Digital Lamang
Nagkinahanglan ba Gayod ang Dios sa Akong Tabang?
Kon mobati kamo og kakulang, ang Manluluwas makabayaw kaninyo ug makapalambo sa inyong mga paningkamot.
Mibati ba kamo nga dili angayan? Tingali nakadawat kamo og calling nga sa inyong pagtuo dili ninyo matuman, o tingali mibati kamo nga murag wala makahimo sa inyong mga responsibilidad. Masulayan natong tanan kana sa pipila ka paagi. Ania ang tulo ka butang nga akong nakat-onan nga nakatabang nako nga makabaton og pagsalig.
Ang Dios Nagtawag sa Huyang ug sa Yano
Sa akong misyon, mibati ko og kakulang sa pagtudlo sa ebanghelyo ngadto sa ubang mga tawo.
Mibati ko nga batan-on pa kaayo, walay kasinatian, ug dili perpekto aron makahimo og tinuod nga kalainan sa kinabuhi ni bisan kinsa. Gusto nakong ipunting ang akong mga higala ngadto kang Jesukristo, apan unsaon?
Usa ka adlaw, nagtuon ko sa Doktrina ug mga Pakigsaad ug nakita kini nga bersikulo: “Aron ang kinatibuk-an sa akong ebanghelyo mapahayag pinaagi sa huyang ug sa yano ngadto sa kinatumyan sa kalibotan, ug sa atubangan sa mga hari ug mga magmamando,” (Doktrina ug mga Pakigsaad 1:23).
Kini nga bersikulo mipuno sa akong kalag og paglaom ug kalipay. Ang Ginoo wala moingon nga gusto Niya ang perpekto nga mga tawo nga mohimo sa Iyang buhat. Kondili, Siya nagtawag og dili perpekto nga mga tawo nga adunay dili masukod nga potensiyal—mga tawo sama nako ug ninyo.
Ang Dios Makapalambo Kaninyo
Nagtubo ko nga ganahan sa istorya bahin sa igsoong lalaki ni Jared. Ang Ginoo mihatag sa igsoong lalaki ni Jared og kahigayonan sa paggamit sa kabubut-on ug kamamugnaon pinaagi sa pagpangutana niya kon sa unsang paagi nga ang mga Jaredita adunay kahayag sa sulod sa ngitngit nga mga sakayan samtang mopanaw sila ngadto sa gisaad nga yuta. Ang igsoong lalaki ni Jared miporma og hamis nga mga bato gikan sa dakong bato ug mihangyo sa Ginoo nga mohayag ang mga bato. Ang Manluluwas mihikap sa matag bato ug mihayag kini (Ether 2:25; 3:1–6).
Sa samang paagi, kon atong dad-on sa Dios ang atong labing maayo nga mga paningkamot, Siya makapalambo niini ug gani makahimo og mas dako nga mga butang kaysa atong mahunahuna. Ang Dios ang mohimo og mga milagro, dili kita.
Si Elder Vern P. Stanfill sa Seventy miingon, “Kinahanglan natong hinumdoman nga bisan unsa ang atong labing maayo apan dili hingpit nga halad, ang Manluluwas makahimo niini nga hingpit. Bisan unsa ka daw dili mahinungdanon ang atong mga paningkamot, kinahanglan dili nato ipakaubos ang gahom sa Manluluwas.”
Mas Maayo ang Inyong Gibuhat Kaysa Inyong Gihunahuna
Pahibaloon ko kamo sa sekreto: tingali mas maayo ang inyong gibuhat kaysa inyong gihunahuna. Si Presidente Russell M. Nelson miingon, “Kinahanglang hinumdoman natong tanan: ang mga tawo anaa, aron sila makabaton og kamaya—dili ang pagbati nga sad-an! [tan-awa sa 2 Nephi 2:25].”
Usa ka paagi nga atong malikayan ang pagbati nga sad-an mao ang pagtinguha og kahingpitan pinaagi sa grasya ni Jesukristo (tan-awa sa Moroni 10:32) imbes sa atong mga paningkamot.
“Ang pagkahimong hingpit diha ni Kristo,” miingon si Elder Stanfill, “mohupay kanato sa mga palas-anon sa pagbati nga sad-an ug kakulang, kanunay nga mohatag og gibug-aton kon kinsa kita sa panan-aw sa Dios.”
Bisan og nanglimbasog pa gihapon ko sa akong mga pagbati sa kakulang, nagkat-on ko nga iapil ang Ginoo sa pagpalambo sa akong kaugalingon. Samtang magpaubos ko sa akong kaugalingon, ang akong mga kahuyang Iyang gilig-on (tan-awa sa Ether 12:27).