Ang Pagtinguha og Pagpadayag gikan sa Dios

Ang Doktrina ug mga Pakigsaad naglangkob sa importanteng mga pagtulun-an mahitungod sa pagpadayag.

Asa ko mangita og bag-ong trabaho? Usaon nako nga mas maayong makonektar sa akong pamilya? Unsay plano sa Dios alang nako?

Tingali duna kay mga pangutana sama niini sa imong kinabuhi, sa imong mga pakigrelasyon, o sa imong pagtuo. Ang Espiritu Santo makagiya nimo samtang magtubag ka sa mga pangutana nga sama niini. Ang mga tudling diha sa Doktrina ug mga Pakigsaad ug ang mga pagtulun-an gikan sa mga propeta makatabang nimo sa pagkat-on mahitungod sa pagdawat og pagpadayag alang sa lisod nimong mga pangutana.

Ang pagpadayag mahimong madawat sa tanan nga mangayo.

“Kon mangutana kamo kanako kamo makadawat; kon kamo manuktok kini pagaablihan alang kaninyo” (Doktrina ug mga Pakigsaad 6:5; tan-awa usab sa Mateo 7:7).
“Ang pribilehiyo sa pagdawat og pagpadayag usa sa labing mahinungdanon nga mga gasa sa Dios ngadto sa Iyang mga anak.” —Presidente Russell M. Nelson

Ang pagpadayag madawat sa managlahi nga paagi.

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabot diha kanimo ug nga mopuyo diha sa imong kasingkasing” (Doktrina ug mga Pakigsaad 8:2).
“Ang Dios naggamit og nagkadaiyang sundanan [aron ipaabot ang] pagpadayag ngadto sa Iyang mga anak nga lalaki ug mga anak nga babaye, sama sa mga panghunahuna ug mga pagbati sa kasingkasing, mga damgo,mga panan-awon, pagpakigsulti sa langitnong mga mensahero, ug inspirasyon.” —Elder David A. Bednar sa Korum sa Napulog Duha ka Apostoles

Ang pagpadayag magkinahanglan og pagpangandam.

“Kinahanglan gayod nga imo kining tun-an og maayo sa imong hunahuna; dayon ikaw kinahanglan nga mangutana kanako kon husto ba kini” (Doktrina ug mga Pakigsaad 9:8).
“Ang atong espirituhanong pagpangandam mapalambo pag-ayo kon kanunay kitang magtuon sa mga kasulatan ug mga kamatuoran sa ebanghelyo ug mamalandong diha sa atong hunahuna sa giya nga atong gitinguha.” —Elder Quentin L. Cook sa Korum sa Napulog Duha ka Apostoles

Ang pagpadayag posibleng moabot sa usa ka matang sa kalinaw.

“… Hinumdumi ang gabii nga ikaw misangpit ngari kanako diha sa imong kasingkasing. … Wala ba Ako mamulong og kalinaw sa imong hunahuna mahitungod niini nga butang?” (Doktrina ug mga Pakigsaad 6:22–23).
“Ang Espiritu Santo mamulong og kalinaw sa inyong kalag. Awhagon niya kamo nga magpadayon sa pagtuo. Ug ipahibalik Niya ang panumdoman sa mga panahon nga mibati kamo’g kahayag ug gugma ni Jesukristo.” —Presidente Henry B. Eyring, Ikaduhang Magtatambag sa Unang Kapangulohan

Ang pagpadayag magdala og kalipay.

“Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay” (Doktrina ug gma Pakigsaad 11:13).
“Ang hingpit nga kalipay nga mopuno sa atong mga kalag magdala og mahangtorong panglantaw nga sukwahi sa adlaw-adlaw nga pagpakabuhi. Kana nga kalipay moabot nga usa ka kalinaw taliwala sa kalisdanan o kasakit.” —Elder Ronald A. Rasband sa Korum sa Napulog Duha ka Apostoles