O Iesu o loo talo atu i alii o i luga o le vaa

Faamatalaga mai le Sau, Mulimuli Mai ia te Au, saunia e James T. Harwood

O Le Faatomuaga

E Mafai Ona e Manuia i le Fesoasoani Mai o le Alii

I le avea ai ma se faifeautalai mo auaunaga, ua valaauina oe e fai ma sui o Iesu Keriso. O loo e auauna atu i fanau a le Tama Faalelagi. E alofa le Faaola ia te oe, ma o le a Ia fesoasoani e uunai oe i luma. Ua Ia folafola mai: “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).

faifeautalai mo auaunaga o loo faitauina tusitusiga paia

Faaaoga lou faatuatua ma galue e tusa ma le faaiuga ua e faia e fai le galuega a le Alii. E ala i lou faatuatua faifai pea ma au taumafaiga aupito sili o le a e atia’e ai ni tomai, o meaalofa, ma malosiaga e te manaomia vave. O le a e lagonaina le fesoasoani a le Alii. O le a e tuputupu ae i le talitonuga mautinoa i lou gafatia e auauna atu ia te Ia.

Ua folafola mai e le Alii e fesoasoani i faifeautala. Ae o le toatele o faifeautalai sili ona lelei i le talafaasolopito sa mafatia ma feagai ma tauiviga i a latou galuega faafaifeautalai. O Amona ma ona uso sa “mafatia tele, i le tino ma le mafaufau, e pei o le fia aai, fia inu ma le le lavava, ma le tele foi o tauiviga i la le agaga” (Alema 17:5). I nisi o taimi, sa lofituina i latou. “O lenei ina ua vaivai o tatou loto, ma toetoe a tatou toe foi i tua, faauta, sa faamafanafanaina i tatou e le Alii, ma fetalai mai: O atu i totonu o o outou uso, o sa Lamanā, ma tauave ma le onosai ou puapuaga, ma o le a ou tuu atu ia te outou le manuia” (Alema 26:27).

E faatatau foi lenei folafolaga ia te oe i lau auaunaga ua tofia i ai oe i le aiga o le Atua. E mafai ona avea oe ma auauna aoga tele i le Alii.

O Tatsu Ito, o lē sa i ai se migi le uaua malosi o lona ivitu, o se faataitaia o le faataunuuina o lenei folafolaga. Ina ua masii mai le aiga mai Iapani i Iuta, sa tonu ia Tatsu e avea o se faifeautalai mo auaunaga. Sa mafai e Dan o le uso laitiiti o Tatsu “ona vaaia le suiga o Tatsu” i le taimi o le misiona ma sa ia iloa ai sa “saunia moni lava ia Tatsu e toe foi i le lagi.”

Ina ua maliu Tatsu, sa alu Dan, o le sa migi foi le uaua malosi o lona ivitu, i le malumalu. Sa ia lagona le uunaia o ia e fesili pe mata e mafai ona valaauina o ia e faamae’a le tofiga o le misiona lava lea e tasi na auauna ai Tatsu a o lei maliu. Sa faamanuiaina Dan ona sa mafai ona ia faia. Sa galue auauna o ia i le ‘au a le LDS.org e tali i fesili, ma sa iloiloina ia atatosi o le “O A’u o se Mamona” i le faa-Iapani.

Fai mai Dan sa avea foi o ia “o se sui o le Atua i le olaga i aso taitasi.” Afai e i ai ni faafitauli o se tasi, sa “fiafia o ia i taimi uma e faalogologo atu ia i latou ma fautuaina i latou e o i o latou epikopo ia maua mai ai se faamanuiaga.”

E ui e lei i ai se faiga masani mo le talaiga i le misiona a Elder Ito, ae na ia fai mai sa ia matua lagonaina lava o ia o se faifeautalai. Fai mai a ia, o lana misiona na fesoasoani “e faateleina ai lo’u naunautaiga e auauna atu atili i aso uma.”

faifeautalai o auaunaga o loo faaaoga se komepiuta

Elder Tatsu Ito

E Faapefea ona Faaaoga Lenei Tamaitusi

O se faafaifeautalai mo auaunaga e mafai ona fiafia ma atuatuvale. O le galue malosi ma le auauna atu o meafaigaluega faamaonia ia i le faafoeina o le popole, faasiasia, ma le vaivai. E taua tele mo se tasi e punouai ai i le galuega a le Alii, i le taimi o le auaunaga faafaifeautalai ma le mae’a ai foi. Ae o le galue malosi ma le auaunaga lava ia ua le na o le pau ia o au meafaigaluega. O isi punaoa e aofia ai le fesoasoani faapolofesa, faamanuiaga faaleperisitua, fautuaga mai tagata matutua ua i ai le poto masani, ma le tamaitusi lenei. O le a fesoasoani le Alii ia te oe e atia’e ia tomai ma uiga faaalia e fesoasoani ai ia e manuia. E mafai ona e maua le lotomalie ma le mania i lau misiona auauna atu ma i le olaga.

O lenei tamaitusi e le o fuafuina e faitau uma i le taimi e tasi. Faaaoga faatonuga o i lalo. O le a taialaina oe i fautuaga mo luitau e te lua fetaiai. O le a fesoasoani foi nei manatu a o e tautua ma auauna atu i isi.

E Faapefea Ona Maua le Fesoasoani

Faitau le “Malamalama i le Atuatuvale”

Ina ia amata, faitau le “Malamalama i le Atuatuvale.” O le a e a’oa’o ai i le uiga o le atuatuvale ma pe o le a e mafua ai le atuatuvale i le galuega faafaifeautalai mo auaunaga. O le a e aoaoina ai foi pe o a punaoa o loo maua e faafoe ai le atuatuvale.

Suesue le “Faaaogaina o le Lisifaamaumau o Luitau”

Mulimuli i faatonuga o i lalo o le “Faaaogaina o le Lisifaamaumau o Luitau.” O le a fesoasoani nei faatonuga e te filima’oti ai pe o a luitau o lau galuega faafaifeautalai mo auaunaga e ono afua ai le faigata i le taimi nei. O le a e maua fautuaga i totonu o lenei tamaitusi o le a fesoasoani ia te oe e aoao ai le faatoilaloina o luitau taitasi. E mafai ona fesoasoani tagata o le aiga ma taitai misiona o le auaunaga ia te oe e faaaoga nei fautuaga ma o loo fautuaina atu ai foi isi ‘aitia. Ona faaauau lea ona e galue i isi luitau e faaaoga ai fautuaga o i lenei tamaitusi.