Unsa nga mga Kamatuoran ang Gitudlo sa Pamahayag sa Pagpahiuli?

Enero 2025

“Unsa nga mga Kamatuoran ang Gitudlo sa Pamahayag sa Pagpahiuli?,” Liahona, Ene. 2025.

Dali, Sunod Kanako

Ang Pagpahiuli

Unsa nga mga Kamatuoran ang Gitudlo sa Pamahayag sa Pagpahiuli?

Si Joseph Smith nga nagluhod sa sagradong kakahoyan

Sa kinatibuk-ang komperensiya sa Abril 2020, si Presidente Russell M. Nelson mibasa sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Dayon miingon siya: “Tun-i kini sa pribado ug uban sa mga sakop sa inyong pamilya ug mga higala. Pamalandongi ang mga kamatuoran ug paghunahuna sa epekto niadtong mga kamatuoran sa inyong kinabuhi kon kamo maminaw niini, ug mopatalinghog sa mga sugo ug mga pakigsaad nga nag-uban niini.”

Ang mosunod nga talaan motabang kaninyo sa pagsunod sa tambag sa propeta sa pagtuon sa pamahayag. Samtang inyong buhaton, ikonsiderar ang paghinumdom dili lamang sa makasaysayong mga panghitabo sa Pagpahiuli apan usab sa kamot sa Ginoo nga naggiya niadto nga mga panghitabo. (Ang teksto sa pamahayag anaa sa Librarya sa Ebanghelyo o sa kataposan sa unang leksiyon sa Dali, Sunod Kanako niining tuiga.)

Parapo	Pagtuon: Unsa nga mga Kamatuoran ang Inyong Nakaplagan?	Pamalandongi: Unsa nga mga Kamatuoran ang Gitudlo niini Kaninyo?	Patalinghogi: Unsaon Ninyo sa Paggamit Niini nga mga Kamatuoran sa Inyong Kinabuhi?	Pakigbahin: Unsaon Ninyo sa Pagpakigbahin Niini nga mga Kamatuoran ngadto sa Inyong Pamilya ug mga Higala?
1
2
3
4
5
6
7
8
9

Ngano nga mga Pamahayag?

Nasayod ba kamo nga adunay unom lamang ka pamahayag ang giisyu sa Ang Simbahan ni Jesukristo sa mga Santos sa Ulahing mga Adlaw? Ang unang tulo gimantala tali sa 1841 ug 1865. Ang kataposang tulo ka pamahayag gimantala sukad sa 1980:

“Pamahayag gikan sa Unang Kapangulohan ug sa Korum sa Napulog Duha ka Apostoles sa Ang Simbahan ni Jesukristo sa mga Santos sa Ulahing mga Adlaw” (1980), giaprobahan ni Presidente Spencer W. Kimball (1895–1985) ug gibasa ni kanhi Elder Gordon B. Hinckley sa ika-150 nga anibersaryo sa Simbahan.
“Ang Pamilya: Usa ka Pamahayag ngadto sa Kalibotan” (1995), gibasa ni Presidente Gordon B. Hinckley sa Kinatibuk-ang Miting sa Relief Society sa pagpakigbahin sa opisyal nga pamahayag sa Simbahan bahin sa doktrina sa pamilya.
“Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan” (2020), gibasa ni Presidente Russell M. Nelson atol sa Abril 2020 nga kinatibuk-ang komperensiya—200 ka tuig human sa Unang Panan-awon. Kini nagpahayag pag-usab nga si Joseph Smith usa ka propeta sa Dios, ug nga Ang Simbahan ni Jesukristo sa mga Santos sa Ulahing mga Adlaw mao ang gipahiuli nga Simbahan ni Jesukristo.

Ang mga pamahayag gihimo alang sa tanan sa tibuok kalibotan. Kini “ligdong ug sagrado ang matang ug … giisyu uban sa tuyo sa pagpahinabo, pagpalig-on, ug pagdumala sa mga kalihokan sa Simbahan isip ang gingharian sa Dios dinhi sa kalibotan.” Ang mga pamahayag mao ang talagsaon ug gamhanan nga tugon nga kita adunay buhi nga propeta nga naggiya sa Simbahan ug sa kalibotan karon.