. O lena lava e te faifeautalai! Faaauau pea ona atia’e tomai faatagata matua, e pei o nei:

Tausi faalelei ou lava lavalava e ala i le tataina, faamamago, ma auli e oe lava.
Vaai le faafugaga ma teu faalelei oe lava. Taele i aso taitasi, ma tuuina atu oe lava o se sui o le Faaola.
Aoao e kuka, fai au oe lava faatauga, ma faafoe lelei pe o a meaai e ‘ai.
Ia mautinoa o e faamalositino i aso taitasi.
Ia lava lau moe ma faatumauina le soifua maloloina ma le mataala.
Fai au suesuega patino faaletalalelei ma tatalo i aso taitasi.
Faatutu ni sini e mafai ona ausia ma ni soa-sini, ma tusi i lalo.