Gusto nga Mohimo og Mas Maayo nga mga Tumong Niining Tuiga? Sunda ang mga Ehemplo sa mga Propeta
Ang mga lider sa Simbahan mipakita nga ang mga tumong mahimong matuman inubanan sa determinasyon, pailob, paghimo og prayoridad—sa tabang sa Ginoo.
Ang Enero usa ka maayo kaayong panahon sa paghimo og mga plano sa pagkat-on ug sa pagtubo atol sa mosunod nga 12 ka bulan. Samtang inyong ikonsiderar ang inyong mga tumong sa mainampoong paagi, hinumdomi kining upat ka leksiyon gikan sa mga kinabuhi sa mga propeta ug apostoles nga malamposong naghimo ug nakab-ot ang ilang mga tumong.
Pagbansay ug Pagpadayon
Sa dihang si Presidente Heber J. Grant bata pa, ang iyang inahan wala magmalamposon sa pagsulay sa pagtudlo kaniya sa pagkanta. Mao nga, si Heber miapil og klase sa pagpanganta sa edad nga 10—apan dili gani gayod siya “makakuha og yanong tono.” Ang maestra sa musika “mihunong nga naguol” ug miingon nga si Heber “dili gayod makakanta, niini nga kalibotan.”
Apan si Heber determinado ug naghimo sa iyang hunahuna sa tumong nga magkat-on sa pagkanta. Nagpraktis siya og daghang oras kon siya magbiyahe nga mag-inusara ug diin walay tawo nga makadungog kaniya. Nakahibalo siya nga ang maayong mga butang sa kanunay magkinahanglan og kakugi aron matuman, nag-ingon, “Malipayon kong mohatag og duha o tulo ka bulan sa akong libreng oras kon ang paghimo sa ingon moresulta nga ako makahimo sa pagkanta og usa o duha ka himno.”
Pinaagi sa determinasyon ug pagbansay, sa hinahinay milambo si Heber. Ang importante mao nga siya nagpadayon sa pagpaningkamot. Gikanta niya ang unang himno nga iyang nakat-onan sa gatosan ka higayon. Sa kataposan, tungod sa iyang makanunayon nga paningkamot, nakat-on siya sa pagkanta.
Himoa ang Mahagitong mga Tumong
Si Presidente Spencer W. Kimball nakahibalo usab sa mga benepisyo sa paghimo sa mahagiton nga tumong. Gisulti niya kini nga istorya bahin sa usa ka tumong nga iyang gihimo sa dihang nag-edad siya og 14:
“Sa dihang nakadungog ko sa usa ka lider sa Simbahan gikan sa Siyudad sa Salt Lake nga nagsulti nato nga kinahanglan kitang mobasa sa mga kasulatan, … naglakaw ko paingon sa among balay nga usa ka bloke ang gilay-on … ug gibasa nako ang unang mga kapitulo sa Genesis. …
“Nahibaloan nako nga kini nga Biblia nga akong gibasa adunay 66 ka libro, ug dayon hapit ako mawad-i og paglaom sa dihang akong nahibaloan nga kini adunay 1,189 ka kapitulo, ug dayon nakahibalo nga kini adunay 1,519 ka pahina. Lisod kadto, apan nasayod ko nga kon ang uban nakahimo niini nga ako makahimo niini.”
Ang gidaghanon nga basahon dili sayon alang sa usa ka tin-edyer, apan bisan pa si Presidente Kimball nagpadayon ug nakompleto ang iyang tumong. Isip usa ka hamtong, miingon siya, “Nalipay ko kanunay nga nahurot nako og basa ang tibuok Biblia.”
Nakabenepisyo si Presidente Kimball sa paggahin og panahon sa paghunahuna sa mga pamaagi sa iyang tumong. Bisan og kini makapawala sa paglaom, ang impormasyon nakapaandam niya sa paglampos. Sama sa sitwasyon ni Presidente Kimball, ang paghimo ug pagkab-ot og mahagiton nga tumong sa batan-on pa makahatag og mga pagbati sa pagsalig ug katagbawan nga makaayo nato sa tibuok kinabuhi.
Ayaw Tugoti nga ang Dili Importante nga mga Butang Mobabag sa Agianan
Si Elder Quentin L. Cook sa Korum sa Napulog Duha ka Apostoles naghisgot sa istorya sa iyang amahan nga nagtudlo niya sa paghimo og mga tumong pinaagi sa tagsa-tagsa nga pakig-istorya sa mga anak ug pagtanyag og tabang.
“Aduna koy tinguha sa paghimo niini nga praktis uban sa akong mga anak,” miingon si Elder Cook. “Sa dihang ang among anak nga si Larry lima ka tuig ang panuigon, ako siyang gipangutana kon unsay gusto niya inig-dako niya. Miingon siya nga gusto siyang mahimong doktor sama sa iyang Tiyo Joe. …
“Paglabay sa pipila ka bulan, nangutana ko niya pag-usab kon unsay gusto niya inig-dako niya. Niining higayona miingon siya nga gusto niya nga mahimong usa ka piloto. … Miingon ko, ‘Larry, sa atong kataposang panag-istorya gusto ka nga mahimong usa ka doktor. Unsay nakapausab sa imong hunahuna?’ Mitubag siya, “Ganahan gihapon ko sa ideya nga mahimong doktor, apan nakabantay ko nga si Tiyo Joe motrabaho sa Sabado sa buntag, ug dili ko gustong makapalta sa mga Cartoons sa Sabado sa buntag.’
“Sukad nianang panahona ang among pamilya mohingalan sa makalinga gikan sa maayong tumong ang usa ka Cartoon sa Sabado sa buntag.
“Unsa ang pipila ka Cartoon sa Sabado sa buntag nga makapalinga kanato gikan sa pagkab-ot sa hingpit nga kalipay nga atong gitinguha? … Kon atong susihon ang mga rason nga wala nato buhata ang angay natong buhaton, mahibaloan nato nga ang lista sa mga Cartoon sa Sabado sa Buntag walay kahumanan.”
Ang mga pagtulun-an ni Elder Cook nagpakita nato nga kinahanglan kita nga mamalandong kon unsay atong gibuhat, sa paglikay sa mga makabalda, ug magpabiling nakatutok samtang maningkamot kita sa pagkab-ot sa atong mga tumong.
Paghimo og mga Tumong Base sa Tambag sa Propeta
Sa edad nga 54, sa wala pa siya matawag isip usa ka Kinatibuk-ang Awtoridad, si Presidente Russell M. Nelson mitambong og miting diin si Presidente Spencer W. Kimball mihagit sa mga nanambong nga “moserbisyo kita sa mga Chinese.” ug “magkat-on sa ilang pinulongan.”
Bisan tuod busy siya sa pagkadoktor sa kasingkasing nianang higayona, si Presidente Nelson miisip niini nga tambag nga importante. Nakakita siya og magtutudlo nga motabang niya nga makat-on sa pinulongan nga Mandarin.
Wala magdugay nakaplagan ni Presidente Nelson ang iyang kaugalingon nga naglingkod tupad sa usa ka inila nga Insek nga doktor, si Dr. Wu Yingkai, sa usa ka medikal nga kombensyon. Tungod sa mga pagtuon sa pinulongang nga Ininsek, si Presidente Nelson nakahimo sa pagpakig-istorya ni Dr. Wu. Gikan dinha, ang duha ka doktor nakahimo og malungtarong panaghigalaay ug gani mibisita sa mga nasod sa usag usa.
Ang tumong ni Presidente Nelson nga magkat-on og Mandarin misangpot ngadto sa positibo nga pagbinayloay uban sa China, nga gilaoman ni Presidente Kimball. Human siya matawag ngadto sa Korum sa Napulog Duha ka Apostoles, si Presidente Nelson mipahigayon gani sa iyang kataposan nga pag-opera sa kasingkasing sa labing inila nga mang-aawit sa opera tungod sa espesyal nga hangyo.
Si Presidente Nelson mipakita usab og ehemplo sa paghimo og tumong pinaagi sa iyang pagtuon sa kasulatan. Sa dihang nakadungog siya sa hangyo ni Presidente Thomas S. Monson (1927–2018) niadtong 2017 alang sa matag usa kanato nga magbasa ug magtuon sa Basahon ni Mormon kada adlaw, si Presidente Nelson mihimo og tumong sa paghimo niini—sama sa iyang gihimo sa dihang misuhol siya og magtutudlo sa Mandarin.
Samtang siya nagtuon, si Presidente Nelson “naglista kon unsa ang Basahon ni Mormon, unsa ang gipamatud-an niini, unsa ang gisupak, unsa ang gituman, unsa ang gipatin-aw, ug unsa ang gipadayag niini.” Iyang gipakita nato nga ang mga pulong sa mga propeta makadasig sa mga tumong nga atong gihimo ug nga kita makapadayon sa pagkat-on ug paglambo sa atong tibuok kinabuhi.
Pagkaplag og Hingpit nga Kalipay
Kining mga sundanan sa paghimo og tumong kabahin sa mahantorong baroganan sa pagtubo ug paglambo sa atong tibuok mga kinabuhi. Ang Langitnong Amahan ug si Jesukristo gusto nga kita mahimong mas sama Kanila aron kita makakaplag og hingpit nga kalipay ug katumanan ug makapuyo sa kahangtoran uban Kanila.