Digital Lamang
Mas Lig-on ug Mas Suod nga Koneksyon ngadto sa Dios pinaagi sa Daghang Pakigsaad
Gikan sa usa ka debosyonal nga pakigpulong nga gihatag ngadto sa mga estudyante sa Brigham Young University sa Provo, Utah, USA, niadtong Marso 5, 2024. Alang sa kompleto nga pakigpulong, bisitaha ang speeches.byu.edu.
Aron molambo ug makadawat sa matang sa kinabuhi nga anaa sa Langitnong Amahan, matag usa nato kinahanglan nga mohimo ug motuman sa mga pakigsaad uban sa Dios.
Ang mga pakigsaad nga gihimo sa Dios gibase sa walay kataposan, dili mausab nga balaod. Adunay usa lamang ka paagi nga makabalik aron magpuyo uban sa Dios, ug kini gitawag og dalan sa pakigsaad. Ang hugpong sa mga pulong nga dalan sa pakigsaad nagpasabot sa nagsumpay-sumpay nga mga pakigsaad diin pinaagi niini kita makaduol ni Kristo ug makakonektar ngadto Kaniya ug sa atong Langitnong Amahan. Ang paghimo ug pagtuman sa mga pakigsaad mao ang paagi nga kita makig-uli sa atong kaugalingon ngadto sa Dios. Kini nga mga pakigsaad dili masabot-sabot. Pinaagi niini, ang Ginoo mousab, moluwas, ug mobayaw kanato. Gihimo nato kini pinaagi sa pag-apil sa mga ordinansa sa pagkapari. Isip ganti sa pagtuman niini nga mga pakigsaad, ang Dios mopasalig kanato og piho nga mga panalangin. Ang pakigsaad maoy usa ka pasalig nga kinahanglan atong pangandaman, sabton og maayo, ug tahoron sa hingpit.
Alang sa tanan, ang dalan sa pakigsaad magsugod sa pakigsaad sa bunyag (tan-awa sa 2 Nephi 31:17–18). Alang sa kalalakin-an, ang pakigsaad naglakip sa importante nga lakang sa pagdawat sa Melchizedek nga Pagkapari. Alang sa tanan, ang dalan sa pakigsaad nagpadayon sa mga pakigsaad diha sa pagtuga sa templo, diin kita misaad nga mosunod sa lima ka balaod. Apan, kining lima ka balaod dili magbulag—dili ka makapili nga mosunod og bisan asa nga kombinasyon sa lima; ikaw makigsaad nga sundon ang tanang lima o wala. Ang kataposang pakigsaad nga atong gihimo uban sa Dios diha sa templo mao ang usa nga gihimo sa dihang ang usa ka lalaki ug usa ka babaye naselyo diha sa bag-o ug walay kataposang pakigsaad sa kaminyoon (tan-awa sa Doktrina ug mga Pakigsaad 131:1–4).
Nganong ang daghang pakigsaad gikinahanglan? Kini tungod kay ang daghang pakigsaad dili lamang kinahanglang magsunod apan kini usab hinay-hinay nga mapun-an ug gani mas makapalig-on sa atong relasyon sa Dios. Ang matag pakigsaad mopadugang sa kasuod, mas mopaduol kanato ug mopalig-on sa atong koneksiyon sa Dios.
Si Presidente Russell M. Nelson misugyot nga atong mapalawman ang atong relasyon sa Dios kon kita mohimo og daghang pakigsaad. Siya miingon: “Ang Dios adunay espesyal nga gugma alang sa matag tawo nga mohimo og pakigsaad Kaniya diha sa mga tubig sa bunyag. Ug kana nga balaanon nga gugma mapalawman samtang ang dugang pa nga mga pakigsaad gihimo ug matinud-anong gituman.”
Kini nagpasabot nga kita nagpalambo og mas lig-on ug mas suod nga koneksyon ngadto sa Dios pinaagi niadtong daghang pakigsaad. Kon kita makigbatok sa mga hagit sa kinabuhi, makuhaan ang kalagmitan nga kita mopalayo sa atong kaugalingon gikan sa Dios.
1. Bunyag
Ang bunyag mao ang unang pakigsaad nga gihimo sa tanan diha sa dalan sa pakigsaad. Ang pakigsaad sa bunyag usa ka pangpublikong pagsaksi sa Langitnong Amahan sa tulo ka piho nga pasalig: sa pagserbisyo sa Dios, sa pagtuman sa Iyang mga sugo, ug pagkahimong andam sa pagdala sa ngalan ni Kristo (tan-awa sa 2 Nephi 31:7, 13–14; Mosiah 18:10; 21:32, 35; Doktrina ug mga Pakigsaad 20:37). Ang ubang mga aspeto nga kanunay nga naapil sa pakigsaad sa bunyag—nga kita “mopas-an sa mga alantoson sa usag usa,” “[m]agbangotan uban niadtong nagbangotan,” ug “[mo]hupay niadtong nanginahanglan og kahupayan” (Mosiah 18:8, 9)—maoy mga bunga sa paghimo sa pakigsaad kay sa kabahin sa aktuwal nga pakigsaad. Kini nga mga aspeto mahinungdanon tungod kay kini ang natural nga buhaton sa usa ka nakabig nga kalag.
2. Ang Pagtuga
Ang sunod nga pakigsaad nga himoon sa tanan diha sa dalan sa pakigsaad mao ang pagtuga. Sama sa akong gihisgotan, ang pagtuga naglakip sa mga pakigsaad nga motuman sa lima ka dili magbulag nga mga balaod. Samtang akong girebyo ang matag usa, tan-awa kon giunsa nga kini nahisubay ug naglig-on sa mga aspeto sa pakigsaad sa bunyag.
Una, kita nakigsaad diha sa pagtuga nga “mopuyo sa balaod sa pagkamasulondon,” nga nagpasabot nga kita “maningkamot sa pagtuman sa mga sugo sa Langitnong Amahan.” Kini nga pakigsaad tukma nga nahisubay ubos sa saad sa pakigsaad sa bunyag nga motuman sa mga sugo sa Dios.
Ikaduha, kita nakigsaad nga “mosunod sa balaod sa sakripisyo, nga nagpasabot nga magsakripisyo sa pagsuporta sa buhat sa Ginoo ug paghinulsol uban sa masulub-ong kasingkasing ug mahinulsolon nga espiritu.” Kini nga pakigsaad nahisubay sa mga saad sa bunyag nga moserbisyo sa Dios ug motuman sa Iyang mga sugo. Dugang pa, ang paghinulsol mao ang importanteng aspeto sa pagdala sa ngalan ni Jesukristo.
Ikatulo, kita nakigsaad nga “motuman sa balaod sa ebanghelyo ni Jesukristo.” Gibuhat nato kini, sa bahin, pinaagi sa pagsunod sa doktrina ni Kristo. Kini naglakip sa “paghimo og mga pakigsaad uban sa Dios pinaagi sa pagdawat sa mga ordinansa sa kaluwasan ug kahimayaan” ug sa pagtuman niadto nga mga pakigsaad sa tibuok natong kinabuhi. Ang pakigsaad naglakip sa “pagpaningkamot sa pagpuyo sa duha ka dako nga kasugoan”:ang paghigugma sa Dios ug sa isigkatawo (tan-awa sa Mateo 22:37, 39). Kini nga pakigsaad nahisubay sa tanang tulo ka aspeto sa pakigsaad sa bunyag.
Ikaupat, kita nakigsaad nga mosunod sa gihatag sa Dios nga “balaod sa kaputli, nga nagpasabot nga nagdili sa bisan unsang klase sa pagpakighilawas gawas sa legal nga kaminyoon tali sa usa ka lalaki ug sa usa ka babaye.”
Si Elder Jeffrey R. Holland miingon: “Ang kaminyoon giplano [sa Dios] nga magpasabot nga kompleto nga panaghiusa sa usa ka lalaki ug sa usa ka babaye—sa ilang mga kasingkasing, mga paglaom, mga kinabuhi, gugma, pamilya, umaabot, sa tanang butang. … Sila mahimong ‘usa ka lawas’ sa ilang kinabuhi nga mag-uban [tan-awa sa Genesis 2:23–24].”
Dili nato makab-ot ang matang sa kinabuhi nga gitagamtam sa atong Langitnong Amahan kon wala ang usa ka hingpit nga pasalig sa pagkamaunongon sulod sa kaminyoon sa atong bana o asawa sumala sa plano sa Dios. Kini nga pakigsaad nahisubay sa aspeto sa pakigsaad sa bunyag nga motuman sa mga sugo sa Dios.
Ikalima, kita nakigsaad nga “mosunod sa balaod sa pagpahinungod,” buot ipasabot nga mopahinungod sa atong mga kaugalingon ug tanan nga gipanalangin sa Ginoo kanato aron sa pagpalig-on sa Iyang Simbahan. Ang mga yawe sa balaang pagkapari gipahiuli aron ang mga ordinansa sa pagkapari mapahigayon, nagtugot kanato nga maghimo og mga pakigsaad uban sa Dios. Pinaagi lamang sa gipahiuli nga Simbahan ni Jesukristo nga kini mahimo alang sa mga anak sa Dios sa duha ka habig sa tabil. Kita nanumpa nga mosuporta sa buluhaton sa Dios. Kini nga pakigsaad nahisubay sa aspeto sa pakigsaad sa bunyag nga moserbisyo sa Dios. Dugang pa, kini nga pakigsaad nahisubay sa pagdala diha sa atong mga kaugalingon sa ngalan ni Kristo tungod kay ang pagsunod niini nagkinahanglan nga kita permanente nga magpadayon sa pagbaton og dako nga kausaban sa kasingkasing.
3. Ang Pagselyo sa usa ka Babaye ug usa ka Lalaki
Karon ang tanan giandam na alang sa pakigsaad nga may kalabotan sa pagselyo sa usa ka babaye ug usa ka lalaki. Niini nga ordinansa sila makadawat og mga saad, sila maghimo og pakigsaad sa usag usa ug sila maghimo og pakigsaad ngadto sa Dios. Aron sa pagrebyo sa mga saad, mobalik kita sa kaliboan ka tuig. Si Abraham nakadawat sa ebanghelyo (tan-awa sa Doktrina ug mga Pakigsaad 84:14; Abraham 2:11) ug misulod sa celestial nga kaminyoon, nga mao ang pakigsaad sa kahimayaan (tan-awa sa Doktrina ug mga Pakigsaad 131:1–4; 132:19, 29). Nakadawat si Abraham og saad nga ang tanang panalangin niini nga pakigsaad itanyag ngadto sa iyang mortal nga kaliwatan (tan-awa sa Doktrina ug mga Pakigsaad 132:29–31; Abraham 2:6–11). Ang tanan nga mosubay sa dalan sa pakigsaad mahimong “mga kaliwat ni Abraham, ug mga manununod sumala sa saad” (Mga Taga-Galacia 3:29).
Kon ang usa ka babaye ug usa ka lalaki naselyo sa usag usa, sila gisaaran niini nga mga panalangin, sama ni Abraham. Ang mga panalangin naglakip nga sila “mobangon sa unang pagkabanhaw; … makapanunod og mga trono, mga gingharian, mga kayutaan, mga kagamhanan, ug mga kamandoan …; ug sila moagi sa mga anghel … diha sa ilang pagkahimaya ug himaya sa tanan nga mga butang …, diin nga himaya mao ang kahingpitan ug pagpadayon sa mga binhi hangtod sa hangtod” (Doktrina ug mga Pakigsaad 132:19; tan-awa usab sa bersikulo 20). Atol sa pagselyo, ang babaye maghimo og pakigsaad ngadto sa iyang bana ug ang lalaki maghimo og pakigsaad ngadto sa iyang asawa. Ang mga buluhaton sa mortalidad mahiusa. Ang bana ug asawa parehong mosulod sa kapunongan sa pagkapari nga walay makasulod nga mag-inusara ug kana kinahanglanon aron makasulod sa labing taas nga ang-ang sa celestial nga gingharian (tan-awa sa Doktrina ug mga Pakigsaad 131:1–4). Sila moserbisyo sa usag usa ug sa ilang mga anak ug sa ingon moserbisyo sa Dios. Samtang ang usa ka lalaki ug usa ka babaye naselyo, sila mopakigsaad uban sa Dios nga motuman sa tanang sugo nga may kalabotan sa kaminyoon diha sa bag-o ug walay kataposang pakigsaad.
Ang mga elemento sa pagtuga ug ang pagselyo nahisubay ug mosuportar sa tanang tulo ka aspeto sa pakigsaad sa bunyag. Ang matag aspeto sa pakigsaad sa bunyag ug ang mga pakigsaad sa pagtuga ug pagselyo nagsapaw ug komon nga nagsuportahanay sa usag usa.
Kita wala gipuwersa o gipugos sa bisan unsang paagi nga magpabilin sa relasyon sa pakigsaad uban sa Dios bisan human kita mopili nga mohimo niini nga mga pakigsaad. Kon kita mohimo og pakigsaad nga mabugkos ngadto sa Dios, kita nakigbahin og pakigsaad uban Kaniya. Kita dungan nga makasinati ug moapil sa pakigsaad. Kini usab tinuod alang sa usa ka babaye ug usa ka lalaki kon sila maselyo; sila maghimo og pakigsaad sa usag usa. Ako nagtuo nga makapalibog ang maghunahuna nga ang usa ka tawo nagapos ngadto sa lain sa kahangtoran; sila wala giulipon, gipugos, giposasan, o ubos sa pagpanghulga. Kondili, sila dungan nga nakigbahin ug nakasinati sa pakigsaad. Ang kabubut-on magpadayon nga usa ka dili mabalewala nga bahin sa mahangtorong kaminyoon. Si Presidente Dallin H. Oaks, Unang Magtatambag sa Unang Kapangulohan, miingon: “Kita usab nasayod nga Siya [ang Dios] dili mopugos ni bisan kinsa ngadto sa usa ka giselyohan nga relasyon nga supak sa iyang kabubut-on. Ang mga panalangin sa usa ka giselyohan nga relasyon giseguro alang sa tanan kinsa motuman sa ilang mga pakigsaad apan dili gayod pinaagi sa pagpugos og usa ka giselyohan nga relasyon ngadto sa laing tawo kinsa dili takos o dili andam.” Walay bisan usa nga gipugos sa usa ka kaminyoon nga wala nila gipili o gidawat, bisan human sa pagselyo diha sa templo.
Ang Daghang Pakigsaad Mas Lig-on nga Nagbugkos Kanato ngadto sa Dios
Ang daghang pakigsaad mas makapaduol nato ngadto sa Dios ug mas mopalig-on sa koneksyon nato ngadto Kaniya. Ang katuyoan niini nga mga pagbugkos mao ang pagtabang nato nga mahimong mas makabig, matinud-anon, ug mapasaligon nga mga disipulo ni Jesukristo. Ang akong personal nga kasinatian nagsugyot nga, paglabay sa panahon, ang mga hamtong nga nabunyagan, natugahan, ug naselyo ngadto sa kapikas mao ang labing dako nga kalagmitan nga mapadayon ug mapalawman ang ilang pagkadisipulo subay sa dalan sa pakigsaad. Ang minos ang kalagmitan nga makabuhat sa ingon mao ang mga hamtong nga nabunyagan ug natugahan apan wala maselyo sa kapikas. Ang labing minos ang kalagmitan nga makapadayon ug makapalawom sa ilang pagkadisipulo sa paglabay sa panahon mao kadtong mga hamtong nga nabunyagan apan wala matugahi. Samtang ang atong pagkadisipulo magkadugay, atong gidugang ang mga pakigsaad sa pagtuga ngadto sa atong pakigsaad sa bunyag. Kana mas lig-on nga magbugkos kanato ngadto sa Dios. Dayon, kon ang mga panalangin moabot nga maselyo ngadto sa kapikas, ang pakigsaad sa pagbugkos mahimong mas lig-on.
Palihog hinumdomi, hinuon, kana nga mga butang dili segurado. Ikaw ug ako nakaila og mga indibiduwal nga wala matugahi nga talagsaon ang pagkamatinud-anon nga disipulo ni Kristo, ug nakaila kita niadtong mga naselyo sa kapikas nga dili matinud-anon. Ang pagkamatinud-anon usa ka indibiduwal nga pagpili kon unsaon nato sa pagpuyo ang mga pakigsaad nga atong gihimo. Ang pagkadili maselyo ngadto sa kapikas dili mopahunong sa imong paglambo sa imong pagkadisipulo sa Manluluwas. Samtang ikaw magpadayon nga mahimong lig-on sa imong pagpamatuod ni Jesukristo, ang imong paglambo magpadayon.
Mga Pagdapit alang Niadtong Wala Pa Matugahi
Kana nasulti na, isip Apostol ni Ginoong Jesukristo, ako adunay mga pagdapit alang sa matag usa kaninyo. Ang akong pagdapit alang niadtong nabunyagan na pero wala pa matugahi mao nga kamo mag-andam ug modawat sa inyong pagtuga. Ang desisyon nga modawat sa pagtuga personal ug kinahanglang himoon sa mainampoong paagi. Kini nagdepende lamang sa inyong kabubut-on—wala nay lain. Dugang pa, kini dili tahas ni bisan kinsa—mga lider, mga higala, mga kauban sa grupo, pamilya, o nako—nga modesisyon niini alang nimo o dili makataronganon nga moimpluwensya nimo sa pagbuhat sa ingon. Daghan ninyo ang nakaabot na sa mga sumbanan aron matugahan kon gibati ninyo ang tinguha nga modawat ug motahod sa sagrado nga mga pakigsaad sa templo sa tibuok ninyong kinabuhi. Diha sa Kinatibuk-ang Tamdanan nga Basahon atong mabasa:
“Ang mga miyembro mahimong mopili nga modawat sa ilang kaugalingong pagtuga kon ilang natuman ang tanan nga mosunod nga mga kondisyon:
-
Sila dili mominos sa 18 anyos.
-
Sila nakakompleto o wala na mag-eskwela sa high school, secondary school, o katugbang niini.
-
Usa ka tuig na ang milabay sukad sa ilang kompirmasyon.
-
Sila mobati sa tinguha nga modawat ug motahod sa sagrado nga mga pakigsaad sa templo sa ilang tibuok kinabuhi.”
Hangtod nga kamo andam, padayon sa pagpangandam. Kini naglakip sa paghimo sa mga buluhaton sa family history ug pagkahimong angayan ug paggamit og rekomend sa templo alang sa puli nga mga pagbunyag ug mga kompirmasyon. Usab, pagtutok og maayo sa pakigsaad nga nahimo na nimo. Mahunahunaong moambit sa sakramento kada semana. Kon ikaw mopili sa dili pagtambong sa miting sa sakramento bisan kon mahimo ra gyod ka nga motambong, imong gibutang ang imong kaugalingon sa kakuyaw. Padayon sa matinud-anong pagsunod sa ebanghelyo ni Jesukristo. Kon imong dawaton kini nga pagdapit, kini mas makapaduol nimo ngadto sa Dios.
Mga Pagdapit alang Niadtong Wala Pa Maselyo
Atong tan-awon kadtong mga nabunyagan ug natugahan apan wala maselyo sa kapikas. Kitang tanan nakahibalo nga ang pagkaselyo ngadto sa kapikas naglambigit sa kabubut-on sa usa ka tawo. Dili ka motino niini nga lakang nga ikaw ra. Ang akong pagdapit magtutok sa unsay imong mahimo.
Kon ang pagkaselyo ngadto sa kapikas wala pa nimo maangkon tungod kay naglambigit kini sa imong kabubut-on, ayaw paglangay sa pagpahimulos sa imong mga oportunidad. Ayaw isira ang pultahan sa posibilidad. Niadtong Mayo 2023, si Presidente Dallin H. Oaks nagtudlo:
“Ang mapinanggaong Langitnong Amahan dunay plano alang sa Iyang mga young adult, ug kabahin niana nga plano mao ang pagminyo ug [pagbaton og] mga anak.
“… Motambag kami nga itumong ninyo ang pakig-uban sa lahi nga sekso ngadto sa pakig-date nga may kalagmitang mosangpot sa kaminyoon.”
Hinumdomi, ang labing importante sa kinabuhing walay kataposan mao ang pagkadisipulo, dili ang kasamtangan nga estado sa kaminyoon; buot ipasabot, ang pagkahimong “maisog diha sa pagpamatuod ni Jesus” (Doktrina ug mga Pakigsaad 76:79; tan-awa usab sa 121:29). Ikaw makadawat og akses sa grasya ni Kristo pinaagi sa pagkamasulondon sa mga balaod ug mga ordinansa sa ebanghelyo. Dugang pa, ako modapit kaninyo sa pagtutok diha sa mga pakigsaad nga inyong gihimo. Adto kanunay sa templo ug moapil sa buluhaton sa family history. Mahunahunaong moambit sa sakramento kada semana. Samtang mobuhat ka, imong mapalig-on ang imong koneksyon ni Jesukristo (tan-awa sa 3 Nephi 18:12–13).
Alang niadtong wala pa gayod maselyo ngadto sa kapikas niini nga kinabuhi o kadtong kansang pagselyo wala mahitabo sama sa unsay gilaoman, ikonsiderar kining makahupay nga saad nga gihimo ni Presidente Lorenzo Snow niadtong 1899. Nag-istorya kabahin sa kababayen-an nga wala maminyo, siya mipahayag: “Murag adunay mga pagbangotan kabahin niini nga kondisyon. Dili na kini piho nga gikinahanglan. …[Apan] pipila ka binuang nga doktrina ang gipresentar ngadto sa pipila ka sister kabahin niini ug ubang butang nga susama og matang. … Walay Santos sa Ulahing mga Adlaw kinsa namatay human magpuyo og matinud-anon nga kinabuhi ang mawagtangan og bisan unsa tungod kay napakyas sa pagbuhat og pipila ka butang sa dihang ang mga oportunidad wala mahatag kaniya. … Sila makadawat sa tanang panalangin, kahimayaan ug himaya nga madawat sa bisan kinsa nga lalaki o babaye nga aduna niini nga oportunidad. … [Sila] makabaton og pamaagi nga ihatag kanila diin ilang madawat ang tanang panalangin nga gikinahanglan alang sa mga tawo nga anaa sa kahimtang sa kaminyoon”
Gibati nako nga napugos sa pagpuno nga kinahanglan dili kamo mabalaka kon kamo ba adunay oportunidad nga maselyo ngadto sa usa ka kapikas apan wala madayon o nga ang inyong pagselyo diha sa balay sa Ginoo wala mahitabo sama sa unsay inyong gilaoman. Ayaw pagduhaduha sa inyong gihimo nga desisyon. Ang grasya sa Dios paigo alang sa tanan. Ang tanan “nga dili makiangayon kabahin sa kinabuhi mahimong mahusto pinaagi sa Pag-ula ni Jesukristo.” Samtang gidawat ninyo kini nga pagdapit, kini usab mas makapaduol ninyo ngadto sa Dios.
Mga Pagdapit alang Niadtong Naselyo sa Kapikas
Alang niadtong naselyo sa kapikas, kini nga pagselyo usa ka mahinungdanong nakab-ot sa imong kinabuhi, dili mao ang kataposan sa panaw. Ikaw kinahanglan nga mopadayon sa unahan ug motutok sa mga pakigsaad nga imong gihimo, sama sa akong pag-awhag sa uban nga buhaton: mahunahunaon nga moambit sa sakramento, mosimba diha sa templo, ug mohimo sa mga buluhaton sa family history. Isip dugang, pagtinguha nga mahimong mas maayo nga kapikas pinaagi sa paghupot sa sama kang Kristo nga mga kinaiya. Magmahimong kapikas nga takos sa imong kapikas. Kon ikaw napanalanginan nga mahimong ginikanan, magmahimong ginikanan nga takos sa imong mga anak. Samtang gidawat nimo kini nga pagdapit, kini usab mas makapaduol nimo ngadto sa Langitnong Amahan ug ni Jesukristo ug mopalig-on sa imong pakigsaad sa pagbugkos uban Kanila.
Mga Pagdapit alang sa Tanan
Ikaw mihimo man o wala og usa o daghan nga pakigsaad, patalinghogi ang pahimangno sa Manluluwas:
“Apan adunay kalagmitan nga ang tawo mawad-an sa grasya ug mobiya gikan sa buhi nga Dios;
“Busa himoa nga ang simbahan magpatalinghog ug mag-ampo sa kanunay, tingali unya og mahulog sila sa tentasyon;
“Oo, ug bisan gani himoa nga kadtong kinsa gibalaan mopatalinghog usab.” (Doktrina ug mga Pakigsaad 20:32–34).
Ang Dios naghimo og daghang pakigsaad aron kita panalanginan, dili aron kita silotan. Ang pagtutok og maayo sa mga pakigsaad nga atong gihimo ug ang pag-andam alang sa mosunod mao ang labing maayo nga paagi aron maandam sa pagdawat sa tanang anaa sa Langitnong Amahan. Kana mao ang paagi sa atong “paghunahuna og celestial.” Ako mopamatuod nga si Jesukristo gamhanan sa pagluwas. Siya nagtinguha og suod nga relasyon uban kaninyo, gani usa ka relasyon sa pakigsaad. Ako mag-ampo nga kamo unta maghimo og mga pakigsaad uban ang tinuod nga tinguha ug tugotan kadto nga mga pakigsaad nga mopanalangin kaninyo karon ug ngadto sa kahangtoran.