“Pagpangutana, Pagpangita og mga Tubag; Ang Sundanan nga Gibuhat ni Joseph Smith,” Liahona, Ene. 2025.
Dali, Sunod Kanako
Joseph Smith—Kasaysayan 1:1–26
Pagpangutana, Pagpangita og mga Tubag: Ang Sundanan nga Gibuhat ni Joseph Smith
A Pillar of Light [Gilis sa Kahayag], ni Dan Burr, dili mahimong kopyahon
Niadtong 1820, si Joseph Smith, ang gi-orden nang daan nga 14-anyos nga batang mag-uuma sa amihanang bahin sa New York, nakadawat sa milagrosong Unang Panan-awon nga magtimaan sa bag-ong sinugdanan sa tibuok kalibotan. Ania ang tulo ka pangutana ug mga tubag mahitungod sa pagpalig-on sa atong mga pagpamatuod mahitungod sa Unang Panan-awon.
Unsa ang atong makat-onan gikan sa sundanan ni Joseph Smith sa pagpangutana?
Si Joseph nagtinguha og kapasayloan sa iyang mga sala ug mga tubag sa iyang mga pangutana. Gusto siyang masayod hain nga simbahan ang iyang apilan. Mitambong siya sa lainlaing mga simbahan ug midangop sa Biblia aron makaangkon og tubag. Ang Santiago 1:5 nakadasig niya sa pagpangutana sa Dios, ang tinubdan sa tanang kamatuoran. (Tan-awa sa Joseph Smith—Kasaysayan 1:10–13.)
Samtang nangandam si Joseph sa pag-ampo, nakakita siya og dapit nga hilom ug malinawon. Bisan pa man sa pagbatok nga iyang giatubang sa pagsugod sa iyang pag-ampo, gigamit ni Joseph ang ”tanan [niya] nga gahom sa pagtawag sa Dios aron pagluwas [kaniya]” (Joseph Smith—Kasaysayan 1:16) ug nakadawat siya og tubag sa iyang pangutana (tan-awa sa mga bersikulo 18–19).
Pinaagi sa kasinatian ni Joseph, daghan kita og makat-onan mahitungod sa pagtuo, pag-ampo, ug pagdawat og mga tubag. Mahinungdanon ang paghinumdom nga samtang nakadawat og mga tubag si Joseph sa iyang unang mga pangutana pinaagi sa iyang panan-awon sa Amahan ug sa Anak, sa tibuok niyang kinabuhi nagpadayon siya sa pagpangita og mga tubag gikan sa Dios pinaagi sa pag-ampo. Kini nga mga tubag miabot latas sa daghang katuigan sa pagpadayon niya sa pagtinguha, pagsunod, ug pagbaton og hugot nga pagtuo nga ang Dios motubag kaniya.
Si Presidente Russell M. Nelson mitudlo, “Si Propeta Joseph Smith mipahiluna og sumbanan nga atong sundon sa pagtubag sa atong mga pangutana”:
Ang Unang Panan-awon ba mahinungdanon sa akong pagpamatuod?
Ang Unang Panan-awon nagtimaan sa pagsugod sa Pagpahiuli sa ebanghelyo ni Jesukristo nga nagpadayon hangtod karon. Nianang adlaw sa tingpamulak sa tuig 1820, ang Dios nakigsulti kang Joseph, mitubag sa Iyang pag-ampo, ug mihatag og giya nga misangpot ngadto sa pag-establisar sa Simbahan ni Jesukristo sa kalibotan sa makausa pa.
Kon motuo kita nga ang Ginoo nakigsulti kang Joseph, nan makatuo kita nga makigsulti Siya kanato. Kon nagasalig kita nga Iyang gi-establisar pag-usab ang Iyang Simbahan pinaagi ni Propeta Joseph, makasalig kita nga magpadayon Siya sa paggiya kanato pinaagi sa atong propeta karon, si Presidente Russell M. Nelson.
Sama ni Joseph Smith, ang buhing mga propeta makadawat og pagpadayag sa paggiya sa Simbahan. Si Presidente Russell M. Nelson miingon: “Kon ang langitnong kasinatian ni Joseph Smith sa Sagrado nga Kakahoyan makatudlo kanato og bisan unsa, kana mao nga ang mga langit abli ug nga ang Dios makigsulti sa Iyang mga anak.”
Inubanan sa pagpamatuod sa Unang Panan-awon, ang atong pagtuo sa Ginoo, sa Iyang Simbahan, ug sa padayon nga pagpadayag nga Iyang ihatag ngadto sa atong mga propeta ug apostoles malig-on.
Unsaon nato sa pag-angkon og pagpamatuod sa Unang Panan-awon?
Samtang ang panaw sa matag tawo ngadto sa pagkakabig managlahi, sa kataposan ang tanan nagkinahanglan sa kompirmasyon sa Espiritu Santo aron makaangkon og pagpamatuod sa Unang Panan-awon ug sa ubang mga kamatuoran sa ebanghelyo.
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, nagtudlo, “Ilha sa matinuorong paagi ang inyong mga pangutana ug mga kabalaka, apan unaha sa paglig-on ug gamita sa hangtod ang inyong pagtuo, tungod kay ang tanang butang posible alang niadtong nagatuo.”
Ang pag-ampo mao ang yawe nga moabli sa pultahan sa personal nga pagpadayag mahitungod sa Unang Panan-awon—ug sa matag pangutana. Mangutana sa Dios. Pangutana Kaniya kon si Joseph tinuod ba nga nakakita sa Amahan ug sa Anak. Tinguhaa ang Espiritu, salig sa Ginoo, ug padayon sa pagpaningkamot. Makahimo ka sa pagsulti sama sa gibuhat ni Joseph “Ako nasayod niini, ug ako nasayod nga ang Dios nasayod niini, ug ako dili makalimod niini” (Joseph Smith—Kasaysayan 1:25).