Si Ann ug Newel Whitney ug ang Dalan sa Pakigsaad

Ni John H. Heath

Departamento sa Kasaysayan sa Simbahan

Sama ni Ann ug Newel Whitney, kita usab padulong sa dalan sa pakigsaad pinaagi sa paghinulsol, pagserbisyo, pagsakripisyo, ug pagmaya samtang nagsubay sa agianan.

Tindahan sa mga Whitney sa Kirtland — Ang tindahan sa mga Whitney sa Kirtland (gipakita dinhi niadtong 1907) nakahatag og dakong pundo sa pagtubo sa Simbahan didto sa Ohio ug Missouri niadtong mga 1830.

Sa dihang ang nag-edad og 18 anyos nga si Elizabeth Ann Smith mibalhin ngadto sa Ohio, nahimamat niya ang gwapo nga negosyante nga ginganlan og Newel K. Whitney. Gihulagway niya siya nga “usa ka batan-ong lalaki [kinsa] gikan sa Kasadpan aron ‘mangita sa iyang kapalaran.’ Siya daginotan ug lagsik, ug siya mas daling nakaangkon og kabtangan kaysa kadaghanan sa iyang … mga kauban.” Naminyo sila niadtong Oktubre 1822 ug nahimong “ malipayon nga magtiayon, nga adunay mahayag nga kaugmaon nga nagpaabot.”

Nanimuyo sila sa Kirtland, Ohio, diin si Newel adunay malamposong kompaniya sa pamaligya.

Makita nato ang mga sundanan sa kahimoan sa Ginoo sa Iyang mga anak pinaagi sa pagtan-aw sa mga kasinatian sa mga Whitney ug sa daghan pang uban. Pananglitan, makita nato giunsa nila sa pagkaila sa Manluluwas ug giunsa Niya sa pagtabang kanila nga makakita sa ilang mga kaugalingon isip mga anak sa pakigsaad. Ang pagkaila kanila makahatag og mas lawom nga mga panabot sa mga pagpadayag sa Ginoo nga anaa sa Doktrina ug mga Pakigsaad.

Pag-andam sa Pagdawat sa Pulong sa Ginoo

Ang mga ginikanan ni Ann mipili sa pagpadako kaniya nga walay relihiyon. Si Newel adunay hilig sa negosyo. Apan samtang nagtukod sila og balay sa Kirtland, nakamatikod si Ann nga adunay kulang sa ilang mga kinabuhi. Misugod sila sa pagpangita og simbahan nga misunod sa ebanghelyo nga gitudlo ni Jesukristo sa Bag-ong Tugon. Sa makadiyot misimba sila sa Alexander Campbell’s Disciples of Christ.

“Usa ka gabii,” paghinumdom ni Ann, “… ang akong bana ug ako, diha sa among balay sa Kirtland, nag-ampo ngadto sa Amahan aron makakita sa paagi, ang Espiritu mikunsad kanamo ug usa ka panganod ang milandong sa balay. … Usa ka ligdong nga pagtahod ang mituhop kanamo. … Nakadungog kami og tingog … nag-ingon, ‘Pangandam sa pagdawat sa pulong sa Ginoo, kay kini moabot.’”

Sa New York, gatosan ka kilometro ang gilay-on, ang Ginoo misulti ni Joseph Smith nga magpadala og mga misyonaryo nga mosangyaw sa ebanghelyo. Sa dihang kadto nga mga misyonaryo—nga gipangulohan ni Oliver Cowdery ug Parley P. Pratt—nagsangyaw didto sa Kirtland, naminaw si Ann ug unya misulat, “Nasayod ko nga kini ang tingog sa Maayong Magbalantay.” Ang saksi sa mga misyonaryo, sa ubang mga tumutuo sama ni Lucy ug Isaac Morley, ug ang labing importante, ang Espiritu Santo, migiya nila sa paghimo og sagrado nga mga pakigsaad. Si Ann ug Newel nabunyagan ngadto sa Ang Simbahan ni Jesukristo sa mga Santos sa Ulahing mga Adlaw niadtong Nobiyembre 1830.

Miabot sa Kirtland niadtong 1831, si Joseph Smith mipaila sa iyang kaugalingon ngadto ni Newel, nag-ingon, “Ako si Joseph, ang Propeta. … Nag-ampo ka nga moanhi ko.”

Paghulagway ni Paul Mann

Pakighimamat sa Propeta Joseph

Laing pagpadayag misulti sa mga Santos sa “pag-adto ngadto sa Ohio,” diin sila makadawat “og panalangin nga sa ingon wala pa mahibaloi diha sa mga katawhan,” (Doktrina ug mga Pakigsaad 39:14–15; tan-awa usab sa 37:1).

Si Joseph ug Emma Smith miabot sa Kirtland niadtong Pebrero 1831, ug si Newel ug Ann midawat kanila sa ilang panimalay sulod sa usa ka bulan. Paglabay sa diseotso ka bulan, mihatag sila pag-usab og panimalay alang ni Joseph ug Emma sa ilang giayo nga tindahan.

Ang mga Whitney nagsugod sa pagkakita sa mas klaro sa ilang mahantorong pagkatawo. Sa ulahing bahin nianang tuiga, ang Ginoo mipadayag ngadto ni Propeta Joseph nga si Newel moserbisyo isip bishop sa Kirtland. Miingon si Newel, “Dili ako makahunahuna sa akong kaugalingon nga usa ka Bishop, Brother Joseph, apan kon moingon ka nga kabubut-on kini sa Ginoo, akong sulayan.”

Mitubag si Joseph, “Dili nimo kinahanglan nga tuohon lang ang akong pulong. Lakaw ug pangutan-a ang amahan sa imong kaugalingon.”

Human mag-ampo, si Newel nakadungog og tingog gikan sa langit nga nag-ingon, “Ang imong kalig-on ania kanako.”

Mao kini ang panahon sa paglambo alang ni Newel ug Ann samtang naningkamot sila sa pagtuman sa ilang mga pakigsaad. Misulat si Ann mahitungod sa usa ka paagi sa ilang pagserbisyo sa uban:

“Sumala sa sundanan sa atong Manluluwas … , determinado kami sa paghimo og Kasaulogan alang sa Kabos … ; sa bakol, sa pungkol, sa bungol, sa buta, sa may edad ug may balatian.

“Kini nga kasaulogan milungtad og tulo ka adlaw, nga atol niining panahona ang tanang kasilinganan sa Kirtland nga moanha gidapit. … Alang kanako “usa kini ka kombira sa lamiang pagkaon” [Isaias 25:6]; ug usa ka panahon sa pagmaya nga dili gayod makalimtan.”

Sa kadugayan si Newel miserbisyo isip usa ka misyonaryo kauban ni Joseph Smith ug isip usa ka kauban sa Nagkahiusang Kapunongan, usa ka kooperatiba sa negosyo nga motubag sa mga panginahanglan sa mga Santos. Ang mga halin gikan sa iyang tindahan nakahatag og dakong pundo sa pagtubo sa Simbahan sa Kirtland ug Missouri, ug siya nagserbisyo sa Simbahan sa daghang laing paagi. Tingali ang labing importante, si Ann ug Newel adunay 14 ka anak ug mipadako og 10 hangtod sa pagkahamtong.

Ang uban nagpundok aron motukod sa mga stake sa Zion. Ang mga Kimball, mga Young, mga Crosbys, mga Tippet, ug daghan pa naningkamot sa pagsentro sa ilang mga kinabuhi sa ebanghelyo ni Jesukristo. Ang matag usa nagdala og kalagsik ug piho nga mga talento. Ang unang mga pagpadayag migiya, mibadlong, ug mihatag og kaseguroan kanila ug midumala sa nagkadako nga Simbahan.

Pagtukod sa Balay sa Ginoo

Alang sa unang mga miyembro sa Simbahan, sa tanan ug sa indibidwal nga lebel, ang pagdawat sa gisaad nga pagtuga sa gahom mao ang sentro sa ilang temporal ug espirituwal nga paningkamot (tan-awa sa Doktrina ug mga Pakigsaad 38:32).

Balik-balik nga gisugo sa Ginoo ang pagtukod og mga templo sa Kirtland ug Missouri. Sa Kirtland, ang mga Santos milampos inubanan sa bayanihong paningkamot sa pagpabarog og talagsaong gambalay. Mao kadto ang ilang labing maayong paningkamot sa pagtukod og butang nga takos sa Ginoo nga si Jesukristo. Ang templo nagbarog gihapon karon. Ang tindahan ni Newel, uban sa iyang duol nga paktori sa kahoy, maoy importante nga mga bahin sa ekonomiya sa Kirtland nga misuporta sa proyekto sa templo.

Niatong 1836, ang Manluluwas mipakita diha sa templo ug midawat sa ilang mga paningkamot. Misaad Siya nga ang Iyang katawhan “malipay sa hilabihan sa sangpotanan sa mga panalangin nga ibu-bo, ug ang pagtuga diin ang akong mga sulugoon gitugahan dinhi niini nga balay” (Doktrina ug mga Pakigsaad 110:9). Dayon si Moises, Elias, ug Elijah miabot ug mitugyan sa mga yawe nga importante sa kataposan nga dispensasyon (tan-awa sa Doktrina ug mga Pakigsaad 110:11–16).

Walay petsa nga paghulagway ni Newel K. Whitney sa batan-on pa

Pagpanggukod ug Kalibotanon nga mga Problema

Sa umaabot nga mga adlaw ang mga Santos pagasulayan, lakip ang mga Whitney. Sa ekonomikanhong kalisod sa tibuok nasod ug sa kahadlok nga manira ang bangko, daghan ang mibatok sa Simbahan ug sa Propeta. Gisugo nga mobalhin ngadto sa Missouri, nagduhaduha si Newel. Naningkamot siya pag-ayo sa pagtukod sa iyang tindahan. Daghan sa kwarta nga kinitaan niini gitabang sa Simbahan. Giunsa niya ang pagdumili niini?

Ang Ginoo mipanton kaniya tungod sa paghatag og dakong pagtagad sa kalibotanon nga mga butang ug tungod sa “pagkadaotan sa ilang espiritu” (Doktrina ug mga Pakigsaad 117:11). Mihinulsol si Newel ug misunod. Mipuyo siya sa Nauvoo, Illinois, diin siya nagpadayon sa pagserbisyo isip bishop ug unya isip tigdumalang Bishop.

Mga Ordinansa sa Templo

Sa Nauvoo, ang templo mao sa makausa ang sentro sa temporal ug espirituwal nga kalihokan. Sa dihang ang mga bungbong sa templo nagsugod na sa pagbarog, ang Ginoo miorganisar sa Relief Society pinaagi sa Iyang propeta. Si Emma Smith mao ang unang presidente, ug si Sarah Cleveland ug Ann Whitney mao ang iyang mga magtatambag. Gitugyan ni Emma ang importanteng mga katungdanan ngadto ni Ann ug mihangyo kaniya sa paggiya sa organisasyon kon wala siya.

Ang Ginoo nagpadayon sa pagpadayag sa mga ordinansa sa templo ngadto sa Propeta. Niadtong 1842, nga wala pa gihapon mahuman ang Templo sa Nauvoo, si Joseph Smith mipundok sa mga lider sa Simbahan, lakip ni Newel, sa ibabaw nga andana sa iyang Red Brick Store ug nangalagad sa ordinansa sa pagtuga. Sa dihang ang kabahin sa templo—ang lawak ubos sa atop—gipahinungod, sila si Ann ug Newel nangalagad sa pagtuga ngadto sa ubang mga Santos sa wala pa sila mobiya padulong sa Walog sa Salt Lake.

Subay sa dalan sa pakigsaad, si Ann ug Newel nagtinguha sa Manluluwas, naghinulsol, nagserbisyo sa kinasingkasing, nagpahinungod, nagsakripisyo, ug nagmaya. Nakaila sila ni Jesukristo ug nakita ang ilang mga kaugalingon isip mga anak sa pakigsaad. Minilyon human nila ang misunod sa samang sundanan sa paghimo ug pagsunod sa sagrado nga mga pakigsaad ug pagtukod sa gingharian sa Ginoo. Ang paningkamot nga makahibalo sa ilang mga istorya magtabang nato atol sa atong mga panahon sa kasayon ug mga pagsulay.

Si Ann Whitney sa ulahing bahin sa kinabuhi — Walay petsa nga litrato ni Ann Whitney sa ulahing bahin sa kinabuhi

Sa hinapos sa iyang kinabuhi, misulat si Ann: “Sa pagbati nga ikaw nakaangkon og gamay nga pagsabot sa mga katuyoan sa Dios sa imong pagkalalang … makaamgo ka ba nga kining mga butanga bililhon nga pagapuy-an, bililhon nga pagaantoson? Aduna bay sakripisyo nga dako kaayo … kon mosunod kita sa mga tunob sa atong Ginoo?”

Mga Kapanguhaan alang sa Inyong Pagtuon sa Doktrina ug mga Pakigsaad

Pag-angkon og makapadasig nga mga panabot bahin sa mga tawo, mga dapit, ug mga panghitabo sa ulahing adlaw nga Pagpahiuli sa Manluluwas niini nga mga kapanguhaan:

Ang Makasaysayanong mga Kapanguhaan sa Doktrina ug mga Pakigsaad nagkolekta sa labing maayong gimantala sa Simbahan nga mga kapanguhaan alang sa matag seksiyon sa Doktrina ug mga Pakigsaad ug mipahaom niini ngadto sa sinemana nga pagtuon sa Dali, Sunod Kanako.

Ang Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, nagsaysay sa unang mga adlaw sa Pagpahiuli sa usa ka paspas, eksakto, ug madanihong paagi. Mabasa ninyo ang Mga Santos sa giimprinta o sa digital nga pormat o maminaw niini sa audiobook.

Kinatibuk-ang Saysay sa mga Pagpadayag naghulagway sa sitwasyon sa matag seksiyon sa Doktrina ug mga Pakigsaad gikan sa panglantaw niadtong konektado kaayo ngadto sa mga pagpadayag.

Ang Mga Hisgotanan sa Kasaysayan sa Simbahan naghatag og mas lawom ug pagpanglantaw sa sobra sa 200 ka hilisgotan gikan sa Adam-ondi-Ahman ngadto sa Kampo sa Zion.

Ang Global Histories nagsaysay sa mga kasinatian sa daghang tawo sa tibuok kalibotan kinsa nagsubay sa dalan sa pakigsaad ug mitukod sa Simbahan.

Ang matag usa niini nga mga kapanguhaan anaa sa seksiyon sa “Kasaysayan sa Simbahan” Librarya sa Ebanghelyo nga app o sa online sa ChurchofJesusChrist.org/study/church-history.