“Joseph, Martin, ug ang mga Leksiyon gikan sa mga Pahina nga Nawala,” Liahona, Peb. 2025.
Dali, Sunod Kanako
Doktrina ug mga Pakigsaad 3; 10
Joseph, Martin, ug ang mga Leksiyon gikan sa mga Pahina nga Nawala
Ang pagsunod sa mga baroganan nga gitudlo sa Manluluwas ug sa mga propeta dako kaayo nga tabang sa atong paglambo niining kinabuhia.
Paghulagway pinaagi ni Alex Nabaum
Sa ting-init sa 1828, si Propeta Joseph Smith makugihong naghubad sa Basahon ni Mormon. Usa ka adlaw ang iyang tigsulat, si Martin Harris, nangayo og pagtugot kang Joseph nga dad-on ang unang 116 ka pahina sa manuskrito ngadto sa iyang panimalay sa New York, aron ang iyang pamilya makakita niini. Dili segurado si Joseph ug nangutana sa Ginoo unsay angay niyang buhaton. Ang Ginoo misulti kaniya nga dili tugotan si Martin nga dad-on ang mga pahina. Si Martin mihangyo og usab ni Joseph nga hangyoon na usab ang Ginoo. Gibuhat kini ni Joseph, ug ang tubag mao lang gihapon. Mihangyo na usab og maayo si Martin nga hangyoon ang Ginoo sa makausa pa. Niini nga higayon gitugotan sila sa Ginoo nga buhaton unsay ilang ganahan.
Gisultihan ni Joseph si Martin nga mahimo niyang dad-on ang mga pahina kon ligdong siyang makigsaad nga ipakita kini ngadto lamang sa iyang asawa ug sa gipiho nga mga sakop sa iyang pamilya. Misaad si Martin ug gidala ang mga pahina sa balay. Apan gisupak ni Martin ang iyang saad ug gipakita ang mga pahina ngadto sa uban. Wala madugay, dihang gikuha ni Martin ang mga pahina, wala na niya kini makita. Nawala kini.
Ang Ginoo mipanton sa hilabihan ni Joseph sa wala pagpaminaw dihang miingon Siya nga dili tugotan si Martin nga kuhaon ang manuskrito (tan-awa sa Doktrina ug mga Pakigsaad 3:5–8). Sulod usa ka panahon, gikuha sa Ginoo ang mga palid ug ang katakos ni Joseph sa paghubad, apan gihatagan siya og kaseguroan sa Ginoo nga siya mahimong mapasaylo (tan-awa sa Doktrina ug mga Pakigsaad 3:9–10). Naghinulsol si Joseph, ug sa kadugayan ang mga palid gibalik. Nagpadayon si Joseph uban sa nabag-o nga determinasyon.
Ang mga Buluhaton sa Dios Dili Gayod Mapakyas
Human niining lisod kaayong kasinatian, nakadawat si Propeta Joseph Smith og pagpadayag diin ang Manluluwas mitudlo og labihan ka bililhong mga baroganan nga makatabang nato samtang magpadayon kita sa atong kinabuhi.
“Ang mga buhat, ug mga laraw, ug ang mga katuyoan sa Dios dili gayod mapakyas, ni kini makawang,” ang Ginoo miingon.
“Kay ang Dios dili molakaw sa hiwi nga mga dalan, ni siya moliko padulong sa tuo ni sa wala, ni siya mosimang gikan sa iyang nasulti, busa ang iyang mga dalan tul-id ug ang iyang katuyoan nagsubay sa usa ka mahangtorong agianan nga walay pagkausab.
“Hinumdomi, hinumdomi nga dili ang buhat sa Dios ang mapakyas, apan ang buhat sa mga tawo” (Doktrina ug mga Pakigsaad 3:1–3).
Mapakyas kita kon kita magdahom nga ang buhat sa Dios mag-agad lamang kanato. Ang Ginoo mipasabot, “Kay bisan pa kon ang tawo adunay daghang pagpadayag, ug adunay gahom sa pagbuhat sa daghang gamhanan nga mga buhat, apan kon siya manghambog sa iyang kaugalingong kusog, … siya mapukan gayod” (Doktrina ug mga Pakigsaad 3:4).
Sukad pa sa panahon ni Adan ug ni Eva, adunay mga tawo nga nagtinguha sa pagpakyas sa buhat sa Dios. Nagpadayon kini karon. Apan ang mga paningkamot sa paghunong sa buhat sa Dios dili gayod molampos. Kini nga baroganan nagtudlo kanato nga dili kita angayang mobati og kapakyasan bisan kon nag-atubang kita og mga kalisdanan.
Ang katinuod nga kini buhat sa Dios dili maggarantiya nga kita wala nay mga problema. Gipahinumdoman kita ni Apostol Pablo nga tingali kita “gisakit sa tanang paagi, apan wala gayod mapukan; naglibog apan wala gayod kawad-ig paglaom; gilutos … apan wala gayod biyai … gidagmalan … wala kami mamatay” (2 Mga Taga-Corinto 4:8–9).
Kon makita nato nga nag-atubang kita og mga problema, gitambagan kita sa Ginoo sa “pag-ampo kanunay, aron ikaw mahimo nga magmadaogon; oo, nga ikaw makabuntog ni Satanas ug nga ikaw makalingkawas sa mga kamot sa mga sulugoon ni Satanas nga nagpatunhay sa iyang buhat” (Doktrina ug mga Pakigsaad 10:5).
Ayaw Kahadloki ang Tawo Labaw sa Dios
Ang Ginoo misulti usab kang Propeta Joseph Smith, “Ikaw wala unta mahadlok sa tawo labaw pa kay sa Dios” kay “ang mga tawo mipahimutang sa mga tambag sa Dios sa walay kapuslanan, ug mitamay sa iyang mga pulong” (Doktrina ug mga Pakigsaad 3:7).
Angay kitang magmaisogon sa pagpamatuod bahin ni Jesukristo ug dili mahadlok sa pagpahibalo sa atong mga gituohan. Kon buhaton nato kini nga adunay kaseguroan, kalig-on, ug kusog ug giya gikan sa Ginoo, makahimo kita og daghang kaayohan ug gani usahay makaangkon sa respeto gikan sa uban. Dili kita angayng mahadlok sa tawo kay sa Dios.
Maghinulsol
“Hinumdomi, ang Ginoo maluluy-on,” ang Ginoo mitudlo ni Joseph. “Busa, hinulsoli kana nga imong nabuhat nga supak sa sugo nga akong gihatag kanimo, ug ikaw pinili sa gihapon, ug sa makausa pa tawagon ikaw ngadto sa buhat” (Doktrina ug mga Pakigsaad 3:10).
Ang padayon nga paghinulsol maghimo kanatong mobarog nga takos. Kon maghinulsol kita, moduol kita sa atong Langitnong Amahan pinaagi sa masulub-on nga kasingkasing ug mahinulsolon nga espiritu, mangayo og pasaylo sa atong mga sala, ug buhaton ang matag paningkamot sa dili na pagbuhat niini og usab. Pinaagi ni Propeta Joseph Smith, ang Ginoo mipadayag, “Kay tan-awa, Ako, ang Dios, nag-antos niini nga mga butang alang sa tanan, nga sila unta dili mag-antos kon sila maghinulsol” (Doktrina ug mga Pakigsaad 19:16).
Samtang nagserbisyo isip presidente sa misyon, nagdumala ko og usa ka konseho sa pagkamiyembro [membership council] sa usa ka brother nga miresulta sa pagkatangtang sa iyang pagkamiyembro sa Simbahan. Kini nga tawo naghinulsol sa iyang mga sala ug human sa usa ka tuig gitugotan nga mabunyagan og usab.
Human sa iyang bunyag, nakadawat ko og email gikan niya nga nag-ingon: “Minahal nga Presidente, kagahapon ang ordinansa sa bunyag gipahigayon, ug akong ipaneguro kanimo nga ako mibati nga sama og bag-o na. Usa ka milagro ang gipahigayon sa akong kinahiladman. Ang sakripisyo ni Ginoong Jesukristo nahimong epektibo ngari nako. Karon, mibati ko nga gawasnon gikan sa pagpanglupig sa sala. Nasayod kong dili ko kini makab-ot nga mag-inusara. Ang akong mga lider ug ang akong asawa mitabang nako nga akong mapunting ang akong mga panan-aw ngadto sa tumong. Si Kristo ang akong Manluluwas. Anaa ang milagro sa pagpasaylo.”
Makahinulsol kita, sama niini nga brother ug sa Propeta nga si Joseph Smith, ug ang Ginoo makapasaylo nato ug nagtawag kanato og usab sa Iyang buhat.
Salig sa Ginoo
Kinahanglan nga mosalig kita sa Ginoo kon tinuoray kitang magtinguha og kalamboan niining kinabuhia. Ang Ginoo mipasabot kang Joseph nga si Martin Harris napukan tungod kay siya “nagbalewala sa mga tambag sa Dios, ug nakalapas sa labing sagrado nga mga saad nga gihimo sa atubangan sa Dios, ug misalig sa iyang kaugalingong paghukom ug nagpasigarbo sa iyang kaugalingong kaalam” (Doktrina ug mga Pakigsaad 3:13). Manghinaot ko nga ang Ginoo mopanalangin kanato aron dili kita makahimo og mao gihapon nga mga sayop.
Sa pagsunod sa mga pagtulun-an sa Ginoo, wala kita mag-agad sa kaugalingon natong paghukom o magpasigarbo sa kaugalingon natong kaalam, apan hinoon, atong gidawat ang Iyang inspirasyon ug giya. Naningkamot kita sa pagtuman sa mga pakigsaad nga gihimo atubangan sa Dios ug mamahimong mga disipulo ni Jesukristo. Atong mahingpit ang atong pagkadisipulo pinaagi sa paglakip sa hiyas nga pagkamanunoton, kaaghop, pagpaubos, pailob, ug gugma (tan-awa sa Mosiah 3:19; Doktrina ug mga Pakigsaad 4:5–6).
Dili nato ipanghambog ang kaugalingon natong kaalam. Kon buhaton nato kini, mahimong magbayad kita og dako ug mawad-an sa daghang oportunidad aron molambo. Sa Mga Panultihon atong mabasa, “Adunay usa ka dalan nga daw matarong alang sa usa ka tawo, apan ang kataposan niana mao ang mga dalan sa kamatayon” (Mga Panultihon 14:12). Kinahanglan nga mosalig kita sa Ginoo, kansang mga hunahuna ug mga paagi mas labaw kay sa atoa:
“Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan, nagaingon ang Ginoo.
“Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna” (Isaias 55:8–9).
Kon maghinulsol kita ug mapaubsanong mosalig sa Ginoo, Iya kitang panalanginan aron mouswag kita ug mahimong mga lalaki ug mga babaye nga maoy Iyang gilaoman ngari kanato.