“Ngano nga Akong Gipili ang Gipahiuli nga Simbahan,” Liahona, Peb. 2025.
Mga Hulagway sa Hugot nga Pagtuo
Ngano nga Akong Gipili ang Gipahiuli nga Simbahan
Utang ko ang tanan nga anaa kanako ug ang akong kaugalingon—akong pamilya, akong mga hiyas, akong propesyon, akong katuyoan sa kinabuhi—sa gipahiuli nga ebanghelyo ni Jesukristo.
Mga litrato pinaagi ni Christina Smith
Human nga nakakat-on ko sa pagbasa sa bata pa, gisugdan nako ang pagbasa sa Biblia. Dihang nag-10 anyos ko, gusto ko, sama ni Joseph Smith, makakaplag sa hustong simbahan nga apilan. Nagsugod ko sa pagpakisusi sa mga simbahan nga naglibot sa akong panimalay. Dayon usa ka adlaw usa ka higala sa akong inahan midapit kanamo sa usa ka family home evening.
“Mao na kini,” naghunahuna ko. “Mao kini nga simbahan!”
Duha ka semana ang milabay human niana, nabunyagan kami nga mga miyembro sa Ang Simbahan ni Jesukristo sa mga Santos sa Ulahing mga Adlaw.
Mipuyo kami sa kabos nga dapit sa Guatemala, diin didto nagsugod sa pagkaporma ang mga gang. Daghan sa mas magulang nakong mga higala miapil niini nga mga gang. Kon ako wala pa makahibalo sa ebanghelyo, tingale sakop na pod ko sa usa ka gang ug gipatay na sa wa pa ko mag-18, sama sa uban niining batan-ong mga lalaki. Ang pagpasakop sa Simbahan nahimong usa ka punto sa kausaban sa akong umaabot nga mga oportunidad.
Kahibalo ug Pagpamatuod
Human magpasakop sa Simbahan, gutom ako sa kahibalo. Dihang nag-14 anyos na ko, nabasa na nako ang tanan nga kasulatan ug mga basahon sa Simbahan nga pwede nakong basahon, sama sa Jesus the Christ ug ang Articles of Faith, ni Elder James E. Talmage (1862–1933) sa Korum sa Napulog Duha ka Apostoles.
Pagka-1984, mikanta ko kauban sa choir sa pagpahinungod sa Guatemala City Guatemala Temple. Naghunahuna ko kon nganong ang ubang mga tawo miprotesta sa pagpahinungod ug nanghatag og mga libro nga batok sa Simbahan atubangan sa templo. Nianang mga panahona, nakakita sab ko og mga tawo nga mibiya sa Simbahan tungod sa managlahing mga rason.
Akong nahuman og basa ang Basahon ni Mormon duha ka bulan human nabunyagan ko. Ang akong pagpamatuod sa Basahon ni Mormon wala gayod mawala kanako. Tungod kay nasayod ko nga tinuod kini, nasayod ko nga si Joseph Smith usa ka propeta, nga siya gitawag sa Dios, ug nga kini ang Simbahan sa Manluluwas.
Kay si Carlos nahibalo nga ang Basahon ni Mormon tinuod, nasayod usab siya “nga si Joseph Smith usa ka propeta, nga siya gitawag sa Dios, ug nga kini ang Simbahan sa Manluluwas.”
Usa ka pagpamatuod gikan sa Dios. Kon moingon Siya nimo nga tinuod kini nga Simbahan ug ikaw nasayod nga ang Ginoo ang nagsulti kanimo, nan, mao na kana—ikaw nakahibalo na (tan-awa sa Joseph Smith—Kasaysayan 1:25). Ang tanan masabtan ug makasagubang gumikan niana nga pagsabot.
Bag-o lang, nagbisita ko og usa ka sakop sa pamilya nga naglisod sa iyang gituohan tungod sa pipila ka butang nga iyang nakita sa internet.
“Kon makakita ka og butang nga mas maayo kay sa ebanghelyo ni Jesukristo og nga maghimo nimong mas malipayon kay sa ebanghelyo, nan tinguhaa nga maangkon kini,” giingnan nako siya. “Apan nasayod ako gikan sa kasinatian nga walay mas maayo o makahimo natong mas malipayon kay sa ebanghelyo ni Jesukristo.”
Giingnan nako siya nga ang ubang mga tawo moingon nga walay Dios ug nga ang ebanghelyo dili tinuod, apan wala nila pangitaa sa matinguhaong paagi ang kamatuoran. Ug dunay uban sama sa amahan ni Hari Lamoni, kinsa mahinamon kaayong makaila sa Dios nga nag-ampo siya, “Mahimo bang ipaila nimo ang imong kaugalingon ngari kanako, ug biyaan nako ang tanan nakong sala aron makaila kanimo” (tan-awa sa Alma 22:17–18).
Ang paghigugma ug dili pagpanghukom mahinungdanon kon magtabang og tawo nga nanglimbasog sa lisod nga mga pangutana mahitungod sa pagtuo. Usa ka sakop sa akong pamilya miingon nga dili na siya mosimba, apan wala siya mohunong sa pagtambong. Nagtuo ko nga padayon siya sa pagtambong kay aduna kami suod nga relasyon, ug gibati niya nga nakasabot ko sa iyang mga pagduhaduha.
Musika ug ang Malumong mga Kaluoy
Samtang nagtubo ang akong pagpamatuod samtang batan-on pa ko, mao usab ang akong gugma sa musika. Kana nga gugma nagsugod dihang misulod ko sa simbahan sa mga Santos sa Ulahing mga Adlaw ug nakakita og piano sa unang higayon. Mibati ko nga ang Ginoo dunay plano alang nako kay gibati nako nga naagni ko sa piano. Giablihan nako ang lingkoranan sa piano, nakakita og libro kon unsaon sa pagtukar sa piano, ug gisugdan ang pagtudlo sa akong kaugalingon.
Wala madugay, nagtukar na ko sa piano sa akong ward matag Dominggo ug nagkanta sa youth choir sa ward. Dihang dise-16 na ko, nagsugod ko og tambong sa National Conservatory of Music sa Guatemala. Ang nagdumala sa conservatory choir, si Beto Echerria, miawhag nako sa pagkahimong propesyonal. Sukad niadto, mopatukar na ko sa piano ug nangulo og daghang choir sa mga kalihokan sa Simbahan. Sa kataposan, nahimo ko nga music direktor sa Simbahan alang sa Central America Area. Karon, nagtrabaho ko isip teknisyan sa piano ug titser sa musika.
Si Carlos, nagkanta kauban sa iyang anak nga babaye, si Rocio, nakadiskobre sa iyang gugma sa musika human nga misulod siya sa simbahan sa mga Santos sa Ulahing mga Adlaw, nakakita og piano sa unang higayon, ug gitudloan ang iyang kaugalingon sa pagtukar.
Dihang mibisita si Presidente Russell M. Nelson sa Guatemala pagka-2019 isip kabahin sa siyam ka adlaw nga pagpangalagad sa Latin Amerika, namulong siya sa gabii nga debosyonal, diin ako ang gihangyo nga mangulo sa 200 ka tingog nga choir. Dihay higayon human nagsugod kami og praktis, nagdamgo ko.
Nagdamgo ko nga makatimbaya ko sa pagsulti og hello sa propeta. Human sa debosyonal, samtang miwarawara si Presidente Nelson sa pagpanamilit gamit ang iyang panyo ngadto sa 22,000 ka mga tawo didto, milingi siya kanako ug misulti sa perpekto nga Espanyol, “Salamat kaayo. Maanindot!” Dayon, sa pagpamulong sa kongregasyon, si Sister Wendy Nelson, miingon, “wala ko kahibalo nga dunay diay moy Tabernacle Choir sa Guatemala!”
Lain pang malumong kaluoy nga akong nadawat sa pagserbisyo pinaagi sa musika miabot pagka-2024 dihang gidapit ko nga mokanta kauban sa Tabernacle Choir sa Temple Square atol sa Abril nga kinatibuk-ang komperensiya. Ug sa gihapon laing panalangin miabot dihang, pinaagi sa BYU–Pathway Worldwide, nahuman nako ang akong bachelor’s degree—butang nga akong gitinguha sukad sa young adult pa ko.
Sa walay pagduhaduha, makaingon ko nga utang ko ang tanan nga anaa kanako ug ang akong kaugalingon—akong pamilya, akong mga hiyas, akong propesyon, akong katuyoan sa kinabuhi—sa gipahiuli nga ebanghelyo ni Jesukristo. Naghatag kini kanako og proteksiyon, direksiyon, ug dili maihap nga mga panalangin.
“Ang tanan masabtan ug masagubang” pinaagi sa usa ka pagpamatuod mahitungod sa Manluluwas ug sa Iyang gipahiuli nga ebanghelyo, miingon si Carlos, nga gilitratohan kauban sa iyang asawa, si Claudia, ug sa ilang mga anak, si Jose ug Rocio.