Digital Lamang: Mga Pagtulun-an sa mga Lider sa Simbahan gikan sa Social Media
Ang mga Panalangin sa Templo
Tan-awa kon unsa ang gitudlo sa buhi nga mga propeta ug sa ubang mga lider sa Simbahan diha sa social media mahitungod sa kaimportante sa mga templo.
Sa mga panahon sa kagubot ug kalibog, kita mahimong magtinguha og kalinaw ug kadangpan diha sa templo aron matabangan kita nga klarong makakita. Si Presidente Russell M. Nelson miingon: “Ang panahon sulod sa templo motabang ninyo nga maghunahuna og celestial ug sa pagsabot kinsa gayod kamo, unsa ang inyong maabot, ug sa matang sa kinabuhi nga inyong maangkon sa kahangtoran. Ang kanunay nga pagsimba sa templo makapalambo sa paagi sa inyong pagtan-aw sa inyong kaugalingon ug sa unsa nga paagi kamo mohaom sa talagsaong plano sa Dios. Mosaad ko kaninyo niana.”
Ang mga lider sa Simbahan namulong sa kinatibuk-ang komperensiya mahitungod sa mga templo ug mga pakigsaad. Mipakigbahin sila og mga mensahe mahitungod niini nga mga hilisgotan diha sa social media, lakip na sa mosunod:
Walay Mas Importante Kaysa Pagtahod sa Inyong mga Pakigsaad sa Templo
“Sa unang adlaw nga naglakaw ko sa Salt Lake Temple sa batan-on pa ko, mibati ko nga nakaadto na ko sa una. Sa kalit lang, misantop sa akong hunahuna nga ang akong nabatyagan mao ang pagbati og kalinaw nga labaw pa sa bisan unsa nga ako nang gibati sa una niining kinabuhia, apan kana murag akong nabatyagan ug hapit makahinumdom gikan sa panahon sa wala pa ko matawo.
“Kita nakaila sa atong Langitnong Amahan ug sa Iyang Pinalanggang Anak sa wala pa kita moanhi sa Yuta. Sa atong pagtambong sa templo, atong bation ang kalinaw sa atong pakig-uban Kanila sa kinabuhi kaniadto, ug kita mapahinumdoman sa mahangtorong kinaiyahan sa atong mga espiritu ug sa atong labing mahinungdanong tinguha nga mopauli ngadto sa atong langitnong panimalay.
“Mohimo ug motuman sa sagrado nga mga pakigsaad ngadto sa Dios. Walay mas importante kaysa pagtahod sa inyong mga pakigsaad sa templo.”
Presidente Henry B. Eyring, Ikaduhang Magtatambag sa Unang Kapangulohan, Facebook, May 31, 2024, facebook.com/henry.b.eyring.
Ang mga Templo Mas Mopaduol Kanato ngadto ni Jesukristo
“Human sa pagbiya ni Kristo sa Iyang mga disipulo ug ‘gibayaw ngadto sa langit’ (Lucas 24:51), ang mga disipulo mibalik sa Jerusalem ‘nga malipayon kaayo’ (Lucas 24:52) ug ‘kanunay silang didto sa templo ug nagdayeg sa Dios’ (Lucas 24:53).
“Karon, ang Dios mipanalangin sa matinud-anon nga mga miyembro sa gipahiuli nga Simbahan ni Jesukristo sa tibuok kalibotan pinaagi sa balaanong giya sa Iyang propeta sa pagtukod og mga templo. Ang mga templo sa Ang Simbahan ni Jesukristo sa mga Santos sa Ulahing mga Adlaw mao ang sagrado nga mga luna diin ang usa ka tawo mobati nga duol sa langit ug nagmaya sa impluwensya sa Espiritu Santo.
“Sa bag-ohay lang namo nga mga pagbisita sa tibuok kalibotan, si Harriet ug ako mibisita sa mga templo sa lainlaing mga ang-ang sa pagkompleto. Ang matag pagbisita mipanalangin namo og mga pagbati sa kalinaw ug kalipay—maanaa man kami sa sulod sa balay sa Ginoo o mogahin og panahon sa palibot sa mga nataran. Sa dihang among nakaistorya ang mga lider sa gobyerno o relihiyon niini nga mga nasod, sa kanunay adunay pagbati og pagtahod, pagdayeg, ug pasalamat alang sa atong doktrina sa paghiusa sa mga pamilya pinaagi sa panalangin sa mga templo.
“Ang pagtukod og mga templo sa tibuok kalibotan nakatabang kanato nga mas mapaduol ngadto ni Jesukristo. Siya ang sentro sa matag templo. Si Jesukristo mao ang atong giya ug ang halangdong arkitekto sa pagtukod pag-usab, pagpahiuli, ug sa pag-ayo sa atong kaugalingong kinabuhi sumala sa plano sa Dios alang sa kalipay.
“Ang mga pakigsaad nga gihimo ug ang mga baroganan nga gitudlo diha sa balaang mga templo sa Ang Simbahan ni Jesukristo sa mga Santos sa Ulahing mga Adlaw mao ang praktikal nga aplikasyon sa gugma sa Dios alang sa matag usa sa Iyang mga anak. Ang paghangop niini nga gugma sa atong inadlaw nga kinabuhi—bisan sa ginagmay nga mga lakang—mogiya kanato ngadto sa usa ka dapit nga kadangpan ug pagkahisakop atol sa mahagiton nga mga panahon.”
Elder Dieter F. Uchtdorf, Korum sa Napulog duha ka Apostoles, Facebook, June 15, 2023, facebook.com/dieterf.uchtdorf.
Nagsumpay sa Langit ug sa Yuta
“Ang mga templo mao ang nagsumpay sa langit ug sa yuta. Gidesinyo kini sa atong Langitnong Amahan aron sa pagtudlo ug sa pagtabang nato sa atong panaw balik ngadto sa Iyang presensya. Kon kita magmatinud-anon sa mortalidad, pinaagi sa pagsulod ug sa pagtuman sa pakigsaad sa ebanghelyo, makabaton kita og kinabuhing dayon.
“Kini nga templo—ug ang tanang templo sa ulahing mga adlaw—naglangkob sa atong makita, tinuod nga pagpamatuod sa buhi nga reyalidad sa Manunubos tungod kay kon wala ang Iyang Pag-ula ug Pagkabanhaw, ang templo walay kapuslanan.
“Ang Ginoo migamit sa Iyang mga templo aron hatagan kita ug ang atong mga henerasyon—sa miagi, sa karon, ug sa umaabot—og mga panalangin nga mahatag lamang diha sa balay nga Iyang gi-orden alang niana nga katuyoan.”
Elder D. Todd Christofferson, Korum sa Napulog duha ka Apostoles, Facebook, Jan. 21, 2024, facebook.com/dtodd.christofferson.
Ang Atong Panahon diha sa Templo Makapalig-on Nato
“Sa atong pagsulod sa templo, kita temporaryong milakang pagawas sa kalibotan. Atong gibilin ang atong mga problema ug mga hagit diha sa pultahan ug gitutok ang atong mga hunahuna diha sa mga butang sa Dios, diha sa mga ordinansa ug mga pakigsaad sa kaluwasan ug kahimayaan. Gibag-o nato ang atong mga hunahuna ug mga tinguha ngadto sa balaanong panglantaw.
“Kita mas klarong mobati sa kalinaw ug gugma nga nagagikan sa atong Langitnong Amahan ug sa atong Manluluwas pinaagi sa Balaang Espiritu. Mabatyagan nato kanang sama nga gugma alang sa atong mga inahan ug mga amahan sa nanglabay nga mga henerasyon ug mangandoy nga mahiusa uban kanila sa kahangtoran. Kita mabag-o diha sa pagdayeg sa atong kaugalingong walay kinutoban nga bili ug diha sa atong determinasyon sa paglihok sumala niini.
“Sa atong pagbiya sa templo, atong makita nga ang mga problema ug ang mga hagit nga atong gibilin sa ganghaan anaa gihapon. Obligado kita sa pagpas-an niini pag-usab. Wala kini mausab, apan salamat nalang, ang atong panahon diha sa templo nakapausab nato. Ang atong panglantaw mas segurado ug mas klaro. Karon atong makita nga ang daw bug-at ug imposible, uban sa tabang sa Ginoo, adunay kasulbaran, ug mas segurado kita sa Iyang tabang.
“Sa laing bahin, ang ubang ginagmay nga mga butang nga murag dili importante, atong maamgohan nga nagkinahanglan og pagtagad karon aron dili kini mahimong seryoso nga mga butang nga adunay makapakunhod nga mga sangpotanan alang nato ug sa uban inig-abot sa panahon. Sa laktod nga pagkasulti, sa atong panahon didto sa templo kita nalig-on, bisan sa ginagmay lamang, ug ang langit ingon niana ka mas duol.”
Elder D. Todd Christofferson, Korum sa Napulog duha ka Apostoles, Facebook, Jan. 15, 2023, facebook.com/dtodd.christofferson.
Ang Templo Naghiusa sa mga Pamilya sa Duha ka Habig sa Tabil
“Sa miaging bulan, mapasalamaton ko nga nakaapil sa pag-orden sa pagkapari sa tulo sa akong mga apo nga lalaki sa samang pamilya sa samang adlaw—si John isip priest, si David isip teacher, ug si Will isip deacon. Pagkasunod semana, dungan kami nga mitambong sa templo. Si John nakahimo sa pagbunyag sa iyang mga igsoong lalaki, kuyog sa iyang magulang nga lalaki, si Jason, nga nag-andam sa misyon. Una kadto nga higayon nga si Will nakasulod sa templo. Pagkadako nga panalangin nga adunay pagkapari sa among mga pamilya! Pagkadako nga panalangin nga adunay templo alang sa among mga apo! Kining duha ka higayon sa pamilya mga bilihon nga handomanan nga kanunay nakong hinumdoman.
“Ang pagpahigayon og buhat sa templo ug ang pagtuman sa mga katungdanan sa pagkapari mohiusa sa mga pamilya sa duha ka habig sa tabil—sama sa nahimo niining duha ka kalihokan alang sa akong pamilya. Diha sa templo, atong bation ang gahom gikan sa kahitas-an sa pag-atubang sa mga hagit sa atong personal nga kinabuhi ug sulod sa atong mga pamilya. Ang atong gugma alang sa usag usa ug alang sa Manluluwas molambo kon kita motutok sa mahangtorong kinaiyahan sa atong mga relasyon.”
Elder Neil L. Andersen, Korum sa Napulog Duha ka Apostoles, Facebook, Feb. 2, 2023, facebook.com/neill.andersen.
Moadto sa Templo
“Ang balay sa Ginoo usa ka sagrado nga dapit tali sa langit ug sa yuta diin mas makaila nato ang atong Amahan ug ang Iyang Pinalanggang Anak, si Jesukristo.
“Napahinumdoman ko bahin niini karon ingon nga ako adunay espesyal nga pribilehiyo nga masangonan ni Presidente Russell M. Nelson sa pagpahinungod sa Brasilia Brazil Temple sa Ang Simbahan ni Jesukristo sa mga Santos sa Ulahing mga Adlaw.
“Pagkadako nga panalangin alang niadtong mobisita niini nga templo nga mopadayon sa pagpalambo sa ilang mga relasyon ngadto sa Dios ug ngadto sa usag usa. Mahinungdanon kaayo kini kay nagpuyo kita sa gubot ug makalibog nga kalibotan.
“Ako modapit natong tanan nga moadto sa templo kon kamo nahasol sa mga hagit sa inyong pamilya. Moadto kon nag-atubang og mga desisyon. Kon ang kalibotan daw bug-at ug nagtinguha kamo og kalinaw. Kon kamo daw mapildi ug nagkinahanglan kamo og dugang nga gahom.
“Moadto kon kamo malipayon ug ang tanan maayo ra. Moadto nga dili sultihan. Moadto kon kamo wala magdali-dali. Moadto nga nakapasaylo na niadtong nakapasilo kaninyo. Moadto nga matuohon.
“Kon atong buhaton, ang Espiritu sa Ginoo magauban kanato ug ang katahom sa mga kahangtoran maangkon nato.”
Elder Neil L. Andersen, Korum sa Napulog Duha ka Apostoles, Facebook, Sept. 17, 2023, facebook.com/neill.andersen.
Ang mga Templo Motabang Nato nga Matuman ang Atong Balaanong Potensiyal
“Ang mga templo motabang nato nga matuman ang atong balaanong potensiyal. …
“Oo, kita nagtahod sa Ginoo pinaagi sa pagtukod og matahom nga istraktura, sama sa gihimo ni Solomon sa Daang Tugon, apan kita mas nagtahod Kaniya pinaagi sa pagpahigayon sa sagrado nga mga ordinansa nga pagahimoon lamang diha sa gipahinungod nga balay sa Ginoo.
“Kita modapit sa tanan sa pagduol ngadto ni Jesukristo ug sa paghimo og sagrado nga mga saad diha sa Iyang mga templo. Ang pagdapit gikan ni Jesukristo alang sa tanan:
“‘Duol kamo kanako, kamong tanan nga gikapoyan ug gibug-atan sa inyong gipas-an ug papahulayon ko kamo. … Sayon ang yugo nga akong isangon kaninyo ug gaan ang ipapas-an ko kaninyo.’”
Elder Gary E. Stevenson, Korum sa Napulog duha ka Apostoles, Facebook, June 18, 2023, facebook.com/stevenson.gary.e.
Magmahimong Tigsumpay sa mga Henerasyon
Post: “Pinaagi sa atong hugot nga pagtuo kang Jesukristo, hinaot nga kita magmahimong tigsumpay sa atong mga henerasyon. Hinaot nga kita mokonektar sa atong mga katigulangan ug mopanalangin sa atong kasamtangan ug umaabot nga mga pamilya—ang mga pamilya nga anaa kanato ug ang mga pamilya nga gusto nato.”
Bidyo: “Minahal nga mga higala, minahal nga mga kaigsoonan, kami ug ang among pamilya nagtumong nga magmalipayon ug mahangtoron. Ang among labing importante ug bililhon nga mga relasyon wala gitumong nga pagabulagon sa kamatayon. Ang Dios, ang atong Langitnong Amahan, ug ang Iyang Anak, si Jesukristo, nag-andam og balaanong plano sa kalipay, lakip na sa sagradong mga ordinansa ug mga pakigsaad nga anaa sa balaan nga mga templo nga makahimong posible nga ang mga indibidwal makabalik ngadto sa presensya sa Dios ug ang mga pamilya mahiusa sa kahangtoran. Ang sagrado nga mga ordinansa ug mga pakigsaad sa templo mokonektar sa langit sa unsay atong gihatagan og bili sa yuta.”
Elder Gerrit W. Gong, Korum sa Napulog Duha ka Apostoles, Facebook, Mar. 21, 2023, facebook.com/gerritw.gong.
Ang Kalinaw Makaplagan diha sa Balay sa Ginoo
“Sa atong nagkapuliki nga kalibotan diin atong makita ang atong kaugalingon nga nagpangutana kon asa kita modangop alang sa kalinaw, ako mopamatuod nga kini nga kalinaw makaplagan diha sa balay sa Ginoo. Sa sulod sa mga templo sa Dios, atong makat-onan kon kinsa kita ug kon kinsa kita mamahimo sa umaabot salamat ni Jesukristo ug sa Iyang walay kinutoban nga Pag-ula ug sa plano sa Langitnong Amahan alang nato.”
Elder Ulisses Soares, Korum sa Napulog duha ka Apostoles, Facebook, Aug. 13, 2023, facebook.com/soares.u.
Mabugkos ngadto sa Manluluwas pinaagi sa mga Pakigsaad
Post: “Ang atong Langitnong Amahan nahigugma nato ug gusto nga adunay mas lawom, mas makahuloganon nga koneksiyon ngari nato. Pinaagi sa atong pagtambong sa templo, mas mapaduol kita ngadto Kaniya ug sa atong Manluluwas, si Jesukristo.”
Reel: “Hi, mga higala. Mibalik na usab kami karon sa pagtuon sa mga kanta sa Primary, ug anaa kami sa pahina 95 sa Songbook sa mga Bata. Kini ang ‘Gusto Ko nga Makita ang Templo.’ Mahinungdanon gyod kini nako kay usa kini sa pipila ka kanta sa Primary nga akong mahinumdoman, gikan sa sayo nga katuigan sa akong pagkamiyembro human ko nabunyagan, nga nakapadasig nako.
“Ganahan ko nga mopakigbahin sa parte sa ikaduhang bersikulo nganha ninyo. Kini nag-ingon: ‘Gusto kong makita ug mosulod sa templo. Mohimog pakigsaad; Motuman g’yod ako. Kay balaang dapit ang templo.’
“Ug bation ko kana sa matag higayon nga magtinguha ko sa paghimo niana nga pakigsaad nga mosulod sa balay sa Ginoo ug maanaa sa balaan nga dapit uban sa akong Manluluwas, uban sa Langitnong Amahan. Bation nako nga naghimo ko og butang nga modala nako paduol ngadto kanila ug nagtugot nako nga makat-on ug molambo diha sa paagi nga importante ngadto kanila.
“Naghunahuna ko niini nga bersikulo diha sa Doktrina ug mga Pakigsaad 124. Sa bersikulo 40, ug mabasa kini, ‘Ug sa ka pagkatinuod Ako moingon nganha kaninyo, himoa kini nga balay nga matukod ngadto sa akong ngalan, aron Ako mopadayag sa akong mga ordinansa diha niini ngadto sa akong mga katawhan.’
“Ug naghunahuna gyod ko kon sa unsang paagi nga ang templo mao ang balay sa Ginoo. Ug Siya nagdapit sa Iyang tanang anak ngadto sa Iyang balay, ug Siya nagdapit kanato sa pagbaton og relasyon pinaagi niini nga mga ordinansa nga makaplagan lamang didto. Ako mohangyo kaninyo nga ikonsiderar ang pagdawat sa pagdapit sa Manluluwas nga moadto sa Iyang balay ug mabugkos ngadto Kaniya pinaagi sa pakigsad ug makat-on kon unsay gusto niya nga inyong makat-onan aron molambo uban Kaniya. Magkita kita didto! Babay sa pagkakaron, mga higala!”
Sister Tracy Y. Browning, Unang Magtatambag sa Kinatibuk-ang Kapangulohan sa Primary, Facebook, Jan. 11, 2024, facebook.com/Primary2ndCounselor