Digital Lamang
3 ka Leksiyon gikan sa Akong Misyon mahitungod sa Pagtakda og mga Tumong
Ang pagtutok sa paningkamot, kamauyonon, ug hingpit nga kalipay diha sa panaw—dili bahin sa numero—magdala og tinuod nga kalipay ug kalamposan alang nimo ug niadtong imong giserbisyohan.
Nagtubo ko nga dili maayo diha sa pagtakda og mga tumong. Wala gyod ko makasabot sa katuyoan. Apan nakakat-on ko sa pagtakda og tinuod ug matinud-anon nga mga tumong samtang nagserbisyo og misyon sa Dallas, Texas, USA. Sukad sa pagpauli niadtong 2018, akong gigamit ang tulo ka mahinungdanong mga leksiyon mahitungod sa pagtakda og tumong.
Leksiyon 1: Motutok sa Paningkamot ug Pagserbisyo
Isip usa ka misyonaryo, nagtakda ko og inadlaw ug sinemana nga mga tumong kauban sa akong kompanyon nga nagtutok sa among misyonaryo nga mga katuyoan. Kini nga mga tumong nagsugod isip mga numero, apan samtang mitubo ko ug mas nakasabot kon nganong naghimo kami niini nga mga tumong, ang mga numero napulihan og mga ngalan nga giampo namo sa tinagsa-tagsa.
Ang Ginoo naghatag og bili sa atong mga paningkamot ug gusto nga kita moserbisyo sa uban. Motutok sa pagpaningkamot ug pagserbisyo sa uban diha sa proseso, ug itugyan ang mga resulta ngadto sa Ginoo. Sama sa gitambag ni Hari Limhi sa iyang katawhan, “Ihangad ang inyong mga ulo, ug pagmaya, ug ibutang sa Dios ang inyong pagsalig” (Mosiah 7:19). Imbes magtakda og tumong nga mobasa og 50 ka bersikulo sa usa ka semana, tingali mas epektibo ang pagtakda og tumong nga makugihong magtuon sa mga kasulatan matag adlaw, nga nagtinguha sa pagpakigbahin sa mga ideya ngadto sa uban.
Leksiyon 2: Mohangop og Pagkamauyonon ug mga Pag-aghat sa Espiritu
Daghang higayon sa akong misyon, nagtakda kami og mga tumong nga nagdepende dili lamang sa among mga paningkamot apan usab sa unsay andam nga buhaton sa uban. Kapitulo 8 sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo nagtudlo mahitungod sa pagtakda niini nga mga matang sa mga tumong: “Kon makab-ot ba ninyo kana nga tumong nagdepende sa kabubut-on sa ubang mga tawo. Apan buhata kon unsay anaa sa inyong kontrol aron sa pagtuman niini.”
Akong nakat-onan nga magmauyonon ug mosunod sa Espiritu inubanan sa mga tumong ug sa matag adlaw nga mga kasinatian. Adunay daghang panahon nga nagdahom kami nga makab-ot ang piho nga mga tumong—apan napakyas. Sa matag higayon, ang Espiritu mitabang sa paggiya namo ngadto sa bag-ong mga oportunidad sa pagtuman sa among misyonaryo nga katuyoan ug sa pagtabang sa uban. Ang wala damha nga mga sitwasyon motumaw, ug ang Espiritu makagiya ninyo sa pag-usab sa inyong pamaagi sa hapit bisan unsa nga sitwasyon.
Leksiyon 3: Mangita og Kalipay diha sa Panaw, Dili Lang sa Destinasyon
Sa sinugdanan sa akong misyon, akong nahibaloan nga ang mga misyon mahitungod sa pagtubo ug pagserbisyo, dili mahitungod sa gidaghanon sa mga bunyag. Apan nasabtan ra nako kini human nga ako nakakat-on nga magmalipayon sa higayon nga magtrabaho sa usa ka tumong, imbes sa higayon lang nga makab-ot nako kana nga tumong. Ang mga tumong dili lamang magdala og katagbawan diha sa kataposan; ang panaw sa pagkab-ot sa mga tumong kinahanglang magdala usab og kalipay ug katuyoan.
Usa ka ehemplo niini nga matang sa tumong mao ang pagtinguha sa pagpalambo og Kristohanon nga kinaiya pinaagi sa inadlaw nga mga buhat sa pagserbisyo. Imong makita ang katumanan diha sa epekto niini ngadto sa uban, dili lang sa pagtsek sa kahon sa imong “mga oras sa pagserbisyo”. Nakat-onan nako kini samtang nagserbisyo sa mga tawo sa Texas sa akong misyon.
Ang Ginoo nagtinguha nga kita “matinguhaon nga moapil diha sa usa ka maayo nga katuyoan, ug mobuhat og daghan nga mga butang sa [atong] kaugalingon nga gawasnon nga kabubut-on, ug magpahinabo sa daghan nga pagkamatarong” (Doktrina ug mga Pakigsaad 58:27; tan-awa usab sa mga bersikulo 26–29). Kini nga mga leksiyon nakatabang nako nga masabtan kon unsaon nga “matinguhaon nga moapil diha sa usa ka maayong katuyoan” pinaagi sa pagtakda ug pagkab-ot sa mga tumong.