“Kaninyo Ihatag Ko ang Akong Kalinaw”
Misaad ang Ginoo og kalinaw ngadto sa Iyang mga disipulo dihang padulong na Siyang mobiya kanila. Gihimo Niya ang mao gihapon nga saad ngari kanato.
Pinalangga kong mga sister, napanalanginan kita sa Espiritu sa Dios karong gabhiona. Ang dinasig nga mga mensahe gikan sa mga bantugang mga lider sa mga sisterug ang musika nakapalig-on sa atong pagtuo ug mipalambo sa atong tinguha nga matuman ang sagradong mga pakigsaad nga atong gihimo uban sa mapinanggaon natong Amahan sa Langit. Gibati nato ang paglambo sa atong gugma alang ni Ginoong Jesukristo ug pasalamat sa talagsaong gasa sa Iyang maulaon nga sakripisyo.
Yano ra ang akong mensahe karon. Mibati kitang tanan og kalinaw karon. Tanan kita gustong mobati sa ingon nianang kalinaw sa atong kaugalingon, sa atong mga pamilya, ug sa mga tawo sa atong palibut. Misaad ang Ginoo og kalinaw ngadto sa Iyang mga disipulo dihang padulong na Siyang mobiya kanila. Gihimo Niya ang mao gihapon nga saad ngari kanato. Apan miingon Siya nga mohatag Siya og kalinaw sa Iyang pamaagi, dili sa pamaagi sa kalibutan. Gihulagway niya ang Iyang pamaagi sa pagpadala og kalinaw:
“Apan ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo.
“Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:26–27).
Ang mga anak ni Mosiah nagkinahanglan niana nga gasa sa kalinaw dihang gisugdan nila ang misyon ngadto sa mga Lamanite. Inubanan sa gamayng kahingawa sa gibati nilang kadak-on sa ilang tahas, nag-ampo sila og kasiguroan. Ug “ang Ginoo miduaw kanila uban sa iyang Espiritu, ug miingon ngadto kanila: Magmahupayon. Ug sila nahupay” (Alma 17:10; tan-awa usab sa Alma 26:27).
Panagsa, mangandoy ka og kalinaw kon nag-atubang ka og kawalay kasiguroan ug mahulgaong mga hagit. Nakat-unan sa mga anak ni Mosiah ang leksyon nga gitudlo sa Ginoo kang Moroni. Usa kini ka giya kanatong tanan: “Ug kon ang mga tawo moduol ngari kanako, Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” (Ether 12:27).
Miingon si Moroni nga dihang siya “nakadungog niini nga mga pulong,” siya “nahupay” (Ether 12:29). Makahupay kini kanatong tanan. Kadtong dili makakita sa ilang mga kahuyang walay paglambo. Ang inyong pagkasayud sa inyong mga kahuyang usa ka panalangin, kay nakatabang kini nga magpabilin kamong mapaubsanon ug padayon ang inyong pagsunod sa Manluluwas. Dili lang mohupay ang Espiritu kaninyo, apan Siya usab ang paagi nga ang Pag-ula mousab sa inyong pagkakamo. Dayon mahimong lig-on ang mga butang nga huyang.
May mga higayon nga sulayan ni Satanas ang inyong pagtuo; mahitabo kini sa tanang disipulo ni Jesukristo. Ang inyong depensa batok niining pang-atake mao ang kanunayng pagpakig-uban sa Espiritu Santo. Ang Espiritu Santo mamulong og kalinaw sa inyong kalag. Awhagon niya kamo nga magpadayon sa pagtuo. Ug ipahibalik Niya ang panumduman sa mga panahon nga mibati kamo’g kahayag ug gugma ni Jesukristo.
Ang paghinumdom tingali usa sa labing bililhong mga gasa nga ikahatag as Espiritu kaninyo. Siya “magapahinumdom kaninyo sa tanan nga gikasulti [sa Ginoo] kaninyo” (Juan 14:26). Ang panumduman posibling mao ang usa ka pag-ampo nga gitubag, nadawat nga ordinansa sa priesthood, kumpirmasyon sa pagpamatuod, o dihang nakita ninyo ang kamot sa Dios sa inyong kinabuhi. Tingali sa adlawng moabut kon magkinahanglan kamo’g kalig-on, ang Espiritu modala sa inyong panumduman sa inyong mga gibati atol niini nga miting. Hinaot nga mahitabo kini.
Usa ka panumduman nga kanunayng gisulod sa Espiritu sa akong hunahuna mao ang sakrament miting nga gihimo sa gabii dugay nang katuigan didto sa metal nga kasilungan sa Innsbruck, Austria. Ang kasilungan nahimutang ilawom sa riles sa tren. Mga usa ra ka dosenang tawo ang didto, nanglingkod sa kahoy nga lingkuranan. Kadaghanan nila mga babaye, ang uban mas bata ug ang uban mas magulang. Nakakita ko og mga luha sa kalipay dihang gipasa ang sakrament nianang gamayng kongregasyon. Akong gibati ang gugma sa Manluluwas para niadtong mga Santos, ug mao usab sila. Apan ang milagro nga akong nahinumduman kaayo mao ang kahayag nga ingon og mipuno sa metal nga kasilungan nga nagdala og malinawong pagbati. Gabii kadto ug walay bintana, apan ang kwarto mihayag sama sa udtong tutok.
Ang kahayag sa Espiritu Santo sanag ug tugob niadtong gabhiona. Ug ang mga bintana nga mipasulod sa kahayag mao ang mapaubsanong mga kasingkasing niadtong mga Santos; nga nangadto atubangan sa Ginoo nangita og kapasayloan sa ilang mga sala ug mipasalig sa kanunayng paghinumdom Kaniya. Dili lisud ang paghinumdom Kaniya adtong higayuna, ug ang akong panumduman nianang sagradong kasinatian nagpasayon sa akong paghinumdom Kaniya ug sa Iyang Pag-ula sa katuigang misunod. Ang saad diha sa pag-ampo sa sakrament nga ang Espiritu magauban kanamo natuman ug nagdala og mga pagbati sa kahayag ug kalinaw.
Sama ninyo, mapasalamaton ko sa daghang paagi nga giduaw ko sa Ginoo uban sa Maghuhupay dihang nagkinahanglan ko og kahupayan. Apan ang Amahan sa Langit wala lang maghunahuna sa atong kahupayan apan mas labaw pang naghunahuna sa atong paglambo. Ang “Maghuhupay” usa lang sa gihimong paghulagway sa Espiritu Santo diha sa kasulatan. Nia pay lain: “Ug karon sa pagkatinuod, sa pagkatinuod, Ako moingon nganha kanimo, itugyan ang imong pagsalig diha niana nga Espiritu nga nagtultol sa pagbuhat og maayo” (D&P 11:12). Kasagaran, ang kamaayo nga Iyang ipabuhat kaninyo maglakip sa pagtabang og tawo aron makadawat og kahupayan gikan sa Dios.
Pinaagi sa Iyang kaalam, gipahimutang kamo sa Ginoo diha sa mga organisasyon ug mga klase sa Iyang Simbahan. Gibuhat Niya kini aron mouswag ang inyong gahum sa paghimo og maayo. Niana nga organisasyon, may mga pihong gisangon kaninyo sa pagserbisyo sa uban para Kaniya. Sama pananglit, kon kamong mga batan-on, tingali hangyoon mo sa inyong bishop o lider sa Young Women sa pagtabang sa usa ka Laurel nga “na-less active” nga usahay maoy atong itawag.” Tingali mas nakaila kamo niya kay sa inyong bishop o sa Young Women leader. Nahibalo tingali kamong may problema siya sa balay o sa eskwela ug tingali niining duha. Wala mahibalo ang inyong mga lider nganong gibati nilang hangyoon kamo sa pagtabang niya, apan ang Ginoo nahibalo, ug gigiyahan Niya kini nga buhat pinaagi sa inspirasyon sa Iyang Espiritu.
Ang kalampusan sa inyong mga paningkamot magdala og milagro sa kausaban sa inyong kasingkasing ug sa kasingkasing sa inyong gitabangan—ug nagkinahanglan kana sa pakig-uban sa Espiritu Santo. Himoon sa Espiritu nga imong makita ang less-active nga Laurel sama sa pagkakita sa Ginoo kaniya. Nasayud ang Ginoo sa iyang kasingkasing ug sa inyong kasingkasing, ug nasayud Siya sa mga posibilidad nga mausab ang kasingkasing. Makaduaw Siya kaninyo sa Iyang Espiritu aron idasig ang pagpaubos, kapasayloan, ug gugma.
Kana nga Espiritu makadasig sa mga pulong, mga buhat, ug sa pailub nga imong gikinahanglan sa pagdapit sa karnero balik sa panon. Ug matandog Niya ang kasingkasing sa panon sa Laurel class sa paghigugma ug pag-abi-abi sa nawalang karnero, aron sa iyang pagbalik, mobati siya nga nakapauli.
Ang inyong gahum sa paghimo og maayo isip pundok sa mga anak sa Dios mag-agad, sa dakong sukod, sa paghiusa ug gugma nga anaa kaninyo. Lahi usab kini nga gasa nga moabut pinaagi sa Espiritu Santo.
Nasabtan kini ni Alma. Mao nga mihangyo siya sa iyang katawhan “nga kinahanglan walay panagbingkil sa usag-usa, apan sila kinahanglan molantaw sa unahan uban sa nagkahiusa nga panan-aw, magbaton og hugot nga pagtuo ug usa ka bunyag, diin ang ilang mga kasingkasing nabugkos diha sa pagkahiusa ug diha sa gugma sa usag-usa” (Mosiah 18:21).
Ang paghiusa gikinahanglan aron atong mabatunan ang Espiritu sa atong klase ug sa atong pamilya. Apan kamo sama nako nahibalo gikan sa kasinatian nga ang maong mahigugmaong paghiusa lisud imentenar. Nagkinahanglan kini sa pakig-uban sa Espiritu Santo nga mabuka ang atong mga mata ug mohumok ang atong mga pagbati.
Nahinumdom ko nga kausa ang siyete anyos o otyos namong anak kusog kaayong naglukso-lukso sa iyang higdaanan nga nagtuo kong mabungkag kini. Gibati ko og kalit nga kalagot, ug gidali nako og husay ang akong balay. Gisigmit nako ang gagmayng abaga sa akong anak ug gialsa siya igo nga nagtungod ang among mga mata.
Ang Espiritu mibutang og mga pulong sa akong hunahuna. Sama og hinay nga tingog apan midulot sa akong kasingkasing: “Naggunit ikaw og talagsaong tawo.” Hinay siya nakong gibutang sa higdaanan ug nangayo ko’g pasaylo.
Karon nahimo na siyang talagsaong tawo sigun sa gisulti kanako sa Espiritu Santo 40 ka tuig nang milabay. Hangtud sa hangtud kong mapasalamaton nga giluwas ko sa Ginoo gikan sa ngil-ad nakong pagbati pinaagi sa pagpadala sa Espiritu Santo aron akong makita ang usa ka anak sa Dios sama sa Iyang pagkakita kaniya.
Ang paghiusa nga atong gipangita diha sa atong pamilya ug sa Simbahan moabut kon tugutan natong moepekto unsay atong makita kon magtinan-away kita—ug gani kon maghunahuna kita sa usag usa. Ang Espiritu nakakita pinaagi sa tiunay nga gugma ni Kristo. Paminawa ang mga pulong ni Mormon nga gigamit sa paghulagway sa gugmang putli. Hunahunaa ang mga panahon dihang mibati ka niini:
“Ug ang gugma nga putli mainantuson, ug mabination, ug dili masinahon, dili manghambog, dili mangita alang sa iyang kaugalingon, dili dali nga masuko, dili maghunahuna sa dautan, ug dili maglipay diha sa pagkadautan apan maglipay diha sa kamatuoran, mainantuson sa tanan nga mga butang, matuohon sa tanan nga mga butang, molaum sa tanan nga mga butang, ug molahutay sa tanan nga mga butang.
“Busa, akong hinigugma nga mga kaigsoonan, kon kamo walay gugma nga putli, kamo walay kapuslanan, kay ang gugma nga putli dili mopakyas. Busa, unong ngadto sa gugma nga putli, nga mao ang labing mahinungdanon sa tanan, kay ang tanan nga mga butang gayud mapakyas—
“Apan ang gugma nga putli mao ang tiunay nga gugma ni Kristo, ug kini molahutay sa kahangturan; ug bisan kinsa nga makaplagan nga aduna niini sa katapusan nga adlaw, kini makaayo uban kaniya.
“Busa, akong hinigugmang mga kaigsoonan, pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo; aron mahimo kamo nga mga anak sa Dios; nga kon siya moabut kita mahisama kaniya, kay kita makakita kaniya nga mao gihapon; nga kita mahimo nga makabaton niini nga paglaum; aron mahimo kita nga putli ingon nga siya putli” (Moroni 7:45–48
Kini ang tumong sa Amahan sa Langit para kaninyo, bililhon Niyang mga anak. Sama og kini nga tumong layo ra kaayo para ninyo, apan sa Iyang panglantaw, dili kamo ingon niana kalayo. Busa duawon Niya kamo sa Iyang Espiritu alang sa paghupay, pag-awhag, ug pagdasig aron kamo magpadayon.
Ibilin ko kaninyo ang akong tinuod nga pagsaksi nga ang Amahan nakaila kaninyo, nahigugma kaninyo, ug makadungog sa inyong mga pag-ampo. Ang Iyang Hinigugmang Anak nagdapit nga kamo moduol Kaniya. Ug gipadala Nila ang Espiritu Santo sa pagsuporta sa inyong mga paningkamot nga makaserbisyo sa uban para Kanila.
Tungod sa Pag-ula ni Jesukristo, ang padayong pakig-uban sa Espiritu Santo maghatag og makalimpyo ug makalunsay nga epekto sa inyong espiritu. Bation ninyo ang kalinaw nga gisaad sa Manluluwas nga Iyang ibilin sa mga disipulo. Pinaagi niana nga kalinaw moabut ang sanag nga paglaum ug pagbati sa kahayag ug gugma gikan sa Amahan ug sa Iyang Hinigugmang Anak, kinsa nangulo sa Iyang gingharian sa yuta pinaagi sa pagpadayag ngadto sa Iyang buhi nga propeta. Ako mopamatuod sa pangalan ni Ginoong Jesukristo, amen.