“Lisod ang Kinabuhi, apan Makahimo Kita og Lisod nga mga Butang,” Liahona, Peb. 2025.
Mga Young Adult
Lisod ang Kinabuhi, apan Makahimo Kita og Lisod nga mga Butang
Naghunahuna ko kon sa unsang paagi kaha ang Langitnong Amahan naglaom kanako nga makabuntog sa mga hagit.
Paghulagway pinaagi ni Kylee Bodily
Walay usa nga dunay sayon nga kinabuhi.
Ug nasayod ako niini! Tuyo nga kita mag-atubang og mga hagit aron makabalik kita sa Langitnong Amahan isip labaw nga Kristohanong katawhan. Tanan kini kabahin sa Iyang plano (tan-awa sa 1 Pedro 4:12–13).
Apan usahay maghunahuna ko kon nganong naglisod kaayo ko, kon nganong dunay labihan nga kasakit sa kalibotan, ug kon nganong mawad-an ko og gana sa kinabuhi ug nag-inusara sa ubang higayon. Nanlimbasog ko sa depresyon, nga nagpabatyag kanako nga dunay nagbabag sa tanang butang nga akong gibuhat ug gisinati.
Pipila ka tuig ang milabay, nanglimbasog ko nga mobati sa Espiritu sa akong kinabuhi. Naghunahuna ko kon sa unsang paagi kaha milaom ang Langitnong Amahan nga akong mabuntog ang mga hagit nga mibati man ko og kahuyang ug kawalay kaseguroan. Duna koy daghang pagduhaduha mahitungod sa akong kapasidad sa pagdala sa kinabuhi.
Naghunahuna ko nga basin og wala lang gyod koy kapasidad sa pagbuhat og lisod nga mga butang.
Desperado alang sa Kaseguroan
Usa ka adlaw dihang mibati ko og kawalay gana sa kinabuhi, nagbiyahe ko hangtod nga miabot ko sa hilom nga dapit diin akong malantaw ang kadagatan ug madungog ang huni sa kalanggaman. Usa kadto ka dapit sa kalinaw—perpektong dapit aron makigsulti sa Langitnong Amahan.
Akong gibubo ang akong kasingkasing sa pag-ampo, nangutana kon nganong kinahanglan nga magsagubang ko og daghang kalisdanan. Giingnan nako Siya nga nagtuo ko nga ang kinabuhi lisod kaayo ug dili ko makapadayon nga ako ra. Giingnan nako siya nga wala ko kahibalo kon unsaon pagdala sa lisod nga mga bahin sa akong kinabuhi.
Sa kalit lang, niana nga gutlo sa kahuyang ug kawalay paglaom, akong gibati ang kainit sa Espiritu nga miputos kanako—usa ka malumong kaseguroan nga wala ako mag-inusara, nga dili gayod ako mag-inusara. Ug ang mga pulong sa gugma ug kahupayan misulod sa akong hunahuna, nagpahinumdom kanako sa akong balaanong kailhanan [identity], akong potensyal, ug akong katakos sa paghimo og mga butang nga lisod uban ni Jesukristo.
Human sa mga bulan nga mibati nga nag-inusara ug kawalay kaseguroan, akong gibati ang kaseguroan nga ako makahimo—nga ako hinigugmang anak sa Langitnong Amahan nga adunay katuyoan. Gitugahan ako og espiritwal nga mga gasa, ug ako nabugkos Kaniya, sa labing mahigugmaon ug labing gamhanan nga binuhat sa uniberso, tungod sa akong mga pakigsaad. Siya mipaneguro kanako nga makahimo ako ug gituyo nga mag-atubang sa tanan sa kinabuhi uban sa Manluluwas sa akong kiliran.
Si Presidente Russel M. Nelson mipamatuod niini dihang gipangutana niya kini nga pangutana: “Unsa ka dako ang nadugang niini sa inyong pagsalig nga mahibalo niana, isip usa ka natugahan nga babaye o lalaki nga napanalanginan sa gahom sa Dios, dili kamo kinahanglan nga moatubang sa kinabuhi nga mag-inusara?”
Paghingilin sa Kahadlok
Dili kadto sayon, apan nagmaisogon ako sa paghimo og desisyon ug mihukom nga atubangon ang mga butang sa kinabuhi inubanan sa pagsalig kang Jesukristo. Nakahimo ako sa pagbaton og daghang kaayong oportunidad ug nakaangkon og daghang kalamposan nga wala nako damha nga akong mahimo.
Padayon akong nag-atubang og mga babag ug mga hagit, ug usahay mobati ko nga ang kahadlok mibalik sa akong dughan, apan sa higayon nga akong gigamit ang akong pagtuo sa Manluluwas, akong nasayran nga “ang hingpit nga gugma nagahingilin sa kahadlok” (1 Juan 4:18).
Mas daghan ang akong nasinati, mas nasabtan nako nga ang akong mga hagit mga oportunidad alang sa paglambo ug pagkat-on. Sama sa gitudlo ni Elder Gerrit W. Gong sa Korum sa Napulog Duha ka Apostoles, “Ang kasubo … [mahimo nga mahangtoron nga kalipay] pinaagi sa makapahiuli nga Pag-ula ni Jesukristo.”
Dihang akong gipamalandongan kini nga kasinatian, akong naamgohan nga dili lang kini usa ka sugilanon sa mga panlimbasog. Ug akong nakat-onan nga ang pagtuo dili lamang kay motuo; mahitungod kini sa pagsalig nga ako gihigugma sa hingpit sa akong Langitnong Amahan ug ni Jesukristo. Pinaagi sa atong relasyon sa pakigsaad, kauban ko Sila sa matag adlaw.
Si Elder David A. Bednar sa Korum sa Napulog Duha ka Apostoles misaad nga “samtang itukod nato ang pundasyon sa atong mga kinabuhi diha sa “lig-on nga sukaranan” ni Jesukristo, … kita mapanalanginan sa pagbuhat ug pagbuntog sa lisod nga mga butang.”
Pinaagi Kaniya ug tungod sa atong mga pakigsaad, tinuoray natong mabuntog ang bisan unsa nga nagbabag sa atong agianan.
Ang tagsulat nagpuyo sa Thessaloniki, Greece.