Digital Lamang
Kon ang Matarong nga mga Tinguha Wala Matuman
Malisod kon ang matarong nga mga tinguha sa atong mga kasingkasing ingon og wala matubag. Ania ang pipila ka butang nga imong mahimo aron makapadayon sa unahan.
Usa ka higala gusto og usa ka malipayon, mahangtorong pamilya, apan ang iyang tanang anak mipalayo sa Simbahan. Ang uban usab gusto og celetial nga kaminyoon apan wala pa gihapon makakaplag sa tukma nga tawo. Ang ubang mga higala gusto nga magkaanak apan dili mahimong momabdos. Gusto kong malayo sa mental nga sakit, apan akong nakita ang akong kaugalingon nga naglisod bisan sa pipila ka tuig nakong pagpaningkamot, pagpatambag, ug pag-ampo.
Makawala kini sa kadasig kon ang mga butang nga ganahan kaayo nato dili makab-ot. Mas labaw pa gayod ang kasakit nga magbasa sa mga saad diha sa mga kasulatan nga nag-ingon, “Sama sa imong gitinguha gikan kanako kini mahitabo diha kanimo” (Doktrina ug mga Pakigsaad 6:8; tan-awa usab sa 11:8) ug mobati nga ingon og kadtong mga tinguha wala makab-ot.
Mao nga unsay atong mahimo kon ang atong matarong nga mga tinguha wala matuman? Aniay pipila ka propetikanhong mga pagtulun-an nga makatabang kanato:
-
Praktisa ang aktibong pagpailob. Si Elder Dieter F. Uchtdorf sa Korum sa Napulog Duha ka Apostoles mitudlo: “Ang pagpailob nagpasabot og aktibong paghulat ug paglahutay. Nagpasabot kini nga magpabilin diha sa usa ka butang ug sa pagbuhat sa tanan kutob sa atong mahimo—maningkamot, molaom, ug mogamit og pagtuo; mosagubang sa kalisod uban ang kalig-on, bisan kon maulahi ang gitinguha sa atong kasingkasing.”
-
Pagbaton og pagtuo nga ang Ginoo motubag sa inyong mga pag-ampo sa Iyang tukmang panahon. Si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitudlo: Ang hugot nga pagtuo nagpasabot nga mosalig sa Dios sa maayo ug sa daotang mga panahon, bisan og naglakip kini sa mga pag-antos hangtod atong makita ang Iyang mga bukton nga ipadayag tungod ug alang kanato. Posibling lisod kana sa moderno natong kalibotan diin daghan ang nagtuo nga ang pinakamaayo sa kinabuhi mao ang paglikay sa tanang pag-antos, nga walay usa ang angayng maghingutas sa bisan unsa. Apan kana nga pagtuo dili gayod mosangpot aron “mahingkod kita sama sa kahingkod ni Kristo” [Mga Taga-Efeso 4:13].”
-
Mag-ampo alang sa giya. “Ang pag-ampo mao ang lihok diin ang kabubut-on sa Amahan ug ang kabubut-on sa anak nagkasinabtanay sa usag usa.” Mahimo usab kitang mag-ampo aron masabtan unsay gitinguha sa Dios alang kanato. Sama pananglit, duna bay mas gamay nga lakang nga pwede natong iampo nga tingali makagiya kanato ngadto sa mas dako nga tinguha? Duna bay lahi nga tinguha nga posibling mas importante nga atong ipadayon karon dayon? Kon wala kita masayod unsa nga lakang ang sunod nga buhaton, pwede kita nga mag-ampo aron masayod unsay iampo.
Ang Dios misaad nga ang matag matarong nga tinguha sa atong mga kasingkasing matuman. Salig lang sa Iyang tukma nga panahon nga ang tanan mahimo ra, ug Siya mopanalangin kanimo sa imong pagpailob.