“6. Atia’e le Maufetuunai Faaleagaga,” Fetuunaiga i le Olaga Faafaifeautalai mo Auaunaga: Tamaitusi o Punaoa (2020)

“6. Atia’e le Maufetuunai Faaleagaga,” Fetuunaiga i le Olaga Faafaifeautalai mo Auaunaga

Ata

faafaifeautalai o loo tatalo

6. Atia’e le Maufetuunai Faaleagaga

O nisi taimi e tali atu ai faifeautalai i le atuatuvale tele naua e ala i le fesiligia o le moni o le talalelei. E tele ina tali atu faifeautalai faapea ona e le lava a latou punaoa e taulimaina ai le ova o le atuatuvale. Afai o faapea ni ou lagona, taumafai fautuaga o loo i lalo. Filifili fautuaga e foliga tonu mo oe. Tagai i le vaega “1. Atia’e le Maufetuunai i Taimi o le Atuatuvale” mo fautuaga faaopoopo.

A. Faamalosia o Lau Molimau

Ia iloa o fesili e lelei. Sa maua e Iosefa Samita le tele o faaaliga o ni tali i ana fesili faamaoni. O se mea lelei mo oe le i ai o ni fesili e uiga i le talalelei. A e taumafai malosi e sue tali, manatua e mafai ona fesoasoani ia tusitusiga paia, perofeta, faiaoga, ma lou lava gafatia e fefulifulia’i ai. Ae na o le Agaga lava e mafai ona faamautuina le mea moni. E ta’u mai e le Agaga o Iesu o le Keriso ma e moni le Ekalesia
Malamalama po o le a le faatuatua. O le i ai o le faatuatua o le faalagolago lea i le agalelei atoatoa o le Atua, alofa, poto, ma le faamaoni. O le talitonu tatou te le malamalama atoatoa. Ua aoao mai Alema e faapea “o le faatuatua e le o le maua lea o se malamalama atoatoa i mea; o lea afai ua ia te outou le faatuatua ua outou faamoemoe mo mea e le vaaia, ae moni” (Alema 32:21). E te le manaomiaina se “malamalama atoatoa” e maua ai le faatuatua. Suesue i le Alema 32 mo se fesoasoani i le fausiaina o lou faatuatua.
Ia i ai le faatuatua pe a oo ina foliga mai ua le mafai ona pulea mea. Atonu e te lagonaina le popole e uiga i ni tulaga patino po o taunuuga. A oo ina tupu lenei mea, faataitai e nofo filemu ma taulai i le mea o i ai nei (tagai i le “1. Atia’e le Maufetuuna’i i Taimi o le Atuatuvale”). Matau ou lagona pe a e manatu ua le mafai ona puleaina. E ui o nei faalogona e mafai ona le logolelei, ae e le mafai ona faatama’ia oe. I le aluga o taimi, o le a e iloa ua tele ma saga faateleina le faatuatua. E mafai ona i ai lou faatuatua i le taimi o le faaletonu ma luitau.

Tausi i poloaiga. Tatou te maua le faalagolago i le Alii pe a tatou aoaoina le taua o Ana aoaoga. Ina ia maua lenei faatuatuaga, e tatau ona tatou faia Lona finagalo. “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17
Ia onosai. O le taimi ma aafiaga o le a fesoasoani ia te oe e malamalama ai i nisi o mea o loo e fenumiai ai i le taimi nei. Manatua le aoaoga a Nifae: “Ua ou iloa e alofa [le Atua] i ana fanau; e ui i lea, ou te le iloa le uiga o mea uma” (1 Nifae 11:17). Fausia i luga o mea ua e iloaina e ala i le Agaga e moni e uiga i le Atua.

E. Aoao e Salamo

O le salamo e aofia ai le faaogatasi lou loto ma le finagalo o le Faaola. O mataupu faavae nei o le a fesoasoani ia te oe a o e taumafai malosi e salamo.

Ia e faamaoni i lou peresitene o le siteki. Afai e i ai ni au agasala matuia e te lei foiaina talanoa i lou peresitene o le siteki. Ia e talatala atu ma ia e faamaoni. O le a ia fesoasoani atu ia te oe e faasa’o nei mea.
Faamagalo oe lava ia pe a uma ona salamo. O nisi taimi e lagonaina lava e tagata le tausalaina ma le maasiasi pe a uma ona salamo. Manatua tatou te tu’itino lava i agasala ma mea sese ua tuanai. Ia faatuatuaina le lava o le Togiola a Keriso, mo oe. Manatua o le salamo e le na o se fuafuaga faaleoleo. O le salamo o le fuafuaga o le fiafia mo tagata uma.
Taulai atu i mea e taua moni. Fai le mea sili e te salamo ai i aso taitasi. Ona faamautinoa lea o mea e te popole i ai o mea e taua moni. O se faataitaiga o le auauna atu ma le alofa. Aua le popole i mea e te faamaualuga patino ai, e pei o mafaufauga o isi tagata ia te oe.
Malamalama i le matafaioi o le ta’uta’u atu o agasala. E te le manaomia le ta’uta’u atu o agasala e le matuia tele pe ta’uta’u faafia o le agasala lava e tasi. O le a logo atu e taitai perisitua ia te oe le taimi ua lava ai lou ta’uta’u atu. O le faaauau pea ona lagonaina o le tausalaina ma le faanoanoa e uiga i agasala ua mavae o se mea ua masani ai. Ae e le faapea ai e manaomia ona e toe saga ta’uta’u atua faafia mo le mea lava e tasi. Tata’i ese oe lava mai na ituaiga mafaufauga ma isi gaoioiga. Fai se filifiliga maua’i e talitonu i le faamagaloga a le Alii. Aua nei amanaiaina le faaosoosoga e popolevale pe maasiasi.
Talanoa i lou peresitene o le siteki po o le epikopo pe afai o loo faaauau pea ona e tauivi.

I. Aoao e Tatalo ma le Faamoemoe Moni

Taumafai e tatalo leotele, e tusa lava pe ua na o se musumusu. Taumafai e saunia mo se tatalo e ala i le tusiaina o ni au fesili po o ni popolega. Vaai faalemafaufau o loo latalata mai le Atua Fesili atu ia te Ia pe o le a se mea e mafai ona e faia mo Ia i le aso. Ona e galue lea i manatu e oo mai i lou mafaufau. E i ai taimi, faaaoga lau tatalo e tau ina faafetai atu ai i le Atua. Faafetai ia te Ia mo le mau mea lelei na Ia tuuina atu ia te oe.

Ata
faifeautalai mo auaunaga o loo tatalo

O. Aoao e Fiafia i Tusitusiga Paia

Tatalo patino lava mo se fesoasoani ia malamalama ma fiafia i tusitusiga paia. Faaaoga nisi o au taimi mo suesuega e tusitusi ai ou lagona e uiga i tusitusiga paia ma au tali atu i ai. Tusi mea ua e aoaoina po o ni uunaiga faaleagaga e te maua.

U. Aoao e Faalagolago i le Agaga

Faataitai ma le onosai. O le aoao ia iloa ma mulimuli i le leo o le Agaga e pei o le aoaoina o se gagana. E manaomia ai le faata’ita’i, onosai, ma le lotomaualalo. Taumafai malosi e aoao mai i mea na sese e aunoa ma le fiu.
Aoao mai konafesi aoao. Mo ni manatu i le auala e mafai ona e maua ai ia faaaliga patino, ia suesue i lauga o konafesi aoao e uiga i lenei autu.

Punaoa mo Tusitusiga Paia

Suesue ia mau nei. O le a faamalosia ai lou faatuatua e faapea o le a tuuina atu e le Atua ia te oe le mafanafana ma le fesoasoani. Ia lagona saoloto e faaopoopo foi i ai au mau faatusi paia e sili ona e fiafia i ai. A e manatuaina le Faaola, o le a e “maua lona Agaga e faatasi ma [oe]” (Mataupu Faavae ma Feagaiga 20:79).

Isaia 41:10: “Aua e te fefe: aua ou te ia te oe: aua le fetepatepai; aua o au lou Atua: ou te faamalosi oe; e moni ou te fesoasoani ia te oe; e moni ou te taofia oe i lou lima taumatau o i ai le amiotonu”
Ioane 14:27: “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. ou te le avatu ia te outou faapei ona avatu e le lalolagi.”
1 Nifae 1:20: “O le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou e oo lava i le mana e laveaiina ai.”
Iaopo 3:1: “O le a ia faamafanafanaina outou i o outou puapuaga, ma o le a ia aioia a outou tagi.”
Iakopo 4:7: “Ua faailoa mai ia te i matou e le Alii le Atua lo matou vaivai, ina ia mafai ai ona matou iloa, o lona alofa tunoa, ma lona faamaualalo tele i le fanauga a tagata, ua matou maua ai le mana e fai ai ia mea.”
Mosaea 4:27: “Ma ia vaai ia faia nei mea uma i le poto ma le faatulagaga lelei; ona e lē tatau i se tagata ona momoʼe televave atu nai lo le malosi ua ia te ia.”
Mosaea 24:14: “Ma o le a Ou faamāmāina foi avega ua tuu i o outou tauʼau, e oo ia te outou tou te lē lagonaina i latou i luga o o outou tua, aʼo outou i ai lava i le pologa; ma o le a Ou faia lenei mea ina ia mafai ona outou tutu e avea o ni molimau mo aʼu i le lumanai, ma ina ia mafai ona outou iloa ma le mautinoa o Aʼu, o le Alii le Atua, e asiasi atu i oʼu tagata i o latou puapuaga.”
Alema 7:12: “O le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.”
Alema 26:27: “Ina ua vaivai o tatou loto, ma toetoe a tatou toe foi i tua, faauta, sa faamafanafanaina i tatou e le Alii, ma fetalai mai: … tauave ma le onosai ou puapuaga, ma o le a ou tuu atu ia te outou le manuia.”
Alema 38:5:“Afai e te tuu atu lou faalagolago i le Atua seia faapea ona tele, o le a ia laveaiina oe i fafo mai ou tofotofoga, ma ou faalavelave, ma ou puapuaga.”
Eteru 12:27: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”
Mataupu Faavae ma Feagaiga 6:32, 34–36: “E faapei lava ona Ou i ai ia te oulua. … O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo. Faauta, ou te le tausalaina oulua. Vaai mai ia te aʼu i mafaufauga uma; aua le masalosalo, aua le fefefe.
Mataupu Faavae ma Feagaiga 58:2–4: “O ia o lē e faamaoni i puapuaga, ua sili atu le tele o le taui o lea lava tagata i totonu o le malo o le lagi. E lē mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele. Aua a mavae puapuaga e tele ona oo mai lea o faamanuiaga.”
Mataupu Faavae ma Feagaiga 84:88: “Ou te muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e a’u agelu, e sapasapai outou i luga.”
Mataupu Faavae ma Feagaiga 122:7–9: “O nei mea uma e te maua ai le poto masani, ma o le a avea mo ou lelei. Na afio ifo le Atalii o le Tagata i lalo o i latou uma. O le mea lea, pipiimau i lou ala.”
O isi punaoa mau o tusitusiga paia: