Digital Lamang
Pag-ila sa mga Panalangin Human sa Hitabo—Sa Unsang Paagi nga Nahimong Milagro sa Akong Pamilya ang Appendicitis
Samtang atong pamalandongan ang nanglabay nga mga kasinatian, tingali atong maamgohan nga ang daw usa ka pagsulay sa tinuod usa diay ka malumo nga kaluoy.
Pipila ka tuig ang milabay, mibuto ang apendiks sa akong papa, nga nahimong usa ka malumo nga kaluoy.
Kadaghanan sa mga tawo dili moingon nga ang pagkasakit og appendicitis ug nagkinahanglan og emerhensiyang pag-opera usa ka milagro, apan milagro kini sa akong papa.
Dihang gitangtang sa doktor ang apendiks sa akong papa, may nakita siyang kanser niini.
Swerte lang, human sa pipila ka pag-testing, nakita sa mga doktor nga ang kanser wala pa mokatap. Tungod kay gitangtang ang iyang apendiks, luwas na siya sa kanser.
Dihang may panahon kami sa pagproseso niini nga sitwasyon, ang akong pamilya mibati nga mapasalamaton nga mibuto ang apendiks sa akong papa.
Ang kanser sa iyang apendiks dili pa grabe, ug kon wala ang emerhensiya nga pag-opera, posibling dili kini mamatikdan hangtod nga maulahi na kaayo.
Pipila sa mga tawo tingali mokonsiderar sa istorya sa akong papa isip suwerte nga panahon, apan ang akong pamilya ug ako nasayod nga milagro kadto gikan sa Dios.
Si Elder Ronald A. Rasband sa Korum sa Napulog Duha ka Apostoles miingon, “Ang unsay morag sulagma lang, sa pagkatinuod, gidumala sa usa ka mahigugmaong Amahan sa Langit, kinsa makaihap sa mga buhok sa matag ulo.”
Tingali dili nato himatikdan ang pagpanggilabot sa Dios sa atong kinabuhi hangtod nga atong mapamalandongan ang nangaging mga kasinatian. Nianang higayona, ang akong pamilya wala maghunahuna nga ang appendicitis usa ka panalangin. Wala namo masabti ang kaimportante sa emerhensiya nga pag-opera sa akong papa hangtod nga nakita sa doktor ang kanser.
Ang dili dayon pagkasabot sa mga katuyoan sa Dios usa ka komon nga katuyoan. Gisunod ni Nephi ang sugo sa Dios sa pagsulat og duha ka parehas nga rekord nga wala masayod kon ngano (tan-awa sa 1 Nephi 9:2–6). Sa wala madugay gilakip ni Mormon ang duha ka hut-ong sa mga rekord ni Nephi nga wala masayod kon ngano (tan-awa sa Mga Pulong ni Mormon 1:6–7).
Kapin sa duha ka libo ka tuig human sa pagsulat ug pagtipon ni Nephi ug ni Mormon sa ilang mga rekord diha sa metal nga mga palid, 116 ka pahina sa gihubad ni Joseph Smith niadto nga mga rekord nawala. Maayo na lang, kay nahimo gihapon ni Joseph Smith ang paglakip sa usa ka rekord sa katawhan ni Nephi diha sa Basahon ni Mormon tungod kay ang duha ka karaang mga propeta misunod sa mga sugo sa Dios bisan og wala masayod kon ngano.
Si Presidente Henry B. Eyring, Ikaduhang Magtatambag sa Unang Kapangulohan, nagsugod og usa ka journal aron matabangan siya nga moila sa kamot sa Ginoo sa iyang kinabuhi. Sa matag tapos sa adlaw, mangutana siya sa iyang kaugalingon, “Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?” Dihang gihimo niya kini, ang Espiritu Santo mipahinumdom kaniya sa mga panahon nga ang Dios mipanalangin kaniya sa tibuok adlaw.
Unsa nga malumo nga mga kaluoy ang miabot nga wala nimo mamatikdi sa imong kinabui? Sa unsang paagi nga ang pagpamalandong sa nangagi makatabang nimo nga “magpabilin sa inyong panumdoman, ang pagkahangladon sa Dios” (Mosiah 4:11)? Dihang gigahinan nako og panahon ang pagtan-aw sa nangagi ug gipangita ang kamot sa Dios sa akong kinabuhi, nakaangkon ko og pagpamatuod nga ang Langitnong Amahan nakakita og mas daghan pa kay kanato ug adunay hingpit nga plano alang sa matag usa kanato (tan-awa sa 2 Nephi 2:24).