faifeautalai mo auaunaga o loo fai ana kuki

2. Atia’e le Maufetuuna’i Faaletino

O le soona atuatuvale e mafai ona aafia ai lou soifua maloloina, le gafatia e moe ai, ma le gafatia e taulima ai faaosoosoga. O le taumafa i meaai paleni ma le faamalositino e fesoasoani lea ia i tatou e puleaina lelei atili ai le atuatuvale. Afai o e feagai ma ni luitau faaletino, tatalo mo na luitau. Ona filifili lea o se tasi pe lua o fautuaga nei e ono fetaui mo oe. E le o fautuaga uma o le a aoga mo tagata uma. O le tele o manatu e tatau ona faataitai ia le itiiti ifo i le lua i le tolu vaiaso a o lei amata ona aoga. Tagai i le vaega “1 Atia’e le Maufetuunai i Taimi o le Atuatuvale,” mo fautuaga faaopoopo.

A. Aoao e Galue Malosi

• Faataape ia galuega tetele pe faigata i lalo i ni fasimea laiti. Afai o loo faigata pea le galuega, ia toe faalaiti atili. Ona amata loa lea ona galue i se tasi o galuega. Afai e te faatalitali seia “tau lagonaina” le fia galue a o lei amataina, atonu la o le a umi se taimi o le a e faatali. Ia amata, ma o le a sosoo mai ai ma le faaosofia.

• Fuafua lelei lou saoasaoa. Fesuisuiai le galuega e te faia, ma aua e te galue umi tele i se gaoioiga se tasi. Faamanatu ia te oe lava, “E na o le pau le mea e ao ona ou faia i le taimi nei o le .”

• Ia lava le moe, meaai maloloina, vai, ma faamalositino e maua ai le malosi e te manaomiaina.

• Saili mo le lagolagosua ma talia le lagolagosua, fautuaga, ma timaiga mai i isi. Ia lagolago ma faamalosiau atu foi i isi.

• Faaali atu le agaga faafetai. Ia loto faafetai e le gata mo ou faamanuiaga ae faapea foi mo ou luitau ma faigat. E mafai ona tatou aoaoina mai ia i latou. O le faaali atu o le loto faafetai o le a tatalaina ai le faitotoa mo le Alii e faamanuia ma fesoasoani mai ai ia te oe.

o faifeautalai mo auaunaga o loo sopo.

E. Faatumauina o le Soifua Maloloina ma le Malosi

• Suesue ma faaaoga le Mataupu Faavae ma Feagaiga 89.

fualaau ‘aina eseese

“Ma o le au paia uma o e e manatua e tausi ma faia nei upu, ma savavali i le usiusitai i poloaiga, o le a latou maua le maloloina i o latou pute ma le su i o latou ivi;

“Ma o le a latou maua le poto ma oa silisili o le malamalama, o oa natia lava;

Ma o le a taufetuli ae le vaivai, ma o le a savavali ae le matapogia.

“Ma o Aʼu, o le Alii, Ou te tuu atu ia te i latou se folafolaga, e faapea o le a laaloa le agelu o le faafanoga ia te i latou, e pei o le fanauga a Isaraelu, ma lē fasia i latou. Amene.”

Mataupu Faavae ma Feagaiga 89:18-21

• Faamalosia le puipuiga o lou tino .

  • Ia maua le valu i le iva itula e moe ai.

  • Inu ia ipu vai e 6 i le 12 i le aso, e faalagolago i le tau.

  • Aua nei faamisia ia taumafataga, aemaise lava le malu taeao sei vagana lava pe a anapogi.

  • Aloese mai mea suamalie.

  • Ia taumafa vaitamini i aso uma.

  • Taumafa ni nai polotini i aso taitasi (mo se faataitaiga, nati, pi, tofu, fuamoa, susu, yogurt, sisi, i’a, moa, aano manu fasi).

  • Ia fufulu soo ou lima pe faaaoga le vailaau fufululima, aemaise pe afai e gasegase isi o i lou siomaga.

  • Aua nei faataatia soloa ni meaai e tatau ona tuu i le pusa aisa. Afai e le mautinoa, ave e tia’i.

    fafine o loo faamalositino.

• Faamalositino e le aunoa. E taua tele le faamalositino mo le soifua manuia faaletino. Fai uma toleniga o le malosi ma le tumau, ia averesi i le 30 minute i le aso, faalima i se vaiaso. E fesoasoani le faamalositino e faateleina ai lou malosi ma faamautu ai ou lagona.

• Fai ou ofu mo le tau. Afai e te faigaluega i fafo i le la vevela, ia mauatinoa o fai sau mata e puipuia ai mai le la ma ofu lanuvaivai. Afai ua e vevela tele, ki le vai i luga o ou tapulima. I le tau malulu, faamafiafia ou atu lavalava, e aofia ai ma totinilima ma se pulou.

• Ia faatumauina le mama ma le leai o se pefu o lle mea e te nofo ai. O se potu e mama o le a siitia ai foi o oulua agaga. Galulue faatasi ma ou matua ma manatu i lou aiga. Fesoasoani ia i latou ia tausisia avanoa fefaasoaai. O le tausisia o le mama o le mea e te nofo ai e sili ona taua pe afai e te maua soo i le fūlū po o ni mea e te aafia gofie ai. Tata soo ia solo ma ieafu e faaitiitia ai mea e aafia gofie ai.

I. Taulimaina o le Tiga o le Ulu, Manava, po o Maso

• Faataitai le faato’amalieina faaletino. O le faato’amalie e mafai ona fesoasoani e faaitiitia ai auga faaletino e pei o ulu tiga, manava tiga, po o le tiga o le tua. E mafai foi ona fesoasoani i le manava tata, tatavale o le fatu, po o le faigata ona manava. E mafai ona tuuitiitia ai lagona o le popolevale. Toleni lou tino ia to’amalie e ala i le faataitai o le faamalositino e faatoafilemu ai le mafaufau. Pe taumafai le faamalositino o le manava i aso uma ia le itiiti ifo ma le tolu vaiaso. A oo ina i ai ni ou auga faaletino pe lagonaina le soona atuatuvale, faaaoga faamalositino nei e faaitiitia ai le malō o le tino. O le a fesoasoani ia te oe e lagonaina ai le toafilemu. A e toafilemu, ia taulai atu i le talitonu o le a fesoasoani le Alii ia te oe i ou luitau. O lea, o le aoao ia to’afilemu e mafai ona avea ma ituaiga o le gauai atu i le finagalo o le Atua. E mafai foi ona ou faaalia se naunautaiga e mulimuli i le Faaola, o le na fetalai, “Aua le faia lo’u loto, a o lou finagalo” (Luka 22:42).

Faamalositino e Faatoafilemu ai le Mafaufau

O le lava o le malolo e fesoasoani lea i lou tino ia toe faaleleia mai le atuatuvale. Faataitai le faamalositino lea po o le faamalositino tau le manava i le po ae e te lei moe. O le faia o lenei mea o le a toleni ai lou tino ia to’amalie. E mafai ona e faia se faapuupuuga o le faamalositino lea i se taimi o le aso. Faaaoga i soo se taimi e te lagonaina ai ua ova le atuatuvale.

• Taoto i lalo pe saofai lelei ma le toafimalie ma moeiini ou mata.

• Ia mafuli i se vaega se tasi o lou tino i le taimi e tasi, pei o le lima po o le vae. Ia matau soo se mea e malo. Ia faatoamalie ma le naunau le vaega lena o lou tino. Ia lagonaina le matafi ese uma o vaega malō, e pei o se oneone e toulu ifo i le va o ou tamatamailima. Ona e see atu lea i le isi vaega o lou tino. Faifai malie. E te manatu o i ai pea ni mea o malo i lou tino? Faafufusi se vaega o lou tino mo le 10 sekone. Ona matua’i faato’amalie lea mo le 10 sekone ae lei faaauauina.

• Taulai i se vaega e tasi o lou tino i le taimi, e amata i lou ulu ma faasolo ifo ai i lalo o ou vae ma tamatamaivae.

• Siaki faalemafaufau lou tino mo soo se vaega o totoe o loo malō. Ua matua’i toamalie atoa.

• Filifili se “vaaiga patino” e aumaia ia te oe le olioli ma le filemu. E mafai ona avea o se manatuaga po o se faatulagaga e manatu i ai faalemafaufau. Taumafai e vaai faalemafaufau i lenei vaaiga i le manino e mafai ai.

• Vaevae lau galuega i ni nai galuega laiti. Ona fai lea na o se galuega se tasi i le taimi. I laasaga taitasi, faamanatu ia te oe lava, “E na o le pau le mea e ao ona ou faia i le taimi nei o le .” Mo se faataitaiga, e mafai ona e faapea, “E na o le pau le mea e ao ona ou faia i le taimi nei o le valaau atu i le taitai misiona mo auaunaga” po o le “E na o le pau le mea e ao ona ou faia i le taimi nei o le fai o o’u lavalava mo le aso.”

• Tausi se faamaumauga mo se vaiaso. O le a fesoasoani lenei mea ia te oe ia e iloa ai le taimi e tupu ai auga faaletino. Tagai mo ni mamanu. Mo se faataitaiga, atonu e foliga mai o le a atili alia’e mai auga:

  • I lalo o tulaga patino, e pei o Aso Sa. Atonu foi e te faalogoina le ma’i pe a e i ai ma taitai. E tele taimi e te ono lagona ai le ma’i pe afai e te le ‘ai i le tele o itula.

  • Pe a e mafaufau i se ala faapitoa. Mo se faataitaiga, pe a e mafaufau sa tatau ona sili atu lou faia o se mea.

  • Pe a i ai ni ou lagona patino e te le fia talanoa i ai, e pei o le popole po o le ita.

• Mafaufau i se auala e suia ai le tulaga. Mo se faataitaiga, e mafai ona e alu ma ave ni meaai mamā maloloina [snacks] pe taumafai e suia ou mafaufauga (tagai i le “Toetalanoa i Mafaufauga Le Lelei”). E mafai foi ona e taumafai e faatoafilemu ou lagona (tagai i le “Tali Atu ma le Lelei i le Atuatuvale”). Saili i nisi fautuaga i lalo o le “3. Atiia’e le Maufetuunai Faalelagona.”

• Saili atu i se vaaiga faafomai. Afai e faaauau pea auga pe ua e manu’a foi, ia feutagai ma ou matua ia maua se fesoasoaniga faafomai.

• Faagalo oe lava ia. Atonu e te matauina ni mafaufauga popole e pei o le “O le a galo ia te au le tala e fa.” Pe atonu e te mafaufau “Ua ou faavalevalea.” Faamanatu ia te oe lava e sese tagata uma. Manatua e filifili le Alii e galue i mea vaivai ma faatauvaa (tagai i le Mataupu Faavae ma Feagaiga 1:24--28).

uati ma tusi

O. Moe Lelei ma Alu e Moe i le Taimi Sao

• Tusi se lisi o mea e le o mafai ai ona maua sau moe. Ona faataatia ese lea o lea lisi. O le faia o lenei mea o le a mafai ai ona malolo lou mafaufau ina ua iloa o le a le galo ia te oe se mea e taua. Faamanatu ia te oe lava ia o le a e galueaiina ni fuafuaga patino i le taeao. Taulai atu au tatalo i po uma i le lotofaafetai ma le lipoti atu o mea na e aoaoina i lena aso.

• Mulimulitai i se faiga masani i po uma. O le a toleni ai e lenei faiga lou tino o le taimi lea e moe ai. Mo se faataitaiga, faaaoga le faamalositino e faatoafilemu ai le mafaufau ae e te lei moe. Aloese mai le faitautusi pe ‘ai i le moega. O le a sili atu le lelei o lau moe pe afai e iloa e lou mafaufau o le moega o se nofoaga mo le moe. Taumafai ia maua le iva i le sefulutasi itula o le moe i po taitasi.

• Ia toafilemu ma malolo lelei i le itula muamua o le aso. Ae e te lei alu e moe, tusi i se tusi talaaga pe ‘ai sina meaai mamā pei o se ipu susu po o se fualaau ‘aina suamalie. Faalogologo i musika talafeagai, talanoa i se tasi o le aiga, pe faataitai ia tomai e faato’amalie ai. Afai e galo ia oe ona amata ona toamalie i le itula lea, seti se uati faailo ia tatagi i le 30 minute ao lei tatau ona e alu e moe. A e faalogoina, tuu loa au mea o loo fai. Ona amata loa lea ona faatoamalie ma sauni e moe.

• Aloese mai mea suamalie po o le faamalositino mo se itula a o lei moe.

• Faamafanafana po o le Faamalulu. E sili atu ona faigata ona moe pe afai o loo e matua vevela lava pe maalili tele. Taele i se vai malu pe aumai se isi palanikeke.

• Puipui mai le malamalama ma le pisa i le mea sili e mafai ai. Poloka ese le tele o le malamalama e mafai ai, ma pupuni le pisapisao e ala i le faaola o se ili pe fai ni mea pupuni taliga. E oo lava i sina malamalama po o sina pisapisao itiiti e le momoe ai lava isi tagata.

“Tuu le faapaiē; tuu le lē mamā, tuu le fai pona o le tasi i le isi; tuu le moe umi atu nai lo le mea e tatau ai; vave momoe, ina ia outou lē vaivai; alapo aʼe, ina ia olaola o outou tino ma o outou mafaufau.”

Mataupu Faavae ma Feagaiga 88:124

U. Ala i Luga i le Taimi Sao

• Muamua, alu e moe i le taimi sao. Afai e le o lava lau moe, vave alu e moe pe 30 minute mai le taimi masani.

• Ia faamalositino soo. A maea le tolu i le fa vaiaso o faamalositino tai 30 minute i le aso, atonu o le a e matauina o le a itiiti se moe e te manaomiaina. A o faasolo ina malosi atu lou tino, o le a tele atu se malosi ma faigofie atu ona faatoafilemu.

• Aloese mai mea suamalie a o lei moe. O le faia o lea mea e mafai ona fesoasoani ia te oe e te tau le lagonaina ai lelavā i taeao.

• Faapolokalama lou mafaufau. Tau ia te oe lava ia i le po a o lumanai le taeao, le taimi e te manao e ala ai i luga.

• Afai e mafai, aumai se uati ma faapipii i se moli. Seti le fuataimi e ki lou moli i le 15 i le 20 minute a o lei oo i le taimi e te ala ai. E faailo atu e le moli i lou fai’ai ia ala i luga.

F. Aai faatasi ma le Aiga

• Ia galulue faatasi ma lou aiga i le fuafuaina o taumafataga. Avatu sou taimi e faatau ai meaai, fuafua ma sauni taumafataga, ma faamama.

• Ai ni meaai eseese. Taumafai e ‘ai ni fualaau aina suamalie po o fualaau fai sua ia le itiiti ifo ma le lima i aso taitasi, pe afai o maua.

• ‘Ai polotini i aso taitasi. O meaai e tele ai le polotini e aofia ai nati, pi, tofu, fuamoa, susu, yogurt, sisi, i’a, moa, ma aano o manu fasi.

• Faaitiitia le suka ma aloese mai le kafeini (caffeine). O mea uma ia e lua e ala ai ona maitaita gofie tagata ma lelavava i se taimi faaumiumi.

• Inu le vai ma isi mea inu lelei. Ia i ai pea le vai i le tino e ala i le inuina o le 6 i le 12 ipuvai ma isi vaiinu i le aso, e faalagolago i le tau.

• Ia faasolosolo malie ona faaitiitia le mamafa pe a manaomia. Pe o e taumafai e faalusi lou mamafa? Afai o lea, aua e te taumafai ia sili atu i le tasi po o le lua pauna (tasi kilokalama) e lusi i le vaiaso. Inu se vai faasili.

O Keriso o loo lavea’i mai Peteru

O Iesu o Loo Savali i Luga o le Vai, saunia e Robert T. Barrett

“Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”

Eteru 12:27

G. Ia Faaosofia e Faamalositino

• Tatalo mo se naunauga e faamalositino. Ona amata lea i lou ta’u ifo ia te oe lava o le a e faamalositino mo na o le lima minute. O le a tele ina faaosofia atili oe i le taimi lava e te amata ai.

• Faamanatu ia te oe lava ia tulaga manuia o le faamalositino. Manatu faalemafaufau i le i ai o le malosiaga e tetee ai faama’i ma le faateleina o lou malosi. Manatu faalemafaufau foi i le pulea lelei o le atuatuvale, sili atu ona lelei lagona faalelagona, ma le puleaina lelei o lou mamafa. E oo lava i tagata e le fiafia e faamalositino e mauaina foi nei faamanuiaga.

• Faia o faamalositino e pei o se taaloga. A o e faamalositino, fuafua se gaoioiga malie mo se taimi mulimuli ane, pe faamalositino foi i musika talaeagai. Tausia se kata o togi o au taumafaiga faamalositino, ma ia tauia oe lava mo le ausiaina o au sini. O le taui atonu o le alu i le paka, fale’aiga, po o se faleoloa.

• Sue se ituaiga o faamalositino e te fiafia ai (pe tau le fiafia foi i ai). Mo se faataitaiga, atonu e te savali faamalo pe tamoemoe i se musika faagaeetia. E mafai ona e tafue, falōlō, pe fai push-ups, sit-ups, po o le yoga.

  tamaitai o loo tamoe